ശാസ്താംകോട്ട:ശാസ്താംകോട്ട റെയിൽവേ സ്‌റ്റേഷനിലെ പാർക്കിംഗ് ഫീസ് സംബന്ധിച്ച് വ്യാപക പരാതി.ടിക്കറ്റ് എടുക്കുന്നതിനും യാത്രക്കാരെ കൂട്ടി കൊണ്ടു പോകുന്നതിനും സ്‌റ്റേഷനിൽ എത്തുന്ന വാഹന യാത്രക്കാർ ഏറെ നേരം ഇവിടെ വാഹനങ്ങൾ പാർക്ക് ചെയ്തില്ലങ്കിലും ഫീസ് കൊടുക്കേണ്ട അവസ്ഥയിലാണ്. കൊല്ലുന്ന ഫീസാണ് ഈടാക്കുന്നത്. 50 രൂപയാണ് ഇരുചക്രവാഹനത്തിന്‍റെ നിരക്ക്. ഇത് പലപ്പോഴും വാക്കു തർക്കങ്ങൾക്കും കാരണമാകുന്നുണ്ട്.പാർക്കിംഗ് ഫീസ് നൽകിയ ദീർഘ യാത്രകൾ നടത്തി മടങ്ങിവരുന്നവരുടെ ഇരുചക്ര വാഹനങ്ങൾ സംരക്ഷിക്കാനും നടപടിയില്ലെന്ന് പരാതിയുണ്ട്.

റെയിൽവേ സ്റ്റേഷനിൽ പാർക്ക് ചെയ്യുന്ന ഇരു ചക്രവാഹനങ്ങളിൽ നിന്നും ഹെൽമറ്റ്,പെട്രോൾ എന്നിവ നഷ്ടപ്പെടുന്നത് പതിവായി കൊണ്ടിരിക്കുകയാണന്ന് യാത്രക്കാർ പറയുന്നു.അപൂർവ്വ അവസരങ്ങളിൽ ഇരുചക്രവാഹനങ്ങളും മോഷണം പോയിട്ടുണ്ട്.സ്റ്റേഷനു മുന്നിൽ പാർക്ക് ചെയ്യുന്ന ഇരുചക്ര വാഹനങ്ങളുടെ ഉടമസ്ഥരുടെ അനുവാദമില്ലാതെ വാഹനം മാറ്റി പാർക്ക് ചെയ്യുന്നതായും ഇത് മൂലം വാഹനത്തിന് കേടുപാടുകൾ ഉണ്ടാകുന്നതായും പരാതിയുണ്ട്.റെയിൽവേ സ്‌റ്റേഷൻ പരിസരത്ത് സിസിറ്റിവി ക്യാമറ ഇല്ലാത്തതാണ് ഇത്തരം പ്രശനങ്ങൾക്ക് കാരണം. സാദാരണക്കാര്‍ക്ക് താങ്ങാവുന്ന നിരക്കല്ല ദിവസം 50 രൂപ,പതിവായി വണ്ടി സൂക്ഷിക്കുന്നവര്‍ക്ക് പുറത്ത് ഒരുമാസം 200 രൂപയാണ് വാങ്ങുന്നത്. വെയിലും പെട്രോള്‍ പോലും സുരക്ഷയില്ലാതെ വണ്ടിവയ്ക്കാന്‍ 50 രൂപവാങ്ങുന്നു എന്നതാണ് പരാതി.

അടിയന്തിരമായി റെയിൽവേ സ്‌റ്റേഷൻ പരിസരത്ത് നിരീക്ഷണ ക്യാമറ സ്ഥാപിക്കണമെന്നും പാർക്കിംഗ് ഏരിയായോട് ചേർന്നുള്ള ഭാഗത്തെ കുറ്റിക്കാടുകളും മുളം കാടുകളും വെട്ടിമാറ്റണമെന്നും ആവശ്യപ്പെട്ട് ട്രെയിൻ സിറ്റി ശാസ്താംകോട്ട
തിരുവനന്തപുരം ഡിവിഷണൽ മാനേജർ,റെയിൽവേ ചീഫ് കൊമേഴ്സ്യൽ ഓഫീസർ,സ്റ്റേഷൻ മാസ്റ്റർ എന്നിവർക്ക് പരാതി നൽകി.

പോരുവഴി:2020-21 വാർഷിക പദ്ധതിയിൽ ഉൾപ്പെടുത്തി അനുവദിച്ച 87 ലക്ഷം രൂപ ചെലവിൽ കമ്പലടി ഗവ. എൽ.പി സ്‌കൂളിൽ നിർമ്മിച്ച പുതിയ കെട്ടിടത്തിന്റെ ഉദ്ഘാടനം ടൂറിസം സാംസ്കാരിക വകുപ്പ് മന്ത്രി പി.സി. വിഷ്ണു നാഥ് നിർവഹിച്ചു.ഉല്ലാസ് കോവൂർ എംഎൽഎ അധ്യക്ഷത വഹിച്ചു.

ഗ്രാമപഞ്ചായത്ത് പ്രസിഡൻ്റ് വിനു ഐ നായർ,ജില്ലാ പഞ്ചായത്ത് അംഗം എ.റമീസ്,ബ്ളോക്ക് പഞ്ചായത്ത് അംഗങ്ങളായ അസൂറ അർത്തിയിൽ,നിഖിൽ മനോഹർ, ഗ്രാമപഞ്ചായത്ത് സ്ഥിരം സമിതി അധ്യക്ഷൻമാരായ വി.ബേബികുമാർ,പ്രശാന്തി, ഗ്രാമപഞ്ചായത്ത് വൈസ് പ്രസിഡന്റ് കെ.മോഹനൻ,ഹെഡ്മിസ്ട്രസ്സ് ഷീബ.വി എന്നിവർ പ്രസംഗിച്ചു.

ശാസ്താംകോട്ട:ശുദ്ധജല തടാകമായ ശാസ്താംകോട്ട തടാകത്തിന്റെ തീരപ്രദേശങ്ങളിൽ വലിയ കറുത്ത അട്ടകളുടെ ശല്യം രൂക്ഷമാകുന്നു.കഴിഞ്ഞ കുറെ വർഷങ്ങളായി മഴക്കാലത്ത് പറമ്പുകളിൽ മാത്രം കണ്ടുവന്നിരുന്ന ഈ അട്ടകൾ, ഇപ്പോൾ ജനവാസമേഖലകളിലേക്ക് വ്യാപകമായി പടരുകയാണ്.നിലവിൽ വീടുകളുടെ അകത്തും കുടിവെള്ള സ്രോതസ്സുകളായ കിണറുകളിലും വരെ ഇവ കൂട്ടത്തോടെ പ്രത്യക്ഷപ്പെടുന്നത് നാട്ടുകാരെ വലിയ തോതിൽ ആശങ്കയിലാഴ്ത്തിയിട്ടുണ്ട്.

കിണറുകളിൽ അട്ടകൾ ഇറങ്ങുന്നത് ശുദ്ധജലത്തെയും ജനങ്ങളുടെ ആരോഗ്യത്തെയും നേരിട്ട് ബാധിക്കുന്ന ഗുരുതരമായ പ്രശ്നമായി മാറിയിരിക്കുകയാണ്.തടാക പരിസരത്തെ ആവാസവ്യവസ്ഥയിലുണ്ടായ മാറ്റങ്ങളാണോ ഈ പ്രതിഭാസത്തിന് പിന്നിലെന്ന് സംശയിക്കുന്നു.ജനങ്ങളുടെ സുരക്ഷയ്ക്ക് ഭീഷണിയായ അട്ടശല്യം തുരത്തുന്നതിനായി അധികാരികളുടെ ഭാഗത്തുനിന്ന് അടിയന്തരവും ശാസ്ത്രീയവുമായ നടപടികൾ ഉണ്ടാകേണ്ടതാണ്.ആരോഗ്യ വകുപ്പും തദ്ദേശ സ്വയംഭരണ സ്ഥാപനങ്ങളും ചേർന്ന് അടിയന്തരമായി ഇടപെട്ട്,  ആശങ്ക പരിഹരിക്കാൻ ശുദ്ധീകരണ-പ്രതിരോധ പ്രവർത്തനങ്ങൾ ആരംഭിക്കണമെന്നതാണ് ജനങ്ങളുടെ ആവശ്യം.