ശാസ്താംകോട്ട:കെ.ഐ.പി കനാലിൽ വളർന്ന് നിൽക്കുന്ന കാട് ഒഴിവാക്കാൻ പ്രദേശവാസികൾ പരാതി നൽകിയപ്പോൾ കനാൽ വശങ്ങളിലെ കൃഷി നീക്കം ചെയ്യാൻ നോട്ടീസ് നൽകി കെ.ഐ.പി അധികൃതർ.മൈനാഗപ്പള്ളിയിലാണ് വിചിത്ര നടപടി.മൈനാഗപ്പള്ളിയിലെ കനാൽ നിർമ്മാണം പൂർത്തിയാകാത്തതിനാൽ വർഷങ്ങളായി കനാൽ നിറയെ കാട് കയറി കിടക്കുകയാണ്.ചില ഭാഗങ്ങളിൽ വലിയ മരങ്ങൾ തന്നെ വളർന്ന് നിൽപ്പുണ്ട്.കനാൽ കാട് കയറി കിടക്കുന്നത് മൂലം ഇഴജന്തുക്കളുടെ ശല്യവും മാലിന്യ നിക്ഷേപവും രൂക്ഷമാണ്.സമീപകാലത്ത് കനാലിനോട് ചേർന്നുള്ള ഏതാനും വീടുകളിൽ പാമ്പുകളെ കണ്ടെത്തിയിരുന്നു.
ഇതിനെ തുടർന്ന് പ്രദേശവാസികൾ ഗ്രാമപഞ്ചായത്ത് അധികൃതർക്കും കെ.ഐ.പി അധികൃതർക്കും കാട് വെട്ടിത്തെളിക്കാൻ നടപടി സ്വീകരിക്കണമെന്ന് ആവശ്യപ്പെട്ട് പരാതിനൽകി.ഉടൻ തന്നെ കെ.ഐ.പി അധികൃതർ കനാലിൻ്റെ വശങ്ങളിൽ കൃഷി ചെയ്തിരിക്കുന്നവർക്ക് കൃഷി നീക്കം ചെയ്യാൻ നോട്ടീസ് നൽകിയിരിക്കുകയാണ്.കനാലിന് സമീപം താമസിക്കുന്ന ചിലർ വാഴ,മരച്ചീനി,ചേമ്പ് പോലുള്ള കൃഷികൾ നടത്താറുണ്ട്.ഇത് ഏതങ്കിലും തരത്തിൽ ബുദ്ധിമുട്ട് സൃഷ്ടിക്കാറില്ല.കൃഷി ചെയ്യുന്നത് മൂലം ഈ ഭാഗത്ത് ഇഴജന്തുക്കളുടെ ശല്യമോ മാലിന്യ നിക്ഷേപമോ ഉണ്ടാകാറുമില്ലന്നും പ്രദേശവാസികൾ പറയുന്നു.കെ.ഐ.പി അധികൃതരുടെ നടപടിയൽ പ്രതിഷേധം ഉയർന്നിട്ടുണ്ട്.
