കിഫ്ബി ഭൂമി ഏറ്റെടുക്കലിലെ ക്രമക്കേട് ഗൗരവമായി അന്വേഷിക്കും: മുഖ്യമന്ത്രി
കിഫ്ബി ഭൂമി ഏറ്റെടുത്തതിലടക്കം നടത്തിയ ക്രമക്കേടുകളെക്കുറിച്ചു ഗൗരവമായ അന്വേഷണം നടത്തുമെന്ന് മുഖ്യമന്ത്രി വി.ഡി സതീശന്‍. കിഫ്ബി വായ്പക്ക് സര്‍ക്കാര്‍ ഗ്യാരണ്ടി വേണ്ടെന്ന ധനവകുപ്പ് നിര്‍ദേശം മറികടന്നത് റൂള്‍സ് ഓഫ് ബിസിനസ് ലംഘനമാണ്. ഭൂമി ഏറ്റെടുക്കലില്‍ പകുതിയിലധികം നടന്നത് കണ്ണൂരിലാണ്. കണക്കില്‍ കാണിച്ചതിന്റെ പത്തിരിട്ടിയാണു പരസ്യചെലവ്. തിരുവനന്തപുരത്ത് വിഴിഞ്ഞം പദ്ധതിക്ക് ഭൂമി ഏറ്റെടുത്തില്ല. പദ്ധതികളുടെ 41.6 ശതമാനം മൂന്ന് ജില്ലകളില്‍ മാത്രമായി ക്രമീകരിച്ചു. കടം പെരുകുമ്പോഴും 5821 കോടി രൂപ നിക്ഷേപിച്ചെന്നും മുഖ്യമന്ത്രി ചൂണ്ടിക്കാട്ടി.
ദുരിതാശ്വാസ നിധി ധനസഹായ പരിധികൾ വർധിപ്പിച്ചു
മുഖ്യമന്ത്രിയുടെ ദുരിതാശ്വാസ നിധിയില്‍നിന്നു സഹായം ലഭിക്കാന്‍ അര്‍ഹതയ്ക്കുള്ള സാമ്പത്തിക മാനദണ്ഡം രണ്ടു ലക്ഷം രൂപയില്‍നിന്ന് മൂന്നു ലക്ഷം രൂപയായി വര്‍ധിപ്പിച്ചു. മുഖ്യമന്ത്രിക്ക് മൂന്നു ലക്ഷം അനുവദിക്കാമെന്നത് അഞ്ചു ലക്ഷം രൂപയാക്കി വര്‍ധിപ്പിച്ചു. റവന്യു മന്ത്രി അടക്കമുള്ള അധികാരികള്‍ക്ക് അനുവദിക്കാവുന്ന തുകയുടെ പരിധിയും വര്‍ധിപ്പിച്ചു. അടിയന്തര ഘട്ടങ്ങളില്‍ ചെലവാക്കാന്‍ ജില്ലാ കളക്ടര്‍മാര്‍ക്കുള്ള തുകയുടെ പരിധി ഒരു കോടി രൂപയായി വര്‍ധിപ്പിച്ചെന്നും മുഖ്യമന്ത്രി വി.ഡി. സതീശന്‍ അറിയിച്ചു.
അതിവേഗ കോടതികളുടെ കാലാവധി ദീർഘിപ്പിച്ചു
സംസ്ഥാനത്തെ 56 അതിവേഗ കോടതികളുടെ കാലാവധി ദീര്‍ഘിപ്പിക്കാന്‍ മന്ത്രിസഭ തീരുമാനിച്ചു. റവന്യൂ വകുപ്പിനു വാഹനങ്ങളില്ലെന്ന പരാതി പരിഹരിക്കാനും മന്ത്രിസഭ തീരുമാനിച്ചു.
വിവാദ എക്സ് പോസ്റ്റ്: കെപിസിസിക്ക് സുപ്രീം കോടതിയുടെ നോട്ടീസ്
ചീഫ് ജസ്റ്റിസിനെതിരായ വിവാദ എക്സ് പോസ്റ്റിന്റെ പേരില്‍ കെ പി സി സിക്ക് സുപ്രീം കോടതിയുടെ നോട്ടീസ്. മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രതിഷേധത്തിന്റെ ഭാഗമായി സുപ്രീം കോടതിയിലേക്കുള്ള ഇന്ത്യ സഖ്യത്തിന്റെ മാര്‍ച്ചിനിടെയായിരുന്നു വിവാദ എക്സ് പോസ്റ്റ്.
ശബരിമലയിൽ ഇനിമുതൽ ശുചിമുറികളും കുളിമുറികളും സൗജന്യം
ശബരിമലയില്‍ ഭക്തര്‍ക്ക് ഇനിമുതല്‍ ശുചിമുറിയും കുളിമുറികളും സൗജന്യമാക്കി. ദേവസ്വം ബോര്‍ഡാണ് തീരുമാനമെടുത്തത്. ശബരിമല സന്നിധാനം, പമ്പ, സ്വാമി അയ്യപ്പന്‍ റോഡ്, പരമ്പരാഗത പാത എന്നിവിടങ്ങളില്‍ ഭക്തര്‍ പണം നല്‍കി ഉപയോഗിക്കുന്ന എല്ലാ ശുചിമുറികളും കുളിമുറികളും സൗജന്യമാക്കി. താല്‍പര്യമുള്ള ഭക്തര്‍ക്ക് സംഭാവനയായി പണം നല്‍കാം.
ഗൾഫ് സെക്ടറിൽനിന്ന് കരിപ്പൂരിലേക്കുള്ള വിമാന സർവീസുകൾ റദ്ദാക്കി
സൗദി -ഹൂതി ആക്രമണത്തിന്റെ പശ്ചാത്തലത്തില്‍ ഗള്‍ഫ് സെക്ടറില്‍നിന്ന് കരിപ്പൂരിലേക്കും തിരിച്ചുമുള്ള വിമാന സര്‍വീസുകള്‍ റദ്ദാക്കി. 22 വിമാന സര്‍വീസുകളാണ് റദ്ദാക്കിയത്.
മാസപ്പടി കേസ്: നിലപാടിൽ സർക്കാരിനെതിരെ കോൺഗ്രസ് പാർലമെന്ററി പാർട്ടിയിൽ പ്രതിഷേധം
മാസപ്പടി കേസില്‍ സംസ്ഥാന സര്‍ക്കാര്‍ ഹൈക്കോടതിയില്‍ പിണറായി വിജയന് അനുകൂലമായ നിലപാട് സ്വീകരിച്ചതിനെതിരേ കോണ്‍ഗ്രസ് പാര്‍ലമെന്ററി പാര്‍ട്ടി യോഗത്തില്‍ പ്രതിഷേധം. ഉമ്മന്‍ ചാണ്ടിക്ക് എല്‍ഡിഎഫ് സര്‍ക്കാര്‍ നല്‍കാത്ത നീതി എന്തിനാണ് പിണറായിക്ക് നല്‍കുന്നതെന്ന് യോഗത്തില്‍ മാത്യു കുഴല്‍നാടന്‍ ചോദിച്ചു. മാത്യുവിന് ചെറുപ്പത്തിന്റെ ആവേശമാണെന്നും അതിവേഗം കേസെടുക്കേണ്ട എന്നതാണ് ശരിയായ രാഷ്ട്രീയ ലൈന്‍ എന്നും മുഖ്യമന്ത്രി വിശദീകരിച്ചു.
വാർഷിക വോട്ടർ പട്ടിക പരിഷ്കരണത്തിന് ഉത്തരവിട്ട് തെരഞ്ഞെടുപ്പ് കമ്മീഷൻ
കേരളമടക്കം എസ്ഐആര്‍ പൂര്‍ത്തിയായ 17 സംസ്ഥാനങ്ങളിലും കേന്ദ്ര ഭരണ പ്രദേശങ്ങളിലും വാര്‍ഷിക വോട്ടര്‍ പട്ടിക പരിഷ്‌ക്കരണത്തിന് തെരഞ്ഞെടുപ്പ് കമ്മീഷന്‍ ഉത്തരവിട്ടു. പഴയ ഫോം 6 ആയിരിക്കും ഉപയോഗിക്കുക. നവംബര്‍ 12 ന് കരട് വോട്ടര്‍ പട്ടിക പ്രസിദ്ധീകരിക്കും. അന്തിമ പട്ടിക 2027 ജനുവരി നാലിന് പ്രസിദ്ധീകരിക്കും. രാഷ്ട്രീയ പാര്‍ട്ടികള്‍ക്ക് മെഷീന്‍ റീഡബിള്‍ ഡിജിറ്റല്‍ വോട്ടര്‍ പട്ടിക കൈമാറുമെന്നും തെരഞ്ഞെടുപ്പ് കമ്മീഷന്‍. കേരളത്തില്‍ പുതിയ വോട്ടര്‍മാരെയും പട്ടികയില്‍ നിന്ന് ഒഴിവാക്കപ്പെട്ടവരെയും ഉള്‍പ്പെടുത്താന്‍ ഒക്ടോബര്‍ 31 വരെ പ്രത്യേക യജ്ഞം നടത്തും. വില്ലേജ് ഓഫീസുകളിലെ ഹെല്‍പ്പ് ഡെസ്‌ക് വഴിയോ 1950 എന്ന നമ്പറിലോ സഹായം തേടാം.
ഗുണനിലവാരമുള്ള മരുന്നുകൾ കുറഞ്ഞ വിലയിൽ ഉറപ്പാക്കും: മന്ത്രി കെ. മുരളീധരൻ
ഗുണനിലവാരമുള്ള മരുന്നുകള്‍ കുറഞ്ഞ വിലയില്‍ ജനങ്ങള്‍ക്ക് ലഭ്യമാക്കാന്‍ സര്‍ക്കാര്‍ മുന്‍ഗണന നല്‍കുന്നുണ്ടെന്നും, ഫാര്‍മസ്യൂട്ടിക്കല്‍ കമ്പനികളില്‍ നിന്ന് ഗുണമേന്മയുള്ള മരുന്നുകള്‍ ഉറപ്പാക്കാനുള്ള നടപടികള്‍ സ്വീകരിച്ചിട്ടുണ്ടെന്നും ആരോഗ്യ വകുപ്പ് മന്ത്രി കെ. മുരളീധരന്‍. പട്ടം ജില്ലാ പഞ്ചായത്ത് ഇ.എം.എസ്. ഹാളില്‍ സംഘടിപ്പിച്ച ‘ക്ഷയരോഗ മുക്ത പഞ്ചായത്ത്’ പുരസ്‌കാര പ്രഖ്യാപനവും വിതരണവും ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.
ഹണി ട്രappingിലൂടെ പണം തട്ടിയ കേസിൽ യുവതികളടക്കം അഞ്ചുപേർ പിടിയിൽ
ഹണി ട്രാപ്പിലൂടെ പണം തട്ടിയെടുത്തും കൂടുതല്‍ പണം ആവശ്യപ്പെട്ടും ഭീഷണിപ്പെടുത്തിയ കേസില്‍ യുവതികളടക്കം അഞ്ചുപേര്‍ പിടിയില്‍. പരാതിക്കാരനായ പുത്തൂര്‍ സ്വദേശിയുടെ പെണ്‍സുഹൃത്ത് മാന്ദാമംഗലം ഒന്നക്കുന്നില്‍ വീട്ടില്‍ അലോന (19), അലോനയുടെ സുഹൃത്ത് കല്ലൂര്‍ അറങ്ങാശേരി വീട്ടില്‍ ജോയല്‍ (20), മാന്ദാമംഗലം മുരിക്കിന്‍പാറ വാകക്കുഴിയില്‍ വീട്ടില്‍ ലിഷ (40), കൂര്‍ക്കഞ്ചേരി വടൂക്കര കളപ്പാട്ടില്‍ വീട്ടില്‍ ആഷിദ് (32), പാലക്കാട് യാക്കര വാടനാംകുറിശി മൈത്രിനഗറിലെ അന്‍സാര്‍ (26) എന്നിവരെയാണു പോലീസ് പിടികൂടിയത്.
ജയമാധവൻ നായർ കൊലപാതകം: രണ്ടാം പ്രതിയെ അബുദാബിയിൽനിന്ന് എത്തിക്കാൻ ശ്രമം
കൂടത്തില്‍ തറവാട്ടിലെ ജയമാധവന്‍ നായരുടെ കൊലപാതകത്തില്‍ രണ്ടാം പ്രതി സാജുവിനെ അബുദാബിയില്‍നിന്നു നാട്ടിലെത്തിക്കാന്‍ പോലീസ് ശ്രമം തുടങ്ങി. കൊലപാതകം മറയ്ക്കാനും സാക്ഷികളെ സ്വാധീനിക്കാനും പ്രതിയായ രവീന്ദ്രന്‍ നായരെ സഹായിച്ചവര്‍ക്കെതിരെയും അന്വേഷണം ഊര്‍ജ്ജിതമാക്കി. കൂടത്തില്‍ കുടുംബത്തിന്റെ ഭൂമി വാങ്ങിയവരെ കുറിച്ചും അന്വേഷണം തുടരുകയാണ്. ജയമാധവ നായരുടെ കൊലപാതകത്തില്‍ രവീന്ദ്രന്‍െ ഉറ്റ സുഹൃത്തുക്കളായ അനിലിനും സാജുവിനും പങ്കുണ്ടെന്ന് പൊലീസ് പറയുന്നു. അനില്‍ മരിച്ചു. സാജുവാണ് അനിലിന്റെ വാഹനത്തില്‍ ജയമാധനെ ആശുപത്രിയില്‍ കൊണ്ടുപോയത്.
ജർമനിയിലെ തീപിടിത്തം: മലയാളികളുടെ മൃതദേഹങ്ങൾ നാട്ടിലെത്തിക്കും
ജര്‍മനിയിലെ ബോഹുമില്‍ അപ്പാര്‍ട്ട്മെന്റ് സമുച്ചയത്തില്‍ ഉണ്ടായ തീപിടിത്തത്തില്‍ കൊല്ലപ്പെട്ട മൂന്ന് മലയാളികളുടെ മൃതദേഹം നാട്ടില്‍ എത്തിക്കാനുള്ള നടപടികള്‍ തുടങ്ങി. എല്ലാ ചെലവും നോര്‍ക്ക റൂട്ട്സ് വഹിക്കുമെന്ന് സംസ്ഥാന സര്‍ക്കാര്‍ അറിയിച്ചു. കൊല്ലം ചെമ്മക്കാട് സ്വദേശി അഞ്ജലി ജോയി, കട്ടപ്പന സ്വദേശി നോവ സാബു, എറണാകുളം കാലടി സ്വദേശി സിവിന്‍ ജോണി എന്നിവരാണ് ചൊവ്വാഴ്ച പുലര്‍ച്ചെ ഉണ്ടായ തീപിടിത്തത്തില്‍ കൊല്ലപ്പെട്ടത്. മൂന്ന് പേരും ജോലിക്കും പഠനത്തിനുമായി മാസങ്ങള്‍ക്ക് മുന്‍പ് ജര്‍മ്മനിയില്‍ എത്തിയവരാണ്.
കേരളത്തിൽ തുലാവർഷം ആരംഭിച്ചു; അതിശക്തമായ മഴയ്ക്ക് സാധ്യത
കേരളത്തില്‍ തുലാവര്‍ഷം ആരംഭിച്ചു. അതിശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്.
നെടുമ്പാശ്ശേരി വാഹനാപകടം: പ്രതി കതിര് മദ്യപിച്ചിരുന്നതായി സ്ഥിരീകരിച്ചു
നെടുമ്പാശ്ശേരി മിനി കൂപ്പര്‍ അപകടത്തില്‍ പ്രതി സുഹൈല്‍ സജീവ് മദ്യപിച്ചിരുന്നതായി കണ്ടെത്തി. സാമ്പിള്‍ പരിശോധന ഫലം പൊലീസിന് ലഭിച്ചു. സുഹൈല്‍ സജീവിന്റെ ശരീരത്തില്‍ കൂടിയ അളവില്‍ മദ്യം ഉണ്ടായിരുന്നതായി പരിശോധന ഫലത്തില്‍ പറയുന്നു. പ്രതി മറ്റെന്തെങ്കിലും ലഹരി ഉപയോഗിച്ചോ എന്നതില്‍ വിശദ പരിശോധന നടത്തും.
നെടുമ്പാശ്ശേരി അപകടം: സർക്കാരിന്റെ ഭാഗത്തുനിന്ന് നീതി ഉറപ്പാക്കുമെന്ന് മന്ത്രി ടി. സിദ്ദിഖ്
നെടുമ്പാശ്ശേരി മിനി കൂപ്പര്‍ അപകടത്തില്‍ സര്‍ക്കാര്‍ നീതി ഉറപ്പാക്കുമെന്ന് മന്ത്രി ടി സിദ്ദിഖ്. അപകടത്തില്‍ മരിച്ച വയനാട് സ്വദേശിനി ദേവികയുടെ വീട് മന്ത്രി സന്ദര്‍ശിച്ചു. കര്‍ണാടക സ്വദേശി ഇയാസിന്റെ കുടുംബവുമായി സംസാരിച്ചെന്നും മന്ത്രി വ്യക്തമാക്കി.
മാസപ്പടി കേസ് വിധി നിയമപരമായും രാഷ്ട്രീയമായും നേരിടും: എം. വി. ഗോവിന്ദൻ
പിണറായി വിജയനും കുടുംബത്തിനും എതിരായ മാസപ്പടിക്കേസിലെ ഹൈക്കോടതി വിധിയെ നിയമപരമായും രാഷ്ട്രീയപരമായും നേരിടുമെന്ന് സിപിഎം സംസ്ഥാന സെക്രട്ടറി എം വി ഗോവിന്ദന്‍. അപ്പീല്‍ പോകേണ്ടിയിരുന്നത് പിണറായിയല്ല, സര്‍ക്കാരായിരുന്നുവെന്നും ഗോവിന്ദന്‍.
അഴിമതിക്കേസ് സിപിഎമ്മിന് കനത്ത തിരിച്ചടി: സണ്ണി ജോസഫ്
പിണറായി വിജയനും കുടുംബത്തിനുമെതിരായ അഴിമതിക്കേസ് സി.പി.എമ്മിന് കനത്ത തിരിച്ചടിയായെന്ന് കെ.പി.സി.സി പ്രസിഡന്റ് സണ്ണി ജോസഫ്. ആരോപണങ്ങള്‍ രാഷ്ട്രീയ പ്രേരിതമാണെന്ന സി.പി.എം വാദം ഇതോടെ അപ്രസക്തമായെന്ന് അദ്ദേഹം പറഞ്ഞു.
ഗരീബ് രഥ് എക്സ്പ്രസിന് മൂന്ന് തേർഡ് എസി കോച്ചുകൾ കൂടി അനുവദിച്ചു
യശ്വന്ത്പൂര്‍ – തിരുവനന്തപുരം ഗരിബ് രഥ് എക്സ്പ്രസില്‍ മൂന്ന് തേര്‍ഡ് എസി കോച്ചുകള്‍ കൂടി അനുവദിച്ച് റെയില്‍വേ. ട്രെയിന്‍ നമ്പര്‍ 12257/12258 ട്രെയിനുകളിലാണ് അധിക കോച്ചുകള്‍ ഘടിപ്പിക്കുക.
ശബരിമല പോലീസ് ഉദ്യോഗസ്ഥരുടെ മെസ്സ് ഗ്രാന്റ് വർധിപ്പിച്ചു
ശബരിമല മണ്ഡല മകരവിളക്ക് മഹോത്സവത്തോടനുബന്ധിച്ചുള്ള പൊലീസ് ഉദ്യോഗസ്ഥരുടെ മെസ്സ് ഗ്രാന്റ് വര്‍ദ്ധിപ്പിച്ച് ആഭ്യന്തര വകുപ്പ്. ഡ്യൂട്ടിയിലുള്ള പൊലീസ് ഉദ്യോഗസ്ഥന് ഭക്ഷണ ചെലവിലേക്ക് ദിവസം 90 രൂപയാണ് കണക്കാക്കുക.
വാണിയമ്പുഴ ഊരിലെ പ്രളയബാധിതർക്ക് പുനരധിവാസം ഒരുങ്ങുന്നു
മഹാപ്രളയത്തില്‍ വീടുകള്‍ വാസയോഗ്യമല്ലാതായതോടെ കഴിഞ്ഞ ഏഴ് വര്‍ഷമായി ദുരിത ജീവിതം നയിക്കുന്ന മലപ്പുറം വാണിയമ്പുഴ ഊരിലെ കുടുംബങ്ങള്‍ക്ക് വീടൊരുങ്ങുന്നു. രണ്ടര കോടിയോളം രൂപ സര്‍ക്കാര്‍ പുനരധിവാസത്തിനായി പ്രഖ്യാപിച്ചു.
യുപിഐ ഇടപാടുകൾക്ക് ഫീസ്: കേന്ദ്ര തീരുമാനത്തിനെതിരെ നിയമസഭ പ്രമേയം പാസാക്കി
യു പി ഐ ഇടപാടുകള്‍ക്കു ഫീസ് ഈടാക്കാനുള്ള കേന്ദ്ര സര്‍ക്കാര്‍ തീരുമാനം പിന്‍വലിക്കണമെന്ന് ആവശ്യപ്പെട്ട് കേരള നിയമസഭ പ്രമേയം പാസാക്കി. പ്രമേയത്തെ യു ഡി എഫ് – എല്‍ ഡി എഫ് അംഗങ്ങള്‍ പിന്തുണച്ചു.
പത്മശ്രീ ചെറുവയൽ രാമന് ഔദ്യോഗിക ബഹുമതികളോടെ വിട നൽകി
അന്തരിച്ച പത്മശ്രീ ചെറുവയല്‍ രാമന് വിട നല്‍കി നാട്. ജന്മദേശമായ മാനന്തവാടി കമ്മനയില്‍ കുറിച്യ സമുദായ ശ്മശനാത്തില്‍ പൂര്‍ണ ഔദ്യോഗിക ബഹുമതികളോടെയായിരുന്നു സംസ്‌കാരം. മന്ത്രി ടി സിദ്ദിഖ്, സിപിഎം സംസ്ഥാന സെക്രട്ടറി എം വി ഗോവിന്ദന്‍ തുടങ്ങി രാഷ്ട്രീയ സാമൂഹിക രംഗത്തെ പ്രമുഖര്‍ അന്ത്യോപചാരം അര്‍പ്പിച്ചു.
തിരുവനന്തപുരം മൃഗശാല മാറ്റുന്നതിനെതിരെ പ്രതിഷേധം ശക്തമാകുന്നു
തിരുവനന്തപുരത്തെ 167 വര്‍ഷത്തിലേറെ പഴക്കമുള്ള മൃഗശാല മാറ്റണമെന്ന മുഖ്യമന്ത്രി വി.ഡി. സതീശന്റെ അഭിപ്രായത്തിനെതിരേ എല്‍ഡിഎഫ് നേതാക്കളും സാസ്‌കാരിക പ്രവര്‍ത്തകരും പ്രതിഷേധവുമായി രംഗത്തെത്തി. തിരുവനന്തപുരം മൃഗശാല സംരക്ഷണ സമിതി’ രൂപീകരിച്ചു. ജി.എസ് പ്രദീപ് യോഗം ഉദ്ഘാടനം ചെയ്തു. വട്ടിയൂര്‍ക്കാവ് മുന്‍ എംഎല്‍എ വി.കെ പ്രശാന്ത്, മുന്‍ എംപി അഡ്വ. എ. സമ്പത്ത്, കൗണ്‍സിലര്‍ അഡ്വ. എസ്.പി. ദീപക്, നഗരസഭ മുന്‍ സ്റ്റാന്റിങ് കമ്മിറ്റി ചെയര്‍മാന്‍ പാളയം രാജന്‍, മൃഗശാല മുന്‍ ഡയറക്ടര്‍ ഡോ. ഉദയവര്‍മ്മന്‍ തുടങ്ങിയവര്‍ പങ്കെടുത്തു.
പണത്തെച്ചൊല്ലി തർക്കം: ഇതര സംസ്ഥാന തൊഴിലാളിയെ ആക്രമിച്ചയാൾ പിടിയിൽ
ഒന്നിച്ചിരുന്നു മദ്യപിക്കുന്നതിനിടെ പണത്തെച്ചൊല്ലി വഴക്കിട്ട സുഹൃത്തായ ഇതര സംസ്ഥാന തൊഴിലാളിയെ കരിങ്കല്ല് കൊണ്ട് ആക്രമിച്ച പ്രതി പിടിയില്‍. പത്തനംതിട്ട ആനപ്പാറ സ്വദേശി നൗഫല്‍ നജീബ് (34) ആണ് പിടിയിലായത്. പശ്ചിമ ബംഗാള്‍ ജാല്‍പ്പായിഗുരി സ്വദേശി മുഹമ്മദ് സിദ്ദീഖ് (34) നെ ആണ് പ്രതി വലിയ കരിങ്കല്ല് കൊണ്ട് കൊലപ്പെടുത്താന്‍ ശ്രമിച്ചത്.
കൊട്ടാരക്കരയിൽ നവജാതശിശു മരിച്ച സംഭവം: അനാസ്ഥയെന്ന് ബന്ധുക്കൾ
കൊല്ലം കൊട്ടാരക്കര താലൂക്ക് ആശുപത്രിയില്‍ പ്രസവത്തിനിടെ നവജാതശിശു മരിച്ചത് ആശുപത്രി അധികൃതരുടെ അനാസ്ഥ കാരണമെന്ന് ബന്ധുക്കള്‍. കൊട്ടാരക്കര ചെപ്ര സ്വദേശികളായ സുരേഷ് – ശ്രീകല ദമ്പതികളുടെ നവജാത ശിശുവാണ് മരിച്ചത്. പ്രസവവേദന അനുഭവപ്പെട്ട ശ്രീകലയ്ക്ക് കൃത്യസമയത്ത് ശസ്ത്രക്രിയ നടത്തിയില്ലെന്നാണ് ആരോപണം.
രാഹുൽ ഗാന്ധിക്കെതിരായ പരാമർശം: ബിജെപി കൗൺസിലർക്ക് നോട്ടീസ്
രാഹുല്‍ ഗാന്ധിക്കെതിരെ ‘മയക്കുമരുന്ന് താണ്ഡവം’ എന്ന വിവാദ പരാമര്‍ശം നടത്തിയ ബിജെപി കൗണ്‍സിലര്‍ ശ്രീലേഖയ്ക്ക് കെപിസിസി വക്കീല്‍ നോട്ടീസ് അയച്ചു. പ്രസ്താവന പിന്‍വലിച്ച് മാപ്പ് പറഞ്ഞില്ലെങ്കില്‍ നിയമനടപടി നേരിടേണ്ടി വരുമെന്നാണ് മുന്നറിയിപ്പ്.
മന്ത്രി കെ.എം. ഷാജിയുടെ വിദേശയാത്രയിൽ ദുരൂഹതയെന്ന് സിപിഎം
മന്ത്രി കെ.എം. ഷാജിയുടെ വിദേശത്തേക്കുള്ള പ്രാഗ് യാത്രയില്‍ ദുരൂഹതയുണ്ടെന്ന് സിപിഎം മലപ്പുറം ജില്ലാ സെക്രട്ടറി വി.പി. അനില്‍. മന്ത്രിക്ക് വിദേശ യാത്ര പോകണമെങ്കില്‍ കേന്ദ്ര -സംസ്ഥാന സര്‍ക്കാരുകളുടെ അനുമതി വേണം. മദ്യവ്യവസായ മുതലാളിയും തൊഴില്‍ തട്ടിപ്പ് കേസ് പ്രതിയും സ്പോണ്‍സര്‍ ചെയ്ത ഷാജിയുടെ യാത്രയില്‍ ലീഗ് മറുപടി പറയണമെന്നും അദ്ദേഹം പറഞ്ഞു.
കൂട്ടുപുഴ ചെക്പോസ്റ്റ് വഴി ലഹരി കടത്ത്: ഒരാൾ കൂടി പിടിയിൽ
കൂട്ടുപുഴ ചെക്പോസ്റ്റ് വഴി 192 ഗ്രാം എംഡിഎംഎ കടത്തിയ കേസില്‍ ഒരാള്‍ കൂടി അറസ്റ്റില്‍. എംഡിഎംഎ ഓര്‍ഡര്‍ ചെയ്ത പെരിന്തല്‍മണ്ണ സ്വദേശി ജാസിം ബാദുഷയാണ് ഇരിട്ടി പൊലീസിന്റെ പിടിയിലായത്. കുപ്രസിദ്ധ ലഹരി കച്ചവടക്കാരി റോഷ്നി സാവിയോ ഉള്‍പ്പെടെ ആറ് പേരാണ് ഈ കേസില്‍ ഇതുവരെ കുടുങ്ങിയത്.
കോടതി വളപ്പിലെ പെരുമാറ്റം: രാഹുൽ ഗാന്ധിയോട് വിശദീകരണം തേടി സുപ്രീംകോടതി
ഇന്ത്യാസഖ്യ മാര്‍ച്ചിനിടെ കോടതി വളപ്പില്‍ പെരുമാറിയ രീതിയില്‍ രാഹുല്‍ ഗാന്ധിയോട് വിശദീകരണം തേടി സുപ്രീംകോടതി. കോടതിയെ ഭീഷണിപ്പെടുത്താമെന്നു കരുതേണ്ടെന്ന് ചീഫ് ജസ്റ്റിസ് സൂര്യകാന്ത്. ഇന്ത്യാ സഖ്യം നല്‍കിയ ഹര്‍ജിയില്‍ ഗ്യാനേഷ് കുമാറിനും കേന്ദ്ര സര്‍ക്കാരിനും കോടതി നോട്ടീസ് അയച്ചു. വനിത മാധ്യമപ്രവര്‍ത്തകര്‍ക്കെതിരായ അതിക്രമ കേസുകളില്‍ വനിത ജഡ്ജി ഉള്‍പ്പെട്ട അന്വേഷണ സമിതി രൂപീകരിക്കും എന്ന സൂചനയും കോടതി നല്‍കി.
സിജെപിയുടെ ‘തിരംഗ മാർച്ച്’ തടയില്ലെന്ന് ഡൽഹി ഹൈക്കോടതി
ജന്തര്‍മന്തറില്‍ ദേശീയപതാകയുമായി പ്രതിഷേധിച്ച സിജെപി നേതാക്കളെ ജയിലിലടച്ചതിനെതിരേ സിജെപി ഇന്നു വൈകുന്നേരം അഞ്ചിനു കൊണാട്ട് പ്ലേസില്‍ നടത്തുന്ന പ്രതിഷേധ സമരം ‘തിരംഗ മാര്‍ച്ച്’ തടയില്ലെന്നു ഡല്‍ഹി ഹൈക്കോടതി. എന്നാല്‍ പ്രതിഷേധത്തിന് 11 പേരെ മാത്രമേ അനുവദിക്കൂവെന്ന് ഡല്‍ഹി പൊലീസ്. 11 നേതാക്കളുടെ പേര് നല്‍കാന്‍ ആവശ്യപ്പെടുകയും ചെയ്തു. സെന്‍ട്രല്‍ പാര്‍ക്കിന് ചുറ്റും 6000 പൊലീസുകാരെ വിന്യസിക്കുമെന്നും പൊതുജനങ്ങള്‍ പ്രതിഷേധത്തില്‍ പങ്കെടുക്കരുതെന്നും ഡല്‍ഹി പൊലീസ് ആവശ്യപ്പെട്ടു.
ദേശീയ പതാകയെ തടയുന്നത് എന്തിനെന്ന് സിജെപി നേതാവ് അഭിജീത് ദിപ്കെ
ദേശീയ പതാകയെ എന്തിനാണ് തടയുന്നതെന്നും പ്രധാനമന്ത്രി നരേന്ദ്ര മോദിക്ക് ഭയമാണോയെന്നും സിജെപി സ്ഥാപകന്‍ അഭിജീത് ദിപ്കെ. തിരംഗ മാര്‍ച്ച് എന്തായാലും നടക്കും. തെരഞ്ഞെടുപ്പ് കമ്മീഷനിലെ ക്രമക്കേടുകള്‍ അന്വേഷിക്കണം. പ്രതിഷേധങ്ങള്‍ക്കെതിരായ പൊലീസ് അതിക്രമങ്ങളും അന്വേഷണം വേണം. കൊണാട്ട് പ്ലേസില്‍ എത്താന്‍ സാധിക്കാത്തവര്‍ സ്വന്തം സ്ഥലങ്ങളില്‍ തിരംഗറാലികള്‍ സംഘടിപ്പിക്കാന്‍ അഭിജീത് ദീപ്‌കെ ആഹ്വാനംചെയ്തു.
പൊലീസ് അതിക്രമത്തിൽ പ്രതിഷേധിച്ച് ഡൽഹിയിൽ എൻ എസ് യു ഐ സമരം
മര്‍ദന പരാതിയില്‍ എഫ്ഐആര്‍ ഇടാത്തതില്‍ പ്രതിഷേധിച്ച് ഡല്‍ഹിയില്‍ രാത്രി എന്‍ എസ് യു ഐ സമരം. പൊലീസ് അതിക്രമങ്ങള്‍ക്ക് ഇരയായ മലയാളി വിദ്യാര്‍ഥിനി ആതിര, വനിതാ പൊലീസുകാര്‍ മര്‍ദിച്ച ഋതു ബരാല എന്നിവര്‍ അടക്കമുള്ള പ്രവര്‍ത്തകര്‍ പാര്‍ലമെന്റ് സ്ട്രീറ്റ് സ്റ്റേഷന് മുന്നില്‍ പ്രതിഷേധിച്ചു. പോലീസുകാര്‍ക്കെതിരേ കേസെടുക്കുംവരെ സമരം തുടരുമെന്ന് എന്‍ എസ് യു ഐ ദേശീയാധ്യക്ഷന്‍ വിനോദ് ജാക്കര്‍ പറഞ്ഞു. പ്രവര്‍ത്തകര്‍ ബാരിക്കേഡ് ചാടിക്കടക്കാന്‍ ശ്രമിച്ചതോടെ സ്ഥലത്ത് സംഘര്‍ഷമായി. ഗതാഗതം സ്തംഭിച്ചു. പ്രവര്‍ത്തകരെ പൊലീസ് കസ്റ്റഡിയയിലെടുത്തു നീക്കി.
രാജ്യം വിടണമെന്ന നോട്ടീസിനെതിരെ ബോംബെ ഹൈക്കോടതിയെ സമീപിക്കാൻ നടൻ ഇമ്രാൻ ഖാൻ
രാജ്യം വിടണമെന്ന നോട്ടീസിനെതിരെ ബോംബെ ഹൈക്കോടതിയെ സമീപിക്കുമെന്ന് നടന്‍ ഇമ്രാന്‍ ഖാന്‍. മുഖ്യതെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെതിരായ പ്രതിഷേധത്തില്‍ പങ്കെടുത്തതിന് ഓവര്‍സീസ് സിറ്റിസണ്‍ കാര്‍ഡും അമേരിക്കന്‍ പൗരത്വവുമുള്ള ഇമ്രാനോട് രാജ്യം വിടാന്‍ പോലീസ് ആവശ്യപ്പെട്ടിരുന്നു.
രാജ്യത്ത് ഭരണമാറ്റം വേണമെന്ന് മുതിർന്ന അഭിഭാഷകൻ പ്രശാന്ത് ഭൂഷൺ
രാജ്യത്ത് ഭരണമാറ്റം വേണമെന്ന് മുതിര്‍ന്ന അഭിഭാഷകന്‍ പ്രശാന്ത് ഭൂഷണ്‍. രാജ്യത്തെ തെരഞ്ഞെടുപ്പ് ജനാധിപത്യം തകര്‍ക്കാന്‍ മോദി സര്‍ക്കാര്‍ കച്ചകെട്ടി ഇറങ്ങിയിരിക്കുകയാണെന്ന് പ്രശാന്ത് ഭൂഷണ്‍ പറഞ്ഞു. സര്‍ക്കാരിനോട് വിയോജിപ്പ് പ്രകടിപ്പിക്കുന്നത് ഒരു കുറ്റമല്ലെന്നും പ്രശാന്ത് ഭൂഷണ്‍ ചൂണ്ടിക്കാട്ടി.
ദുഷ്യന്ത് ഗൗതമിന്റെ ഗവർണർ നിയമനം പുനപരിശോധിക്കണമെന്ന് രാഹുൽ ഗാന്ധി
അങ്കിത ഭണ്ഡാരി കേസിലെ ആരോപിതനായ ദുഷ്യന്ത് ഗൗതമിനെ സിക്കിം ഗവര്‍ണറായി നിയമിച്ചതു പുനപരിശോധിക്കണമെന്ന് ആവശ്യപ്പെട്ട് പ്രതിപക്ഷ നേതാവ് രാഹുല്‍ ഗാന്ധി രാഷ്ട്രപതിക്ക് കത്തയച്ചു. കേസില്‍ സിബിഐ അന്വേഷണം പൂര്‍ത്തിയാകും വരെ നിയമനം തടയണമെന്നാണ് ആവശ്യം. ഗവര്‍ണര്‍ എന്ന ഭരണഘടനാ പദവിയിലെത്തിയാല്‍ ക്രിമിനല്‍ നടപടികള്‍ തടസപ്പെടുമെന്ന് കത്തില്‍ രാഹുല്‍ ചൂണ്ടിക്കാട്ടി.
ഗുജറാത്തിൽ റെയിൽവേ ട്രാക്കിൽ ഇരുമ്പ് കമ്പി വെച്ച നിലയിൽ കണ്ടെത്തി
ഗുജറാത്തില്‍ റെയില്‍വേ പാതയില്‍ അജ്ഞാതര്‍ കൊണ്ടിട്ട ഇരുമ്പ് കമ്പിയിലൂടെ ട്രെയിന്‍ കയറിയിറങ്ങി. ഭാഗ്യംകൊണ്ടാണു വന്‍ ദുരന്തം ഒഴിവായത്. ജാംനഗര്‍ ജില്ലയിലെ ലാല്‍പുര്‍, ഗോപ്ജം സ്റ്റേഷനുകള്‍ക്കിടയിലാണ് സംഭവം. മൂന്നടിയോളം നീളമുള്ള ഇരുമ്പ് കമ്പിയിലൂടെ ആണ് ട്രെയിന്‍ കയറിയിറങ്ങിയത്. പൊലീസ് അന്വേഷണം ആരംഭിച്ചു.
അമേരിക്കയിൽ ഹിന്ദു ക്ഷേത്രത്തിൽ വെടിവയ്പ് നടത്താൻ ശ്രമിച്ച യുവാവ് പിടിയിൽ
അമേരിക്കയിലെ ഇല്ലിനോയിസില്‍ ഹിന്ദു ക്ഷേത്രത്തിനുള്ളില്‍ വെടിവയ്പ് നടത്താന്‍ ശ്രമിച്ച 19 കാരന്‍ പിടിയില്‍. ചിക്കാഗോയിലെ ഇല്ലിനോയിസിലെ അറോറ എന്ന സ്ഥലത്തുള്ള ക്ഷേത്രത്തിലാണ് 19കാരന്‍ തോക്കുമായി എത്തിയത്. ഇന്ത്യക്കാര്‍ക്കെതിരായ ചിന്താഗതികളില്‍ വിശ്വസിക്കുന്നതാണ് യുവാവിനെ അക്രമത്തിന് പ്രേരിപ്പിച്ചതെന്നാണ് അന്തര്‍ ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നത്.
നിദാൽ ഹസന്റെ വധശിക്ഷ ലൈവ് സ്ട്രീം ചെയ്യില്ലെന്ന് ട്രംപ്
അമേരിക്കയിലെ ഫോര്‍ട്ട് ഹുഡ് വെടിവെപ്പ് കേസിലെ പ്രതി നിദാല്‍ ഹസന്റെ വധശിക്ഷ ലൈവ് സ്ട്രീം ചെയ്യില്ലെന്ന് പ്രസിഡന്റ് ഡോണാള്‍ഡ് ട്രംപ്. നിശ്ചയിച്ച പ്രകാരം ഹസന്റെ വധശിക്ഷ ഫയറിംഗ് സ്‌ക്വാഡ് വഴിതന്നെ നടപ്പാക്കുമെന്നും ട്രംപ് പറഞ്ഞു. ഹസന്റെ വധശിക്ഷ ലൈവ് സ്ട്രീം ചെയ്യുന്നതോ കാണാനോ താല്‍പര്യമില്ലെന്നു മനസിലായെന്നു ട്രംപ്.
രഞ്ജി ട്രോഫി: ഒഡീഷയ്ക്കെതിരായ മത്സരത്തിനുള്ള കേരള ടീമിനെ പ്രഖ്യാപിച്ചു
രഞ്ജി ട്രോഫി ക്രിക്കറ്റില്‍ ഒഡീഷയ്ക്കെതിരായ മത്സരത്തിനുള്ള കേരള ടീമിനെ പ്രഖ്യാപിച്ചു. യുവതാരം അഭിഷേക് ജെ. നായരെ ടീമില്‍ ഉള്‍പ്പെടുത്തിയിട്ടുണ്ട്. കാര്യവട്ടം ഗ്രീന്‍ഫീല്‍ഡ് സ്റ്റേഡിയത്തില്‍ ഒക്ടോബര്‍ 18 മുതല്‍ 21 വരെയാണ് മത്സരം നടക്കുന്നത്. ഈ സീസണില്‍ കേരളത്തിന്റെ ആദ്യ ഹോം മത്സരം കൂടിയാണിത്. വിഷ്ണു വിനോദാണ് ടീമിന്റെ ക്യാപ്റ്റന്‍.
സി.കെ. നായിഡു ട്രോഫി: കേരളം – പോണ്ടിച്ചേരി മത്സരം സമനിലയിൽ
23 വയസ്സില്‍ താഴെയുള്ളവര്‍ക്കായുള്ള സി.കെ. നായിഡു ട്രോഫിയില്‍ കേരളവും പോണ്ടിച്ചേരിയുമായുള്ള മത്സരം സമനിലയില്‍. 59 റണ്‍സിന്റെ ഒന്നാം ഇന്നിങ്‌സ് ലീഡ് സ്വന്തമാക്കിയ കേരളം, രണ്ടാം ഇന്നിങ്‌സില്‍ രണ്ട് വിക്കറ്റിന് 226 റണ്‍സെടുത്ത് നില്‍ക്കെയാണ് കളി സമനിലയില്‍ പിരിഞ്ഞത്. ആദ്യ ഇന്നിങ്‌സില്‍ കേരളം 515 റണ്‍സും പോണ്ടിച്ചേരി 456 റണ്‍സുമാണ് നേടിയത്.
സൂപ്പർ ലീഗ് കേരള: ഫോഴ്‌സ കൊച്ചി – തിരുവനന്തപുരം കൊമ്പൻസ് പോരാട്ടം ഇന്ന്
സൂപ്പര്‍ ലീഗ് കേരളയുടെ നാലാം റൗണ്ടിലെ ആദ്യ മത്സരത്തില്‍ ഇന്നു ഫോഴ്‌സ കൊച്ചിയും തിരുവനന്തപുരം കൊമ്പന്‍സും തമ്മില്‍ ഏറ്റുമുട്ടും. കൊച്ചിയുടെ അറ്റാക്കിംഗ് ഗെയിമും കൊമ്പന്മാരുടെ ഡിഫന്‍സീവ് ഗെയിമും തമ്മിലുള്ള പോരാട്ടം ആവേശകരമായിരിക്കും. മൂന്ന് മത്സരങ്ങളില്‍ അഞ്ച് പോയന്റുമായി കൊച്ചി മൂന്നാം സ്ഥാനത്തും നാല് പോയന്റുമായി കൊമ്പന്‍സ് നാലാം സ്ഥാനത്തുമാണ്.
സൗത്ത് ഇന്ത്യൻ ബാങ്കിന് റെക്കോർഡ് അറ്റാദായം
നടപ്പ് സാമ്പത്തിക വര്‍ഷത്തിലെ (2026-27) രണ്ടാം പാദത്തില്‍ എക്കാലത്തെയും ഉയര്‍ന്ന അറ്റാദായം സ്വന്തമാക്കി സൗത്ത് ഇന്ത്യന്‍ ബാങ്ക്. ജൂലൈ-സെപ്റ്റംബര്‍ പാദത്തില്‍ ബാങ്കിന്റെ അറ്റാദായം 21.28 ശതമാനം വര്‍ധിച്ച് 426.13 കോടി രൂപയിലെത്തി. കഴിഞ്ഞ സാമ്പത്തിക വര്‍ഷത്തെ സമാന പാദത്തില്‍ ഇത് 351.31 കോടി രൂപയായിരുന്നു. 37.95 ശതമാനം വാര്‍ഷിക വളര്‍ച്ചയോടെ അറ്റ പലിശ വരുമാനം 1,116 കോടി രൂപയായി. ബാങ്കിന്റെ പ്രവര്‍ത്തന ലാഭം 37 ശതമാനം വര്‍ധിച്ച് 732 കോടി രൂപയിലെത്തി. മൊത്ത നിഷ്‌ക്രിയ ആസ്തി മുന്‍വര്‍ഷത്തെ 2.93 ശതമാനത്തില്‍ നിന്ന് 169 ബേസിസ് പോയിന്റ് കുറഞ്ഞ് 1.24 ശതമാനത്തിലെത്തി. പ്രവാസി നിക്ഷേപത്തില്‍ മാത്രം 5,008 കോടി രൂപയുടെ വര്‍ധന ഉണ്ടായി.
ചരിത്ര നേട്ടവുമായി ആപ്പിൾ: വിപണിമൂല്യം 5 ട്രില്യൺ ഡോളർ കടന്നു
വിപണിമൂല്യത്തില്‍ ചരിത്രത്തിലാദ്യമായി 5 ട്രില്യണ്‍ ഡോളറിന് മുകളില്‍ ക്ലോസ് ചെയ്ത് ആപ്പിള്‍. ആദ്യമായി ഈ നാഴികക്കല്ല് പിന്നിട്ടത് ചിപ്പ് നിര്‍മാതാക്കളായ എന്‍വിഡിയ ആണ്. നേട്ടം കൈവരിക്കുന്ന ലോകത്തെ രണ്ടാമത്തെ കമ്പനിയാണ് ആപ്പിള്‍. ബുധനാഴ്ചത്തെ വ്യാപാരദിനത്തിലായിരുന്നു ചരിത്രത്തിലേക്കുള്ള ക്ലോസിംഗ്. മുമ്പ് ആറുതവണ വ്യാപാരത്തിനിടെ ആപ്പിളിന്റെ വിപണിമൂല്യം 5 ട്രില്യണ്‍ ഡോളര്‍ കടന്നിരുന്നെങ്കിലും വ്യാപാരാന്ത്യം വരെ ആ നില തുടരാനായിരുന്നില്ല. ഏഴാമത്തെ തവണയാണ് അത് സാധ്യമായത്. ഡൗ ജോണ്‍സ് മാര്‍ക്കറ്റ് ഡാറ്റ പ്രകാരം ബുധനാഴ്ചത്തെ ക്ലോസിംഗില്‍ കമ്പനിയുടെ വിപണിമൂല്യം 5.005 ട്രില്യണ്‍ ഡോളറായിരുന്നു. സ്മാര്‍ട്ട് ഹോം ഉപകരണങ്ങളുടെ പുതിയ നിര അവതരിപ്പിച്ചതിനാണ് ആപ്പിളിന്റെ വിപണിമൂല്യം ഉയര്‍ത്തിയത്.
രഞ്ജൻ പ്രമോദിന്റെ ‘നൈറ്റ് ഷോസ്’ ടീസർ പുറത്തിറങ്ങി
കാവ്യ ഫിലിം കമ്പനി നിര്‍മിച്ച്, രഞ്ജന്‍ പ്രമോദ് ഒരുക്കിയ ‘നൈറ്റ് ഷോസ്’ ടീസര്‍ പുറത്ത്. ദൃശ്യങ്ങളുടെയും ശബ്ദത്തിന്റെയും പുതിയൊരു ലോകത്തേക്കാണ് ചിത്രം പ്രേക്ഷകരെ കൂട്ടിക്കൊണ്ട് പോകുന്നത്. ഡിജെ പാര്‍ട്ടിയുടെയും നൈറ്റ് ലൈഫിന്റെയും ദൃശ്യങ്ങളിലൂടെ സഞ്ചരിക്കുന്ന ടീസര്‍, സിനിമയുടെ കഥാപശ്ചാത്തലത്തെക്കുറിച്ചും ദൃശ്യാവിഷ്‌കാരത്തെക്കുറിച്ചും കൗതുകം സൃഷ്ടിക്കുന്നുണ്ട്. സൗബിന്‍ ഷാഹിറും 1870 പുതുമുഖങ്ങളുമാണ് ചിത്രത്തിന്റെ താരനിരയില്‍ അണിനിരക്കുന്നത്. സാങ്കേതിക മികവിന് ഏറെ പ്രാധാന്യം നല്‍കുന്ന ചിത്രമായിരിക്കും ‘നൈറ്റ് ഷോസ്’. ശബ്ദവിന്യാസം, സംഗീതം എന്നിവയ്ക്ക് ചിത്രത്തില്‍ പ്രത്യേക പ്രാധാന്യമുണ്ടെന്നതും ടീസറിലൂടെ വ്യക്തമാകുന്നുണ്ട്.
ദുൽഖർ സൽമാന്റെ ‘ഐ ആം ഗെയിം’ സിനിമയിലെ വീഡിയോ ഗാനം പുറത്തിറങ്ങി
ദുല്‍ഖര്‍ സല്‍മാന്‍ നായകനായി ഏറ്റവും ഒടുവില്‍ റിലീസ് ചെയ്ത ‘ഐ ആം ഗെയിമി’ലെ പുതിയ വീഡിയോ ഗാനം പുറത്ത്. ‘നിനച്ചത് നടക്കിറ നേരമേ…’എന്ന ഗാനത്തിന് വരികള്‍ എഴുതിയിരിക്കുന്നത് വിനായക് ശശികുമാറും അറിവും ചേര്‍ന്നാണ്. സംഗീതം: ജേക്സ് ബിജോയ്. ആലാപനം: അറിന്, ആനന്ദ് ശ്രീരാജ്. സംവിധാനം: നഹാസ് ഹിദായത്ത്. ദുല്‍ഖറിന്റെ വേഫെറര്‍ ഫിലിംസിന്റെ ബാനറില്‍ ദുല്‍ഖര്‍ സല്‍മാനും ജോം വര്‍ഗീസും ചേര്‍ന്നാണ് ചിത്രം നിര്‍മ്മിച്ചത്. തിരക്കഥ: സജീര്‍ ബാബ, ഇസ്മായില്‍ അബൂബക്കര്‍, ബിലാല്‍ മൊയ്ദു. സംഭാഷണം: സജീര്‍ ബാബ, ആദര്‍ശ് സുകുമാരന്‍, ഷബാസ് റഷീദ്. തന്റെ കരിയറിലെ തന്നെ ഏറ്റവും മികച്ച പ്രകടനങ്ങളിലൊന്ന് സമ്മാനിച്ച ദുല്‍ഖര്‍ ആണ് ഈ ചിത്രത്തിന്റെ നട്ടെല്ല്.
മഹീന്ദ്ര എക്സ് യുവി 3എക്‌സ്ഒ സിഎൻജി വിപണിയിലെത്തി
പ്രമുഖ വാഹന നിര്‍മ്മാതാക്കളായ മഹീന്ദ്രയുടെ പുതിയ എക്സ് യുവി 3എക്‌സ്ഒ സിഎന്‍ജി വേര്‍ഷന്‍ വിപണിയില്‍ അവതരിപ്പിച്ചു. പ്രാരംഭ വില 9.99 ലക്ഷം രൂപ. നോര്‍മല്‍, കംഫോര്‍ട്ട്, സ്‌പോര്‍ട്‌സ് എന്നി മൂന്ന് സ്റ്റിയറിങ് മോഡുകളാണ് ഇതിന്റെ പ്രത്യേകത. ആറു എയര്‍ബാഗുകള്‍, നാലു ഡിസ്‌ക് ബ്രേക്കുകള്‍, ത്രീ പോയിന്റ് സീറ്റ് ബെല്‍റ്റുകള്‍, ഇബിഡിയോട് കൂടിയ എബിഎസ്, റിവേഴ്‌സ് പാര്‍ക്കിങ് സെന്‍സര്‍, സീറ്റ് ബെല്‍റ്റ് റിമൈന്റര്‍, സ്പീഡ് അലര്‍ട്ട് സിസ്റ്റം എന്നിവയാണ് സുരക്ഷ വിഭാഗത്തില്‍ വരുന്നത്. 1.2 ലിറ്റര്‍, ടിസിഎംപിഎഫ്ഐ ടര്‍ബോ പെട്രോള്‍ എന്‍ജിന്‍ ആണ് ഇതിന് കരുത്തുപകരുന്നത്. ഇത് 110 ബിഎച്ച്പി കരുത്തും 200 എന്‍എം ടോര്‍ക്കുമാണ് ഉല്‍പ്പാദിപ്പിക്കുന്നത്. 24.70 കിലോമീറ്റര്‍ മൈലേജ് കിട്ടും. നാലു വേരിയന്റുകളില്‍ ലഭ്യമാണ്. ടോപ്പ് മോഡലിന് 12.27 ലക്ഷം രൂപയാണ് വില.
പുസ്തക പരിചയം: ‘കോണ്ടെസ്സ’ (എസ്.പി ശരത്)
ഇതൊരു അന്വേഷണമാണ്. ഒരത്തന്‍ ഈനാശുവില്‍നിന്ന് നഷ്ടപ്പെട്ട നിധി തേടിയുള്ള ഒരു യാത്ര. ആ യാത്രയില്‍ കണ്ടുമുട്ടുന്നവര്‍ക്കെല്ലാം ഓരോ കഥകളാണ്. മുന്നില്‍ വരുന്ന പലതിനും നമ്മളോട് എന്തൊക്കൊയോ പറയാനുണ്ട്. അങ്ങനെ ഒരു വണ്ടിക്കഥയിലൂടെ പല ജീവിതങ്ങളിലെ യാഥാര്‍ത്ഥ്യങ്ങള്‍ തേടുകയാണ് ഈ നോവല്‍. ഒരത്തന്‍ ഈനാശു എന്ന വ്യവസായസാമ്രാജ്യത്തില്‍ നിന്ന് തുടങ്ങി വര്‍ഷങ്ങള്‍ നീണ്ട ഗാഢപ്രണയത്തിന്റെ മറ്റൊരു കഥയിലേക്കുള്ള സഞ്ചാരം. ഒരത്തന്റെ സാമ്രാജ്യത്തില്‍ കയറി കളിച്ചതാരാണ്? ഈ കഥയില്‍ ആ കോണ്ടെസ്സ കാറിനുള്ള പങ്ക് എന്താണ്? നഷ്ടപ്പെട്ടുപോയത് കണ്ടെത്താനാകുമോ ? എന്നിങ്ങനെ അനേക ചോദ്യങ്ങള്‍ക്കുള്ള ഒരു ഉത്തരം തേടല്‍ കൂടിയാണ് ഈ കഥ. ‘കോണ്ടെസ്സ’. എസ്.പി ശരത്. ഡിസി ബുക്സ്. വില 252 രൂപ.
വൃക്കകളുടെ ആരോഗ്യത്തെ ബാധിക്കുന്ന പ്രധാന ദൈനംദിന ശീലങ്ങൾ
ജനിതകം ഒരു പ്രധാന ഘടകമാണെങ്കിലും ചില ദൈനംദിന ശീലങ്ങളും വൃക്കകളില്‍ കാന്‍സര്‍ ഉണ്ടാകുന്നതിലേക്ക് നയിക്കാം. വെള്ളം കുടിക്കാന്‍ വിട്ടുപോകുന്നത് വൃക്കകളുടെ ആരോഗ്യത്തെ മോശമാക്കും. നിര്‍ജ്ജലീകരണം വൃക്കകളുടെ കാര്യക്ഷമത കുറയ്ക്കുകയും വിഷവസ്തുക്കളുടെ അളവ് വര്‍ധിപ്പിക്കുകയും ചെയ്യുന്നു. ഇത് വൃക്ക കാന്‍സറിന് കാരണമാകുന്നു. അച്ചാറുകള്‍ മുതല്‍ മിക്ക ഭക്ഷണങ്ങളിലും അധികമായി ഉപ്പ് ഉപയോഗിക്കുന്ന ശീലം കാലക്രമേണ വൃക്കകളെ ബുദ്ധിമുട്ടിലാക്കും. ഇത് കാന്‍സറിനുള്ള അന്തരീക്ഷം സൃഷ്ടിക്കും. വേദനസംഹാരികള്‍ കാലക്രമേണ, വൃക്ക കലകളെ നശിപ്പിക്കുകയും കാന്‍സര്‍ സാധ്യത വര്‍ധിപ്പിക്കുകയും ചെയ്യുന്നു. പുകവലിച്ചാലും ചവച്ചാലും, പുകയില രക്തപ്രവാഹത്തിലൂടെ വൃക്കകളില്‍ എത്തുകയും അവയുടെ പ്രവര്‍ത്തനത്തെ ബാധിക്കുകയും ചെയ്യും. കാന്‍സറിന് ഒരു പ്രധാന കാരണമാണിത്. ഗ്രില്‍ ചെയ്തതോ വറുത്തതോ സംസ്‌കരിച്ചതോ ആയ മാംസം പതിവായി കഴിക്കുന്നത് കാന്‍സര്‍ സാധ്യത വര്‍ധിപ്പിക്കും. ഉയര്‍ന്ന രക്തസമ്മര്‍ദവും പ്രമേഹവും ഹൃദയത്തെ മാത്രമല്ല, വൃക്കകളിലെ ചെറിയ രക്തക്കുഴലുകളെ നശിപ്പിക്കുകയും കാന്‍സര്‍ മാറ്റങ്ങളുടെ സാധ്യത വര്‍ധിപ്പിക്കുകയും ചെയ്യുന്നു.