തിരുവനന്തപുരം: സംസ്ഥാനത്ത് ക്ഷേമ പെന്‍ഷന്‍ വിതരണം നാളെ ആരംഭിക്കും. ഈ മാസത്തെ സാമൂഹ്യ സുരക്ഷാ പെന്‍ഷന്‍ വിതരണത്തിനായി 951.39 കോടി രൂപയും അനുവദിച്ചു. 51.59 ലക്ഷം ഗുണഭോക്താക്കള്‍ക്കാണ് പെന്‍ഷന്‍ ലഭിക്കുക. ഈ മാസം 31 വരെ പെന്‍ഷന്‍ വിതരണം ചെയ്യും.
ക്ഷേമനിധി ബോര്‍ഡ് പെന്‍ഷനും സാമൂഹ്യ സുരക്ഷാ പെന്‍ഷനും വിതരണം ചെയ്യുന്നതിനുള്ള തുകയും സംസ്ഥാന സര്‍ക്കാര്‍ അനുവദിച്ചു. ക്ഷേമനിധി ബോര്‍ഡിന്റെ ഈ മാസത്തെ പെന്‍ഷന്‍ വിതരണത്തിനായി 130.31 കോടി രൂപയാണ് അനുവദിച്ചത്. 6.59 ലക്ഷം ഗുണഭോക്താക്കള്‍ക്ക് പെന്‍ഷന്‍ ലഭിക്കും.
കണ്ണൂര്‍: പയ്യന്നൂരില്‍ ഭാര്യയെ പെട്രോള്‍ ഒഴിച്ച് തീകൊളുത്തുന്നതിനിടെ ഗുരുതരമായി പൊള്ളലേറ്റ ഭര്‍ത്താവ് മരിച്ചു. സി.വി സനല്‍കുമാറാണ് മരിച്ചത്. കണ്ണൂരിലെ സ്വകാര്യ ആശുപത്രിയില്‍ ചികിത്സയിലിരിക്കെയാണ് മരണം. പരിക്കേറ്റ ഭാര്യ പി. പ്രജിഷയും ഭാര്യ മാതാവ് പി. പത്മിനിയും ചികിത്സയില്‍ തുടരുകയാണ്.
വിവാഹ മോചനത്തിന് കേസ് കൊടുത്ത വിരോധത്തിലാണ് സനല്‍കുമാര്‍ ഭാര്യയെ കൊലപ്പെടുത്താന്‍ ശ്രമിച്ചത്. ഇരുവരും ഏതാനും നാളുകളായി വേര്‍പിരിഞ്ഞ് കഴിയുകയായിരുന്നു. പ്രജിഷയുടെ വീട്ടില്‍ അതിക്രമിച്ചു കയറിയായിരുന്നു കൊലപാതക ശ്രമം. ബഹളം കേട്ടെത്തിയ നാട്ടുകാരാണ് തീയണച്ച് മൂവരെയും ആശുപത്രിയിലെത്തിച്ചത്. സംഭവത്തില്‍ സനലിനെതിരെ പയ്യന്നൂര്‍ പൊലീസ് വധശ്രമത്തിന് കേസെടുത്തിരുന്നു.
മുംബൈ: വീട്ടുകാരിൽ നിന്ന് അഞ്ച് ലക്ഷം രൂപ തട്ടിയെടുക്കാൻ സ്വന്തം തട്ടിക്കൊണ്ടുപോകൽ ആസൂത്രണം ചെയ്ത 19കാരൻ പൊലീസ് പിടിയിൽ. ഉത്തർപ്രദേശ് സ്വദേശിയായ ഓം പ്രകാശ് ഗൗരിശങ്കറാണ് തട്ടിക്കൊണ്ടുപോയതായി വ്യാജപ്രചാരണം നടത്തി കുടുംബത്തെ കബളിപ്പിക്കാൻ ശ്രമിച്ചത്.
മഹാരാഷ്ട്രയിലെ പുണെയിൽ നിന്ന് തന്നെ ആരോ തട്ടിക്കൊണ്ടുപോയെന്നും വിട്ടയക്കണമെങ്കിൽ അഞ്ച് ലക്ഷം രൂപ മോചനദ്രവ്യം നൽകണമെന്നും ആവശ്യപ്പെട്ട് ഓം പ്രകാശ് കുടുംബത്തെ ഫോണിൽ അറിയിക്കുകയായിരുന്നു. തട്ടിക്കൊണ്ടുപോയ സംഘം ആവശ്യപ്പെട്ടതാണെന്നു തോന്നിപ്പിക്കുന്ന തരത്തിൽ കരഞ്ഞുതളർന്ന നിലയിലുള്ള വീഡിയോയും ഇയാൾ കുടുംബത്തിന് അയച്ചു.
പുണെയിൽ ജോലിയും സ്ഥിരവരുമാനവുമില്ലാതെ ബുദ്ധിമുട്ടിലായിരുന്ന ഓം പ്രകാശ് പല ആവശ്യങ്ങൾക്കായി വീട്ടുകാരോട് നിരന്തരം പണം ആവശ്യപ്പെട്ടിരുന്നു. എളുപ്പത്തിൽ പണം സമ്പാദിക്കാമെന്ന ചിന്തയിലാണ് സ്വന്തം തട്ടിക്കൊണ്ടുപോകൽ നാടകം ആസൂത്രണം ചെയ്തതെന്നാണ് പൊലീസ് പറയുന്നത്.
വീഡിയോ ലഭിച്ചതോടെ ഭയന്ന കുടുംബം ഉത്തർപ്രദേശ് പൊലീസിൽ പരാതി നൽകി. തുടർന്ന് നടത്തിയ അന്വേഷണത്തിൽ ഓം പ്രകാശിന്റെ മൊബൈൽ ഫോൺ കേന്ദ്രീകരിച്ച് നടത്തിയ പരിശോധനയിൽ ഇയാൾ പുണെയിലുണ്ടെന്ന് കണ്ടെത്തി. ഖാഡ്കിയിലെ ഒരു ലോഡ്ജിൽ നിന്നാണ് പൊലീസ് യുവാവിനെ കണ്ടെത്തിയത്.
തുടർന്ന് നടത്തിയ ചോദ്യം ചെയ്യലിലാണ് തട്ടിക്കൊണ്ടുപോകൽ നാടകം താൻ തന്നെയാണ് ആസൂത്രണം ചെയ്തതെന്ന് ഓം പ്രകാശ് സമ്മതിച്ചത്. സംഭവത്തിൽ പൊലീസ് വിശദമായ അന്വേഷണം തുടരുകയാണ്.
മധ്യപ്രദേശിലെ ഭോപ്പാലിൽ മനുഷ്യന്റെ വൃഷണങ്ങൾക്ക് വിദേശരാജ്യങ്ങളിൽ കോടികൾ വിലയുണ്ടെന്ന വ്യാജ പ്രചാരണത്തിൽ വിശ്വസിച്ച് 17കാരനെ കൊലപ്പെടുത്തി ജനനേന്ദ്രിയം നീക്കം ചെയ്ത സംഭവത്തിൽ അഞ്ചുപേർ അറസ്റ്റിൽ. കോളജ് വിദ്യാർഥി ഉൾപ്പെടെയുള്ള സംഘമാണ് കൊലപാതകത്തിന് പിന്നിൽ. അറസ്റ്റിലായവരിൽ രണ്ടുപേർ പ്രായപൂർത്തിയായവരും മൂന്നുപേർ പ്രായപൂർത്തിയാകാത്തവരുമാണ്.
ഉപജീവനത്തിനായി തെരുവിൽ പേനകളും കീചെയിനുകളും വിറ്റിരുന്ന 17കാരനാണ് കൊല്ലപ്പെട്ടത്. മനുഷ്യന്റെ ജനനേന്ദ്രിയത്തിന് 1.20 കോടി രൂപ വരെ വില ലഭിക്കുമെന്ന തരത്തിലുള്ള ഇൻസ്റ്റഗ്രാം റീലുകൾ കണ്ടാണ് പ്രതികൾ കൊലപാതകത്തിന് പദ്ധതിയിട്ടതെന്ന് പൊലീസ് പറഞ്ഞു.
രണ്ടാം വർഷ ബി.ബി.എ വിദ്യാർഥിയായ 20കാരൻ സോഹബ് ഖാനാണ് കേസിലെ മുഖ്യസൂത്രധാരൻ. വ്യാജ ഡോക്ടറായി ചമഞ്ഞ ഇയാൾ കൊലപാതകത്തിന് ഗൂഢാലോചന നടത്തിയെന്നാണ് പൊലീസ് കണ്ടെത്തൽ. സോഹബ് നേരിട്ട് കൃത്യത്തിൽ പങ്കെടുത്തില്ലെങ്കിലും വിഡിയോ കോളിലൂടെ മറ്റുള്ളവർക്ക് നിർദേശങ്ങൾ നൽകിയിരുന്നു. 15 വയസിന് മുകളിലുള്ള ആൺകുട്ടിയെ വേണമെന്നായിരുന്നു ഇയാളുടെ നിർദേശം. ഇതിന്റെ അടിസ്ഥാനത്തിലാണ് 17കാരനെ സംഘം ലക്ഷ്യമിട്ടത്. പ്രതികളിൽ ചിലർക്ക് കുട്ടിയെ നേരത്തെ പരിചയമുണ്ടായിരുന്നെന്നും പൊലീസ് വ്യക്തമാക്കി. കുട്ടിയെ കൊലപ്പെടുത്താൻ നേരത്തെയും രണ്ടുതവണ ശ്രമിച്ചിരുന്നെങ്കിലും പരാജയപ്പെട്ടു.
ഓഗസ്റ്റ് ആറിനായിരുന്നു ക്രൂരമായ കൊലപാതകം. വഴിയിൽ തർക്കമുണ്ടെന്നും സഹായിക്കണമെന്നും പറഞ്ഞ് 100 രൂപ നൽകാമെന്ന് വാഗ്ദാനം ചെയ്താണ് കുട്ടിയെ പ്രതികൾ വിജനമായ സ്ഥലത്തേക്ക് കൂട്ടിക്കൊണ്ടുപോയത്. അവിടെവച്ച് പിന്നിൽനിന്ന് കുത്തിക്കൊലപ്പെടുത്തി. തുടർന്ന് സോഹബിന്റെ നിർദേശപ്രകാരം ബ്ലേഡ് ഉപയോഗിച്ച് വൃഷണങ്ങൾ നീക്കം ചെയ്ത് മൃതദേഹം ഉപേക്ഷിച്ചു.
ഓഗസ്റ്റ് 10ന് ഛോട്ടാ തലാബിലെ ധോബിഘട്ടിൽ അഴുകിയ നിലയിൽ മൃതദേഹം കണ്ടെത്തി. വയറിലും കാലുകളിലും ആഴത്തിലുള്ള മുറിവുകളുണ്ടായിരുന്നു. വൃഷണങ്ങൾ നീക്കം ചെയ്ത നിലയിലായിരുന്നു മൃതദേഹം. പോസ്റ്റുമോർട്ടത്തിൽ കൊലപാതകമാണെന്ന് സ്ഥിരീകരിച്ചതോടെ പൊലീസ് അന്വേഷണം ആരംഭിച്ചു. തിരിച്ചറിയാൻ കഴിയാത്തതിനാൽ മൃതദേഹം സംസ്കരിച്ചതോടെ അന്വേഷണം പ്രതിസന്ധിയിലായി.
എന്നാൽ ഓഗസ്റ്റ് 15ന് കാണാതായ മകനെ അന്വേഷിച്ച് അമ്മ പൊലീസിനെ സമീപിച്ചതോടെയാണ് കേസിൽ വഴിത്തിരിവുണ്ടായത്. കൈയിലെ ടാറ്റൂവിന്റെ സഹായത്തോടെ മൃതദേഹം മകന്റേതാണെന്ന് തിരിച്ചറിഞ്ഞു. തുടർന്ന് നടത്തിയ അന്വേഷണത്തിലാണ് പ്രതികളെക്കുറിച്ചുള്ള നിർണായക വിവരങ്ങൾ പുറത്തുവന്നത്.
കൊലപാതകത്തിന് ശേഷം നീക്കം ചെയ്ത വൃഷണങ്ങൾ പ്രതികൾ പ്ലാസ്റ്റിക് കവറിൽ സൂക്ഷിച്ചിരുന്നു. എന്നാൽ വാങ്ങാൻ ആളില്ലെന്ന് മനസ്സിലായതോടെ മൂന്ന് ദിവസത്തിന് ശേഷം ശരീരഭാഗം തടാകത്തിൽ ഉപേക്ഷിച്ചതായി പൊലീസ് പറഞ്ഞു. കൃത്യത്തിന് ഉപയോഗിച്ച കത്തിയും ബ്ലേഡും പൊലീസ് കണ്ടെടുത്തു.
സംഭവത്തിന് പിന്നിൽ അവയവക്കച്ചവടവുമായി ബന്ധപ്പെട്ട വൻ റാക്കറ്റുകളൊന്നുമില്ലെന്നാണ് പ്രാഥമിക അന്വേഷണത്തിൽ വ്യക്തമായതെന്ന് പൊലീസ് അറിയിച്ചു. കൊലപാതകത്തിന് പ്രേരണയായ ഇൻസ്റ്റഗ്രാം റീലിന്റെ ഉറവിടവും അത് പ്രചരിപ്പിച്ചവരെയും കണ്ടെത്താനുള്ള അന്വേഷണം തുടരുകയാണ്.
സൂര്യയെ കേന്ദ്രകഥാപാത്രമാക്കി നിരവധി താരങ്ങൾ അണിനിരക്കുന്ന വിശ്വനാഥ് ആൻഡ് സൺസ് ഇക്കഴിഞ്ഞ ഇടയ്ക്കാണ് റിലീസ് ചെയ്യുന്നത്. മികച്ച പ്രേക്ഷക പിൻതുണ നേടിയാണ് ചിത്രം മുന്നേറുന്നത്. കുടുംബപ്രേക്ഷകരെ ലക്ഷ്യമിട്ടുള്ള പ്രമേയത്തിലൂടെ ശ്രദ്ധ നേടിയ ചിത്രത്തിൽ അഭിനയിച്ച താരങ്ങളുടെ പ്രതിഫലവും ഇപ്പോൾ ചർച്ചയാകുകയാണ്. സൂര്യയുടെ കോടികൾ വരുന്ന പ്രതിഫലം മുതൽ രവീണ ടണ്ടൻ, രാധിക ശരത്‌കുമാർ, മമിത ബൈജു എന്നിവരുടെ പ്രതിഫലം വരെ വ്യത്യസ്ത തലമുറകളിൽ നിന്നുള്ള താരങ്ങളുടെ പ്രതിഫലവും വമ്പൻ ചർച്ചകൾക്കാണ് വഴി വച്ചത്. പ്രത്യേകിച്ചും മലയാളി കൂടിയയായ മമിത യുടെ മാർക്കറ്റ് വാല്യൂ ഉയർന്നതിനെ കുറിച്ചും ചർച്ചകൾ ഏറെയാണ്.
വിശ്വനാഥ് ആൻഡ് സൺസ്’ന് സൂര്യ വാങ്ങിയത് 45 കോടി രൂപ
വിവിധ റിപ്പോർട്ട് പ്രകാരം ചിത്രത്തിലെ ഏറ്റവും കൂടുതൽ പ്രതിഫലം വാങ്ങുന്ന താരം സൂര്യയാണ്. ഏകദേശം 45 കോടി രൂപയാണ് സൂര്യയുടെ പ്രതിഫലമെന്നാണ് റിപ്പോർട്ട്. നേരത്തെ ചില ചിത്രങ്ങൾക്ക് സൂര്യ 20 കോടി മുതൽ 25 കോടി രൂപ വരെ പ്രതിഫലം വാങ്ങിയിരുന്നതായി റിപ്പോർട്ടുകളുണ്ടായിരുന്നു. അതുമായി താരതമ്യം ചെയ്യുമ്പോൾ പുതിയ ചിത്രത്തിനായി വലിയ തുകയുടെ വർധനവാണ് സൂര്യ നടത്തിയത്.
ചിത്രത്തിൽ സഞ്ജയ് വിശ്വനാഥ് എന്ന കഥാപാത്രത്തെയാണ് സൂര്യ അവതരിപ്പിക്കുന്നത്. ഒരു അന്താരാഷ്ട്ര പിസ്റ്റൾ ഷൂട്ടറായ സഞ്ജയിന്റെ ജീവിതം അപ്രതീക്ഷിതമായ ഒരു കുടുംബപ്രശ്നത്തെ തുടർന്ന് മാറിമറിയുന്നതാണ് കഥയുടെ പ്രധാന ഭാഗം. അടുത്തകാലത്ത് സൂര്യ അവതരിപ്പിച്ചിട്ടുള്ള തീവ്രമായ കഥാപാത്രങ്ങളിൽ നിന്ന് വ്യത്യസ്തമായി, കൂടുതൽ വൈകാരികവും ലളിതവുമായ ഒരു വശം അവതരിപ്പിക്കാനുള്ള അവസരമാണ് ഈ കഥാപാത്രം താരത്തിന് നൽകുന്നത്.
രവീണ ടണ്ടൻ, രാധിക ശരത്‌കുമാർ, മമിത ബൈജു എന്നിവരുടെ പ്രതിഫലം
ചിത്രത്തിലെ സഹതാരങ്ങളുടെയും പ്രതിഫലം ശ്രദ്ധ നേടുന്നുണ്ട്. ഫിലിംബീറ്റ് റിപ്പോർട്ട് പ്രകാരം രവീണ ടണ്ടന് ഏകദേശം 2 കോടി മുതൽ 3 കോടി രൂപ വരെയാണ് പ്രതിഫലം ലഭിച്ചതെന്നാണ് പറയുന്നത്. രണ്ട് പതിറ്റാണ്ടിലേറെക്കാലത്തിന് ശേഷം തമിഴ് സിനിമയിലേക്കുള്ള രവീണ ടണ്ടന്റെ തിരിച്ചുവരവ് കൂടിയാണ് ഈ ചിത്രം.
പ്രധാനപ്പെട്ടൊരു കഥാപാത്രത്തെ അവതരിപ്പിക്കുന്ന **രാധിക ശരത്‌കുമാറിന് ഏകദേശം 40 ലക്ഷം രൂപയാണ് പ്രതിഫലമെന്നാണ് റിപ്പോർട്ട്
അതേസമയം, പ്രേമലു എന്ന ചിത്രത്തിലൂടെ വലിയ ജനപ്രീതി നേടിയ മമിത ബൈജു ‘മാഡി’ എന്ന കഥാപാത്രത്തെയാണ് അവതരിപ്പിക്കുന്നത്. ഇപ്പോൾ ഒരു ചിത്രത്തിന് ഏകദേശം 1.5 കോടി മുതൽ 3 കോടി രൂപ വരെ മമിത പ്രതിഫലം വാങ്ങുന്നതായാണ് റിപ്പോർട്ട്. തമിഴ് സിനിമയിലും മമിതയ്ക്ക് കൂടുതൽ അവസരങ്ങൾ ലഭിക്കുന്നതിന് അവരുടെ വർധിച്ചുവരുന്ന ജനപ്രീതി സഹായിക്കുന്നുണ്ട്.
വിശ്വനാഥ് ആൻഡ് സൺസ്’: അഭിനേതാക്കൾ, അണിയറപ്രവർത്തകർ, കഥ
വെങ്കി അറ്റ്ലൂരി സംവിധാനം ചെയ്യുന്ന ‘വിശ്വനാഥ് ആൻഡ് സൺസ്’ ഹാസ്യം, പ്രണയം, വൈകാരികത, കുടുംബബന്ധങ്ങൾ, ഡ്രാമ എന്നിവ ചേർന്ന ഒരു ഫാമിലി എന്റർടെയ്‌നറായാണ് ഒരുക്കിയിരിക്കുന്നത്.
ശബരിമല: തരുൺ മൂർത്തി സംവിധാനം ചെയ്യുന്ന മോഹൻലാൽ ചിത്രം അതിമനോഹരം പമ്പയിൽ ചിത്രീകരണം ആരംഭിച്ചു. ചിത്രത്തിന്റെ രണ്ടാം ഷെഡ്യൂളിന്റെ ഭാഗമായാണ് ശബരിമലയിലെ രംഗങ്ങൾ ചിത്രീകരിക്കുന്നത്. നടൻ മോഹൻലാലും അണിയറപ്രവർത്തകരും മറ്റ് താരങ്ങളും പമ്പയിലെത്തി.
നിലക്കൽ ബസ് സ്റ്റാൻഡും പമ്പയും ഉൾപ്പെടെ രണ്ട് സ്ഥലങ്ങളിൽ ചിത്രീകരണം നടത്താൻ ഹൈക്കോടതി അനുമതി നൽകിയിരുന്നു. ശബരിമലയെയോ വിശ്വാസത്തെയോ മോശമായി ചിത്രീകരിക്കുന്ന രംഗങ്ങൾ ഉണ്ടാകരുത് എന്നതടക്കമുള്ള കർശന നിബന്ധനകളോടെയാണ് കോടതി അനുമതി നൽകിയത്.
നിബന്ധനകൾ പാലിക്കുന്ന പക്ഷം ചിത്രീകരണത്തിന് അനുമതി നൽകാമെന്ന് റാന്നി ഡിവിഷണൽ ഫോറസ്റ്റ് ഓഫീസർ നേരത്തെ കോടതിയെ അറിയിച്ചിരുന്നു. എന്നാൽ പെരിയാർ ടൈഗർ റിസർവ് മേഖലയ്ക്കുള്ളിൽ ചിത്രീകരണം അനുവദിക്കാനാവില്ലെന്നും ഡിഎഫ്ഒ വ്യക്തമാക്കിയിരുന്നു. തീർഥാടകർക്ക് ബുദ്ധിമുട്ടുണ്ടാക്കുന്ന രീതിയിൽ ചിത്രീകരണം നടത്തരുതെന്നും വനവും വന്യജീവികളും പരിസ്ഥിതിയും സംരക്ഷിക്കപ്പെടണമെന്നും ഹൈക്കോടതി നിർദേശിച്ചു.
വനംവകുപ്പ് അനുമതി നിഷേധിച്ചതിനെ തുടർന്നാണ് നിർമാതാക്കൾ ഹൈക്കോടതിയെ സമീപിച്ചത്. തുടർന്ന് കോടതി നിബന്ധനകളോടെ ചിത്രീകരണത്തിന് അനുമതി നൽകുകയായിരുന്നു.
അതേസമയം, അതിമനോഹരം ഡിസംബർ 24ന് ലോകമെമ്പാടും റിലീസ് ചെയ്യുമെന്ന് അണിയറപ്രവർത്തകർ നേരത്തെ പ്രഖ്യാപിച്ചിരുന്നു. ചിത്രത്തിന്റെ 80 ശതമാനം ഷൂട്ടിംഗും പൂർത്തിയായതായി സംവിധായകൻ തരുൺ മൂർത്തി കഴിഞ്ഞ ദിവസം സമൂഹമാധ്യമങ്ങളിലൂടെ അറിയിച്ചിരുന്നു.
തൊടുപുഴയാണ് ചിത്രത്തിന്റെ പ്രധാന ലൊക്കേഷൻ. കൊച്ചിയിൽ രണ്ടാഴ്ചയോളം ചിത്രീകരണം നടന്നിരുന്നു. തൊടുപുഴ, കൊച്ചി, ശബരിമല, ഹൈദരാബാദ്, മുംബൈ എന്നിവിടങ്ങളിലായാണ് അവസാനഘട്ട ചിത്രീകരണം പുരോഗമിക്കുന്നത്. ‘ലൗലജൻ’ എന്ന പൊലീസ് സബ് ഇൻസ്പെക്ടറുടെ ഔദ്യോഗിക ജീവിതത്തിലും വ്യക്തിജീവിതത്തിലും ഉണ്ടാകുന്ന സംഘർഷങ്ങളാണ് ചിത്രത്തിന്റെ പ്രമേയമെന്നാണ് സൂചന.
മീര ജാസ്മിൻ നായികയാകുന്ന ചിത്രത്തിൽ ലാലു അലക്സ്, മനോജ് കെ. ജയൻ, ജഗദീഷ്, ഇർഷാദ്, സുധീഷ്, പ്രമോദ് വെളിയനാട്, സജീവൻ, ശ്രീനാഥ് ബാബു, കിരൺ പീതാംബരൻ, വിജി വിശ്വനാഥ്, ഭാമ അരുൺ, പ്രാർത്ഥന എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു. ആഷിഖ് ഉസ്മാൻ പ്രൊഡക്ഷൻസിന്റെ ബാനറിൽ ആഷിഖ് ഉസ്മാനാണ് ചിത്രം നിർമിക്കുന്നത്.
മോഹൻലാലും തരുൺ മൂർത്തിയും വീണ്ടും ഒന്നിക്കുന്ന ചിത്രം എന്ന നിലയിൽ അതിമനോഹരം വലിയ പ്രതീക്ഷയോടെയാണ് ആരാധകരും സിനിമാപ്രേമികളും കാത്തിരിക്കുന്നത്.
വധശിക്ഷ നടപ്പാക്കുന്നതിനുള്ള തൂക്കിക്കൊല രീതി നിർത്തലാക്കണമെന്ന ആവശ്യം സുപ്രീം കോടതി തള്ളി. എന്നാൽ, വധശിക്ഷ നടപ്പാക്കാൻ കൂടുതൽ മാനുഷികവും വേദന കുറഞ്ഞതുമായ ബദൽ മാർഗങ്ങൾ കണ്ടെത്തുന്നതിന് കേന്ദ്രസർക്കാർ വിദഗ്ധ സമിതിയെ നിയോഗിച്ച് പഠനം നടത്താമെന്ന് കോടതി വ്യക്തമാക്കി.
ജസ്റ്റിസുമാരായ വിക്രം നാഥ്, സന്ദീപ് മേത്ത എന്നിവരടങ്ങിയ ബെഞ്ചാണ് ഹർജി പരിഗണിച്ചത്. നിലവിൽ പ്രാബല്യത്തിലുള്ള തൂക്കിക്കൊല രീതി ഭരണഘടനാവിരുദ്ധമാണെന്ന് പ്രഖ്യാപിക്കണമെന്നാവശ്യപ്പെട്ട് സമർപ്പിച്ച ഹർജിയാണ് കോടതി തള്ളിയത്. തൂക്കിക്കൊലയ്ക്ക് പകരം വേദന കുറഞ്ഞ മറ്റൊരു മാർഗം നടപ്പാക്കണമെന്നായിരുന്നു ഹർജിക്കാരന്റെ ആവശ്യം.
അതേസമയം, ഇന്നത്തെ വിധി ഈ വിഷയത്തിലെ അവസാന വാക്കല്ലെന്നും സുപ്രീം കോടതി വ്യക്തമാക്കി. വധശിക്ഷ നടപ്പാക്കുന്നതിനുള്ള ബദൽ മാർഗങ്ങളെക്കുറിച്ച് നിർണായകമായ ശാസ്ത്രീയ, വൈദ്യശാസ്ത്രപരമോ അനുഭവാധിഷ്ഠിതമോ ആയ പുതിയ തെളിവുകൾ ഭാവിയിൽ ലഭിക്കുകയാണെങ്കിൽ വിഷയം വീണ്ടും ഭരണഘടനാപരമായി പരിശോധിക്കാമെന്ന് കോടതി നിരീക്ഷിച്ചു.
വധശിക്ഷ നടപ്പാക്കുന്ന നിലവിലെ രീതി പുനഃപരിശോധിക്കുന്നതിൽ കേന്ദ്രസർക്കാരിന് തടസ്സമില്ലെന്നും, ആവശ്യമായാൽ വിദഗ്ധരുടെ സമിതി രൂപീകരിച്ച് കൂടുതൽ മാനുഷികമായ ബദൽ മാർഗങ്ങൾ സംബന്ധിച്ച് സമഗ്ര പഠനം നടത്താമെന്നും കോടതി വ്യക്തമാക്കി.
ഇന്ത്യയിൽ നിലവിൽ വധശിക്ഷ നടപ്പാക്കുന്നത് ‘കഴുത്തിൽ കുരുക്കിട്ട് മരണം സംഭവിക്കുന്നതുവരെ തൂക്കുക’ എന്ന രീതിയിലാണ്. ഈ രീതിയുടെ ഭരണഘടനാസാധുത 1983-ലെ ‘ദീന വേഴ്സസ് യൂണിയൻ ഓഫ് ഇന്ത്യ’ കേസിൽ സുപ്രീം കോടതി ശരിവെച്ചിരുന്നു. ആ വിധി പുനഃപരിശോധിക്കേണ്ട സാഹചര്യം നിലവിൽ ഇല്ലെന്നാണ് സുപ്രീം കോടതിയുടെ പുതിയ നിരീക്ഷണം.
തിരുവനന്തപുരം. വിഴിഞ്ഞം തുറമുഖത്ത് കരമാർഗമുള്ള ചരക്ക് ഗതാഗതത്തിന് ഔദ്യോഗികമായ തുടക്കം.
മുഖ്യമന്ത്രി വി ഡി സതീശൻ എക്സീം പ്രവർത്തനത്തിന്റെ ഫ്ലാഗ് ഓഫ് ചടങ്ങ് നിർവഹിച്ചു.കേരളത്തിന്റെ തീരദേശ മേഖലയെ ബന്ധിപ്പിച്ചു കൊണ്ടുള്ള സംസ്ഥാന സർക്കാരിന്റെ പദ്ധതിയായ മിഷൻ സമുദ്രയുടെ ലോഗോ ലോഞ്ചും ചടങ്ങിൽ നടന്നു.
വിഴിഞ്ഞം തുറമുഖത്ത് നിന്നുള്ള ആദ്യ കണ്ടൈനർ യൂറോപ്പിലേക്കുള്ള കപ്പല് കയറി. ഇനി കരമാർഗ്ഗം വിഴിഞ്ഞം ദക്ഷിണ ഇന്ത്യയെ തൊടും.
തീരദേശങ്ങളെ പരസ്പരം ബന്ധിപ്പിക്കുന്ന സംസ്ഥാന സർക്കാരിന്റെ പദ്ധതിയായ മിഷൻ സമുദ്രയുടെ ഔദ്യോഗിക ലോഞ്ചിങും ചടങ്ങിൽ നടന്നു
അടിസ്ഥാന സൗകര്യ വികസനങ്ങളുടെ അപര്യാപ്തത വിഴിഞ്ഞം തുറമുഖത്തെ പിന്നോട്ടാക്കിയെന്ന് മുഖ്യമന്ത്രി .
വ്യവസായ വകുപ്പ് മന്ത്രി പി കെ കുഞ്ഞാലിക്കുട്ടി പരിപാടിയുടെ അധ്യക്ഷ കർമ്മം നിർവഹിച്ചു. ക്ഷണിക്കപ്പെട്ട അതിഥികൾ ഭൂരിഭാഗവും ചടങ്ങിൽ പങ്കെടുത്തില്ല .
കോഴിക്കോട്. അധ്യാപകർ പ്രതികളായ വടകര എംഡിഎംഎ കേസിൽ അന്വേഷണം വഴിമുട്ടി.ലഹരിക്കടത്തിലെ പ്രധാന കണ്ണിയെന്ന് അന്വേഷണ സംഘം സംശയിക്കുന്ന വയനാട് സ്വദേശി ഇപ്പോഴും ഒളിവിൽ.ഇയാളെ കണ്ടെത്താനാകാത്തതോടെ ലഹരി ഇടപാടിന്റെ പണമൊഴുക്കും പിന്നിലെ കൂടുതൽ കണ്ണികളിലേക്കുള്ള അന്വേഷണവും നിലച്ചിരിക്കുകയാണ്.
അന്വേഷണ ഉദ്യോഗസ്ഥന്റെ സ്ഥലംമാറ്റവും കേസിന്റെ തുടർ അന്വേഷണത്തെ ബാധിച്ചു.
വടകരയിൽ അധ്യാപകർ ഉൾപ്പെടെ പ്രതികളായ എംഡിഎംഎ കേസിലാണ് അന്വേഷണത്തിന് ഇപ്പോൾ ബ്രേക്ക്.കേസിൽ അറസ്റ്റിലായ പ്രതികൾ അയച്ച പണമെല്ലാം ഒടുവിൽ എത്തിയിരുന്നത് വയനാട് സ്വദേശിയുടെ അക്കൗണ്ടിലേക്കെന്നാണ് അന്വേഷണ സംഘത്തിന്റെ കണ്ടെത്തൽ.ലഹരി ഇടപാടിലെ പ്രധാന കണ്ണിയെന്ന് സംശയിക്കുന്ന ഇയാളെ കണ്ടെത്താൻ അന്വേഷണം നടത്തിയെങ്കിലും ഫലമുണ്ടായില്ല.
.അറസ്റ്റിലായ അധ്യാപികമാരായ കീർത്തന, കാവ്യ നീഷ്മ, ഡെലിവറി ബോയ് ജിജിൻ കൂര്യാക്കോസ് എന്നിവരുടെ സാമ്പത്തിക ഇടപാടുകളിലേക്കും അന്വേഷണ സംഘം എത്തിയിരുന്നു.
കീർത്തനയുടെ ബാങ്ക് അക്കൗണ്ട് വഴി മാത്രം നടന്നത് ഏകദേശം 15 ലക്ഷം രൂപയുടെ ഇടപാട്.ജിജിൻ കൂര്യാക്കോസിന്റെ അക്കൗണ്ട് വഴി നടന്നത് ഒരു കോടി രൂപയുടെ ഇടപാട്.ഇടപാടുകളുടെ പണമൊഴുക്ക് പരിശോധിച്ചപ്പോഴാണ് പണം ഒടുവിൽ വയനാട് സ്വദേശിയിലേക്ക് എത്തിയതായി കണ്ടെത്തിയത്.പ്രതികളുടെ വാട്സാപ്പ് ചാറ്റുകളിലും നിർണായക വിവരങ്ങൾ അന്വേഷണ സംഘത്തിന് ലഭിച്ചിരുന്നു.ലഹരി ഇടപാടുമായി ബന്ധപ്പെട്ട ചാറ്റുകളും പണമിടപാടുകളുടെ വിവരങ്ങളും അന്വേഷണത്തിൽ തെളിവുകളായി.
എന്നാൽ കേസിലെ പ്രധാന കണ്ണിയായ വയനാട് സ്വദേശിയെ കണ്ടെത്താൻ കഴിയാതെ പോയതോടെ അന്വേഷണം അവിടെത്തന്നെ തടസ്സപ്പെട്ടു.
ഇയാളെ കണ്ടെത്തി ചോദ്യം ചെയ്താൽ മാത്രമേ ലഹരി ശൃംഖലയിലെ കൂടുതൽ കണ്ണികളിലേക്ക് അന്വേഷണം നീളൂ.
എവിടെ നിന്നാണ് എംഡിഎംഎ എത്തിയത്?
ആർക്കൊയാണ് വിതരണം ചെയ്തത്?
പണമൊഴുക്ക് എവിടേക്കാണ് നീണ്ടത്?തുടങ്ങിയ നിർണായക ചോദ്യങ്ങൾക്കും ഇയാളുടെ മൊഴി നിർണായകമാണ്.അതിനിടെ കേസിലെ അന്വേഷണ ഉദ്യോഗസ്ഥന്റെ സ്ഥലംമാറ്റവും അന്വേഷണത്തിന് തിരിച്ചടിയായി.
പ്രധാന പ്രതിയെ കണ്ടെത്താനാകാതെ, അന്വേഷണ ഉദ്യോഗസ്ഥനും മാറിയതോടെ കേസിന്റെ തുടർനടപടികൾ മന്ദഗതിയിലായി.
റിയാലിറ്റി ഷോ താരം അനുമോളുടെ വിവാഹവാർത്ത കണ്ടാണ് ഇന്ന് മിനി സ്‌ക്രീൻ പ്രേക്ഷകരിൽ പലരും ഉണർന്നത്. ഇക്കഴിഞ്ഞ ഏഴാം സീസൺ ബിഗ് ബോസിലെ വിജയി കൂടി ആയിരുന്ന അനുമോൾ മിനി സ്‌ക്രീൻ രംഗത്ത് കൂടിയാണ് സജീവം ആകുന്നത്. സ്റ്റർമാജിക്ക് താരം കൂടിയായ അനുമോളുടെ പേരും പ്രശസ്തിയും ബിഗ് ബോസിൽ എത്തിയതോടെയാണ് കൂടിയത് എന്ന് പറയുന്നതിൽ തെറ്റില്ല. സീരിയൽ താരം കൂടിയായ അനുമോൾ ചെറുതും വലുതും ആയ റോളുകളിലൂടെ ആണ് മിനി സ്‌ക്രീനിൽ സ്ഥാനം ഉറപ്പിച്ചത്.
ഉദ്‌ഘാടനവേദികളിൽ സജീവമായ അനുമോൾ തീർത്തും അപ്രതീക്ഷിതമായിട്ടാണ് ബിഗ് ബോസിൽ എത്തിയത്. ബിഗ് ബോസ് വീട്ടിൽ സഹമത്സരാര്ഥി ആയിരുന്ന അനീഷും ആയുള്ള കോംബോ ഏറെ ചർച്ച ചെയ്യപ്പെട്ടിരുന്നു. അനീഷും അനുമോളും ഒന്നിക്കുന്നു എന്ന് വാർത്തകൾ പോലും വന്നു. എന്നാൽ ഏവരെയും ഞെട്ടിച്ചുകൊണ്ടാണ് ഇന്ന് പുലർച്ചെ ഗുരുവായൂരപ്പനെ സാക്ഷിയാക്കി അനുമോൾ – ഭുവനേഷ്. വിവാഹം നടക്കുന്നത്.
തമിഴ്നാട് സ്വദേശിയും നടനും മോഡലുമായ ഇന്റഫ്‌ളുവൻസറും കൂടിയാണ് ഭുവനേഷ് രാജേന്ദിരൻ.
ഫാഷൻ, ട്രാവൽ, ലൈഫ് സ്‌റ്റൈൽ എന്നിവയിലാണ് ഭുവനേഷിന്റെ താത്പര്യം. കൂടാതെ മോഡലിംഗിലും ശ്രദ്ധിക്കപ്പെട്ടിട്ടുണ്ട്. വിവാഹത്തിന്റെ വിശേഷങ്ങൾ പരമാവധി രഹസ്യമാക്കാൻ അനുമോൾ ശ്രദ്ധിച്ചിരുന്നു. അത് മനഃപൂർവ്വം ആണെന്നും. അനുമോൾ വെളിപ്പെടുത്തി.
അനുവിനേ ഭുവനേഷ് താലികെട്ടുന്ന വേളയിൽ കണ്ണീരണിഞ്ഞു നിൽക്കുന്ന അച്ഛന്റെ ദൃശ്യങ്ങളും ഇപ്പോൾ വൈറൽ ആണ്.
