Home Blog Page 668

കൊല്ലത്ത് അമ്മയ്ക്കൊപ്പം സ്കൂട്ടറിൽ പോവുകയായിരുന്ന 9-ാം ക്ലാസുകാരൻ ടിപ്പർ ലോറിയിടിച്ച് മരിച്ചു

June 6, 2026

കൊല്ലം: കൊല്ലത്ത് അമ്മയ്ക്കൊപ്പം സ്കൂട്ടറിൽ പോവുകയായിരുന്ന 14കാരന് വാഹനാപകടത്തിൽ ദാരുണാന്ത്യം. അയത്തിൽ സ്വദേശി സൽമാൻ ഫാരിസ് ആണ് മരിച്ചത്. കൊല്ലം പാൽകുളങ്ങരയ്ക്ക് സമീപത്താണ് ദാരുണമായ സംഭവം ഉണ്ടായത്. ഇരുവരും സഞ്ചരിച്ച സ്കൂട്ടറിൽ ടിപ്പർ ലോറി ഇടിച്ചാണ് അപകടം ഉണ്ടായത്. റോഡിലേക്ക് തെറിച്ചുവീണ കുട്ടിയുടെ ശരീരത്തിലൂടെ ടിപ്പർ ലോറി കയറി ഇറങ്ങിയാണ് മരണം സംഭവിച്ചത്.

Also Read: ജനറൽ, സ്പെഷ്യൽ, എൻ.സി.എ.; 16 കാറ്റഗറികളിൽ പി.എസ്.സി. വിജ്ഞാപനം

ലോറിയെ മറികടക്കാൻ ശ്രമിക്കുന്നതിനിടെ എതിരെ വന്ന ഇരുചക്ര വാഹനത്തിൽ തട്ടി നിയന്ത്രണം നഷ്ടപ്പെട്ട് സ്കൂട്ടർ ലോറിക്ക് അടിയിലേക്ക് വീഴുകയായിരുന്നുവെന്ന് പൊലീസ് പറഞ്ഞു. അമ്മ എതിർ ഭാഗത്തേക്കും മകൻ ലോറിക്ക് അടിയിലേക്കും വീവുകയായിരുന്നു. ദേശീയപാത നിർമ്മാണം നടക്കുന്നതിനാൽ വാഹനങ്ങൾ പല റോഡുകളിലൂടെ വഴി തിരിച്ചാണ് കടത്തി വിടുന്നത്. ഇരുഭാഗങ്ങളിലേക്ക് വാഹനങ്ങൾ പോകാൻ വീതി കുറവുള്ള റോഡിലാണ് അപകടം ഉണ്ടായത്. മൃതദേഹം ആശുപത്രിയിലേക്ക് മാറ്റി.

എക്‌സൈസിന്റെ ഓപ്പറേഷന്‍ തണ്ടറില്‍ നെടുമ്പാശേരി വിമാനതാവളത്തിലെ ജീവനക്കാരിയടക്കം മൂന്നംഗ ലഹരിസംഘം പിടിയില്‍

June 6, 2026

കൊച്ചി. എക്‌സൈസിന്റെ ഓപ്പറേഷന്‍ തണ്ടറില്‍ നെടുമ്പാശേരി വിമാനതാവളത്തിലെ ജീവനക്കാരിയടക്കം മൂന്നംഗ ലഹരിസംഘം പിടിയില്‍. നൂറ് ഗ്രാമിലേറെ എംഡിഎംഎയും ലഹരികടത്തിയ കാറും ലഹരിയിടപാടിലൂടെ ലഭിച്ച പണവും പിടിച്ചെടുത്തു. എക്‌സൈസ് സംഘമെത്തിയതിന് പിന്നാലെ എംഡിഎംഎ ശുചിമുറിയില്‍ ഉപേക്ഷിച്ച് രക്ഷപ്പെട്ട നാലാംപ്രതിക്കായി അന്വേഷണം ഊര്‍ജിതം.

സംസ്ഥാന വ്യാപകമായി നടക്കുന്ന ഓപ്പറേഷന്‍ തണ്ടറിന്റെ ഭാഗമായാണ് എക്‌സൈസിന്റെ ലഹരിവേട്ട. തൃശൂര്‍ ഈസ്റ്റ് കോമ്പാറ സ്വദേശിനി ഐവിന്‍, കടമക്കുടി സ്വദേശി നിഖില്‍ പീറ്റര്‍, ഒല്ലൂര്‍ സ്വദേശി ലാറി ജോണ്‍ എന്നിവരാണ് എക്‌സൈസ് സംഘത്തിന്റെ പിടിയിലായത്. ഐവിന്‍ നെടുമ്പാശേരി വിമാനതാവളത്തിലെ ഗ്രൗണ്ട് സ്റ്റാഫും നിഖില്‍ പീറ്റര്‍ ഡല്‍ഹി വിമാനത്താവളത്തിലെ ജീവനക്കാരനുമാണ്. വിമാനതാവളത്തില്‍ ജോലി ചെയ്യുന്നതിനിടെയുണ്ടായ സൗഹൃദം ലഹരികച്ചവടത്തിലും ഇരുവരെ പങ്കാളികളാക്കി. ചേരാനല്ലൂരിലെ ഫ്ാറ്റിലാണ് ഐവിനും നിഖിലുമടങ്ങുന്ന ലഹരിസംഘം താമസിച്ചിരുന്നത്. ഇവര്‍ക്കൊപ്പമുണ്ടായിരുന്ന ഒല്ലൂര്‍ സ്വദേശി ലാറി ജോണ്‍, രക്ഷപ്പെട്ട കളമശേരി സ്വദേശി മുഹമ്മദ് നിയാസ് എന്നിവര്‍ ലഹരിക്കടത്ത് കേസില്‍ നേരത്തെ പിടിയിലായിട്ടുള്ളവരാണ്. കേസിലെ ഒന്നാംപ്രതിയായ ലാറി ഐടി എന്‍ജിനീയറാണ്. കൊച്ചിയിലെ പ്രധാന ലഹരിവിതരണക്കാരാണ് പിടിയിലായ നാലംഗസംഘം. കഴിഞ്ഞ ദിവസം ഒരു കിലോയ്ക്കടുത്ത് എംഡിഎംഎയാണ് ബെംഗളൂരുവില്‍ നിന്ന് നാലംഗ സംഘം കാറില്‍ കടത്തിയത്. എക്‌സൈസ് എത്തുമ്പോള്‍ ബാക്കിയുണ്ടായിരുന്നത് നൂറ്റിപ്പത്ത് ഗ്രാം മാത്രം. എക്‌സൈസ് ഫ്‌ളാറ്റില്‍ എത്തിയതിന് പിന്നാലെ ഇതില്‍ ഒരു ഭാഗം സംഘം നശിപ്പിച്ചു. ശുചിമുറിയിലെ ക്ലോസറ്റില്‍ ഫ്‌ളഷ് ചെയ്തതിന് പുറമെ പുറത്തേക്ക് മഴയില്‍ എറിഞ്ഞു കളഞ്ഞു. പ്രതികള്‍ രക്ഷപ്പെടാന്‍ ശ്രമിച്ചെങ്കിലും എക്‌സൈസ് സംഘം സാഹസികമായി പിടികൂടി. പക്ഷെ നിയാസ് മാത്രം രക്ഷപ്പെട്ടു.

കൊച്ചിയില്‍ തുടര്‍ച്ചയായി ഒരേ ഫ്‌ളാറ്റില്‍ താമസിക്കുന്ന പതിവ് സംഘത്തിനില്ല. ഓരോ തവണയും തങ്ങുന്നത് വെവ്വേറെ ഫ്‌ളാറ്റുകളില്‍ താമസിച്ചാണ് ലഹരിവിതരണം. ബെംഗളൂരുവില്‍ നിന്ന് കാറിലാണ് ലഹരിക്കടത്ത്. ചേരാനല്ലൂരിലെ ഫ്‌ളാറ്റില്‍ നാല് ദിവസം മുന്‍പാണ് സംഘം താമസം തുടങ്ങിയത്. രണ്ട് ദിവസംകൊണ്ട് ഒന്നേമുക്കാല്‍ ലക്ഷത്തിലേറെ രൂപയാണ് ലഹരികച്ചവടത്തിലൂടെ ഇവര്‍ സമ്പാദിച്ചത്. ഈ പണവും എക്‌സൈസ് പിടിച്ചെടുത്തു. എറണാകുളം എക്‌സൈസ് ഇന്‍സ്‌പെരക്ടര്‍ ആര്‍. അഭിരാജിന്റെ നേതൃത്വത്തിലുള്ള അന്വേഷണത്തിലാണ് ലഹരിസംഘം കുടുങ്ങിയത്.

മലയാളികളുടെ നന്മ ലക്ഷ്യമാക്കിയുള്ള എല്ലാ തീരുമാനങ്ങളെയും പിന്തുണയ്ക്കും,മുഖ്യമന്ത്രി വി ഡി സതീശനുമായി കൂടിക്കാഴ്ച നടത്തി രാജീവ് ചന്ദ്രശേഖർ

പാറ്റകളുടെ തലവന്‍ ഡല്‍ഹിയില്‍.. വന്‍ സന്നാഹങ്ങളുമായി പോലീസ്

June 6, 2026

കോക്‌റോച്ച് ജനതാ പാര്‍ട്ടിയുടെ സ്ഥാപകന്‍ അഭിജിത്ത് ദീപ്കെ ഡൽഹിയിൽ എത്തി. പാര്‍ട്ടി സ്ഥാപനത്തിന് ശേഷം ആദ്യമായിട്ടാണ് അഭിജിത്ത് രാജ്യത്തെത്തിയിരിക്കുന്നത്. സോഷ്യല്‍ മീഡിയയിലൂടെ വന്‍ പ്രശസ്തി നേടിയ സറ്റയറിക്കല്‍ പാര്‍ട്ടിക്കെതിരെ രൂക്ഷ നടപടികള്‍ സ്വീകരിക്കുന്നതിനിടെയാണ് സ്ഥാപകന്‍റെ വരവ്. ഡല്‍ഹിയില്‍ സമാധാനപരമായ പ്രക്ഷോഭം നടത്തുമെന്ന് ദീപ്കെ പറഞ്ഞതിന്‍റെ അടിസ്ഥാനത്തില്‍ 2000 പൊലീസുകാരെയാണ് തലസ്ഥാനത്ത് വിന്യസിച്ചിരിക്കുന്നത്. പാര്‍ട്ടിയുടെ വന്‍ സോഷ്യല്‍ മീഡിയ പിന്തുണ കണക്കാക്കിയാണ് നടപടി.

കേന്ദ്ര വിദ്യാഭ്യാസ മന്ത്രി ധര്‍മേന്ദ്ര പ്രധാന്‍ രാജിവയ്ക്കണമെന്ന് ആവശ്യപ്പെട്ടുകൊണ്ടുള്ള പാര്‍ട്ടിയുടെ ആദ്യ പ്രതിഷേധ പരിപാടി ജന്തര്‍ മന്തറിലാണ് നടത്താനുദ്ദേശിച്ചിരിക്കുന്നത്. സമാധാനപൂര്‍ണമായി നടപ്പാക്കാന്‍ പദ്ധതിയിട്ടിരിക്കുന്ന പ്രതിഷേധത്തില്‍ നിയമങ്ങള്‍ പൂര്‍ണമായും പാലിച്ചുവേണം പങ്കെടുക്കാന്‍ എന്ന് നേരത്തെ തന്നെ പാര്‍ട്ടി വക്താക്കള്‍ ആഹ്വാനം ചെയ്തിരുന്നു.

ആദിവാസി വിഭാഗത്തിൽ ഉൾപ്പെട്ട മെന്റർ അധ്യാപകരെ പിരിച്ചുവിട്ടതിനെതിരെ പ്രതിപക്ഷ നേതാവ് പിണറായി വിജയൻ

June 6, 2026

തിരുവനന്തപുരം.ആദിവാസി വിഭാഗത്തിൽ ഉൾപ്പെട്ട മെന്റർ അധ്യാപകരെ പിരിച്ചുവിട്ടതിനെതിരെ പ്രതിപക്ഷ നേതാവ് പിണറായി വിജയൻ.ജോലിയിൽ തിരിച്ചെടുക്കാൻ സർക്കാർ തയ്യാറാകണം. ആദിവാസി വിദ്യാർത്ഥികളുടെ കൊഴിഞ്ഞുപോക്ക് തടയാനാണ് എൽഡിഎഫ് സർക്കാർ അധ്യാപകരെ നിയമിച്ചത്.നിലവിലുള്ള അധ്യാപകരെ ഈ അധ്യയന വർഷം പ്രവേശിപ്പിക്കേണ്ടതില്ലെന്നാണ് ഇപ്പോഴത്തെ സർക്കാർ തീരുമാനം

9 വർഷമായി ജോലിചെയ്യുന്ന അധ്യാപകരെയാണ് ഒഴിവാക്കുന്നത്.ഇതോടെ ഗോത്ര വിദ്യാർത്ഥികളുടെ പഠനം താളം തെറ്റും.എൽഡിഎഫ് സർക്കാർ നടപ്പാക്കിയ വിപ്ലവകരമായ നടപടിയായിരുന്നു മെന്റർ അധ്യാപക നിയമനം

രാജ്യത്ത് ആദ്യമായി കേരളത്തിലാണ് ഇത്തരം ഒരു പദ്ധതി നടപ്പിലാക്കിയത്.ഈ പദ്ധതിയുടെ ഭാഗമായവർക്കാണ് തൊഴിൽ നഷ്ടപ്പെട്ടത്. അധ്യാപകർ പ്രക്ഷോഭപാതയിലാണ്

സർക്കാർ ഇവരെ തിരിച്ചെടുക്കണം

‘ പാറ്റാ’ തലവൻ എത്തി; ഡെൽഹി വിമാനത്താവളത്തിൽ അസാധാരണ മുന്നൊരുക്കം

മലയാളികളുടെ നന്മ ലക്ഷ്യമാക്കിയുള്ള എല്ലാ തീരുമാനങ്ങളെയും പിന്തുണയ്ക്കും,മുഖ്യമന്ത്രി വി ഡി സതീശനുമായി കൂടിക്കാഴ്ച നടത്തി രാജീവ് ചന്ദ്രശേഖർ

June 6, 2026

തിരുവനന്തപുരം: മുഖ്യമന്ത്രി വി ഡി സതീശനുമായി കൂടിക്കാഴ്ച നടത്തി ബിജെപി സംസ്ഥാന അധ്യക്ഷനും നേമം എംഎൽഎയുമായ രാജീവ് ചന്ദ്രശേഖർ. കൂടിക്കാഴ്ചയുടെ ചിത്രങ്ങൾ അദ്ദേഹം സമൂഹ മാധ്യമങ്ങളിൽ പങ്കിട്ടു. നേമം മണ്ഡലത്തിന്റെ വികസനാവശ്യങ്ങളെക്കുറിച്ചും ജനങ്ങള്‍ നേരിടുന്ന വിവിധ പ്രശ്‌നങ്ങളെക്കുറിച്ചും മുഖ്യമന്ത്രിയുമായി ചര്‍ച്ച ചെയ്തതായി കൂടിക്കാഴ്ചയുടെ ചിത്രങ്ങള്‍ പങ്കുവെച്ച് രാജീവ് ചന്ദ്രശേഖര്‍ കുറിച്ചു.

കേരള മുഖ്യമന്ത്രി ശ്രീ. വിഡി സതീശനുമായി സൗഹൃദ കൂടിക്കാഴ്ച നടത്തി. നേമം മണ്ഡലത്തിൻ്റെ വികസനാവശ്യങ്ങളെക്കുറിച്ചും ജനങ്ങൾ നേരിടുന്ന വിവിധ പ്രശ്നങ്ങളെക്കുറിച്ചും അദ്ദേഹവുമായി ച‍ർച്ച ചെയ്തു. മലയാളികളുടെ നന്മ ലക്ഷ്യമാക്കിയുള്ള എല്ലാ തീരുമാനങ്ങളെയും ബി.ജെ.പി/എൻ.ഡി.എ പിന്തുണയ്ക്കുകയും, ജനവിരുദ്ധ നയങ്ങളെ ശക്തമായി എതിർക്കുകയും ചെയ്യും.

ആരോഗ്യവകുപ്പില്‍ അടിമുടി മാറ്റവുമായി സംസ്ഥാന സർക്കാർ,മെഡിക്കല്‍ കോളജുകളിലെ സൂപ്രണ്ടുമാരെ മാറ്റി ഉത്തരവിറക്കി

ആരോഗ്യവകുപ്പില്‍ അടിമുടി മാറ്റവുമായി സംസ്ഥാന സർക്കാർ,മെഡിക്കല്‍ കോളജുകളിലെ സൂപ്രണ്ടുമാരെ മാറ്റി ഉത്തരവിറക്കി

June 6, 2026

തിരുവനന്തപുരം: ആരോഗ്യ വകുപ്പില്‍ അടിമുടി മാറ്റവുമായി സംസ്ഥാന സർക്കാർ. മെഡിക്കല്‍ കോളജുകളിലെ സൂപ്രണ്ടുമാരെ മാറ്റി ഉത്തരവിറക്കി. 25 ഉദ്യോഗസ്ഥരെയാണ് മാറ്റി നിയമിച്ചത്. ഉത്തരവ് ഉടന്‍ പ്രാബല്യത്തിലാക്കണമെന്നും സര്‍ക്കാര്‍ നിർദ്ദേശമുണ്ട്. സൂപ്രണ്ടുമാര്‍ക്ക് പുറമേ ഡെപ്യൂട്ടി സൂപ്രണ്ടുമാര്‍ക്കും ആര്‍എംഒമാര്‍ക്കും മാറ്റമുണ്ട്.

തിരുവനന്തപുരം മെഡിക്കല്‍ കോളജില്‍ ഡോ. ജയചന്ദ്രനെ സൂപ്രണ്ടായി നിയമിച്ചു. അനസ്‌തേഷ്യ വിഭാഗം പ്രൊഫസറായിരുന്നു ജയചന്ദ്രന്‍. കൊച്ചി കളമശ്ശേരി മെഡിക്കല്‍ കോളജില്‍ ഡോ. അനൂപ് ജോസഫിനെയും തൃശൂര്‍ മെഡിക്കല്‍ കോളജില്‍ ഡോ. ലിജോ കൊല്ലനൂരിനേയും കോട്ടയം മെഡിക്കല്‍ കോളജില്‍ ഡോ. ടിഗ്ഗി തോമസിനെയും സൂപ്രണ്ടുമാരായി നിയമിച്ചു. ഇടുക്കി മെഡിക്കല്‍ കോളജില്‍ ഡോ. ഹരീഷ് ചന്ദ്രനാണ് പുതിയ സൂപ്രണ്ട്. ആലപ്പുഴ മെഡിക്കല്‍ കോളജില്‍ ഡോ. ലക്ഷ്മിയും കോഴിക്കോട് മെഡിക്കല്‍ കോളജില്‍ ഡോ. ശ്രീജയനുമാണ് പുതിയ സൂപ്രണ്ടുമാർ.

സർക്കാർ മെഡിക്കൽ കോളേജിൽ നിന്ന് മാസം മൂന്ന് ലക്ഷം രൂപയോളം ശമ്പളം, സ്വകാര്യ ആശുപത്രിയിൽ നിന്നും പറ്റുന്നത് ഏഴ്ലക്ഷം, ഡോക്ടറുടെ സ്വകാര്യ പ്രാക്ടീസ് പിടിച്ചപ്പോള്‍

കൊണ്ടോട്ടിയില്‍ ട്രാവലറും ടിപ്പര്‍ ലോറിയും കൂട്ടിയിടിച്ച് രണ്ടുമരണം

June 6, 2026

മലപ്പുറം: കൊണ്ടോട്ടിയില്‍ ട്രാവലറും ടിപ്പര്‍ ലോറിയും കൂട്ടിയിടിച്ച് രണ്ടുമരണം. പാലക്കാട് വടവന്നൂര്‍ സ്വദേശിയായ ട്രാവലര്‍ ഡ്രൈവര്‍ രാജേഷ്, കൊല്ലങ്കോട് സ്വദേശിനി രമണി എന്നിവരാണ് മരിച്ചത്. പരിക്കേറ്റ പതിമൂന്നുപേരെ കോഴിക്കോട് മെഡിക്കല്‍ കോളജ് ആശുപത്രിയിലും 15 പേരെ ഫറോക്ക് താലൂക്ക് ആശുപത്രിയിലും പ്രവേശിപ്പിച്ചു.

പാലക്കാട് നിന്നും കൊട്ടിയൂരിലേക്ക് പോയ സംഘമാണ് അപകടത്തില്‍പ്പെട്ടത്. അപകടത്തില്‍പ്പെട്ടവരില്‍ അഞ്ചുപേരുടെ നില ഗുരുതരമാണ്. പരുക്കേറ്റവരില്‍ മൂന്നുപേര്‍ ടിപ്പര്‍ ലോറിയിലുണ്ടായിരുന്നവരാണ്. ലോറി നിയന്ത്രണം വിട്ട് ട്രാവലറിലേക്ക് ഇടിച്ചു കയറുകയായിരുന്നുവെന്നാണ് പ്രാഥമിക നിഗമനം

‘ പാറ്റാ’ തലവൻ എത്തി; ഡെൽഹി വിമാനത്താവളത്തിൽ അസാധാരണ മുന്നൊരുക്കം

കൊണ്ടോട്ടിയിൽ വാഹനാപകടം; രണ്ട് പേർ മരിച്ചു, 15 പേർക്ക് പരിക്ക്

June 6, 2026

മലപ്പുറം: കൊണ്ടോട്ടിയിൽ കൊട്ടിയൂർ തീർത്ഥാടകർ സഞ്ചരിച്ച ടെമ്പോ ട്രാവലറും ടിപ്പർ ലോറിയും കൂട്ടിയിടിച്ചുണ്ടായ അപകടത്തിൽ രണ്ടുപേർ മരിച്ചു. ട്രാവലറിന്‍റെ ഡ്രൈവ‍റായ പാലക്കാട് വടവന്നൂർ സ്വദേശി രാജേഷ്, പാലക്കാട് മുർകശംകുന്ന് വായനശാല സ്വദേശി രമണി (60)എന്നിവരുമാണ് മരിച്ചത്. അപകടത്തിൽ 15 പേർക്ക് പരിക്കേറ്റു. ഇതിൽ 5 പേരുടെ നില ഗുരുതരമാണ്. പരിക്കേറ്റവരെ കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി. ട്രാവലറിൽ 27 പേരും ലോറിയിൽ മൂന്ന് പേരുമാണ് ഉണ്ടായിരുന്നത്. ഇടിയുടെ ആഘാതത്തിൽ ട്രാവലറിന്റെ മുൻവശം പൂർണമായും തകർന്നു. എന്താണ് അപകടകാരണമെന്ന് വ്യക്തമല്ല. സ്ഥലത്തെത്തിയ പൊലീസും നാട്ടുകാരുമാണ് രക്ഷാപ്രവർത്തനം നടത്തിയത്.

‘ പാറ്റാ’ തലവൻ എത്തി; ഡെൽഹി വിമാനത്താവളത്തിൽ അസാധാരണ മുന്നൊരുക്കം

June 6, 2026

ന്യൂ ഡെൽഹി: കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാന്‍റെ രാജി ആവശ്യപ്പെട്ട് കോക്റോച്ച് ജനതാ പാർട്ടിയുടെ പ്രതിഷേധം ഇന്ന്.
സിജെപിയുടെ സ്ഥാപകൻ അഭിജിത് ദീപ്കെ രാവിലെ 7.31 ഓടെ ഡെൽഹിയിൽ വിമാനമിറങ്ങി . വിമാനത്താവളത്തിൽ അസാധാരണ മുന്നൊരുക്കങ്ങളാണ് ഡെൽഹി പൊലീസ് നടത്തിയിട്ടുള്ളത്. ഉന്നത ഉദ്യോഗസ്ഥർ അടക്കം സ്ഥലത്തെത്തിയിട്ടുണ്ട്. ആറാം നമ്പർ ഗേറ്റിൽ ബാരിക്കേഡ് സ്ഥാപിച്ചു. സിജെപിയുടെ പ്രതിഷേധം കണക്കിലെടുത്താണ് മുന്നൊരുക്കങ്ങളെന്ന് എയർപോർട്ട് അധികൃതർ അറിയിച്ചു.

സിജെപി പ്രതിഷേധത്തിന്റെ പശ്ചാത്തലത്തിൽ കർത്തവ്യപഥിൽ (രാഷ്ട്രപതി ഭവനിലേക്കുള്ള വഴി) അധിക സുരക്ഷ ഏർപ്പെടുത്തി. കൂടുതൽ പൊലീസുകാരെ പ്രദേശത്ത് വിന്യസിച്ചു. ഇവിടേക്ക് പ്രതിഷേധക്കാർ എത്താനുള്ള സാധ്യത കണക്കിലെടുത്താണ് നടപടി.
പ്രതിഷേധത്തിന് ഉപാധികളോടെ അനുമതി നൽകാൻ ദില്ലി പൊലീസ്. പ്രതിഷേധക്കാരെ പ്രകോപിപ്പിക്കുന്ന പെരുമാറ്റം ഒഴിവാക്കണമെന്ന് മുതിർന്ന ഉദ്യോഗസ്ഥർ നിർദ്ദേശം നൽകിയതിനെ തുടർന്നാണ് പ്രതിഷേധത്തിന് അനുമതി നൽകുന്നത്.

പത്രം മലയാള ദിനപത്രങ്ങളിലൂടെ |2026 | ജൂണ്‍ 6, ശനി 1201 | ഇടവം 23 , അവിട്ടം

June 6, 2026

വാർത്തകൾ തയ്യാറാക്കിയത്: രജനീഷ് മൈനാഗപ്പള്ളി

കനത്ത മഴ: 4 ജില്ലകളിലെ വിദ്യാഭ്യാസ സ്ഥാപനങ്ങള്‍ക്ക് ഇന്ന് അവധി

കനത്ത മഴ മൂലം കോഴിക്കോട്, കണ്ണൂര്‍, കാസര്‍കോട്, വയനാട് ജില്ലകളിലെ വിദ്യാഭ്യാസ സ്ഥാപനങ്ങള്‍ക്ക് ഇന്ന് ജില്ലാ കളക്ടര്‍മാര്‍ അവധി പ്രഖ്യാപിച്ചു. പ്രഫഷണല്‍ കോളജുകള്‍, കേന്ദ്രീയ വിദ്യാലയങ്ങള്‍, മദ്രസകള്‍, അങ്കണവാടികള്‍ ഉള്‍പ്പെടെ എല്ലാ വിദ്യാഭ്യാസ സ്ഥാപനങ്ങള്‍ക്കും അവധി ബാധകമായിരിക്കും.

സംസ്ഥാനത്ത് 5 ദിവസം അതിശക്തമായ മഴയ്ക്ക് സാധ്യത; വയനാട്ടില്‍ റെഡ് അലര്‍ട്ട്

അടുത്ത അഞ്ചു ദിവസത്തേക്ക് അതിശക്തമായ മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ്. ഗോവ തീരത്തിനു മുകളിലെ ചക്രവാതച്ചുഴിയാണ് മഴ ശക്തമാകാന്‍ കാരണം. വയനാട്ടില്‍ റെഡ് അലര്‍ട്ട്. മേപ്പാടിയില്‍ കര്‍ശന നിയന്ത്രണം.

കോഴിക്കോട് വിലങ്ങാട് ഉരുള്‍പൊട്ടല്‍ ഭീഷണി; ജനങ്ങളെ മാറ്റിപ്പാര്‍പ്പിക്കാന്‍ ഉത്തരവ്

കനത്തമഴയെ തുടര്‍ന്ന് കോഴിക്കോട് ജില്ലയിലെ വിലങ്ങാട് ഉള്‍പ്പെടെയുള്ള മലയോര മേഖലകളില്‍ ഉരുള്‍പൊട്ടല്‍ ഭീഷണി. ഈ പ്രദേശങ്ങളിലെ ജനങ്ങളെ സുരക്ഷിത സ്ഥാനങ്ങളിലേക്ക് ഉടന്‍ മാറ്റിപ്പാര്‍പ്പിക്കാന്‍ ജില്ലാ കലക്ടര്‍ ഉത്തരവിട്ടു.

മാസപ്പടി കേസ്: ശക്തമായ നടപടികളുമായി മുന്നോട്ടുപോകാന്‍ ഇഡി നിര്‍ദേശം

സിഎംആര്‍എല്‍ എക്സാലോജിക് മാസപ്പടി കേസില്‍ ശക്തമായി നടപടികളുമായി മുന്നോട്ടു പോകാന്‍ എന്‍ഫോഴ്സ്മെന്റ് ഡയറക്ടര്‍ നിര്‍ദേശം നല്‍കി. അന്വേഷണവുമായി മുന്നോട്ടുപോകാന്‍ ഹൈക്കോടതി ഇന്നലെ അനുമതി നല്‍കിയിരിക്കേ, എന്‍ഫോഴ്സ്മെന്റ് ഡയറക്ടറേറ്റിന്റെ ഉന്നതതല യോഗത്തിലാണ് ഡയറക്ടറുടെ നിര്‍ദേശം. യോഗത്തില്‍ അന്വേഷണ പുരോഗതി ചര്‍ച്ച ചെയ്തു.

‘ഓപറേഷന്‍ തൂഫാന്‍’: വിദേശികളായ രണ്ട് ലഹരിക്കടത്തുകാര്‍ അറസ്റ്റില്‍

ഓപറേഷന്‍ തൂഫാന്‍ മയക്കുമരുന്നു വേട്ടയില്‍ രാജ്യാന്തര ലഹരിക്കടത്തു സംഘത്തലവരായ രണ്ടു വിദേശികളെ അറസ്റ്റു ചെയ്തെന്ന് ആഭ്യന്തര മന്ത്രി രമേശ് ചെന്നിത്തല. പന്തളം പൊലീസ് നൈജീരിയന്‍ പൗരന്‍ 42 കാരന്‍ സാമുവേലിനേയും പെരുനാട് പൊലീസ് വിദേശിയും 35 കാരിയുമായ എല്‍സിന സനാതന്‍ സൂസനേയെയും അറസ്റ്റു ചെയ്തു. ഡല്‍ഹി പൊലീസിന്റെ സഹായത്തോടെയാണ് നൈജീരിയന്‍ പൗരനെ പിടികൂടിയത്. ബെംഗളൂരുവില്‍ നിന്നാണ് വിദേശ വനിതയെ പിടികൂടിയത്. വിദേശത്തുനിന്ന് മയക്കുമരുന്ന് എത്തിക്കുന്ന പ്രധാന കണ്ണികളാണ് ഇരുവരും.

മാനന്തവാടി മെഡിക്കല്‍ കോളേജ് ഡോക്ടര്‍ക്ക് സ്വകാര്യ പ്രാക്ടീസ്; വിജിലന്‍സ് കണ്ടെത്തല്‍

മാനന്തവാടി ഗവണ്‍മെന്റ് മെഡിക്കല്‍ കോളേജിലെ കാര്‍ഡിയാക് തൊറാസിക് സര്‍ജറി വിഭാഗം അസോസിയേറ്റ് പ്രൊഫസര്‍ ഡോ. ശിവപ്രസാദ് കോട്ടക്കല്‍ ആസ്റ്റര്‍ മിംസ് ആശുപത്രിയില്‍ സ്വകാര്യ പ്രാക്ടീസ് നടത്തുന്നതായി വിജിലന്‍സ് കണ്ടെത്തി. സര്‍ക്കാരില്‍ നിന്ന് മാസം മൂന്നു ലക്ഷം രൂപയും കോട്ടക്കല്‍ ആസ്റ്റര്‍ മിംസില്‍ നിന്ന് മാസം ഏഴു ലക്ഷത്തോളം രൂപയും പ്രതിഫലമായി വാങ്ങിയിരുന്നതായാണു കണ്ടെത്തല്‍.

ലോട്ടറി ക്ഷേമനിധി തട്ടിപ്പ്: 6 കോടിയുടെ നോട്ടുകള്‍ കത്തിച്ചുകളഞ്ഞെന്ന് പ്രതിയുടെ മൊഴി

ഭാഗ്യക്കുറി ഏജന്റുമാരുടേയും വില്‍പനക്കാരുടേയും ക്ഷേമനിധി ബോര്‍ഡില്‍നിന്ന് തട്ടിയെടുത്ത 16 കോടി രൂപയില്‍ ആറു കോടി രൂപയുടെ നോട്ടുകള്‍ കത്തിച്ചുകളഞ്ഞെന്ന് പ്രതിയുടെ മൊഴി. 2017 ല്‍ അഞ്ഞൂറു രൂപയുടെ നോട്ടുകളാണു കത്തിച്ചതെന്നു ബോര്‍ഡിലെ ക്ലര്‍ക്ക് കെ. സംഗീത് മൊഴി നല്‍കിയെന്നു വിജിലന്‍സ് പോലീസ്.

പെന്‍ഷന്‍ പ്രായം ഉയര്‍ത്തല്‍: യുഡിഎഫ് നിര്‍ദേശത്തിനെതിരെ മന്ത്രി ഒ.ജെ. ജനീഷ്

പെന്‍ഷന്‍ പ്രായം ഉയര്‍ത്തല്‍ നിര്‍ദേശത്തിനെതിരെ മന്ത്രി രംഗത്ത്. പെന്‍ഷന്‍ പ്രായം ഉയര്‍ത്തരുതെന്ന് യുവജന ക്ഷേമ മന്ത്രി ഒ.ജെ. ജനീഷാണ് ആവശ്യപ്പെട്ടത്. യുഡിഎഫ് സര്‍ക്കാര്‍ കഴിഞ്ഞ ദിവസം നിയമസഭയില്‍ അവതരിപ്പിച്ച ധവളപത്രത്തിലാണു പെന്‍ഷന്‍ പ്രായം ഉയര്‍ത്താന്‍ നിര്‍ദേശമുള്ളത്.

ഇഡി ഉദ്യോഗസ്ഥരെ ആക്രമിച്ച കേസ്: പ്രതികളെ സംഭവസ്ഥലത്ത് എത്തിച്ച് തെളിവെടുത്തു

പിണറായി വിജയന്റെ വസതിയില്‍ റെയ്ഡ് കഴിഞ്ഞിറങ്ങിയ ഇഡി ഉദ്യോഗസ്ഥരെ ആക്രമിച്ച കേസിലെ പ്രതികളെ സംഭവസ്ഥലത്ത് എത്തിച്ച് തെളിവെടുത്തു. എസ്എഫ്ഐ, ഡിവൈഎഫ്ഐ, സിപിഎം പ്രവര്‍ത്തകരായ പ്രതികളെയാണ് പിണറായിയുടെ വീടിന് മുന്നിലെത്തിച്ച് തെളിവെടുത്തത്.

പിണറായിയുടെ വീട്ടിലെ ഇഡി റെയ്ഡ്: പ്രതിഷേധത്തെ ന്യായീകരിച്ച് ബിനോയ് വിശ്വം

പിണറായി വിജയന്റെ വീട്ടില്‍ റെയ്ഡ് നടത്തിയതുകൊണ്ടാണു പ്രതിഷേധിച്ചതെന്ന് സിപിഐ സംസ്ഥാന സെക്രട്ടറി ബിനോയ് വിശ്വം. സമരം വ്യക്തിക്കു വേണ്ടിയല്ല. പിണറായിയുടെ വീട് എട്ടുമണിക്കൂര്‍ എന്‍ഫോഴ്സ്മെന്റ് ഉദ്യോഗസ്ഥരുടെ നിയന്ത്രണത്തിലായിരുന്നു. എല്‍ഡിഎഫ് നേതാവിന്റെ വസതിയില്‍ മോശമായ അവസ്ഥയുണ്ടാക്കാന്‍ ശ്രമിച്ചതിനെതിരേയാണു പ്രതിഷേധമെന്നും ബിനോയ് വിശ്വം.

സാംസ്‌കാരിക സ്ഥാപനങ്ങളില്‍ ഉദ്യോഗസ്ഥര്‍ക്ക് താത്കാലിക ചുമതല നല്‍കി ഉത്തരവ്

സാംസ്‌കാരിക സ്ഥാപനങ്ങളിലെ ഉദ്യോഗസ്ഥര്‍ക്ക് താത്കാലിക ചുമതല അനുവദിച്ച് ഉത്തരവ് പുറപ്പെടുവിക്കാന്‍ സംസ്‌കാരിക വകുപ്പ് മന്ത്രി പി സി വിഷ്ണുനാഥ് നിര്‍ദ്ദേശിച്ചു. കേരള സാഹിത്യ അക്കാദമി, കേരള സംഗീത നാടക അക്കാദമി, കേരള ലളിതകലാ അക്കാദമി, മോയിന്‍കുട്ടി വൈദ്യര്‍ മാപ്പിള അക്കാദമി, സാംസ്‌കാരിക ക്ഷേമനിധി ബോര്‍ഡ് എന്നീ സ്ഥാപനങ്ങളിലേക്കാണ് ഉദ്യോഗസ്ഥര്‍ക്ക് താത്കാലിക ചുമതല നല്‍കിയത്.

മെമ്മറി കാര്‍ഡ് ചോര്‍ന്ന സംഭവം: പുനരന്വേഷണം ആവശ്യപ്പെട്ട് അതിജീവിത ഹൈക്കോടതിയില്‍

നടിയെ ആക്രമിച്ച കേസിലെ നിര്‍ണായക തെളിവായ മെമ്മറി കാര്‍ഡ് ചോര്‍ന്ന സംഭവത്തില്‍ പുനര്‍ അന്വേഷണം ആവശ്യപ്പെട്ട് അതിജീവിത വീണ്ടും ഹൈക്കോടതിയെ സമീപിച്ചു. വിചാരണക്കോടതിയുടെ കസ്റ്റഡിയിലിരിക്കെ മെമ്മറി കാര്‍ഡിന്റെ ദൃശ്യങ്ങള്‍ അനധികൃതമായി പരിശോധിച്ചത് അന്വേഷിക്കണണമെന്നാണ് ഹര്‍ജിയിലെ ആവശ്യം.

വഖഫ് ബോര്‍ഡില്‍ അമുസ്ലീം അംഗങ്ങളെ നിയമിക്കണം; ഷോണ്‍ ജോര്‍ജ് ഹൈക്കോടതിയില്‍

കേരളാ വഖഫ് ബോര്‍ഡില്‍ അമുസ്ലീം അംഗങ്ങളെയും നിയമിക്കണമെന്നാവശ്യപ്പെട്ട് ബി ജെ പി സംസ്ഥാന ഉപാധ്യക്ഷന്‍ ഷോണ്‍ ജോര്‍ജ്ജ് ഹൈക്കോടതിയില്‍ പൊതുതാല്‍പ്പര്യ ഹര്‍ജി നല്‍കി. കേന്ദ്ര സര്‍ക്കാരിന്റെ 2025 ലെ വഖഫ് നിയമ ഭേദഗതി സംസ്ഥാനത്ത് അടിയന്തരമായി നടപ്പിലാക്കണമെന്നും ഷോണ്‍ ജോര്‍ജ് ഹര്‍ജിയില്‍ ആവശ്യപ്പെട്ടിട്ടുണ്ട്.

മലപ്പുറത്ത് ട്രാവലറും ടിപ്പറും കൂട്ടിയിടിച്ച് അപകടം; ഡ്രൈവര്‍ മരിച്ചു, 10 പേര്‍ക്ക് പരിക്ക്

മലപ്പുറം കൊണ്ടോട്ടി പെരിയമ്പലത്ത് ട്രാവലറും ടിപ്പര്‍ ലോറിയും കൂട്ടിയിടിച്ച് ട്രാവലറിന്റെ ഡ്രൈവര്‍ മരിച്ചു. പത്തു പേര്‍ക്ക് പരിക്കേറ്റു. അഞ്ചു പേരുടെ നില ഗുരുതരമാണ്. കൊട്ടിയൂര്‍ തീര്‍ഥാടകര്‍ സഞ്ചരിച്ച വാഹനമാണ് പുലര്‍ച്ചെ രണ്ട് മണിയോടെ അപകടത്തില്‍പെട്ടത്.

സംസ്ഥാനത്തെ സര്‍ക്കാര്‍ മെഡിക്കല്‍ കോളേജുകളില്‍ പുതിയ സൂപ്രണ്ടുമാരെ നിയമിച്ചു

സംസ്ഥാനത്തെ സര്‍ക്കാര്‍ മെഡിക്കല്‍ കോളേജുകളിലെ സൂപ്രണ്ട്, അഡീഷണല്‍ സൂപ്രണ്ട്, ഡെപ്യൂട്ടി സൂപ്രണ്ട്, റെസിഡന്റ് മെഡിക്കല്‍ ഓഫീസര്‍ തസ്തികളിലേക്ക് പുതിയ നിയമനങ്ങളായി. തിരുവനന്തപുരം മെഡിക്കല്‍ കോളേജില്‍ ഡോ. ജയചന്ദ്രന്‍ സൂപ്രണ്ടായി തുടരും. എറണാകുളം മെഡിക്കല്‍ കോളേജില്‍ ഡോ. അനൂപ് ജോസഫിനെയും തൃശൂരില്‍ ഡോ. ലിജോ കൊള്ളനൂരിനെയും കോട്ടയത്ത് ഡോ. ടിജി തോമസിനേയും ഇടുക്കിയില്‍ ഡോ.ഹരീഷ് ചന്ദ്രനെയും ആലപ്പുഴയില്‍ ഡോ.ലക്ഷ്മിയെയേയും സൂപ്രണ്ടായി നിയമിച്ചു.

പിജി വിദ്യാര്‍ത്ഥികളുടെ പരാതി: കോഴിക്കോട് മെഡിക്കല്‍ കോളേജിലെ രണ്ട് അധ്യാപകര്‍ക്ക് സ്ഥലംമാറ്റം

മാനസികമായി പീഡിപ്പിക്കുന്നുവെന്ന പിജി വിദ്യാര്‍ത്ഥികളുടെ പരാതിയില്‍ കോഴിക്കോട് മെഡിക്കല്‍ കോളേജിലെ രണ്ട് അധ്യാപകര്‍ക്കെതിരെ നടപടി. സൈക്യാട്രി വിഭാഗത്തിലെ അധ്യാപകരായ ഡോ. അനിതകുമാരി, ഡോ.സ്മിത എന്നിവരെ സ്ഥലം മാറ്റി.

മാസപ്പടി കേസില്‍ യഥാര്‍ഥ പ്രതി മുഖ്യമന്ത്രിയെന്ന് ഷോണ്‍ ജോര്‍ജ്

സി.എം.ആര്‍.എല്‍. എക്‌സാലോജിക് മാസപ്പടി കേസില്‍ മുഖ്യമന്ത്രി പിണറായി വിജയനാണ് യഥാര്‍ഥ പ്രതിയെന്ന് ബി.ജെ.പി. നേതാവ് ഷോണ്‍ ജോര്‍ജ്. മകള്‍ വീണ ഇടനിലക്കാരി മാത്രമാണ്. പണം വീണയ്ക്ക് നല്‍കേണ്ട സാഹചര്യം കമ്പനിക്കില്ല. പണം യഥാര്‍ഥത്തില്‍ പിണറായി വിജയനുള്ളതാണ്. ഷോണ്‍ ജോര്‍ജ് പറഞ്ഞു.

എറണാകുളത്ത് 110 ഗ്രാം എംഡിഎംഎയുമായി മൂന്നുപേര്‍ പിടിയില്‍

എറണാകുളത്ത് 110 ഗ്രാം എംഡിഎംഎ പിടികൂടി. ചേരാനല്ലൂര്‍ അമൃത നഗറിലാണ് സംഭവം. തൃശൂര്‍ സ്വദേശി ലാറി ജോണ്‍ തട്ടില്‍, തൃശൂര്‍ മനവലശ്ശേരി സ്വദേശി ഐവിന്‍ പി വിന്‍സന്റ്, കടമക്കുടി സ്വദേശി നിഖില്‍ പീറ്റര്‍ എന്നിവര്‍ പിടിയിലായി.

കെ സ്മാര്‍ട്ട്, ഡിജി കേരളം, പാലിയേറ്റീവ് കെയര്‍ പദ്ധതികള്‍ക്ക് ദേശീയ അംഗീകാരം

ഇടതു സര്‍ക്കാര്‍ നടപ്പാക്കിയ മൂന്നു പദ്ധതികള്‍ക്ക് ദേശീയ അംഗീകാരം. കെ സ്മാര്‍ട്ട്, ഡിജി കേരളം, പാലിയേറ്റീവ് കെയര്‍ എന്നിവയെ മികച്ച മാതൃകകളായി പഞ്ചായത്തീരാജ് മന്ത്രാലയം റിപ്പോര്‍ട്ടില്‍ ഉള്‍പ്പെടുത്തി.

സ്‌കൂള്‍ ബസിന്റെ വാതില്‍ തെറിച്ചുവീണ സംഭവം: ഒളിപ്പിച്ച ബസ് മോട്ടോര്‍ വാഹന വകുപ്പ് പിടികൂടി

മണ്ണാര്‍ക്കാട് തച്ചമ്പാറ ദേശബന്ധു സ്‌കൂള്‍ ബസിന്റെ വാതില്‍ തെറിച്ചു വീണ സംഭവത്തില്‍ പരിശോധന കര്‍ശനമാക്കി മോട്ടര്‍ വാഹന വകുപ്പ്. പരിശോധനയ്ക്ക് ഹാജരാക്കാതെ ഒളിപ്പിച്ച ഡോര്‍ അടര്‍ന്നു വീണ ബസ് കൊപ്പത്തു നിന്ന് പിടികൂടി. ഡ്രൈവറുടെ ലൈസന്‍സ് പിടിച്ചെടുത്തു.

തൃണമൂല്‍ കോണ്‍ഗ്രസ് പിളര്‍പ്പിലേക്ക്; 20 എംപിമാര്‍ ബിജെപി നേതൃത്വവുമായി ചര്‍ച്ച നടത്തി

തൃണമൂല്‍ കോണ്‍ഗ്രസ് പിളര്‍പ്പിലേക്ക്. തൃണമൂലിലെ 42 എം പിമാരില്‍ ഇരുപതോളം പേര്‍ ബി ജെ പി നേതൃത്വവുമായി ചര്‍ച്ച നടത്തി. ഈ എംപിമാര്‍ ബിജെപി നേതാവും ബംഗാള്‍ മുഖ്യമന്ത്രിയുമായ സുവേന്ദു അധികാരിക്കൊപ്പം ഡല്‍ഹിയിലെത്തി ബിജെപി ദേശീയ അധ്യക്ഷനെ കാണുമെന്നാണ് റിപ്പോര്‍ട്ട്.

ഡല്‍ഹിയില്‍ കോക്രോച്ച് ജനത പാര്‍ട്ടിയുടെ വേറിട്ട പ്രതിഷേധം

ഡല്‍ഹിയില്‍ ഇന്നു നടത്തുന്ന പ്രതിഷേധത്തില്‍ പങ്കെടുക്കാന്‍ കൂട്ടമായി വരണമെന്നു കോക്രോച്ച് ജനത പാര്‍ട്ടി. രാവിലെ ഒമ്പതിന് ആരംഭിക്കുന്ന പ്രതിഷേധത്തിലേക്ക് ഒറ്റയ്ക്ക് വരരുത്. പൊലീസുകാരോട് മോശമായി പെരുമാറരുതെന്നും അവര്‍ക്ക് പൂക്കള്‍ നല്‍കി വിയോജിപ്പ് അറിയിക്കണമെന്നും കൂട്ടായ്മ ആവശ്യപ്പെട്ടു.

കെ. അണ്ണാമലൈയുടെ പുതിയ രാഷ്ട്രീയ പാര്‍ട്ടിക്ക് വന്‍ ജനപിന്തുണ

തമിഴ്‌നാട് ബിജെപി മുന്‍ അധ്യക്ഷന്‍ കെ. അണ്ണാമലൈ ആരംഭിച്ച പുതിയ രാഷ്ട്രീയ പാര്‍ട്ടിക്കു വന്‍ ജന പിന്തുണ. അദ്ദേഹം ‘വി ദ് ലീഡേഴ്സ്’ രാഷ്ട്രീയ പ്രസ്ഥാനം ആരംഭിച്ച് എട്ടു മണിക്കൂറുകള്‍ക്കകം എട്ടു ലക്ഷത്തിലധികം പേര്‍ പാര്‍ട്ടിയില്‍ അംഗങ്ങളായി.

അണ്ണാമലൈ പാര്‍ട്ടി വിട്ടു; തമിഴ്നാട് ബിജെപിയില്‍ കൂട്ടരാജി

ബിജെപി തമിഴ്നാട് മുന്‍ സംസ്ഥാന അധ്യക്ഷന്‍ കെ അണ്ണാമലൈ പാര്‍ട്ടി വിട്ടതിനു പിറകേ തമിഴ്നാട്ടില്‍ കൂട്ടരാജി. ബിജെപി സംസ്ഥാന ഉപാധ്യക്ഷന്‍ കരു നാഗരാജന്‍ അടക്കം 15 പേര്‍ പാര്‍ട്ടിയില്‍നിന്ന് രാജിവച്ചു.

കെ അണ്ണാമലൈ തമിഴ് ജനതയെ കബളിപ്പിക്കുന്നു: ആരോപണവുമായി കോണ്‍ഗ്രസ്

തമിഴ്നാട്ടില്‍ ബിജെപി മുന്‍ അധ്യക്ഷന്‍ കെ അണ്ണാമലൈ തമിഴ് ജനതയെ കബളിപ്പിക്കുകയാണെന്ന് കോണ്‍ഗ്രസ്. ദ്രാവിഡ മണ്ണില്‍ സ്വാധീനം ഉറപ്പിക്കാന്‍ ബിജെപിയും ആര്‍എസ്എസും പുതിയ മുഖംമൂടി അണിയുകയാണെന്ന് കോണ്‍ഗ്രസ് നേതാവ് മാണിക്കം ടാഗോര്‍ ആരോപിച്ചു.

ആന്‍ഡമാന്‍ തീരത്ത് വീണ്ടും പ്രകൃതിവാതക നിക്ഷേപം കണ്ടെത്തി

ആന്‍ഡമാന്‍ കടല്‍ത്തീര മേഖലയില്‍ വീണ്ടും പ്രകൃതിവാതക നിക്ഷേപം കണ്ടെത്തി. പൊതുമേഖലാ എണ്ണ പര്യവേഷണ കമ്പനിയായ ഓയില്‍ ഇന്ത്യ ലിമിറ്റഡാണു പര്യവേക്ഷണം നടത്തിയത്.

ഡോളറിന് 100 രൂപയായാല്‍ എന്താണ് കുഴപ്പം?; വിചിത്ര വാദവുമായി പ്രധാനമന്ത്രിയുടെ ഉപദേശക സമിതി അംഗം

ഡോളറിന് 100 രൂപയായാല്‍ എന്താണ്? അതൊരു വെറും സംഖ്യ മാത്രമാണ് എന്ന വിചിത്ര വാദവുമായി പ്രധാനമന്ത്രി നരേന്ദ്ര മോദിയുടെ സാമ്പത്തിക ഉപദേശക സമിതി അംഗം ഷാമിക രവി. അമേരിക്കന്‍ ഡോളറിനെതിരെ ഇന്ത്യന്‍ രൂപയുടെ മൂല്യം മൂന്നക്കത്തിലേക്ക് ഇടിഞ്ഞേക്കുമെന്ന ആശങ്കയ്ക്കിടെയാണ് ഈ പ്രതികരണം.

ഇന്ത്യ-അമേരിക്ക വ്യാപാര കരാര്‍ ഉടന്‍: വിദേശകാര്യമന്ത്രാലയം

ഇന്ത്യ-അമേരിക്ക വ്യാപാര കരാറിലെ ചര്‍ച്ചകള്‍ ക്രിയാത്മകമാണെന്ന് വിദേശകാര്യമന്ത്രാലയം. ധാരണയും കരാറും ഉടനേ ഉണ്ടാകുമെന്ന് വിദേശകാര്യമന്ത്രാലയം വാര്‍ത്താസമ്മേളനത്തില്‍ വ്യക്തമാക്കി.

ഇന്ത്യന്‍ മാധ്യമപ്രവര്‍ത്തകന് നേരെ ഡോണാള്‍ഡ് ട്രംപിന്റെ വംശീയാധിക്ഷേപം

ഇന്ത്യന്‍ മാധ്യമപ്രവര്‍ത്തകനോട് വംശീയത കലര്‍ന്ന അധിക്ഷേപവുമായി യുഎസ് പ്രസിഡന്റ് ഡോണാള്‍ഡ് ട്രംപ്. വൈറ്റ് ഹൗസിലെ ഓവല്‍ ഓഫീസില്‍ മാധ്യമങ്ങളോട് സംസാരിക്കവെയാണ് ട്രംപിന്റെ പരാമര്‍ശം. നിങ്ങള്‍ ഇന്ത്യയില്‍ നിന്നാണോയെന്ന് ചോദിച്ച ട്രംപ് ജര്‍മ്മനിയില്‍ നിന്നാണെന്നാണ് കരുതിയെന്നും പറഞ്ഞു.

എവറസ്റ്റില്‍ കുടുങ്ങിയ ഷെര്‍പ്പ ഗൈഡിനെ ഒരാഴ്ചയ്ക്കുശേഷം ജീവനോടെ കണ്ടെത്തി

ഭക്ഷണമോ ബോട്ടിലില്‍ നിറച്ച ഓക്‌സിജനോ ഇല്ലാതെ എവറസ്റ്റ് കൊടുമുടിയില്‍ കുടുങ്ങിയ ഷെര്‍പ്പ ഗൈഡിനെ ഒരാഴ്ചയ്ക്കുശേഷം ജീവനോടെ കണ്ടെത്തി. കാഠ്മണ്ഡു ആസ്ഥാനമായി പ്രവര്‍ത്തിക്കുന്ന ഹിമാലയന്‍ ട്രാവേഴ്‌സ്’ കമ്പനിയില്‍ ഗൈഡായി ജോലി ചെയ്യുന്ന 52 കാരനായ ഹിലരി ദാവയാണ് അത്ഭുതകരമായി രക്ഷപ്പെട്ടത്.

ഇസ്രായേലിന് അസര്‍ബൈജാനിലും സോമാലി ലാന്‍ഡിലും രഹസ്യ സൈനിക താവളങ്ങളെന്ന് റിപ്പോര്‍ട്ട്

ഇറാന്‍ യുദ്ധത്തിനിടെ ഇസ്രായേല്‍ അസര്‍ബൈജാന്‍ അടക്കമുള്ള രാജ്യങ്ങളെ തങ്ങളുടെ രഹസ്യ സൈനിക താവളമായി ഉപയോഗിച്ചെന്ന് റിപ്പോര്‍ട്ട്. ആഫ്രിക്കന്‍ രാജ്യമായ സോമാലി ലാന്‍ഡിലും പശ്ചിമേഷ്യയിലെ ചില രാജ്യങ്ങളിലും ഇസ്രായേലിന്റെ രഹസ്യ താവളങ്ങള്‍ പ്രവര്‍ത്തിക്കുന്നതായും അമേരിക്കന്‍ ചാനലായ സി എന്‍ എന്‍ റിപ്പോര്‍ട്ട് ചെയ്തു.

അമേരിക്കയുമായുള്ള ചര്‍ച്ചകള്‍ വഴിമുട്ടി; യുദ്ധം വ്യാപിപ്പിക്കുമെന്ന് ഇറാന്‍

അമേരിക്കയുമായുള്ള ചര്‍ച്ചകള്‍ വഴി മുട്ടിയെന്നും യുദ്ധം വ്യാപിപ്പിക്കാന്‍ മടിക്കില്ലെന്നും ഇറാന്‍ പരമാധികാരി അയത്തുള്ള മുജ്തബ ഖമനേയിയുടെ ഉപദേഷ്ടാവ് മൊഹ്സിന്‍ റിയാസി. ഉത്തരവാദി അമേരിക്കന്‍ പ്രസിഡന്റ് ട്രംപ് ആണ്. ട്രംപ് മറുപടി പറയണം, അല്ലെങ്കില്‍ കറുത്ത കാലം വരുമെന്നും അദ്ദേഹം പറഞ്ഞു.

ആഭ്യന്തര കാര്യങ്ങളില്‍ ഇറാന്റെ ഇടപെടല്‍ ആവശ്യമില്ലെന്ന് ലബനന്‍

ഇറാന്റെ ഇടപെടലുകള്‍ വേണ്ടെന്ന് ലബനന്‍. ലബനന്റെ ആഭ്യന്തര കാര്യങ്ങളിലും നയതന്ത്ര നിലപാടുകളിലും ഇറാന്‍ അഭിപ്രായം പറയേണ്ടതില്ലെന്ന് ലബനന്‍ പ്രസിഡന്റ് ജോസഫ് ഔന്‍ വ്യക്തമാക്കി. തങ്ങളുടെ രാജ്യത്തെ വെച്ച് മറ്റ് രാജ്യങ്ങളുമായി വിലപേശാന്‍ ആരെയും അനുവദിക്കില്ലെന്ന് അദ്ദേഹം പറഞ്ഞു.

റഷ്യന്‍ സഹകരണത്തോടെ വന്‍കിട ആണവ പ്ലാന്റ് നിര്‍മ്മാണവുമായി ഇറാന്‍

യുദ്ധത്തിനിടയിലും റഷ്യയുടെ സഹകരണത്തോടെ സിവിലിയന്‍ ആണവ പ്ലാന്റ് നിര്‍മ്മാണവുമായി ഇറാന്‍ മുന്നോട്ട്. 2500 കോടി ഡോളര്‍ ചെലവ് പ്രതീക്ഷിക്കുന്ന ഈ വന്‍കിട പദ്ധതി ഹോര്‍മുസ്ഗാന്‍ പ്രവിശ്യയിലാണ് നടപ്പാക്കുന്നത്.

ഖമനെയി കൊല്ലപ്പെട്ടപ്പോള്‍ താനും ആ കെട്ടിടത്തിലുണ്ടായിരുന്നു; വെളിപ്പെടുത്തലുമായി ഇറാന്‍ വിദേശകാര്യമന്ത്രി

ഇറാന്റെ പരമോന്നത നേതാവായിരുന്ന ആയത്തുള്ള അലി ഖമനെയി കൊല്ലപ്പെടുമ്പോള്‍ സംഭവസ്ഥലത്ത് താനും ഉണ്ടായിരുന്നുവെന്ന വെളിപ്പെടുത്തലുമായി ഇറാന്റെ വിദേശകാര്യ മന്ത്രി അബ്ബാസ് അരാഗ്ചി. ആക്രണത്തില്‍ തകര്‍ന്ന കെട്ടിടത്തിന്റെ അവശിഷ്ടങ്ങള്‍ക്കടിയില്‍നിന്ന് പുറത്തേക്ക് വരുമ്പോള്‍ തന്റെ മുഴുവന്‍ ചിന്തയും ഖമനെയിയെക്കുറിച്ചായിരുന്നെന്ന് അബ്ബാസ് അരാഗ്ചി പറഞ്ഞു.

രാജ്യത്തെ ജി.ഡി.പി വളര്‍ച്ച 7.7 ശതമാനമായി ഉയര്‍ന്നു

നിര്‍മാണ, സേവന മേഖലകളുടെ കരുത്തില്‍ 2025-26 സാമ്പത്തിക വര്‍ഷത്തില്‍ രാജ്യത്തെ ജി.ഡി.പി വളര്‍ച്ച 7.7 ശതമാനമായെന്ന് റിപ്പോര്‍ട്ട്. സ്വകാര്യ ഉപഭോഗവും മൂലധന നിക്ഷേപവും 7.5 ശതമാനത്തിലധികം വര്‍ധിച്ചു. 2024-25 സാമ്പത്തിക വര്‍ഷത്തില്‍ ഇത് 7.1 ശതമാനമായിരുന്നു. പണപ്പെരുപ്പം കണക്കിലെടുക്കാതെയുള്ള നാമമാത്രമായ കണക്കുകള്‍ പ്രകാരം, കഴിഞ്ഞ സാമ്പത്തിക വര്‍ഷത്തില്‍ സമ്പദ്വ്യവസ്ഥ 8.9 ശതമാനം വളര്‍ച്ച നേടിയിട്ടുണ്ട്. സ്ഥിരവിലയിലുള്ള യഥാര്‍ഥ ജി.ഡി.പി 2025-26 വര്‍ഷത്തില്‍ 323.12 ലക്ഷം കോടി രൂപയിലെത്തി. 2025-26 സാമ്പത്തിക വര്‍ഷത്തിലെ നാലാം പാദത്തില്‍ ജി.ഡി.പി വളര്‍ച്ചാ നിരക്ക് യഥാര്‍ഥ കണക്കുകളില്‍ 7.8 ശതമാനവും നാമമാത്രമായ കണക്കുകളില്‍ 9.1 ശതമാനവുമാണ്. ദ്വിതീയ, തൃതീയ മേഖലകള്‍ യഥാക്രമം 8.8 ശതമാനവും 9.3 ശതമാനവും വളര്‍ച്ച രേഖപ്പെടുത്തി. കാര്‍ഷിക, മത്സ്യബന്ധന മേഖലകളുടെ മികവില്‍ പ്രാഥമിക മേഖല 3.2 ശതമാനം വളര്‍ച്ച കൈവരിച്ചു.

സാന്‍ഡിസ്‌ക് പുതിയ ക്രിയേറ്റര്‍ സീരീസ് ഉപകരണങ്ങള്‍ വിപണിയിലിറക്കി

കണ്ടന്റ് ക്രിയേറ്റര്‍മാരുടെ ആവശ്യങ്ങള്‍ മുന്‍നിര്‍ത്തി സാന്‍ഡിസ്‌ക് പുതിയ ക്രിയേറ്റര്‍ സീരീസ് പുറത്തിറക്കി. കേരളത്തിലും ഈ പുതിയ സ്റ്റോറേജ് സൊല്യൂഷനുകള്‍ അവതരിപ്പിച്ചു. മൈക്രോ എസ്ഡി കാര്‍ഡ്, എസ്ഡി യുഎച്ച്എസ്-കക കാര്‍ഡ്, അതിവേഗ യുഎസ്ബി-സി ഫ്‌ലാഷ് ഡ്രൈവുകള്‍, ഐഫോണിന് അനുയോജ്യമായ മാഗ് സൈഫ് എസ്എസ്ഡി, കൂടാതെ വിവിധ ഉപകരണങ്ങളില്‍ ഉപയോഗിക്കാന്‍ സാധിക്കുന്ന ഫോണ്‍ ഡ്രൈവ് എന്നിവയാണ് പുതിയ ക്രിയേറ്റര്‍ സീരീസില്‍ പ്രധാനമായും ഉള്‍പ്പെടുത്തിയിട്ടുള്ളത്. ഉയര്‍ന്ന റെസല്യൂഷനിലുള്ള വീഡിയോകള്‍ കൈകാര്യം ചെയ്യുന്നവര്‍ക്കും, ജനറേറ്റീവ് എഐ പ്രോജക്റ്റുകള്‍ ചെയ്യുന്നവര്‍ക്കും, വേഗതയേറിയ ക്രിയേറ്റീവ് വര്‍ക്ക്ഫ്‌ലോകള്‍ ആവശ്യമുള്ളവര്‍ക്കും ഇവ തികച്ചും അനുയോജ്യമാണെന്ന് കമ്പനി പറയുന്നു. കൂടാതെ 4കെ വീഡിയോകള്‍ റെക്കോഡ് ചെയ്യാനും വലിയ ഫയലുകള്‍ സുരക്ഷിതമായി ബാക്കപ്പ് ചെയ്യാനും ഈ ഉപകരണങ്ങള്‍ സഹായിക്കുന്നു. 20,000 രൂപ മുതലാണ് ഈ സീരീസിലെ ഉപകരണങ്ങളുടെ വില ആരംഭിക്കുന്നത്.

‘സത്യത്തില്‍ സംഭവിച്ചത്’ സിനിമയിലെ ലിറിക്കല്‍ വീഡിയോ ഗാനം റിലീസായി

പ്രശാന്ത് മോഹന്‍ തിരക്കഥയെഴുതി സംവിധാനം ചെയ്യുന്ന ‘സത്യത്തില്‍ സംഭവിച്ചത്’ എന്ന ചിത്രത്തിലെ ഒഫിഷ്യല്‍ ലിറിക്കല്‍ വീഡിയോ ഗാനം റിലീസായി. കാവാലം നാരായണ പണിക്കര്‍ എഴുതിയ വരികള്‍ക്ക് ബെന്നി ഫെര്‍ണാണ്ടസ് സംഗീതം പകര്‍ന്ന് ശ്രേയ പ്രദീപ് ആലപിച്ച ‘പോയ കാല മധുരിമ…’ എന്നാരംഭിക്കുന്ന ഗാനമാണ് റിലീസായത്. ആകാശ് മേനോന്‍, ദില്‍ഷാന, ദിലീഷ് പോത്തന്‍, ജോണി ആന്റണി, ശ്രീകാന്ത് മുരളി, കോട്ടയം രമേശ്, ടി ജി രവി, ജോജി ജോണ്‍, നസീര്‍ സംക്രാന്തി, ബൈജു എഴുപുന്ന, കലാഭവന്‍ റഹ്‌മാന്‍, ജയകൃഷ്ണന്‍, വിജിലേഷ്, സിനോജ് വര്‍ഗീസ്, ശിവന്‍ സോപാനം, പുളിയനം പൗലോസ്, ജി സുരേഷ് കുമാര്‍, ഭാസ്‌കര്‍ അരവിന്ദ്, സൂരജ് ടോം, അശ്വതി ശ്രീകാന്ത്, കുളപ്പുള്ളി ലീല, ശൈലജ കൃഷ്ണദാസ്, പ്രതിഭ പ്രതാപചന്ദ്രന്‍, പാര്‍വതി രാജന്‍ ശങ്കരാടി, സുഷമ അജയന്‍, ഗായത്രി ദേവി തുടങ്ങിയവരാണ് മറ്റ് പ്രമുഖ താരങ്ങള്‍.

ഉദ്വേഗജനകമായ നിമിഷങ്ങളുമായി ‘ഫാള്‍ 2: ഡെഡ്പോയിന്റ്’ ട്രെയിലര്‍ പുറത്ത്

അമേരിക്കന്‍ സര്‍വൈവല്‍ ചിത്രം ‘ഫാള്‍ 2: ഡെഡ്പോയിന്റി’ന്റെ ട്രെയിലര്‍ പുറത്ത്. പീറ്റര്‍, മൈക്കല്‍ സ്പിയറിങ് സഹോദരങ്ങള്‍ സംവിധാനം ചെയ്ത ഫാളിന്റെ തുടര്‍ച്ചയാണ് ചിത്രം. 2022ല്‍ അപ്രതീക്ഷിത ഹിറ്റായിരുന്ന ഫാളിന്റെ വിജയത്തുടര്‍ച്ച ലക്ഷ്യമിട്ടാണ് ‘ഫാള്‍ 2’ എത്തുന്നത്. ‘ഫാളി’ല്‍ റേഡിയോ ടവറാണ് പ്രേക്ഷകര്‍ക്ക് ത്രില്ലറൊരുക്കുന്നതെങ്കില്‍ രണ്ടാം ഭാഗത്ത് ഏറ്റവും അപകടകരമായ ഹൈക്കിങ്ങിലേക്കാണ് സിനിമ എത്തിക്കുന്നത്. സഹോദരിയുടെ മരണത്തില്‍ വേദനിക്കുന്ന ജാക്സ് കൂട്ടുകാരിക്കൊപ്പം തായ്വാനിലെ 5000 അടി ഉയരത്തിലുള്ള മൗണ്ട് ക്വാന്‍ എന്ന ഹൈക്കിങ് ഇടത്തിലേക്കു പോകുന്നതും പിന്നീട് ഉണ്ടാകുന്ന ഉദ്വേഗജനകമായ നിമിഷങ്ങളിലേക്കുമാണ് സിനിമ കൊണ്ടുപോകുന്നത്. സ്‌കോട്ട് മാന്‍, ജോനാഥന്‍ ഫ്രാങ്ക് എന്നിവരാണ് ചിത്രത്തിന് തിരക്കഥയൊരുക്കുന്നത്. ഹാരിയറ്റ് സ്ലേറ്റര്‍, അര്‍സെമ തോമസ് എന്നിവരാണ് പ്രധാന വേഷത്തിലെത്തുന്നത്. ചിത്രം സെപ്റ്റംബര്‍ രണ്ടിന് തിയറ്ററുകളിലെത്തും.

ടൊയോട്ട ഇന്നോവ ക്രിസ്റ്റയുടെ 2026 പതിപ്പ് ഇന്ത്യയില്‍ പുറത്തിറക്കി

പ്രമുഖ വാഹന നിര്‍മ്മാതാക്കളായ ടൊയോട്ട കിര്‍ലോസ്‌കര്‍ മോട്ടോര്‍ അവരുടെ ജനപ്രിയ മോഡലായ ഇന്നോവ ക്രിസ്റ്റയുടെ 2026 പതിപ്പ് ഇന്ത്യയില്‍ പുറത്തിറക്കി. 19.72 ലക്ഷം രൂപ മുതലാണ് വില ആരംഭിക്കുന്നത്. ജനപ്രിയ എംപിവിയുടെ പുതിയ അപ്ഡേറ്റില്‍ ഡിസൈനിലെ ചെറിയ മാറ്റങ്ങള്‍, കൂടുതൽ സൗകര്യപ്രദമായ ഫീച്ചറുകള്‍, പുതുക്കിയ കാബിന്‍ തീം എന്നിവ ഉള്‍പ്പെടുത്തിയിട്ടുണ്ട്. ടൊയോട്ട ഇലക്ട്രിക് വാഹനങ്ങളിലേക്ക് ക്രമേണ മാറുന്നതിനാല്‍ 2027 ഓടേ ഇന്നോവ ക്രിസ്റ്റ നിര്‍ത്തലാക്കിയേക്കുമെന്ന് റിപ്പോര്‍ട്ടുകളുണ്ട്. ഇന്നോവ ക്രിസ്റ്റയ്ക്ക് കരുത്തേകുന്നത് ടൊയോട്ടയുടെ പരീക്ഷിച്ച് വിജയിച്ച 2.4 ലിറ്റര്‍ ഡീസല്‍ എന്‍ജിന്‍ തന്നെയാണ്. ഇത് 5-സ്പീഡ് മാനുവല്‍ ഗിയര്‍ബോക്സുമായി ബന്ധിപ്പിച്ചിരിക്കുന്നു. ലിറ്ററിന് 15 കിലോമീറ്റര്‍ വരെ മൈലേജ് ടൊയോട്ട അവകാശപ്പെടുന്നുണ്ട്.

പുസ്തക പരിചയം: സി രാധാകൃഷ്ണന്റെ ‘പുത്തന്‍ പുലരി’

”ദ എന്ന മുത്തച്ഛന്‍ ഫ്ളാറ്റില്‍ അദ്ദേഹത്തിന്റെ മുറിയില്‍ കട്ടിലില്‍ ചമ്രംപടിഞ്ഞ് കണ്ണുകള്‍ അടച്ച് ഇരിക്കെയാണ് കുട്ടികള്‍ ചെന്നത്. വാതില്‍ തുറന്നുകിടക്കുകയായിരുന്നു. ശബ്ദമൊന്നും ഉണ്ടാക്കാതിരിക്കാന്‍ അവര്‍ ശ്രദ്ധിച്ചു. എങ്കിലും അവര്‍ ചെന്നത് അദ്ദേഹം അറിഞ്ഞു, കണ്ണു തുറന്നു ചിരിച്ചു. അവരെ തന്റെ ഇരുവശവുമായി പിടിച്ചിരുത്തി ഒരു ചെറുപുഞ്ചിരിയോടെ ചോദിച്ചു: നിങ്ങള്‍ക്ക് ആരോടെങ്കിലും വിരോധം ഉണ്ടോ?”. ജാനും ജിനും മുത്തച്ഛനും യാന്ത്രികലോകത്തിലെ വിചാരവികാരങ്ങളുമെല്ലാം അതീവഹൃദ്യമായി ബാലമനസ്സുകളെ അനുഭവിപ്പിക്കുന്ന കൊച്ചുനോവല്‍. ‘പുത്തന്‍ പുലരി’. സി രാധാകൃഷ്ണന്‍. പൂര്‍ണ പബ്ളിക്കേഷന്‍സ്. വില 105 രൂപ.

ഫ്രഞ്ച് ഫ്രൈസ് ശീലം ടൈപ്പ് 2 പ്രമേഹ സാധ്യത കൂട്ടുമെന്ന് പഠനം

പതിവായി ഫ്രഞ്ച് ഫ്രൈസ് കഴിക്കുന്നത് ടൈപ്പ് 2 പ്രമേഹത്തിനുള്ള സാധ്യത കൂട്ടാമെന്ന് പഠനം. ഫ്രഞ്ച് ഫ്രൈസിന്റെ പതിവ് ഉപഭോഗം ടൈപ്പ് 2 പ്രമേഹം വരാനുള്ള സാധ്യതയുമായി വളരെയധികം ബന്ധപ്പെട്ടിരിക്കുന്നു. 37 വര്‍ഷത്തെ കാലയളവില്‍ യുഎസില്‍ നടത്തിയ മൂന്ന് കൂട്ടായ പഠനങ്ങളില്‍ നിന്ന് ശേഖരിച്ച ഡാറ്റ ശാസ്ത്രജ്ഞര്‍ സൂക്ഷ്മമായി വിശകലനം ചെയ്തു. വിപുലമായ തുടര്‍പരിശോധനയില്‍ 22,299 പേര്‍ക്ക് ടൈപ്പ് 2 പ്രമേഹം കണ്ടെത്തി. മൊത്തം ഉരുളക്കിഴങ്ങ് ഉപഭോഗത്തെ വിശാലമായ ഒരു വിഭാഗമായി ഗവേഷകര്‍ അവലോകനം ചെയ്തപ്പോള്‍ ആഴ്ചയില്‍ കഴിക്കുന്ന ഓരോ മൂന്ന് സെര്‍വിംഗുകളിലും പ്രമേഹ നിരക്കില്‍ 5% വര്‍ദ്ധനവ് കണ്ടെത്തി. ആഴ്ചയില്‍ മൂന്ന് തവണ ഫ്രഞ്ച് ഫ്രൈസ് കഴിക്കുന്നത് ടൈപ്പ് 2 പ്രമേഹം വരാനുള്ള സാധ്യത 20% വര്‍ദ്ധിപ്പിക്കുമെന്ന് പഠനത്തില്‍ കണ്ടെത്തി. വേവിച്ചതോ, ചുട്ടതോ, ഉടച്ചതോ ആയ ഉരുളക്കിഴങ്ങ് മൂന്ന് ആഴ്ചയില്‍ ഒരേ അളവില്‍ കഴിക്കുന്നത് പ്രമേഹ സാധ്യതയില്‍ കാര്യമായ വര്‍ദ്ധനവ് കാണിച്ചില്ല. ആഴ്ചയില്‍ മൂന്ന് തവണ ധാന്യങ്ങള്‍ കഴിക്കുന്നത് ടൈപ്പ് 2 പ്രമേഹ സാധ്യത 8% കുറയ്ക്കുന്നതായും പഠനത്തില്‍ കണ്ടെത്തി.

1...667668669...1,612 Page 668 of 1,612

Click Here to Join WhatsApp Community