തിരുവനന്തപുരം: ഫഹദ് ഫാസിലിനെ നായകനാക്കി ബാഹുബലിയുടെ നിര്‍മാണകമ്പനിയായ ആര്‍ക്കാ മീഡിയാ വര്‍ക്ക്‌സ് ഒരുക്കുന്ന ബിഗ് ബജറ്റ് ഫാന്റസി എന്റര്‍ടെയിനര്‍ ‘ഡോണ്ട് ട്രബിള്‍ ദ ട്രബിള്‍’ എന്ന ചിത്രത്തിന്റെ ടീസര്‍ പുറത്ത്.
പ്രേമലുവിന്റെ വിജയകരമായ വിതരണത്തിലൂടെ നിര്‍മാണരംഗത്തേക്ക് എത്തിയ എസ് എസ് കാര്‍ത്തികേയ, ഷോബു യാര്‍ലഗഡ്ഡ, പ്രസാദ് ദേവിനേനി എന്നിവര്‍ ചേര്‍ന്നാണ് ഷോവിങ് ബിസിനസ്സ് ബാനറിലും ആര്‍ക്കാ മീഡിയാ വര്‍ക്‌സിന്റെയും സഹകരണത്തോടെ ചിത്രം നിര്‍മിക്കുന്നത്. നവാഗതനായ ശശാങ്ക് യെലേട്ടി അണ് സംവിധാനം. ഫാന്റസിയും ഹ്യൂമറും ഹൃദയസ്പര്‍ശിയായ മുഹൂര്‍ത്തങ്ങളും ഒത്തുചേരുന്ന വ്യത്യസ്തമായ ഒരു സിനിമാനുഭവമാണ് ചിത്രം പ്രേക്ഷകര്‍ക്ക് വാഗ്ദാനം ചെയ്യുന്നത്.സെപ്റ്റംബര്‍ 11 ചിത്രം റിലീസ് ചെയ്യും.
എസ് എസ് രാജമൗലിയാണ് ചിത്രം പ്രേക്ഷകരിലേക്ക് എത്തിക്കുക. രമ രാജമൗലിയാണ് ചിത്രത്തിനുവേണ്ടി വസ്ത്രാലങ്കാരം ഒരുക്കിയിരിക്കുന്നത്. ഫഹദ് ഫാസില്‍ നായകനായി അഭിനയിക്കുന്ന ആദ്യത്തെ തെലുഗു ചിത്രം കൂടിയാണിത്. പുഷ്പ എന്ന ചിത്രത്തിലൂടെ ഫഹദിന് ലഭിച്ച ജനപ്രീതി തെലുഗുവില്‍ അദ്ദേഹത്തിന്റെ താരമൂല്യം വര്‍ധിപ്പിച്ചിട്ടുണ്ട്. മാത്രമല്ല ഫഹദ് ഫാസില്‍ നായകനായ മലയാള ചിത്രങ്ങള്‍ എല്ലാം തന്നെ തെലുങ്കില്‍ ഡബ്ബ് ചെയ്തു പുറത്തിറങ്ങിയിട്ടുണ്ട്. ഡിജിറ്റല്‍ പ്ലാറ്റ്‌ഫോമുകളില്‍ അദ്ദേഹത്തിന്റെ സിനിമകള്‍ക്ക് വലിയ സ്വീകാര്യതയും ഉണ്ട്.
