തിരുവനന്തപുരം: പാളയം പെട്രോള്‍ പമ്പില്‍ വന്‍ കവര്‍ച്ച. ഒന്നര ലക്ഷം രൂപയോളം മോഷണം പോയി. പുലര്‍ച്ചെയായിരുന്നു സംഭവം. ഓഫീസിനുള്ളില്‍ കയറി പണവുമെടുത്ത് മോഷ്ടാവ് ഇറങ്ങിയോടുകയായിരുന്നു.
ഈ പമ്പില്‍ രണ്ടാമത്തെ തവണയാണ് മോഷണം നടക്കുന്നത്. പുലര്‍ച്ചെ ഒരു ജീവനക്കാരന്‍ മാത്രമാണ് ഉണ്ടായിരുന്നത്. കഴിഞ്ഞ മൂന്നു ദിവസത്തെ കളക്ഷനാണ് പമ്പില്‍ സൂക്ഷിച്ചിരുന്നതെന്ന് പമ്പ് ഉടമകള്‍ പറയുന്നു.
ഒരാള്‍ നടന്നു വരുന്നതും, ജീവനക്കാരന്റെ കണ്ണുവെട്ടിച്ച് ഓഫീസിനുള്ളില്‍ കയറുകയുമായിരുന്നു. ഇയാള്‍ പണവുമെടുത്ത് ഓടുന്നതിന്റെ സിസിടിവി ദൃശ്യങ്ങളും പൊലീസിന് ലഭിച്ചിട്ടുണ്ട്. മ്യൂസിയം പൊലീസ് അന്വേഷണം ആരംഭിച്ചു.
ശാസ്താംകോട്ട.അമ്മയ്ക്കൊപ്പം ബൈക്കിൽ സഞ്ചരിക്കുന്നതിനിടെ കാറുമായി കൂട്ടിയിടിച്ചു യുവാവിനു ദാരുണാന്ത്യം. അടൂർ ഏനാത്ത് മണ്ണടി ചരുവിള പുത്തൻവീട്ടിൽ ഷാനവാസിൻ്റെയും സീനത്തിൻ്റെയും മകൻ അംജത് (23) ആണു മരിച്ചത്.
കൊല്ലം, പത്തനംതിട്ട അതിർത്തിയായ ഏഴാംമൈൽ ജംക്ഷനിൽ രാത്രി 9.30ന് ആണു സംഭവം. സിനിമാപറമ്പിലുള്ള സഹോദരന്റെ വീട്ടിലേക്കു വന്നതാണു സീനത്തും മകൻ അംജത്തും. മലനട റോഡിൽ നിന്നു വന്ന കാറുമായി കൂട്ടിയിടിക്കുകയായിരുന്നു ഇവർ സഞ്ചരിച്ച വാഹനം. ഗുരുതര പരുക്കേറ്റ ഇരുവരെയും ഭരണിക്കാവിലെ സ്വകാര്യ ആശുപത്രിയിൽ എത്തിച്ചെങ്കിലും അംജത്തിനെ രക്ഷിക്കാനായില്ല. സീനത്ത് ചികിത്സയിലാണ്. കാർ ഓടിച്ചിരുന്ന കൊല്ലം അയത്തിൽ കുറ്റിച്ചിറ തണൽ വീട്ടിൽ ഹരികുമാറിനെ (42) പൊലീസ് അറസ്റ്റ് ചെയ്തു.
സൈനിക സേവനം കഴിഞ്ഞ് എത്തുകയും പിന്നീട് സർക്കാർ സർവീസിൽ കയറുകയും ചെയ്തിരുന്നു ഹരികുമാർ. ഇയാൾക്കൊപ്പം പിഎസ്‌സി പരീക്ഷയ്ക്കു പരിശീലനം നടത്തിയ സുഹൃത്തുക്കളെ കാണാൻ ഇടയ്ക്കാട്ടിൽ എത്തിയ ശേഷം വീട്ടിലേക്കു മടങ്ങവേ ആണ് അപകടം നടന്നത്. തിരക്കേറിയ ഏഴാംമൈൽ ജംക്ഷനിൽ ഗതാഗത നിയന്ത്രണത്തിനു യാതൊരു സംവിധാനവുമില്ല. അപകടങ്ങൾ ഇവിടെ പതിവാണെന്നു നാട്ടുകാർ പറഞ്ഞു.
കണ്ണൂര്‍: കണ്ണൂര്‍ ജില്ലയിലെ മലയോര പ്രദേശമായ കേളകത്ത് വിവാഹവാഗ്ദാനം നല്‍കി 17 വയസുകാരിയെ പീഡിപ്പിച്ച കേസില്‍ വൈദികന്‍ അറസ്റ്റില്‍. കേളകം പൊലീസ് സ്റ്റേഷന്‍ പരിധിയിലുള്ള പള്ളിയിലെ അസി.വികാരി സുല്‍ത്താന്‍ ബത്തേരി മാനിവയല്‍ സ്വദേശി ഉപ്പുവീട്ടില്‍ അഖില്‍ ജോഷിയെയാണ് (33) അറസ്റ്റ് ചെയ്തത്. കേളകം പൊലീസ് ഇന്‍സ്പെക്ടര്‍ ഇതിഹാസ് താഹയാണ് നടപടി സ്വീകരിച്ചത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
പെണ്‍കുട്ടിയുടെ പരാതിയിന്മേല്‍ കഴിഞ്ഞ മാസം 13ന് കേസ് രജിസ്റ്റര്‍ ചെയ്തെങ്കിലും പ്രതി ഒളിവില്‍ പോവുകയായിരുന്നു. കേസ് ഒതുക്കിത്തീര്‍ക്കാന്‍ ഉന്നത ഇടപെടല്‍ നടന്നതായി പെണ്‍കുട്ടിയുടെ കുടുംബം ആരോപിക്കുകയും സംഭവം വിവാദമാവുകയും ചെയ്തതോടെയാണ് വൈദികനെ പൊലീസ് അറസ്റ്റ് ചെയ്തത്. പോക്സോ കേസിലെ വിവിധ വകുപ്പുകളും ബിഎന്‍എസ് വകുപ്പുകളും ചേര്‍ത്താണ് കേസ് രജിസ്റ്റര്‍ ചെയ്തിരിക്കുന്നത്.
കൊച്ചി: ടൊവിനോ തോമസ് കേന്ദ്ര കഥാപാത്രമായി എത്തുന്ന പീരീയഡ് ഡ്രാമ ത്രില്ലര്‍ ചിത്രം ‘പള്ളിച്ചട്ടമ്പി’ ഈ മാസം 15ന് തന്നെ തിയറ്ററുകളിലെത്തും. ഈ മാസം 10നാണ് ആദ്യം ചിത്രത്തിന്റെ റിലീസ് നിശ്ചയിച്ചിരുന്നത്. എന്നാല്‍ തെരഞ്ഞെടുപ്പ് പെരുമാറ്റചട്ടം നിലനിന്നതിനാല്‍ സെന്‍സര്‍ സര്‍ട്ടിഫിക്കറ്റ് ലഭിക്കുന്നതിലുള്ള തടസം കാരണമാണ് റിലീസ് നീട്ടിയത്. ചിത്രത്തിന് യു/എ സര്‍ട്ടിഫിക്കറ്റ് ലഭിച്ചതോടെ വിഷുദിന റിലീസിന് വഴിയൊരുങ്ങുകയായിരുന്നു. കേരളത്തില്‍ 1950-60 കാലഘട്ടത്തില്‍ നടക്കുന്ന കഥയാണ് ‘പള്ളിച്ചട്ടമ്പി’ പറയുന്നത്. ക്വീന്‍, ജനഗണമന, മലയാളി ഫ്രം ഇന്ത്യ എന്നീ ചിത്രങ്ങള്‍ക്കു ശേഷം ഡിജോ ജോസ് ആന്റണി സംവിധാനം ചെയ്യുന്ന ചിത്രം കൂടിയാണിത്. ടി എസ് സുരേഷ് ബാബുവാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. കയാദു ലോഹര്‍ ആണ് നായിക. വിജയരാഘവന്‍, സുധീര്‍ കരമന, ബാബുരാജ്, വിനോദ് കേദാമംഗലം, പ്രശാന്ത് അലക്‌സ് തുടങ്ങി നിരവധി താരങ്ങളും അണിനിരക്കുന്നു. ക്യാമറ: ടിജോ ടോമി. സംഗീത സംവിധാനം: ജെയ്ക്‌സ് ബിജോയ്?. ചിത്രത്തിലെ കാട്ടുചെമ്പകം പൂത്തോട്ടെ എന്ന ഗാനം ഇതിനോടകം സോഷ്യല്‍ മീഡിയയില്‍ വൈറലാണ്. വേള്‍ഡ് വൈഡ് ഫിലിംസിന്റെ ബാനറില്‍ നൗഫലും ബ്രിജീഷും ചേര്‍ന്നാണ് ‘പള്ളിച്ചട്ടമ്പി’ നിര്‍മിക്കുന്നത്. സി ക്യൂബ് ബ്രോ എന്റര്‍ടെയിന്‍മെന്റ്‌സിന്റെ ബാനറില്‍ ചരണ്‍, ചാണുക്യ, ചൈതന്യ എന്നിവരും തന്‍സീറും ചേര്‍ന്നാണ് സഹനിര്‍മാണം. ടൊവിനോയുടെ മാസ് ആക്ഷന്‍ എന്റര്‍ടെയ്നറിനായി വലിയ കാത്തിരിപ്പിലാണ് പ്രേക്ഷകര്‍.
പാറശാല :വെള്ളറട കൂട്ടപ്പൂവിൽ മകളെ മർദിക്കുന്നത് തടയുന്നതിനിടെ മരുമകനെ വെട്ടിപ്പരിക്കേൽപ്പിച്ചു. കൂട്ടപ്പു ചരിവുവിള സോജി ഭവനിൽ ടി ദാസ് (61) ആണ് മകളുടെ ഭർത്താവായ പത്തുകാണി സ്വദേശി മോജോ (30)യെ വെട്ടിയത്. തുടർന്ന് തമിഴ്‌നാട്ടിലേക്ക് കടക്കാൻ ശ്രമിച്ച ദാസിനെ അതിർത്തിയിൽ വച്ച് അറസ്റ്റ് ചെയ്തു. ഇയാളെ റിമാൻഡ് ചെയ്തു.
ശനി രാത്രി 9 ഓടെയായിരുന്നു സംഭവം. മദ്യലഹരിയിലെത്തിയ മോജോ ഭാര്യയെ മർദിക്കുന്നത് കണ്ട് സഹികെട്ടാണ് ദാസ് വെട്ടിയത്. മോജോ ഭാര്യയെ മർദിക്കുന്നത് സ്ഥിരമായിരുന്നു. മുന്പ്‌ പലതവണ മകളെ ഉപദ്രവിക്കരുതെന്ന് ദാസ് താക്കീത് നൽകിയിരുന്നെങ്കിലും മോജോ വകവച്ചിരുന്നില്ല. ഗുരുതര വെട്ടേറ്റ മോജോയെ നാട്ടുകാരും മകളും ചേർന്ന് കാരക്കോണം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
ആറുകാണി വഴി തമിഴ്‌നാട്ടിലേക്ക് കടക്കാൻ ശ്രമിക്കുന്നതിനിടെയാണ് ദാസ് വെള്ളറട സർക്കിൾ ഇൻസ്‌പെക്ടർ നിസാമുദ്ദീന്റെ നേതൃത്വത്തിലുള്ള സംഘത്തിന്റെ പിടിയിലായത്. എസ് ഐ പ്രദീഷ് കുമാർ, ദീപു, വിഷ്ണു, സതീഷ്, ഷാജി, ജിജു എന്നിവരും സംഘത്തിലുണ്ടായിരുന്നു. പിതാവിനെ തല്ലിക്കൊന്നതടക്കം നിരവധി കേസുകളിൽ പ്രതിയാണ് മോജോ. ദാസിനെതിരെയും ആറുകാണി സ്റ്റേഷനിൽ കേസുകളുണ്ട്.
തിരുവനന്തപുരം: കണ്ണൂർ അഞ്ചരക്കണ്ടി ഡെന്റൽ കോളേജിൽ മരണപ്പെട്ട വിദ്യാർത്ഥി നിതിൻ രാജിന്റെ വസതിയിൽ പ്രതിപക്ഷ നേതാവ് വി.ഡി. സതീശൻ സന്ദർശനം നടത്തി. നിതിന്റെ കുടുംബത്തെ ആശ്വസിപ്പിച്ച അദ്ദേഹം, അധ്യാപകർക്കെതിരെ ഉയർന്നിട്ടുള്ള ജാതി അധിക്ഷേപ ആരോപണങ്ങളിൽ കടുത്ത പ്രതിഷേധം രേഖപ്പെടുത്തി. നിതിൻ നേരിട്ട പീഡനങ്ങൾ കേരളത്തിന് തന്നെ വലിയ നാണക്കേടാണെന്നും സാംസ്കാരിക കേരളം തലകുനിക്കേണ്ടി വന്നിരിക്കുകയാണെന്നും അദ്ദേഹം പറഞ്ഞു.
നിതിനെ ക്രൂരമായി അധിക്ഷേപിച്ചവർ അധ്യാപകരാണോ എന്ന് ചോദിച്ച വി.ഡി. സതീശൻ, കുറ്റക്കാർക്കെതിരെ മുഖംനോക്കാതെ കർശന നടപടിയെടുക്കണമെന്ന് ആവശ്യപ്പെട്ടു. പൂക്കോട് വെറ്ററിനറി കോളേജിലെ സിദ്ധാർത്ഥിന്റെ മരണം ഉണ്ടായപ്പോൾ തന്നെ അധികൃതർ ജാഗ്രത കാട്ടിയിരുന്നെങ്കിൽ ഇത്തരം ദാരുണ സംഭവങ്ങൾ ആവർത്തിക്കില്ലായിരുന്നുവെന്ന് അദ്ദേഹം കുറ്റപ്പെടുത്തി. പൂക്കോട് സംഭവത്തിൽ കർശനമായ മാതൃകാ നടപടികൾ എടുക്കാതിരുന്നതാണ് സമാനമായ പീഡനങ്ങൾ ഇന്നും തുടരാൻ കാരണമെന്നും അദ്ദേഹം കൂട്ടിച്ചേർത്തു.
മരണപ്പെട്ട സിദ്ധാർത്ഥിന്റെ അമ്മ, നിതിന്റെ അമ്മയെ ആശ്വസിപ്പിക്കാൻ എത്തിയത് കണ്ടുനിന്നവർക്ക് നൊമ്പരമായി. സമാനമായ ദുരന്തം നേരിട്ട രണ്ട് അമ്മമാരുടെ കൂടിക്കാഴ്ച ആ വസതിയെ കൂടുതൽ കണ്ണീരിലാഴ്ത്തി. നിതിന്റെ മരണത്തിൽ പോലീസ് അന്വേഷണം ഊർജ്ജിതമാക്കിയിട്ടുണ്ടെങ്കിലും കുറ്റാരോപിതരായ അധ്യാപകർക്കെതിരെ നടപടി വൈകുന്നതിനെതിരെ വൻ പ്രതിഷേധമാണ് ഉയരുന്നത്.
കൊച്ചി. തിരിച്ചറിയൽ കാർഡ് ആവശ്യപ്പെട്ടതിന്റെ വൈരാഗ്യത്തിൽ പോലീസിനെ ആക്രമിച്ച ഗുണ്ടയും സഹോദരനും അറസ്റ്റിൽ. റൗഡി ലിസ്റ്റിൽ ഉൾപ്പെട്ട മണ്ണാർകാട് സ്വദേശി ജിന്റോ, സഹോദരൻ പ്രിൻസ് എന്നിവരാണ് പിടിയിലായത്. പൊലീസുകാരെ ആക്രമിച്ചതിന് പുറമേ പൊലീസ് ജീപ്പും ഇരുവരും അക്രമിച്ചു.
ശനിയാഴ്ച ഉച്ചയോടെ നോർത്ത് മേൽപാലത്തിന് താഴെയാണ് പ്രശ്നങ്ങളുടെ തുടക്കം. ഓട്ടോ ഡ്രൈവറും ബൈക്ക് യാത്രികനും തമ്മിലുണ്ടായ തർക്കം പരിഹരിക്കാനാണ് നോർത്ത് പൊലീസ് സ്ഥലതെത്തിയത്. പ്രശ്നം പരിഹരിച്ച ശേഷം സാമൂഹ്യവിരുദ്ധരുടെ കേന്ദ്രമായ പ്രദേശത്ത് പൊലീസ് പരിശോധന തുടർന്നു. സംശയകരമായി സ്ഥലത്ത് കണ്ട ജിന്റോയോടും പ്രിൻസിനോടും പൊലീസ് കാര്യങ്ങൾ തിരക്കി. കൃത്യമായ മറുപടി ലഭിക്കാതെ വന്നതോടെ തിരിച്ചറിയൽ രേഖ ആവശ്യപ്പെട്ടു. ഇതിൽ പ്രകോപിതനായ ജിന്റോ പൊലീസ് നടപടിയെ ചോദ്യം ചെയ്തു. തട്ടിക്കയറി.
ഇതോടെ ജിന്റോയെ പൊലീസ് കസ്റ്റഡിയിലെടുത്തു. ഇതിനിടെയായിരുന്നു ജിന്റോയും സഹോദരനും ചേർന്ന് പൊലീസുകാരെ ആക്രമിച്ചത്.
കൂടുതൽ പൊലീസെത്തി ഇരുവരെയും കസ്റ്റഡിയിലെടുത്തു. തുടർന്ന് നടത്തിയ പരിശോധനയിലാണ് ജിന്റോ റൗഡി ലിസ്റ്റിലുള്ളത് പൊലീസ് സ്ഥിരീകരിച്ചത്. പാലക്കാട് ജില്ലയിൽ ആറ് കേസുകളാണ് ജിന്റോയ്ക്കെതിരെയുള്ളത്. കൃത്യനിർവഹണം തടസപ്പെടുത്തൽ, പൊലീസ് ജീപ്പ് ആക്രമിച്ചു തുടങ്ങി ജാമ്യമില്ല വകുപ്പുകൾ ചുമത്തിയാണ് കേസ്.
തിരുവനന്തപുരം.കോളേജ് ഡേയിൽ പങ്കെടുത്തില്ലെങ്കിൽ പിഴ അടക്കണം എന്ന വിചിത്ര ഉത്തരവുമായി തിരുവനന്തപുരത്തെ സ്വകാര്യ കോളേജ്. തിരുവനന്തപുരം ഐ എം ഡി ആർ കോളേജ് ഓഫ് അഡ്വാൻസ്ഡ് സ്റ്റഡീസ് ആണ് വിദ്യാർത്ഥികളിൽ നിന്ന് പിഴയിടാൻ സർക്കുലർ ഇറക്കിയത്. പിഴ അടച്ചില്ലെങ്കിൽ ഹാൾടിക്കറ്റ് തടഞ്ഞു വയ്ക്കും എന്ന് പ്രിൻസിപ്പാലിന്റെ സർക്കുലറിൽ. സർക്കുലർ പിൻവലിച്ചില്ലെങ്കിൽ കോളേജിനെതിരെ നടപടി സ്വീകരിക്കുമെന്ന് കേരള സർവകലാശാല വിസി ബിഗ് ടീവിയോട്
തിരുവനന്തപുരം ചെറിയ കോണ്ണിയിൽ പ്രവർത്തിക്കുന്ന IMDR കോളേജ് ഓഫ് അഡ്വാൻസ്ഡ് സ്റ്റഡീസിൽ മാർച്ച് 30 ന് നടന്ന കോളേജ് ഡേയുമായി ബന്ധപ്പെട്ടാണ് ഉത്തരവ് ഇറക്കിയത്. കോളേജ് ഡേയിൽ പങ്കെടുക്കാത്ത കുട്ടികൾ 250 രൂപ പിഴ നൽകണമെന്നാണ് ഉത്തരവിൽ പറയുന്നത്. അവസാന തീയതി കഴിഞ്ഞും കോൺട്രിബ്യൂഷൻ എമൗണ്ട് നൽകാത്തവർ 500 രൂപയും രണ്ടിലും ഉൾപ്പെട്ട വിദ്യാർത്ഥികൾ 750 രൂപയും നൽകണമെന്നാണ് സർക്കുലർ. പിഴ അടച്ചില്ലെങ്കിൽ ഹാൾടിക്കറ്റ് തടഞ്ഞുവയ്ക്കുന്നത് ഉൾപ്പെടെയുടെയുള്ള കർശന നടപടികളിലേക്ക് കടക്കുമെന്നും സർകുലറിൽ മുന്നറിയിപ്പുണ്ട്. കോളേജ് പ്രിൻസിപ്പൽ ഡോക്ടർ ജെ ബി രാജൻ ആണ് ഉത്തരവ് ഇറക്കിയത്. വിദ്യാർത്ഥികൾ കോളേജ് ഡേയിൽ പങ്കെടുക്കാതെ മാറി നിൽക്കുന്നത് തടയാനാണ് പിഴനടപടി എന്നാണ് പ്രിൻസിപ്പലിന്റെ വാദം.
എന്നാൽ സ്വാശ്രയ കോളജുകൾക്ക് മാത്രമായി അത്തരം നിയമങ്ങൾ ഇല്ലെന്നും. പിഴ നടപടി നിയമവിരുദ്ധമാണെന്നും കേരള യൂണിവേഴ്സിറ്റി വി സി ഡോ. മോഹനൻ കുന്നുമ്മൽ പറഞ്ഞു. കോളജിന്റെ നടപടി പരിശോധിച്ച് സർവ്വകലാശാല രജിസ്ട്രാറെ ചുമതലപ്പെടുത്തി. സർക്കുലർ പിൻവലിക്കാത്ത പക്ഷം കോളേജിനെതിരെ നടപടി സ്വീകരിക്കുമെന്നും കേരള സർവകലാശാല വിസി അറിയിച്ചു.
തിരുവനന്തപുരം .കുംഭമേളയിലൂടെ വൈറലായ പെൺകുട്ടിയുടെ വിവാഹത്തിൽ പോലീസിന് വീഴ്ച്ച സംഭവിച്ചിട്ടില്ലെന്ന് റിപ്പോർട്ട്. പെൺകുട്ടി ഹാജരാക്കിയ ആധാർ കാർഡ് യഥാർത്ഥത്തിൽ ഉള്ളതാണ് എന്നാണ് പൊലീസിന്‍റെ കണ്ടെത്തല്‍. വിവാഹം നടന്ന പൂവാർ പഞ്ചായത്ത് ഓഫീസിൽ പൊലീസ് പരിശോധന നടത്തി.
കുംഭമേള വൈറൽ താരത്തിന്റെ വിവാഹവുമായി ബന്ധപ്പെട്ട് അന്വേഷണ റിപ്പോർട്ട് സമർപ്പിക്കാൻ ക്രമസമാധാന ചുമതലയുള്ള എഡിജിപി എച്ച് വെങ്കിടേഷിന് ഡിജിപി നിർദേശം നൽകിയിരുന്നു. പെൺകുട്ടിയുടെ വിവാഹം രജിസ്റ്റര്‍ ചെയ്ത പൂവാര്‍ പഞ്ചായത്തില്‍ നിന്ന് പൊലീസ് വിവരം ശേഖരിച്ചു. ആധാര്‍, ജനന സര്‍ട്ടിഫിക്കറ്റ്, പാന്‍ കാര്‍ഡ് എന്നിവ പരിശോധിച്ചെന്നാണ് പഞ്ചായത്ത് അധികൃതരുടെ മൊഴി. സര്‍ട്ടിഫിക്കറ്റുകള്‍ പ്രകാരം പെണ്‍കുട്ടിക്ക് 18 വയസ് പൂര്‍ത്തിയായിരുന്നു. സര്‍ട്ടിഫിക്കറ്റുകള്‍ യഥാര്‍ത്ഥമെന്ന് ഉറപ്പ് വരുത്തിയാണ് രജിസ്‌ട്രേഷന്‍ നടത്തിയതെന്ന് പഞ്ചായത്ത് അധികൃതര്‍ മൊഴി നല്‍കി.സര്‍ട്ടിഫിക്കhറ്റുകള്‍ എടുക്കാനായി കൊടുത്ത രേഖകൾ തെറ്റാണോയെന്ന് അറിയില്ലെന്നും അധികൃതരുടെ പോലീസിനോട് പറഞ്ഞു . പൂവാര്‍ പൊലീസ് നാളെ ഡിജിപിയ്ക്ക് റിപ്പോര്‍ട്ട് കൈമാറും. മധ്യപ്രദേശ് പൊലീസും അന്വേഷണം ഊർജിതമാക്കിയിട്ടുണ്ട്. മാർച്ച് 11നാണ് പെൺകുട്ടിയും മഹാരാഷ്ട്ര സ്വദേശിയായ ഫർമാനും തമ്മിലുള്ള വിവാഹം തിരുവനന്തപുരം അരുമാനൂര്‍ ക്ഷേത്രത്തിൽ വച്ച് നടന്നത്.
പെൺകുട്ടിക്ക് പ്രായപൂർത്തി ആയില്ലെന്ന ദേശീയ പട്ടിക വർഗ കമ്മീഷന്റെ കണ്ടെത്തലിനു പിന്നാലെ ഇരുവരും ഒളിവിൽ പോയി. ഇവരെ കണ്ടെത്താനുള്ള ശ്രമവും പൊലീസ് നടത്തുന്നുണ്ട്. വിവാഹച്ചടങ്ങില്‍ പങ്കെടുത്ത സിപിഐഎം സംസ്ഥാന സെക്രട്ടറി എം വി ഗോവിന്ദന്‍, മന്ത്രി വി ശിവന്‍കുട്ടി അടക്കമുള്ള മുതിർന്ന നേതാക്കൾക്കെതിരെ യൂത്ത് കോൺഗ്രസ് പോലീസിൽ പരാതി നൽകിയിരുന്നു. വിവാഹത്തിൽ പങ്കെടുത്ത മറ്റുള്ളവരുടെ വിവരങ്ങളും പോലീസ് ശേഖരിക്കുന്നുണ്ട്. ഇതുവരെ നടത്തിയ അന്വേഷണത്തിന്റെ റിപ്പോർട്ട് ഏപ്രിൽ 22ന് ദേശീയ പട്ടികവർഗ്ഗ കമ്മീഷൻ മുൻപാകെ സമർപ്പിക്കണമെന്നാണ് നിർദ്ദേശം.
അതേസമയം കുംഭമേള വൈറല്‍ താരത്തെ തട്ടിക്കൊണ്ടുപോയി വിവാഹം ചെയ്ത കേസില്‍ ഉത്തരപ്രദേശ് സ്വദേശി മുഹമ്മദ് ഫര്‍മാന്റെ അറസ്റ്റ് തടഞ്ഞ നടപടി ഹൈക്കോടതി നീട്ടി. അഞ്ചാഴ്ചത്തേക്കാണ് അറസ്റ്റ് തടഞ്ഞ നടപടി ജസ്റ്റിസ് കൗസര്‍ എടപ്പഗത്ത് അധ്യക്ഷനായ സിംഗിള്‍ ബെഞ്ച് നീട്ടിയത്. മുഹമ്മദ് ഫര്‍മാനെതിരെ കേസ് എടുത്തിട്ടുണ്ടോ എന്ന കാര്യത്തില്‍ മധ്യപ്രദേശ് സംസ്ഥാന പൊലീസ് മേധാവിയില്‍ നിന്ന് വ്യക്തത ലഭിച്ചില്ലെന്ന് സംസ്ഥാന സര്‍ക്കാര്‍ ഹൈക്കോടതിയെ അറിയിച്ചിരുന്നു. ഇതോടെ കേസ് മെയ് 20ന് പരിഗണിക്കാൻ മാറ്റി.
കണ്ണൂര്‍ അഞ്ചരക്കണ്ടി ഡെന്റല്‍ കോളജില്‍ ജീവനൊടുക്കിയ വിദ്യാര്‍ഥി നിതിന്‍ രാജിന്റെ മരണം അന്വേഷിക്കാന്‍ 11 അംഗ സംഘം. കണ്ണൂര്‍ എ.സി.പിക്കാണ് അന്വേഷണച്ചുമതല. നിതിന്‍ രാജ് കടുത്ത ജാതി അധിക്ഷേപം നേരിട്ടെന്ന ഗുരുതര ആരോപണം കുടുംബം ആവര്‍ത്തിച്ചു. സഹപാഠികളുടെ മുന്നില്‍വച്ച് ഡെന്റല്‍ അനാട്ടമി വിഭാഗം മേധാവി ഡോ. എം.കെ. റാം പുഴുത്ത പട്ടിയെന്ന് വിളിച്ച് ആക്ഷേപിച്ചെന്ന് സഹോദരി നികിത പറഞ്ഞു.
നിറത്തിന്റെയും സാമ്പത്തികത്തിന്റേയും പേരില്‍ നിതിന്‍ വിവേചനം നേരിട്ടതായും, അധ്യാപകന്‍ മര്‍ദിച്ചതായും കുടുംബം വെളിപ്പെടുത്തി. ആക്ഷേപങ്ങള്‍ ചോദ്യം ചെയ്തപ്പോള്‍ പരീക്ഷയ്ക്ക് മാര്‍ക്ക് കുറച്ചും പീഢനമുണ്ടായി. അധ്യാപകരുടെ കറുത്തവന്‍ എന്ന കളിയാക്കലും സീനിയര്‍ വിദ്യാര്‍ഥികളുടെ കൊടിയ റാഗിംങും നേരിട്ട് മുമ്പോട്ട് പോയ നിതിന്‍ ജീവനൊടുക്കിയന്ന വാദം കുടുംബം തള്ളുന്നു.
നിതിന്‍ രാജിന്റെ മരണത്തില്‍ ആരോപണ വിധേയരായ അധ്യാപകരെ ഇന്നലെ സസ്‌പെന്‍ഡ് ചെയ്തിരുന്നു. അനാട്ടമി വിഭാഗം മേധാവി ഡോ. എം.കെ. റാം, അസോസിയേറ്റ് പ്രഫ. ഡോ. സംഗീത എന്നിവരെയാണ് സസ്‌പെന്‍ഡ് ചെയ്തത്. പൂക്കോട് വെറ്റിനറി കോളജില്‍ റാഗിങിനേത്തുടര്‍ന്ന് മരിച്ച സിദ്ധാര്‍ഥിന്റെ അമ്മയും നിതിനെ അവസാനമായി കാണാന്‍ കണ്ണീരോടെ എത്തി. നിതിന്‍ രാജിന്റെ മൃതദേഹം വീട്ടുവളപ്പില്‍ സംസ്‌കരിച്ചു.
