തിരുവനന്തപുരം: കുതിച്ചുയരുന്ന സവാളവില പിടിച്ചുനിർത്താൻ സർക്കാർ ഇടപെടുന്നു. 100 ടൺ സവാള ഇറക്കുമതി ചെയ്ത് കിലോയ്ക്ക് 35 രൂപ നിരക്കിൽ ഉപഭോക്താക്കൾക്ക് ലഭ്യമാക്കുമെന്ന് കൃഷിമന്ത്രി ടി. സിദ്ധിഖ് അറിയിച്ചു. സപ്ലൈകോയും ഹോർട്ടികോർപ്പും സംയുക്തമായി സവാള വിതരണം ഉറപ്പാക്കും.

സവാള സംഭരിക്കുന്നതിനായി കോൾഡ് സ്റ്റോറേജ് സൗകര്യം ഉൾപ്പെടെ ഒരുക്കാനുള്ള നടപടികളും സ്വീകരിച്ചിട്ടുണ്ട്. ബോധപൂർവം വില ഉയർത്താൻ ശ്രമിക്കുന്നവർക്കെതിരെ ശക്തമായ നടപടി സ്വീകരിക്കുമെന്നും മന്ത്രി പറഞ്ഞു.

നിലവിൽ സവാളയ്ക്ക് കിലോയ്ക്ക് 58 രൂപയ്ക്കു മുകളിലാണ് പല വിപണികളിലെയും വില. നാസിക് ഉൾപ്പെടെയുള്ള പ്രധാന ഉൽപാദന മേഖലകളിൽ ഉൽപാദനം കുറഞ്ഞതാണ് രാജ്യത്താകമാനം സവാളവില ഉയരാൻ കാരണമെന്നും മന്ത്രി വ്യക്തമാക്കി.

തിരുവനന്തപുരം:ശബരിമല സ്വർണക്കൊള്ള കേസിൽ ജയിലായിരുന്ന തിരുവിതാംകൂർ ദേവസ്വം ബോർഡ് മുൻ പ്രസിഡന്‍റ് പി എസ് പ്രശാന്തിന് ജാമ്യം ലഭിച്ചതിനെ തുടർന്ന് ജയിൽമോചിതനായി. കൊല്ലം വിജിലൻസ് കോടതിയാണ് ആരോഗ്യ പ്രശ്നങ്ങൾ പരിഗണിച്ച് ജാമ്യം അനുവദിച്ചത്. ഇതോടെ തിരുവനന്തപുരം സെൻട്രൽ ജയിലിലായിരുന്ന അദ്ദേഹം വൈകിട്ട് 7 മണിയോടെ പുറത്തിറങ്ങി.

ജൂലൈ 23നാണ് പി എസ് പ്രശാന്തിനെ പ്രത്യേക അന്വേഷണ സംഘം അറസ്റ്റ് ചെയ്തത്. പ്രശാന്തിനൊപ്പം അറസ്റ്റിലായ മുൻ ബോർഡ് അംഗം എ അജികുമാറിന് നേരത്തെ ജാമ്യം ലഭിച്ചിരുന്നു. ആരോഗ്യ പ്രശ്നങ്ങൾ പരിഗണിച്ചാണ് അജികുമാറിനും ജാമ്യം ലഭച്ചത്. ജൂലൈ 23നാണ് ഇരുവരെയും എസ്ഐടി അറസ്റ്റ് ചെയ്തത്.

2019-ലെ സ്വര്‍ണക്കൊള്ള മറച്ചുവെക്കാൻ 2025-ൽ പി എസ് പ്രശാന്ത് പ്രസിഡന്‍റായ ബോർഡ് ചെന്നൈ സ്മാർട്ട് ക്രിയേഷൻസിലേക്ക് പാളികൾ കൊടുത്തു വിട്ടെന്നാണ് എസ്ഐടിയുടെ കണ്ടെത്തൽ. ഹൈക്കോടതിയെ അറിയിക്കാതെയായിരുന്നു സ്വർണം പൂശാനായി വീണ്ടും പാളികൾ കൈമാറിയത്. കോടതിയുടെ മുൻകൂർ അനുമതി തേടാത്തത് സാങ്കേതിക പിഴവെന്നായിരുന്നു പി എസ് പ്രശാന്ത് വിശദീകരിച്ചത്. പ്രതികളുടെ വാദങ്ങൾ തള്ളിയ എസ്ഐടി ഗൂഡാലോചന ഉൾപ്പടെയുള്ള കുറ്റങ്ങൾ ചൂണ്ടിക്കാട്ടി അറസ്റ്റിലേക്ക് കടക്കുകയായിരുന്നു

തിരുവനന്തപുരം: പിഎംശ്രീ (PM SHRI) പദ്ധതിയുമായി സംസ്ഥാന സർക്കാർ ഒപ്പുവെച്ച ധാരണാപത്രത്തിൽനിന്ന് ഏകപക്ഷീയമായി പിന്മാറാൻ സാധിക്കില്ലെന്ന് മുഖ്യമന്ത്രി വി.ഡി. സതീശൻ. ധാരണാപത്രത്തിലെ വ്യവസ്ഥകൾ പ്രകാരം പിന്മാറ്റം സാധ്യമല്ലെന്ന നിയമോപദേശമാണ് സർക്കാരിന് ലഭിച്ചതെന്നും അദ്ദേഹം വ്യക്തമാക്കി.

കെപിസിസി രാഷ്ട്രീയകാര്യ സമിതി യോഗത്തിലാണ് മുഖ്യമന്ത്രി സർക്കാരിന്റെ ഔദ്യോഗിക നിലപാട് വിശദീകരിച്ചത്. വിഷയം വിശദമായി പഠിക്കുന്നതിനായി പ്രത്യേക മന്ത്രിസഭാ ഉപസമിതിയെ ചുമതലപ്പെടുത്തിയിട്ടുണ്ടെന്നും ഉപസമിതിയുടെ റിപ്പോർട്ട് ലഭിച്ചശേഷം തുടർനടപടികൾ സ്വീകരിക്കുമെന്നും അദ്ദേഹം അറിയിച്ചു.

എഐസിസി ജനറൽ സെക്രട്ടറി ദീപാ ദാസ് മുൻഷി പിഎംശ്രീ പദ്ധതി നടപ്പാക്കരുതെന്ന ശക്തമായ നിലപാട് യോഗത്തിൽ ഉന്നയിച്ചതിന് പിന്നാലെയാണ് മുഖ്യമന്ത്രിയുടെ വിശദീകരണം. ധാരണാപത്രത്തിൽനിന്ന് പിന്മാറുന്നത് നിയമപരമായ പ്രത്യാഘാതങ്ങൾക്കും വലിയ സാമ്പത്തിക ബാധ്യതകൾക്കും ഇടയാക്കുമെന്നാണ് സർക്കാരിന്റെ വിലയിരുത്തൽ.

പിന്മാറാൻ നിയമപരമായി സാധിക്കുന്ന സാഹചര്യമുണ്ടായിരുന്നെങ്കിൽ അത് പരിഗണിക്കുമായിരുന്നുവെന്നും നിലവിലെ സാഹചര്യത്തിൽ അതിന് കഴിയില്ലെന്നും മുഖ്യമന്ത്രി പറഞ്ഞു. ഇക്കാര്യത്തിൽ കോൺഗ്രസ് പാർട്ടിയുടെ വികാരം പൂർണമായും മാനിക്കുമെന്നും നയപരമായ കാര്യങ്ങളിൽ വിട്ടുവീഴ്ചയുണ്ടാകില്ലെന്നും അദ്ദേഹം വ്യക്തമാക്കി.

യോഗത്തിൽ ബോർഡ്-കോർപ്പറേഷൻ നിയമനങ്ങൾ വൈകുന്നതും ചർച്ചയായി. വിഷയത്തിൽ ഉടൻ തീരുമാനമെടുത്ത് സെപ്റ്റംബർ 15നകം നിയമനങ്ങൾ പൂർത്തിയാക്കുമെന്ന് മുഖ്യമന്ത്രി അറിയിച്ചു.

അതേസമയം, സംഘടനാപരമായ അനിശ്ചിതത്വങ്ങൾ പരിഹരിക്കുന്നതിനായി കെപിസിസി പ്രസിഡന്റ് സ്ഥാനത്ത് മാറ്റം വേണമെന്ന ആവശ്യം യോഗത്തിൽ ശക്തമായി ഉയർന്നു. പുതിയ അധ്യക്ഷനെ തിരഞ്ഞെടുക്കുന്നതിനുള്ള നടപടികൾ വേഗത്തിലാക്കാൻ എഐസിസി നേതൃത്വത്തിൽ സമ്മർദം ചെലുത്താനും യോഗത്തിൽ ധാരണയായി.