പാലക്കാട് കുലുക്കല്ലൂര്‍ റെയില്‍വേ സ്റ്റേഷനുസമീപം നെല്ലായ സ്വദേശിനിയായ അധ്യാപിക ട്രെയിന്‍തട്ടി മരിച്ചു. നെല്ലായ പുത്തന്‍ വീട്ടില്‍ ഉഷ (54) ആണ് മരിച്ചത്. മകള്‍ പ്രാര്‍ത്ഥന പരിക്കുകളോടെ ചികിത്സയിലാണ്. ഞായര്‍ രാവിലെ 10.30നാണ് അപകടം. ട്രെയിന്‍ കയറാന്‍ ട്രാക്കിലൂടെ ഉഷയും മകള്‍ പ്രാര്‍ത്ഥനയും നടന്നുവരികയായിരുന്നു.

ട്രെയിന്‍ വരുന്നതുകണ്ട് വേഗത്തില്‍ പ്ലാറ്റ്‌ഫോമിലേക്ക് ഓടിപ്പോകുന്നതിനിടെ പിന്നിലൂടെ വന്ന മറ്റൊരു ട്രെയിന്‍ ഇരുവരെയും ഇടിച്ചുതെറിപ്പിക്കുകയായിരുന്നു. കോട്ടയം – നിലമ്പൂര്‍ എക്‌സ്പ്രസ് ട്രെയിനാണ് ഇടിച്ചത്. ഗുരുതര പരിക്കേറ്റ ഇരുവരെയും ഉടന്‍ പെരിന്തല്‍മണ്ണയിലെ സ്വകാര്യ ആശുപത്രിയില്‍ എത്തിച്ചെങ്കിലും ഉഷ മരിച്ചു. ഉഷ പൊട്ടച്ചിറ ശബരി സ്‌കൂളിലെ അധ്യാപികയാണ്. ഭര്‍ത്താവ്: രാമപ്രസാദ്. മക്കള്‍: പ്രാര്‍ത്ഥന, പാവന.

ആലപ്പുഴ : വിദ്യാർഥിനിയെ ബസിനുള്ളിൽ പീഡിപ്പിച്ച കേസിൽ ബസ് കണ്ടക്ടർക്ക് 62 വർഷം കഠിനതടവും 3.70 ലക്ഷം രൂപ പിഴയും ശിക്ഷ. ഭരണിക്കാവ് വെട്ടിക്കോട് വലിയകുന്നത്ത് വീട്ടിൽ അരുൺ ബാബുവിനെ(31) യാണ്‌ ഹരിപ്പാട് അതിവേഗ പോക്സോ കോടതി ജഡ്‌ജി ജി ഹരീഷ് ശിക്ഷിച്ചത്‌. 2022–ലാണ്‌ കേസിനാസ്‌പദമായ സംഭവം. അതിജീവിത സ്കൂളിലേക്ക്‌ സ്ഥിരമായി പോയിരുന്ന ബസിലെ കണ്ടക്ടറാണ്‌ പ്രതി.

വിവാഹിതനായ പ്രതി പെൺകുട്ടിയെ പ്രണയംനടിച്ച് കായംകുളത്തെത്തിച്ച് ബസിനുള്ളിൽ വച്ച് പീഡിപ്പിക്കുകയായിരുന്നു. ചെങ്ങന്നൂർ പൊലീസ് രജിസ്റ്റർചെയ്ത കേസ്‌ കായംകുളം പൊലീസിന്‌ കൈമാറുകയായിരുന്നു. കായംകുളം പൊലീസാണ്‌ പ്രതിയെ അറസ്റ്റുചെയ്‌ത്‌ കുറ്റപത്രം സമർപ്പിച്ചത്‌. 23 സാക്ഷികൾ പ്രോസിക്യൂഷന് വേണ്ടി ഹാജരായി. പിഴ ഒടുക്കാതിരുന്നാൽ നാലര വർഷം അധിക ശിക്ഷയും അനുവഭവിക്കണം. പ്രോസിക്യൂഷന് വേണ്ടി സ്പെഷ്യൽ പ്രോസിക്യൂട്ടർ അഡ്വ. എസ് രഘു ഹാജരായി. ചെങ്ങന്നൂർ സി ഐ ജോസ് മാത്യു രജിസ്റ്റർ ചെയത കേസിൽ കായംകുളം സിഐ വൈ മുഹമ്മദ് ഷാഫിയാണ്‌ കുറ്റപത്രം സമർപ്പിച്ചത്‌.

രോഗിയായ യാത്രക്കാരന് സീറ്റ് നിഷേധിക്കുകയും ഇറങ്ങേണ്ട സ്റ്റോപില്‍ ഇറക്കാതിരിക്കുകയും ചെയ്ത സംഭവത്തില്‍ കെഎസ്ആര്‍ടിസിക്ക് 30,000 രൂപ പിഴ. മലപ്പുറം ഉപഭോക്തൃ കമ്മിഷന്റേതാണ് ഉത്തരവ്. തോട്ടശേരിയറ സ്വദേശി മുഹമ്മദ് സൈനുദ്ദീന്റെ പരാതിയിലാണ് നടപടി. തൃശൂരിലെ ആമ്പല്ലൂരില്‍ നിന്നും മലപ്പുറത്തെ കൊളപ്പുറത്തേക്ക് യാത്ര ചെയ്യുന്നതിനിടെയാണ് സംഭവമുണ്ടായത്.

ബസില്‍ കയറിയ ശേഷമാണ് ഇരിക്കാന്‍ സീറ്റില്ലെന്ന് സൈനുദ്ദീന്‍ തിരിച്ചറിഞ്ഞത്. തനിക്ക് സുഖമില്ലെന്നും ദീര്‍ഘനേരം നില്‍ക്കാന്‍ കഴിയില്ലെന്നും കണ്ടക്ടറോട് സൈനുദ്ദീന്‍ പറഞ്ഞതോടെ തൃശൂരെത്തുമ്പോള്‍ സീറ്റ് കിട്ടുമെന്നായിരുന്നു കണ്ടക്ടറുടെ മറുപടി. ഇതോടെ സൈനുദ്ദീന്‍ കൊളപ്പുറത്തേക്ക് ടിക്കറ്റെടുക്കുകയും ചെയ്തു. തൃശൂരെത്തിയപ്പോള്‍ ചില സീറ്റുകള്‍ ഒഴിയുകയും സൈനുദ്ദീന്‍ ഇരിക്കുകയും ചെയ്തു. എന്നാല്‍ സീറ്റ് താന്‍ റിസര്‍വ് ചെയ്തതാണെന്ന് ചൂണ്ടിക്കാട്ടി മറ്റൊരു യാത്രക്കാരന്‍ എത്തിയതോടെ കൊളപ്പുറം എത്തുന്നത് വരെ സൈനുദ്ദീന്‍ നിന്ന് യാത്ര ചെയ്യേണ്ടി വന്നു. ഒടുവില്‍ കക്കാട് എത്തിയപ്പോള്‍ ഇറങ്ങണമെന്ന് സൈനുദ്ദീന്‍ അറിയിച്ചുവെങ്കിലും സര്‍വീസ് റോഡിലേക്ക് കയറാതെ ബസ് പോകുകയായിരുന്നു. ഒടുവില്‍ കൂരിയാട് ഇറക്കി ബസ് യാത്ര തുടരുകയായിരുന്നു.

ദുരനുഭവത്തെ തുടര്‍ന്ന് സൈനുദ്ദീന്‍ പരാതി നല്‍കാന്‍ തീരുമാനിച്ചു. സീറ്റിന്റെ കാര്യത്തില്‍ ഉറപ്പില്ലെന്ന വിവരമോ, സൈനുദ്ദീന്‍ ഇരുന്ന സീറ്റ് റിസര്‍വേഷനുള്ളതാണെന്നോ അറിയിക്കുന്നതില്‍ കണ്ടക്ടര്‍ക്ക് വീഴ്ച പറ്റിയെന്നും കൃത്യമായ സ്റ്റോപില്‍ ഇറക്കാതിരുന്നതും ഗുരുതരമായ വീഴ്ചയാണെന്നും കമ്മിഷന്‍ കണ്ടെത്തി. ഇതോടെയാണ് മലപ്പുറം ജില്ലാ ഉപഭോക്തൃ കമ്മിഷന്‍ പ്രസിഡന്റ് കെ. മോഹന്‍ദാസ്, അംഗങ്ങളായ പ്രീതി ശിവരാമന്‍, സി.വി.മുഹമ്മദ് ഇസ്മയില്‍ എന്നിവര്‍ കെഎസ്ആര്‍ടിസിക്ക് പിഴ വിധിച്ചത്. 25000 രൂപ സൈനുദ്ദീന് നഷ്ടപരിഹാരമായും അയ്യായിരം രൂപ നിയമ നടപടികള്‍ക്ക് ചെലവായതിലേക്കും 45 ദിവസത്തിനകം നല്‍കണമെന്നാണ് വിധി. നിശ്ചിത തീയതിക്കകം പണം നല്‍കിയില്ലെങ്കില്‍ 9 ശതമാനം പലിശ സഹിതം നല്‍കേണ്ടി വരുമെന്നും കമ്മിഷന്‍ വ്യക്തമാക്കി.

സംസ്ഥാനത്ത് കടുത്ത ചൂട് തുടരുന്നു. കേരളത്തില്‍ ഇന്നും നാളെയും ഉയര്‍ന്ന താപനില മുന്നറിയിപ്പ്. പാലക്കാടും കൊല്ലത്തും 39.8 ഡിഗ്രി സെല്‍ഷ്യസ് രേഖപ്പെടുത്തി. പാലക്കാട് രണ്ടുപേര്‍ക്കും കൊല്ലത്ത് ബൈക്കില്‍ സഞ്ചരിച്ച യുവാവിനും സൂര്യാതപമേറ്റു. വൈദ്യുതി ഉപഭോഗവും ഉയര്‍ന്നുതന്നെ തുടരുകയാണ്.

സംസ്ഥാനത്തുടനീളം കനത്തചൂട് ശമനമില്ലാതെ തുടരുകയാണ്. പാലക്കാട് രണ്ടുപേര്‍ക്ക് സൂര്യാതപമേറ്റു. ലക്കിടിയില്‍ ഓട്ടോഡ്രൈവര്‍ ജയന് പൊള്ളലേറ്റു. കഴുത്തില്‍ ഉള്‍പ്പടെ മൂന്നിടത്താണ് പൊള്ളലേറ്റത്. ഒറ്റപ്പാലം സ്വദേശി ജയശ്രീക്കും സൂര്യാതപമേറ്റു. പാലക്കാടും കൊല്ലത്തും 39.8 ഡിഗ്രി സെല്‍സ്യസ് രേഖപ്പെടുത്തി. വയനാടും ഇടുക്കിയും ഒഴികെ 12 ജില്ലകളിലും യെലോ അലര്‍ട്ട് നിലവിലുണ്ട്. സംസ്ഥാനത്തെ വൈദ്യുതി ഉപയോഗത്തിലും നേരിയ കുറവുമാത്രം.

റെക്കോര്‍ഡിന് തൊട്ടടുത്ത് തന്നെ തുടരുകയാണ് വൈദ്യുതി ഉപയോഗം. ഇന്നലെ 115.07 ദശലക്ഷം യൂണിറ്റ് ആണ്. ഇരുപത്തിനാലിന് 116. 48 ദശലക്ഷം യൂണിറ്റ് ആയിരുന്നു. ഈ മാസം 17 ന് 116.11 ദശലക്ഷം യൂണിറ്റായിരുന്നു കേരളം ഉപയോഗിച്ചത്. 18 ന് രേഖപ്പെടുത്തിയ 117.15 ദശലക്ഷം യൂണിറ്റ് ആണ് സര്‍വകാല റെക്കോര്‍ഡ്.

കടയില്‍ നിന്ന് വാങ്ങിയ ജീരകസോഡയുടെ കുപ്പിയില്‍ ചത്ത പാമ്പിന്‍കുഞ്ഞിനെ കണ്ടതായി പരാതി. ഇരിഞ്ഞാലക്കുട കോണത്തുകുന്ന് മനയ്ക്കപ്പടിയിലെ ഇന്ത്യന്‍ ഫാസ്റ്റ് ഫുഡ് എന്ന തട്ടുകടയില്‍ നിന്ന് വാങ്ങിയ സോഡാകുപ്പികളില്‍ ഒന്നിലാണു പാമ്പിനെ കണ്ടത്. കോണത്തുകുന്ന് വള്ളിവട്ടം മനയ്ക്കപ്പടിയിലെ സ്വകാര്യ കമ്പനിയില്‍ സോളര്‍ പാനലിന്റെ ജോലിക്ക് എത്തിയ ചെറായി സ്വദേശി ഉണ്ണിയന്‍ പുരയ്ക്കല്‍ വിഷ്ണുരാജ്, ആലുവ സ്വദേശി ഡിനൂസ് എന്നിവരാണ് സോഡ വാങ്ങിയത്.
സോഡാ കുപ്പി തുറന്ന് കുടിക്കാന്‍ എടുത്ത സമയത്ത് മുകളില്‍ എന്തോ തങ്ങി നില്‍ക്കുന്നത് കണ്ട് നോക്കിയപ്പോഴാണ് പാമ്പിന്‍കുഞ്ഞാണെന്ന് മനസ്സിലായത്. കോണത്തുകുന്ന് ചിരട്ടക്കുന്നില്‍ പ്രവര്‍ത്തിക്കുന്ന റിലാക്‌സ് സോഡാ കമ്പനിയില്‍ നിന്ന് എത്തിച്ച സോഡയാണ് ഇതെന്ന് കുപ്പിയില്‍ പതിച്ച സ്റ്റിക്കറില്‍ നിന്ന് മനസ്സിലായതോടെ യുവാക്കള്‍ കൊടുങ്ങല്ലൂര്‍ ഫുഡ് സേഫ്റ്റി വിഭാഗത്തിലേക്ക് വിളിച്ച് പരാതിപ്പെട്ടു. സോഡാ കുപ്പിയുടെ വിഡിയോ വാട്സ്ആപ്പില്‍ അയച്ചു കൊടുത്തു. തുടര്‍ന്ന് ഫുഡ് സേഫ്റ്റി ഓഫിസര്‍ ഡോ.എം ബര്‍ഷാനയുടെ നേതൃത്വത്തില്‍ സ്ഥാപനത്തില്‍ പരിശോധന നടത്തി.

കണ്ണൂര്‍: പൊയിലൂരില്‍ ബോംബ് ശേഖരം കണ്ടെത്തി. ഐസ്‌ക്രീം കണ്ടെയ്നറുകളിലാക്കിയ അഞ്ചു ബോംബുകളും ഒരു നാടന്‍ ബോംബുമാണ് കണ്ടെത്തിയത്. തെങ്ങിന്‍തോപ്പില്‍ ബക്കറ്റില്‍ മണലുകള്‍ നിറച്ച് കുഴിച്ചിട്ട് സൂക്ഷിച്ച നിലയിലായിരുന്നു ബോംബുകള്‍ കണ്ടെത്തിയത്.
രഹസ്യവിവരത്തിന്റെ അടിസ്ഥാനത്തില്‍ പൊയിലൂരില്‍ തെങ്ങിന്‍ തോട്ടത്തില്‍ നടത്തിയ പരിശോധനയിലാണ് ബോംബുകള്‍ പിടികൂടുന്നത്. കെട്ടു ബോംബ് എന്നറിയപ്പെടുന്ന നാടന്‍ ബോംബും കണ്ടെടുത്തവയില്‍ ഉള്‍പ്പെടുന്നു.
തൊട്ടടുത്ത പാനൂര്‍ മേഖലയില്‍ കഴിഞ്ഞദിവസം നടത്തിയ പരിശോധനയില്‍ സ്റ്റീല്‍ ബോംബുകള്‍ അടക്കം പിടികൂടിയിരുന്നു. കുഴിച്ചിട്ട നിലയിലായിരുന്നു ബോംബ് കണ്ടെടുത്തത്. വോട്ടെണ്ണല്‍ അടുത്തുവരവെ, പ്രദേശത്ത് പൊലീസ് വ്യാപക പരിശോധന നടത്തിവരികയാണ്.

തൊടുപുഴ: സംസ്ഥാനത്ത് പാമ്പുകടിയേറ്റ് ഒരാള്‍ കൂടി മരിച്ചു. ഇടുക്കി കാഞ്ഞാര്‍ സ്വദേശി വിശാലാക്ഷിയാണ് മരിച്ചത്. 75 വയസ്സായിരുന്നു.
വീടിന് സമീപത്തുവെച്ചാണ് വയോധികയെ പാമ്പു കടിച്ചത്. ഉടന്‍ തന്നെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
കണ്ണൂര്‍ തളിപ്പറമ്പിലും പാമ്പുകടിയേറ്റ് ഒരു സ്ത്രീ ഇന്ന് മരിച്ചിരുന്നു. 65 കാരിയായ നബീസയാണ് മരിച്ചത്. പരിയാരം മെഡിക്കല്‍ കോളജില്‍ ചികിത്സയിലായിരുന്നു.
ഇതോടെ ഒരാഴ്ചയ്ക്കിടെ സംസ്ഥാനത്ത് പാമ്പു കടിയേറ്റ് മരിച്ചവരുടെ എണ്ണം അഞ്ചായി. എറണാകുളം ജില്ലയിലെ ചെറായിയില്‍ റിസോര്‍ട്ടിലെത്തിയ യുവതിക്ക് പാമ്പുകടിയേറ്റു. കടിയേറ്റ കോയമ്പത്തൂര്‍ സ്വദേശിനി ശര്‍മിള ചികിത്സയില്‍ തുടരുകയാണ്.