ചിറ്റുമല:കിഴക്കേ കല്ലട മൂന്നു മുക്കിൽ കോൺഗ്രസിൻ്റെ കൊടിമരം തകർത്ത സംഭവത്തിൽ 20 ഡിവൈഎഫ്ഐ പ്രവർത്തകർക്കെതിരെ കിഴക്കേ കല്ലട പോലീസ് കേസെടുത്തു.കഴിഞ്ഞ ദിവസം വൈകിട്ടാണ് സംഘടിച്ചെത്തിയ സിപിഎം-ഡിവൈഎഫ്ഐ പ്രവർത്തകർ മൂന്നു മുക്കിൽ കോൺഗ്രസിൻ്റെ കൊടിമരം അറുത്തെടുത്തത്.തുടർന്ന് അറുത്തുമാറ്റിയ കൊടിമരവുമായി പ്രകടനം നടത്തിയ പ്രവർത്തകർ കിഴക്കേ കല്ലട പോലീസ് സ്റ്റേഷനു സമീപം വച്ച് കോൺഗ്രസ് മണ്ഡലം പ്രസിഡൻ്റ് വിനോദ് വില്ല്യേത്തിനെയും ജനറൽ സെക്രട്ടറി പ്രദീപ് കുമാറും സഞ്ചരിച്ച ബൈക്ക് തടഞ്ഞു നിർത്തി ഭീഷണിപ്പെടുത്തുകയും അസഭ്യം പറയുകയും ചെയ്തതായാണ് പരാതി.ഉടൻ തന്നെ പോലീസ് ഇടപെട്ടതിനാലാണ് അനിഷ്ട സംഭവങ്ങൾ ഒഴിവായത്.ശാസ്താംകോട്ട കോളേജിൽ നടന്ന യൂണിയൻ തെരഞ്ഞെടുപ്പിൽ വിജയിച്ച കെ.എസ്.യു നടത്തിയ ആഹ്ലാദ പ്രകടനത്തിനിടെ ഡിവൈഎഫ്ഐ -എസ്എഫ്ഐ പ്രവർത്തകരും യൂത്ത് കോൺഗ്രസ്-കെ.എസ്.യു പ്രവർത്തകരും തമ്മിൽ
സംഘർഷം ഉണ്ടായിരുന്നു.തുടർന്ന് പോലീസ് നടത്തിയ ലാത്തിച്ചാർജിൽ ഇരുഭാഗത്തെയും നിരവധി പ്രവർത്തകർക്ക് പരിക്കേറ്റിരുന്നു.ഇതിൻ്റെ തുടർച്ചയെന്നോണമാണ് കിഴക്കേ കല്ലടയിലും അക്രമങ്ങൾ ഉണ്ടായത്.അതിനിടെ പ്രദേശത്ത് സംഘർഷാവസ്ഥ നിലനിൽക്കുകയാണ്.
കിഴക്കേ കല്ലടയിലെ കോൺഗ്രസിന്റെ കൊടിമരങ്ങൾ നശിപ്പിക്കുകയുണ്ടായി. അത് ചോദ്യം ചെയ്യുകയും,അതിനെതിരെ പരാതി കൊടുക്കാൻ പോലീസ് സ്റ്റേഷനിൽ എത്തുകയും ചെയ്ത മണ്ഡലം പ്രസിഡൻ്റിനെ ആക്രമിക്കാൻ ശ്രമിക്കുകയും,സ്കൂട്ടർ തകർക്കുകയും ചെയ്ത ഡിവൈഎഫ്ഐ -എസ്എഫ്ഐ പ്രവർത്തകരെ ഉടൻ അറസ്റ്റ് ചെയ്യണമെന്ന് ആവശ്യപ്പെട്ടുകൊണ്ട് കിഴക്കേ കല്ലട,ചിറ്റുമല മണ്ഡലം കമ്മിറ്റികളുടെ നേതൃത്വത്തിൽ പ്രതിഷേധ പ്രകടനം നടത്തി.മണ്ഡലം പ്രസിഡന്റ് വിനോദ് വില്ല്യേത്ത് അധ്യക്ഷത വഹിച്ചു.ഡിസിസി ജനറൽ സെക്രട്ടറി തുണ്ടിൽ നൗഷാദ്,കോൺഗ്രസ് ബ്ലോക്ക് പ്രസിഡന്റ് വൈ ഷാജഹാൻ,കല്ലട വിജയൻ,ചന്ദ്രൻ കല്ലട,ഗോപാലകൃഷ്ണപിള്ള,സൈമൺ വർഗീസ്,നകുല രാജൻ,അനീഷ് പടപ്പക്കര,റിയാസ് പറമ്പിൽ,ഷിബു മൺട്രോ,ഗോപൻ,റിജോ,മണി വൃന്ദാവൻ,ഉമാദേവിയമ്മ,മായാദേവി, പാപ്പച്ചൻ,പ്രദീപ്,അഖിലേഷ്,ഷാജി മുട്ടം,സതീഷ്,വസന്ത,സിബി,ജയശ്രീ പിള്ള,ഷീന വിനോദ്,ഗീത,എന്നിവർ നേതൃത്വം നൽകി.
