തിരുവനന്തപുരം. കാട്ടാക്കടയിൽ രണ്ടരക്കിലോ കഞ്ചാവുമായി യുവാക്കൾ പിടിയിൽ. നെല്ലിമൂട് സ്വദേശികളായ അനന്തു, കിരൺ എന്നിവരാണ് പിടിയിലായത്. ഓപ്പറേഷൻ തൂഫാൻ്റെ ഭാഗമായി നടത്തിയ പരിശോധനയിലാണ് ഇരുവരും പിടിയിലായത്. പൂവാറിൽ നിന്നും കഞ്ചാവ് വിതരണം ചെയ്യാനായി കാട്ടാക്കട ചന്തമുക്ക് ഭാഗത്ത് എത്തിയപ്പോഴാണ് ഡാൻസാഫിൻ്റെ പിടിയിലാവുന്നത്.
പൂവാർ കേന്ദ്രീകരിച്ചുള്ള സംഘത്തിലെ പ്രധാന കണ്ണികളാണ് പ്രതികളെന്നാണ് പോലീസിൻ്റെ നിഗമനം.

കായംകുളം: കാറിന്റെ ഇന്‍ഡിക്കേറ്റര്‍ ഇട്ടില്ലെന്ന് ആരോപിച്ച് ബൈക്കിലെത്തി ആക്രമണം നടത്തിയ മൂന്നംഗ സംഘം അറസ്റ്റില്‍. നിരവധി കേസുകളില്‍ പ്രതികളായ ഓച്ചിറ മേമന കുറച്ചിരേത്ത് വീട്ടില്‍ ഇര്‍ഫാദ് (24), ഓച്ചിറ പായിക്കുഴി വേലശ്ശേരില്‍ പടീറ്റതില്‍ ഷെഫീക്ക് (26), മാരൂര്‍ കിഴക്കതില്‍ വീട്ടില്‍ അനീഷ് (25) എന്നിവര്‍ കായംകുളം പോലീസിന്റെ പിടിയിലായത്.
5ന് വൈകിട്ട് നാലു മണിയോടെ ഓച്ചിറക്ക് കിഴക്ക് സത്യാലയം ജങ്ഷനിലുള്ള സര്‍വീസ് സ്റ്റേഷനു മുന്നിലായിരുന്നു സംഭവം. ഇന്‍ഡിക്കേറ്റര്‍ ഇടാതെ കാര്‍ തിരിഞ്ഞുവെന്ന് ആരോപിച്ച് കാറിലുണ്ടായിരുന്ന സഹോദരങ്ങളെ ദേഹോപദ്രവം ഏല്‍പ്പിക്കുകയും കഴുത്തിന് കുത്തിപ്പിടിച്ച് ശ്വാസം മുട്ടിച്ച് കൊലപ്പെടുത്താന്‍ ശ്രമിക്കുകയും, എയര്‍ഗണ്‍ പോലെയുള്ള തോക്ക് ചൂണ്ടി ഭീഷണിപ്പെടുത്തുകയും ചുറ്റിക കൊണ്ട് കാര്‍ തല്ലിത്തകര്‍ക്കുകയും ചെയ്തെന്നാണ് കേസ്.
സംഭവശേഷം സ്ഥലത്തു നിന്ന് രക്ഷപ്പെട്ട പ്രതികളെ സിസിടിവി ദൃശ്യങ്ങളുടെ സഹായത്തോടെ കണ്ടെത്തിയാണ് അറസ്റ്റ് ചെയ്തത്. കായംകുളം ഡിവൈഎസ്പി ബിനുകുമാറിന്റെ മേല്‍നോട്ടത്തില്‍ സിഐ അരുണ്‍ ഷാ, എസ്ഐമാരായ ജസ്റ്റിന്‍ മണ്ഡപം, ജയസൂര്യ, എഎസ്ഐ ഹരി, പോലീസ് ഉദ്യോഗസ്ഥരായ അഖില്‍ മുരളി, അരുണ്‍, അനു, ബിനു, ഷിഹാബ്, പ്രവീണ്‍, ഗോപകുമാര്‍, ഹരീഷ്, മോനിഷ് എന്നിവരടങ്ങിയ സംഘമാണ് പ്രതികളെ പിടികൂടിയത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

കൊല്ലം: പ്രാദേശിക മേല്‍വിലാസങ്ങളില്‍ വ്യാജ ആധാര്‍ കാര്‍ഡുകള്‍ നിര്‍മിച്ച് സ്വകാര്യ ധനകാര്യ സ്ഥാപനങ്ങളില്‍ മുക്കുപണ്ടം പണയം വെച്ച് ലക്ഷങ്ങള്‍ തട്ടിയ മൂന്നംഗ സംഘം പിടിയിലായി.
തിരുവനന്തപുരം ബാലരാമപുരം സ്വദേശിനി രമ്യ (27), ഇവരുടെ സുഹൃത്തായ ചിറയിന്‍കീഴ് സ്വദേശി ‘ഗോള്‍ഡന്‍ സജിത്ത്’ എന്ന സജിത്ത് (30), കണ്ണനല്ലൂര്‍ സ്വദേശി ഷമീര്‍ (32) എന്നിവരെയാണ് ചിതറ പോലീസ് അറസ്റ്റ് ചെയ്തത്. വിവിധ ജില്ലകളിലായി നിരവധി തട്ടിപ്പ് കേസുകളില്‍ പ്രതികളായ ഇവര്‍ സംസ്ഥാനത്തെ തന്നെ ഏറ്റവും വലിയ മുക്കുപണ്ട തട്ടിപ്പ് സംഘത്തിലെ കണ്ണികളാണെന്ന് പോലീസ് പറഞ്ഞു. കേസിലെ മറ്റൊരു പ്രതിയായ അല്‍ത്താഫിനെ പോലീസ് നേരത്തെ അറസ്റ്റ് ചെയ്തിരുന്നു.
കഴിഞ്ഞ ജനുവരിയില്‍ സമാന കേസില്‍ ജാമ്യത്തിലിറങ്ങിയ രമ്യയുടെ നേതൃത്വത്തിലാണ് വീണ്ടും തട്ടിപ്പ് ആസൂത്രണം ചെയ്തത്. ചിതറ, കടയ്ക്കല്‍ മേഖലകളിലെ നാലോളം സ്വകാര്യ പണമിടപാട് സ്ഥാപനങ്ങളില്‍ നിന്നായി മുപ്പത് ലക്ഷത്തോളം രൂപയാണ് ഇവര്‍ തട്ടിയെടുത്തത്. തട്ടിപ്പ് നടത്താന്‍ ഉദ്ദേശിക്കുന്ന ധനകാര്യ സ്ഥാപനം സ്ഥിതി ചെയ്യുന്ന പ്രദേശത്തെ മേല്‍വിലാസം ഉപയോഗിച്ച് വ്യാജ ആധാര്‍ കാര്‍ഡ് നിര്‍മിക്കുകയാണ് ഇവരുടെ ആദ്യ പടി. തുടര്‍ന്ന് ഈ വിലാസത്തില്‍ സ്വര്‍ണം പണയം വെക്കാന്‍ എത്തും.
കഴിഞ്ഞദിവസം സജിത്ത് ചിതറയിലെ ഒരു സ്ഥാപനത്തില്‍ പണയം വെക്കാനെത്തിയപ്പോഴാണ് തട്ടിപ്പിന്റെ ചുരുളഴിയുന്നത്. ചിതറയില്‍ വീടുപണി നടക്കുന്നതിനാലാണ് സ്വര്‍ണം പണയപ്പെടുത്തുന്നതെന്ന് സജിത്ത് പറഞ്ഞപ്പോള്‍, കൊട്ടാരക്കരയിലാണ് വീടുപണിയെന്നാണ് ഒപ്പമുണ്ടായിരുന്ന രമ്യ പറഞ്ഞത്. ഇവരുടെ മൊഴികളിലെ പരസ്പരവിരുദ്ധത ശ്രദ്ധിച്ച സ്ഥാപന ഉടമയ്ക്ക് സംശയം തോന്നിയതിനെത്തുടര്‍ന്നാണ് തട്ടിപ്പ് പുറത്തറിയുന്നത്. തുടര്‍ന്ന് പോലീസ് എത്തി ഇവരെ അറസ്റ്റ് ചെയ്യുകയായിരുന്നു.