ശാസ്‌താംകോട്ട:അന്താരാഷ്ട്ര റെഡ് ക്രോസ് ദിനാചരണത്തോടനുബന്ധിച്ച് ഇന്ത്യൻ റെഡ് ക്രോസ് സൊസൈറ്റിയും ജൂനിയർ റെഡ് റോസ്(ജെആർസി കൊല്ലം) ജില്ലാ ഘടകവും സംയുക്തമായി സംഘടിപ്പിച്ച ചടങ്ങിൽ ജില്ലയിലെ മികച്ച ജൂനിയർ റെഡ് റോസ് യൂണിറ്റിനുള്ള അവാർഡ് മൈനാഗപ്പള്ളി ശ്രീചിത്തിര വിലാസം യു.പി സ്കൂളിന് ലഭിച്ചു.മനുഷ്യസ്നേഹവും സാമൂഹ്യ പ്രതിബദ്ധതയും വിദ്യാർത്ഥികളിൽ വളർത്തുന്ന മാതൃകാപരമായ പ്രവർത്തനങ്ങൾക്കുള്ള അംഗീകാരമായാണ് ഈ നേട്ടം.സ്കൂളിനു വേണ്ടി ജെആർസി കോഡിനേറ്റർ എം.ആർ സുനീഷ് അവാർഡ് ഏറ്റുവാങ്ങി.കൊല്ലം റെഡ് ക്രോസ് ഓഫീസിൽ നടന്ന ചടങ്ങ് ജില്ലാ ചെയർമാൻ ഡോ.മാത്യു ജോൺ ഉദ്ഘാടനം ചെയ്തു.

ആർ.ശിവൻപിള്ള (ജെആർസി സംസ്ഥാന കോഡിനേറ്റർ) അധ്യക്ഷത വഹിച്ചു.റെഡ് ക്രോസ് സംസ്ഥാന സെക്രട്ടറി എസ്.അജയകുമാർ അവാർഡ് വിതരണം നിർവഹിച്ചു.ജില്ലാ വൈസ് ചെയർമാൻ പ്രൊഫ.മോഹൻദാസ് സർട്ടിഫിക്കറ്റുകൾ വിതരണം ചെയ്തു.മുഹമ്മദ് യാസീൻ (ജെആർസി ജില്ലാ കോഡിനേറ്റർ)മുഖ്യ സന്ദേശം നൽകി.”സ്നേഹ സ്പർശം” ഉൾപ്പെടെയുള്ള ജീവകാരുണ്യ പ്രവർത്തനങ്ങളിലൂടെ സമൂഹത്തോടൊപ്പം ചേർന്ന് പ്രവർത്തിക്കുകയുംവിദ്യാർത്ഥികളിൽ കാരുണ്യവും സേവനമനുഭവവും വളർത്തുകയും ചെയ്ത പ്രവർത്തനങ്ങളാണ് ശ്രീചിത്തിരവിലാസം യു.പി സ്കൂളിനെ ഈ അംഗീകാരത്തിന് അർഹമാക്കിയത്.

ഭരണിക്കാവ്:ഭരണിക്കാവ് ബസ് സ്റ്റാൻഡിലെ വെള്ളക്കെട്ട് യാത്രക്കാക്ക് ദുരിതമാകുന്നു.ചതുപ്പ് പ്രദേശമായ ഇവിടെ ശാസ്‌ത്രീയമായ രീതിയിൽ റോഡ് നിർമ്മാണം നടത്താത്തതാണ് വിനയായിരിക്കുന്നത്.കാലവർഷം ശക്തമായതോടെ സ്‌റ്റാൻഡിൽ പല ഭാഗത്തും മുട്ടൊപ്പം വെള്ളമാണ്.സ്റ്റാൻഡിലക്ക് ബസുകൾ പ്രവേശിക്കുന്ന റോഡുകൾ തകർന്ന് മഴയിൽ തടാകമായി മാറിയിരിക്കയാണ്.

സ്റ്റാൻഡിലെ ഓട നിറഞ്ഞ് കവിഞ്ഞ് മാലിന്യവാഹിയായി മാറിയിട്ടും ക്ലോറിനേഷൻ നടത്താൻ പോലും പഞ്ചായത്തും ആരോഗ്യ വകുപ്പും തയ്യാറായിട്ടില്ലെന്ന് പരാതിയുണ്ട്.മഴയത്തും വെയിലത്തും യാത്രക്കാർക്ക് കയറി നിൽക്കാൻ മതിയായ കാത്തിരിപ്പ് കേന്ദ്രങ്ങൾ ഇല്ലാത്തതും പ്രധാന പ്രശ്നമാണ്.

അതിനിടെ സ്റ്റാൻഡിൽ യാത്രക്കാർ ബസ് കയറാൻ നിൽക്കുന്ന ഭാഗത്തുള്ള ഹൈമാസ്റ്റ് ലൈറ്റും ഭീഷണിയായി മാറിയിരിക്കയാണ്.ലൈറ്റിനു സമീപം വെള്ളക്കെട്ടായതും സ്വിച്ച് ബോർഡ് അടക്കം ചെറിയ കുട്ടികൾക്കു പോലും കയ്യെത്താവുന്ന ഉയരത്തിലായതിനാലും അപകട ഭീഷണി നിലനിൽക്കുന്നു.യാത്രക്കാർക്ക് ഷോക്കേൽക്കാനുള്ള സാധ്യത തള്ളിക്കളയാനാവില്ലെന്നും അടിയന്തിരമായി അധികൃതർ ഇടപെടണമെന്നും സ്വകാര്യ ബസ് ജീവനക്കാർ ആവശ്യപ്പെട്ടു.

കുന്നത്തൂർ:കുന്നത്തൂരിൽ സ്‌കൂൾ വളപ്പിലെ മുത്തശ്ശി മാവ് അപകട ഭീഷണിയായിട്ടും മുറിച്ചു മാറ്റാൻ നടപടിയില്ലെന്ന് പരാതി.കൊട്ടാരക്കര – ഭരണിക്കാവ് റൂട്ടിൽ സ്ഥിതി ചെയ്യുന്ന കുന്നത്തൂർ കിഴക്ക് കരിമ്പിൻപുഴ ഗവ.എൽ.പി സ്കൂളിനു മുൻപിൽ സ്ഥിതി ചെയ്യുന്ന കൂറ്റൻ മരമാണ് അപകട ഭീഷണിയായിരിക്കുന്നത്.തിരക്കേറിയ പാതയിൽ കൊടുംവളവിനോട് ചേർന്ന് ഉയർന്ന ഭാഗത്താണ് സ്‌കൂൾ സ്ഥിതി ചെയ്യുന്നത്.പാതയോരത്തെ മതിലിന് സമീപമുള്ള മാവ് റോഡിലേക്ക് മറിയുന്ന അവസ്ഥയിലുമാണ്.ഇതിനോട് ചേർന്നാണ് 11 കെ.വി ലൈൻ അടക്കം കടന്നു പോകുന്നത്.കാലവർഷം ശക്തമായതോടെ മരം കടപുഴകാനുള്ള സാധ്യത തള്ളിക്കളയാനാവില്ല.ഇങ്ങനെ സംഭവിച്ചാൽ വലിയ ദുരന്തമാകും സംഭവിക്കുക.

പ്രീ-പ്രൈമറി മുതൽ നാലാം ക്ലാസ് വരെ നിരവധി കുട്ടികളാണ് ഈ സ്‌കൂളിൽ പഠിക്കാനെത്തുന്നത്.കഴിഞ്ഞ അധ്യയന വർഷം തേവലക്കര ബോയ്‌സ് സ്‌കൂളിലെ എട്ടാം ക്ലാസ് വിദ്യാർത്ഥി മിഥുൻ ഷോക്കേറ്റ് മരിച്ചതിനെ തുടർന്ന് സ്കൂൾ പരിസരങ്ങളിലെ മരങ്ങൾ പൂർണമായും മുറിച്ചു മാറ്റണമെന്ന് വിദ്യാഭ്യാസ വകുപ്പ് ഉത്തരവിട്ടിരുന്നു.പഴക്കമേറിയ കൂറ്റൻ മരമായതിനാൽ ഇവിടുത്തെ മാവ് മുറിച്ചു മാറ്റാൻ വനം വകുപ്പിൻ്റെ അനുമതി ലഭിക്കേണ്ടതുണ്ട്.ഇതിനായി സ്‌കൂൾ അധികൃതർ പഞ്ചായത്തിൽ പരാതി നൽകിയിട്ടും വനം വകുപ്പിൻ്റെ അനുമതി ലഭ്യമായിട്ടില്ല.വനം വകുപ്പ് ഉദ്യോഗസ്ഥർ സ്ഥലം സന്ദർശിച്ചിരുന്നെങ്കിലും മറ്റ് നടപടികളിലേക്ക് കടന്നിട്ടില്ല.അടിയന്തിരമായി പ്രശ്‌നത്തിൽ ഇടപെടണമെന്ന് ആവശ്യപ്പെട്ട് ഉല്ലാസ് കോവൂർ എംഎൽഎയ്ക്ക് പരാതി നൽകുമെന്ന് പിടിഎ പ്രസിഡൻ്റ് ഹരികുമാർ കുന്നത്തൂർ അറിയിച്ചു.