തിരുവനന്തപുരം:
സംസ്ഥാനത്തെ സ്വകാര്യ ബസ് ഉടമകളുടെ നിരാഹാര സമരം അവസാനിപ്പിക്കാൻ ധാരണയായി. ഗതാഗത മന്ത്രി സി.പി. ജോണുമായി നടത്തിയ ചർച്ചയിലാണ് സമരം അവസാനിപ്പിക്കാൻ തീരുമാനമായത്. പ്രതിസന്ധിയിലായ സ്വകാര്യ ബസുകൾ കെ.എസ്.ആർ.ടി.സി വാടകയ്ക്ക് എടുക്കുമെന്ന് ഗതാഗത മന്ത്രി അറിയിച്ചു.
കെ.എസ്.ആർ.ടി.സി ബസുകളിൽ സ്ത്രീകൾക്ക് സൗജന്യ യാത്ര അനുവദിക്കുന്ന യു.ഡി.എഫ് സർക്കാരിന്റെ ‘പ്രിയദർശിനി’ പദ്ധതി കാരണം തങ്ങളുടെ വരുമാനം ഇടിഞ്ഞെന്നും വ്യവസായം തകർച്ചയിലായെന്നും ചൂണ്ടിക്കാട്ടിയാണ് ഒക്ടോബർ 27 മുതൽ സെക്രട്ടേറിയറ്റിന് മുന്നിൽ ബസ് ഉടമകൾ നിരാഹാര സമരം ആരംഭിച്ചത്.
വിദ്യാർത്ഥികളുടെ കൺസെഷൻ നിരക്ക് വർദ്ധിപ്പിക്കുക, മിനിമം ചാർജ് 15 രൂപയാക്കുക, പത്മകുമാർ കമ്മീഷൻ റിപ്പോർട്ട് നടപ്പിലാക്കുക തുടങ്ങിയ ആവശ്യങ്ങളും ഉന്നയിച്ചിരുന്നു.
ആവശ്യങ്ങൾ അംഗീകരിച്ചില്ലെങ്കിൽ നവംബർ 3 മുതൽ അനിശ്ചിതകാല ബസ് പണിമുടക്ക് ആരംഭിക്കുമെന്ന് സംയുക്ത സമര സമിതി മുന്നറിയിപ്പ് നൽകിയിരുന്ന സാഹചര്യത്തി ലാണ് ചർച്ച നടന്നത്.
സർക്കാരിന്റെ പുതിയ ഉറപ്പിന്റെ അടിസ്ഥാനത്തിൽ നിരാഹാര സമരവും പ്രഖ്യാപിച്ചിരുന്ന അനിശ്ചിതകാല സർവീസ് പണിമുടക്കും ബസുടമകൾ ഔദ്യോഗികമായി പിൻവലിക്കും.
