മലമുകളില്‍ നിന്ന് ചാടി ആത്മഹത്യ ചെയ്യുമെന്ന മകന്റെ ഭീഷണിയെ തുടര്‍ന്ന് രക്ഷിക്കാന്‍ ശ്രമിച്ച മാതാപിതാക്കളും മരിച്ചു. രക്ഷിക്കുന്നതിനിടെ നിയന്ത്രണം വിട്ട് മാതാപിതാക്കളും താഴേക്ക് വീഴുകയായിരുന്നു. മഹാരാഷ്ട്രയിലെ ഖാവ്ഡ മലമുകളിലാണ് സംഭവം.

ഇന്ന് രാവിലെ 10 മണിയോടെയാണ് സംഭവം. ദേവ്‌ലായ് സ്വദേശിയായ 18 കാരന്‍ മലമുകളിലെത്തി താഴേക്ക് ചാടുമെന്ന് ഭീഷണിപ്പെടുത്തുകയായിരുന്നു. മാതാപിതാക്കളും നാട്ടുകാരും പൊലീസും ചേര്‍ന്ന് ഏകദേശം മൂന്ന് മണിക്കൂറോളം, യുവാവിനെ അനുനയിപ്പിച്ച് സുരക്ഷിത സ്ഥാനത്തേക്ക് മാറ്റാന്‍ ശ്രമിച്ചു.

അവസാന 1520 മിനിറ്റിനിടെ പിതാവ് മലമുകളിലേക്ക് കയറി മകനോട് നേരിട്ട് സംസാരിക്കുകയും അപകടമേഖലയില്‍ നിന്ന് മാറ്റാന്‍ ശ്രമിക്കുകയും ചെയ്തു. ഉച്ചയ്ക്ക് ഒരു മണിയോടെ യുവാവിനെ പിടിച്ചുനിര്‍ത്തുന്നതിനിടെ ഇരുവരും നിയന്ത്രണം നഷ്ടപ്പെട്ട് കുന്നില്‍ നിന്ന് വീഴുകയായിരുന്നു.

മകന്‍ വീണതിനു പിന്നാലെ പരിഭ്രാന്തയായ അമ്മയും കുന്നില്‍ നിന്ന് വീഴുകയായിരുന്നു. മൂന്ന് പേരും മരിച്ചതായാണ് റിപ്പോര്‍ട്ട്. യുവാവിനെ പിന്തിരിപ്പിക്കാന്‍ മാതാപിതാക്കളും മറ്റുള്ളവരും ഏറെ നേരം ശ്രമിച്ചിരുന്നുവെന്ന് ദൃക്‌സാക്ഷികള്‍ പറഞ്ഞു.

ചെന്നൈ: പ്രശസ്ത ചലച്ചിത്ര നടി സൗകാര്‍ ജാനകി (94) അന്തരിച്ചു. ചെന്നൈയിലെ സ്വകാര്യ ആശുപത്രിയില്‍ വാര്‍ധക്യസഹജമായ അസുഖങ്ങളെ തുടര്‍ന്ന് ചികിത്സയിലിരിക്കെയായിരുന്നു അന്ത്യം.

1931ല്‍ ജനിച്ച സൗകാര്‍ ജാനകി 1950ല്‍ പുറത്തിറങ്ങിയ തെലുങ്ക് ചിത്രം ‘ഷാവുകാരു’വിലൂടെയാണ് ചലച്ചിത്രരംഗത്തേക്ക് എത്തിയത്. ഏഴ് പതിറ്റാണ്ടിലേറെ നീണ്ട അഭിനയജീവിതത്തില്‍ തമിഴ്, തെലുങ്ക്, മലയാളം, കന്നഡ ഭാഷകളിലായി നാനൂറിലധികം ചിത്രങ്ങളില്‍ വേഷമിട്ടു.

‘സ്‌കൂള്‍ മാസ്റ്റര്‍’, ‘സൂര്യമാനസം’, ‘പപ്പു’ തുടങ്ങിയവയാണ് ശ്രദ്ധേയമായ മലയാള ചിത്രങ്ങള്‍. ‘സൂര്യമാനസം’ സിനിമയില്‍ മമ്മൂട്ടിയുടെ അമ്മയായി നടത്തിയ പ്രകടനം മലയാളികള്‍ക്ക് ഏറെ പ്രിയപ്പെട്ടതാണ്.

ഇന്ത്യന്‍ ചലച്ചിത്രരംഗത്തിന് നല്‍കിയ സമഗ്ര സംഭാവനകള്‍ പരിഗണിച്ച് 2022ല്‍ രാജ്യം പത്മശ്രീ നല്‍കി ആദരിച്ചു. തെന്നിന്ത്യന്‍ സിനിമയിലെ മുന്‍നിര നടിമാരില്‍ ഒരാളായ സൗകാര്‍ ജാനകിയുടെ നിര്യാണത്തില്‍ ചലച്ചിത്ര, സാംസ്‌കാരിക രംഗത്തെ പ്രമുഖര്‍ അനുശോചനം രേഖപ്പെടുത്തി.