കോയമ്പത്തൂർ . ഗ്രാമീണ കാർഷിക പ്രവൃത്തി പരിചയ പരിപാടിയുടെ (RAWE) ഭാഗമായി അരസംപാളയത്തുള്ള അമൃത കാർഷിക കോളേജ് അവസാന വർഷ വിദ്യാർത്ഥികൾ കോയമ്പത്തൂരിലെ കിണത്തുകടവ് താലൂക്കിലെ മണ്ട്രമ്പാളയം ഗ്രാമത്തിൽ
തെങ്ങുകർഷകർക്കായി ബോധവൽക്കരണ പരിപാടി സംഘടിപ്പിച്ചു.
തെങ്ങുകൃഷിയിൽ കാലിവളത്തോടൊപ്പം (FYM) സൂക്ഷ്മമൂലക മിശ്രിതങ്ങൾ പ്രയോഗിക്കേണ്ടതിന്റെ പ്രാധാന്യത്തെക്കുറിച്ച് പരിപാടിയിൽ വിദ്യാർത്ഥികൾ കർഷകർക്ക് വിശദീകരിച്ചു.
ഇരുമ്പ്, സിങ്ക്, ബോറോൺ, മാംഗനീസ്, ചെമ്പ് തുടങ്ങിയ സൂക്ഷ്മമൂലകങ്ങൾ തെങ്ങുകളുടെ ആരോഗ്യകരമായ വളർച്ചയും വികാസവും നിലനിർത്തുന്നതിൽ നിർണായക പങ്ക് വഹിക്കുന്നതായി പരിപാടിയിൽ കർഷകർക്ക് വിശദീകരിച്ചു. കൂടാതെ, നന്നായി ജീർണിച്ച കാലിവളത്തോടൊപ്പം സൂക്ഷ്മമൂലക മിശ്രിതങ്ങൾ ചേർത്ത് പ്രയോഗിക്കുന്നത് മണ്ണിന്റെ ഫലഭൂയിഷ്ഠതയും പോഷകമൂലകങ്ങളുടെ ലഭ്യതയും മെച്ചപ്പെടുത്താൻ സഹായിക്കുമെന്നും വിദ്യാർത്ഥികൾ ബോധ്യപ്പെടുത്തി.
അമൃത കാർഷിക കോളേജ് ഡീൻ ഡോ. സുധീഷ് മണാലിലിന്റെ മാർഗനിർദേശത്തിൽ അനുശ്രീ, മേഘ, അൽത്താഫ്, സഞ്ജന, ശ്യാം, വിഷ്ണു, ധനുശ്രീ, ഗൗരി, നന്ദകിഷോർ, പാർവതി, ശ്വേത, ശിൽപ എന്നീ വിദ്യാർത്ഥികൾ നേതൃത്വം നൽകി. പരിപാടി വിജയകരമായി പൂർത്തിയാക്കി.
