വാഷിംങ്ടണ്‍: പോപ്പ് സംഗീത രാജാവ് മൈക്കിള്‍ ജാക്‌സണിന്റെ ബയോപിക് ചിത്രമായ ‘മൈക്കലി’ന്റെ ട്രെയിലര്‍ പുറത്ത്. അന്റോയിന്‍ ഫുക്വയാണ് കിംങ് ഓഫ് പോപ്പിന്റെ ജീവിതം സിനിമയാക്കുന്നത്. മൈക്കല്‍ ജാക്‌സന്റെ അനന്തരവനായ ജാഫര്‍ ജാക്‌സനാണ് ചിത്രത്തില്‍ മൈക്കലായി എത്തുന്നത്. ആരാധകരുടെ കാത്തിരിപ്പിന് വിരാമമിട്ടുകൊണ്ടാണ് ട്രെയിലര്‍ എത്തിയത്. റിലീസ് ചെയ്ത് മണിക്കൂറുകള്‍ക്കുള്ളില്‍ മൂന്ന് കോടിയ്ക്കടുത്ത് കാഴ്ചക്കാരാണ് ട്രെയിലര്‍ കണ്ടത്.

ഏപ്രില്‍ 24ന് മൈക്കിള്‍ പ്രദര്‍ശനത്തിനെത്തും. ജോണ്‍ ലോഗാന്‍ ആണ് ചിത്രത്തിന്റെ തിരക്കഥയെഴുതിയിരിക്കുന്നത്. ലോകം ആരാധിക്കുന്ന പോപ് രാജാവിലേക്കുള്ള മൈക്കല്‍ ജാക്‌സന്റെ വളര്‍ച്ചയാണ് ബയോപികിലുള്ളത്. ആദ്യകാല ജീവിതവും വ്യക്തിജീവിതത്തില്‍ മൈക്കിള്‍ നേരിട്ട വെല്ലുവിളികളെക്കുറിച്ചും ചിത്രം സംസാരിക്കുന്നുവെന്നാണ് ട്രെയിലര്‍ നല്‍കുന്ന സൂചന. ഏകദേശം 155 മില്യണ്‍ ഡോളര്‍ ബജറ്റിലാണ് ചിത്രം നിര്‍മിച്ചത്.

പ്രണയദിനത്തില്‍ തമിഴ് സൂപ്പര്‍ താരം ധനുഷും താരസുന്ദരി മൃണാള്‍ താക്കൂറും വിവാഹിതരാകുന്നുവെന്നാണ് ഉയരുന്ന ഗോസിപ്പുകള്‍. ഇതിനിടെ പ്രണയത്തെ കുറിച്ച് വാചാലയായി മൃണാള്‍ താക്കൂര്‍ സംസാരിക്കുന്ന അഭിമുഖം ഇപ്പോള്‍ പുറത്തുവന്നിരിക്കുകയാണ്. ഫില്‍മിഗ്യാന് നല്‍കിയ അഭിമുഖത്തിലാണ് താരം മനസ് തുറന്നത്. പ്രണയം അതിമനോഹരമായ വികാരമാണെന്നും പ്രപഞ്ചത്തിലെ ആര്‍ക്കും എപ്പോള്‍ വേണമെങ്കിലും അത് സംഭവിക്കാമെന്നും മൃണാള്‍ പറയുന്നു. ‘കുറേക്കൂടി നല്ല മനുഷ്യരായി മാറാന്‍ പ്രണയം സഹായിക്കും. സത്യം പറഞ്ഞാല്‍ നമ്മുടെയെല്ലാം ഉള്ളില്‍ ബാല്യകാലത്തേറ്റ നൊമ്പരങ്ങളെപ്പോലും അത് മായ്ച്ചുകളയും. ലോകത്തേറ്റവും മനോഹരമായത് പ്രണയമാണ്. എല്ലാവര്‍ക്കും പ്രണയം കണ്ടെത്താനും അനുഭവിക്കാനും കഴിയട്ടെ’യെന്നാണ് തന്റെ പ്രാര്‍ഥനയെന്നും അവര്‍ വ്യക്തമാക്കി.
പ്രണയത്തില്‍ ആരാണ് ഏറ്റവുമധികം അലിഞ്ഞുപോകുന്നതെന്ന ചോദ്യത്തിന് പ്രണയത്തിലായിരിക്കുമ്പോള്‍ ആണ്‍ പെണ്‍ വ്യത്യാസമില്ലാതെ മനുഷ്യര്‍ സ്‌നേഹിക്കുകയാണെന്നായിരുന്നു താരത്തിന്റെ മറുപടി. സ്‌നേഹത്തെ സ്വീകരിക്കുകയെന്നതും പ്രധാനമാണ്. സ്‌നേഹം ലഭിക്കുകയെന്നതും അതിനെ അംഗീകരിക്കുകയെന്നുള്ളതും തീര്‍ത്തും പ്രയാസമേറിയ കാര്യമാണെന്നും പ്രണയത്തിന്റെ നിര്‍വചനം അനുദിനം മാറിക്കൊണ്ടേയിരിക്കുമെന്നും അവര്‍ കൂട്ടിച്ചേര്‍ത്തു. പ്രണയത്തിന് നിങ്ങളെ തന്നെ സമര്‍പ്പിക്കുക എന്നതിലാണ് കാര്യം. പ്രണയം മാത്രം മാറ്റമില്ലാതെ തുടരുമെന്നും മൃണാള്‍ വിശദീകരിക്കുന്നു. അതേസമയം, വിവാഹം ഉടനുണ്ടാവില്ലെന്ന് സുഹൃത്തുക്കള്‍ സ്ഥിരീകരിച്ചതായും റിപ്പോര്‍ട്ടുകളുണ്ട്. രജിനികാന്തിന്റെ മകള്‍ ഐശ്വര്യയുമായി 18 വര്‍ഷം നീണ്ട വിവാഹബന്ധം 2022ല്‍ ധനുഷ് അവസാനിപ്പിച്ചിരുന്നു

നടി പാര്‍വതി തിരുവോത്തിന്റെ പുതിയ സ്റ്റൈലിഷ് ലുക്ക് വൈറല്‍. വെറൈറ്റി മാസികയുടെ ഇന്ത്യന്‍ ലോഞ്ചിലാണ് ബോളിവുഡ് താരങ്ങള്‍ക്കൊപ്പം പാര്‍വതി തിരുവോത്ത് തിളങ്ങിയത്. മൃണാള്‍ ഠാക്കൂര്‍, നിമ്രത് കൗര്‍, സണ്ണി ലിയോണി, മാളവിക മോഹനന്‍, രാകുല്‍ സിങ് തുടങ്ങി നിരവധി നായികമാര്‍ ചടങ്ങില്‍ പങ്കെടുത്തു. കഴിഞ്ഞ കുറച്ച് നാളുകളായി പൊതു ചടങ്ങില്‍ വ്യത്യസ്തമായ സ്‌റ്റൈലിഷ് ലുക്കിലാണ് താരം പ്രത്യക്ഷപ്പെടുന്നത്.
അതേസമയം, പ്രഥമദൃഷ്ട്യാ കുറ്റക്കാര്‍, നോബഡി എന്നിവയാണ് അണിയറയില്‍ ഒരുങ്ങുന്ന പാര്‍വതിയുടെ മറ്റു സിനിമകള്‍. ബോളിവുഡ് സൂപ്പര്‍താരം ഹൃതിക്ക് റോഷനുമായി കൈകോര്‍ത്ത് പാര്‍വതി തിരുവോത്ത് എത്തുന്ന വെബ് സീരീസ് ഉടന്‍ റിലീസിനെത്തും.