മുംബൈ: മുംബൈയിലെ കോസ്റ്റല് റോഡില് അമിതവേഗത്തിലെത്തിയ ആഡംബര ബിഎംഡബ്ല്യു കാര് നിയന്ത്രണം വിട്ട് ഡിവൈഡറിലിടിച്ച് 75 അടി താഴ്ചയിലേക്ക് പതിച്ച് മൂന്ന് വിദ്യാര്ഥികള് മരിച്ചു. കാറിലുണ്ടായിരുന്ന മറ്റൊരു വിദ്യാര്ഥി അതീവ ഗുരുതരാവസ്ഥയില് ആശുപത്രിയില് ചികിത്സയിലാണ്.
ഞായറാഴ്ച പുലര്ച്ചെ 5.20-ഓടെ ലാലാ ലജ്പത് റായ് കോളജിന് എതിര്വശമുള്ള ലോട്ടസ് ജെട്ടിക്ക് സമീപമാണ് അപകടം. മറൈന് ഡ്രൈവില്നിന്ന് ഹാജി അലി ഭാഗത്തേക്ക് പോവുകയായിരുന്ന വാഹനമാണ് അപകടത്തില്പ്പെട്ടതെന്ന് പൊലീസ് അറിയിച്ചു. അമിതവേഗതയില് സഞ്ചരിക്കുകയായിരുന്ന കാര് നിയന്ത്രണം വിട്ട് കോസ്റ്റല് റോഡിലെ ഡിവൈഡറിലേക്ക് ഇടിച്ചുകയറുകയും തുടര്ന്ന് ബാരിക്കേഡ് തകര്ത്ത് ഫ്ലൈഓവറില്നിന്ന് 75 അടിയോളം താഴ്ചയിലേക്ക് കൂപ്പുകുത്തുകയുമായിരുന്നുവെന്ന് കോസ്റ്റല് റോഡ് കണ്ട്രോള് റൂം അധികൃതര് വ്യക്തമാക്കി.
അപകടം നടന്നയുടന് കാറിലുണ്ടായിരുന്ന നാല് വിദ്യാര്ഥികളെയും സമീപത്തെ നായര് ആശുപത്രിയില് എത്തിച്ചെങ്കിലും മൂന്നുപേര് മരണത്തിന് കീഴടങ്ങിയിരുന്നു. ഷനായ് ഗജ്ജല് (21), ധൈര്യ സേത്ത് (17), ആദിത്യ ജകമാനിയ (19) എന്നിവരാണ് മരിച്ചത്. ഗുരുതരമായി പരിക്കേറ്റ ആദിത്യ ഓസ്വാള് (23) നായര് ആശുപത്രിയിലെ ട്രോമ വാര്ഡില് തീവ്രപരിചരണ വിഭാഗത്തില് ചികിത്സയിലാണ്. നാലുപേരും വിദ്യാര്ഥികളാണെന്ന് സ്ഥിരീകരിച്ചിട്ടുണ്ട്.
അമിതവേഗതയാണോ അതോ വാഹനത്തിന്റെ സാങ്കേതിക തകരാറാണോ അപകടത്തിന് വഴിവെച്ചതെന്ന് വ്യക്തമാക്കാന് പൊലീസ് വിശദമായ അന്വേഷണം ആരംഭിച്ചു. സൗത്ത് മുംബൈയിലെ മറൈന് ഡ്രൈവിനെ ബാന്ദ്ര-വര്ളി സീ ലിങ്കുമായി ബന്ധിപ്പിക്കുന്ന 10.58 കിലോമീറ്റര് നീളമുള്ള എക്സ്പ്രസ് വേയാണ് മുംബൈ കോസ്റ്റല് റോഡ്. ഏതാനും ദിവസങ്ങള്ക്ക് മുന്പ് നവി മുംബൈയിലെ വാശി പികെസി ആശുപത്രിക്ക് സമീപം അമിതവേഗത്തിലെത്തിയ എസ്യുവി ഇടിച്ച് മൂന്ന് പേര്ക്ക് ഗുരുതരമായി പരിക്കേറ്റിരുന്നു.
