ശാസ്താംകോട്ട:നൂറ് കണക്കിന് യാത്രക്കാർ പ്രതിദിനം എത്തുന്ന ശാസ്താംകോട്ട റെയിൽവേ സ്റ്റേഷനിൽ തെരുവ് നായ ശല്യം രൂക്ഷമായിട്ടും നടപടിയില്ലെന്ന് പരാതി.കഴിഞ്ഞ ദിവസം വൈകിട്ട് ട്രെയിൻ ഇറങ്ങിയ ഒരു യാത്രക്കാരി അടക്കം 2 പേർക്ക് നായയുടെ കടിയേറ്റു.യാത്രക്കാരിയേയും പ്രദേശവാസിയായ യുവാവിനെയും സ്റ്റേഷന് മുന്നിൽ വച്ച് നായ ഓടിയെത്തി കടിക്കുകയായിരുന്നു.ഇരുവരും പിന്നീട് ആശുപത്രിയിൽ ചികിത്സ തേടി.ശാസ്താംകോട്ട റെയിൽവേ സ്റ്റേഷനിൽ എത്തുന്ന യാത്രക്കാർക്ക് തെരുവ് നായകളുടെ ഇടയിലൂടെ വേണം നടക്കാൻ.
പ്രവേശന കവാടം,ടിക്കറ്റ് കൗണ്ടർ,പ്ലാറ്റ്ഫോം,ഫുട് ഓവർ ബ്രിഡ്ജ്,പാർക്കിംഗ് ഏരിയാ ഉൾപ്പെടെ എല്ലായിടത്തും നായകൾ കൈയ്യടക്കിയിരിക്കുകയാണ്.ചില അവസരങ്ങളിൽ ആളുകൾ ഇരിക്കേണ്ട കസേരകളിൽപ്പോലും നായകൾ കയറി കിടക്കുന്നത് കാണാം.ഇത് കൂടാതെ റെയിൽവേ സ്റ്റേഷൻ്റെ സമീപത്തെ റോഡുകളും നായയുടെ വിഹാരകേന്ദ്രമാണ്.റെയിൽവേ സ്റ്റേഷനിലെ നായയുടെ ശല്യം ഒഴിവാക്കാൻ നടപടി സ്വീകരിക്കണമെന്ന് ആവശ്യപ്പെട്ട് ട്രെയിൻ സിറ്റി പാസഞ്ചേഴ്സ് അസോസിയേഷൻ മൈനാഗപ്പള്ളി ഗ്രാമ പഞ്ചായത്ത് അധികൃതർക്ക് നിവേദനം നൽകിയെങ്കിലും നടപടി മാത്രം ഉണ്ടായിട്ടില്ല.
