ശാസ്താംകോട്ട: ബ്രൂക് ഇൻ്റർനാഷണൽ സ്കൂളിൽ നടന്ന ഓണാഘോഷ പരിപാടികളുടെയും കാർഷികോത്പന്ന -കാർഷികോപകരണ മേളയുടെയും ഉദ്ഘാടനം സ്കൂൾ ഡയറക്ടർ ഫാദർ ഡോ. ജി. എബ്രഹാം തലോത്തിൽ നിർവഹിച്ചു.
ഓണത്തിന്റെ പൈതൃകവും കാർഷികസംസ്കാരത്തിൻ്റെ മഹത്വവും വിളിച്ചോതിയ ആഘോഷത്തിൽ വിദ്യാർത്ഥികളും അധ്യാപകരും രക്ഷാകർത്താക്കളും പങ്കെടുത്തു. മാവേലിയും വാമനനും മലയാളമങ്കമാരുമായി വിവിധ വേഷങ്ങളിൽ കുട്ടികൾ അണിനിരന്നത് ആഘോഷത്തിന് വർണപ്പകിട്ടേകി.
കലപ്പ, നുകം, മെതിപ്പലക, പറ, നാഴി, ഇടങ്ങഴി, തുടം, അരിവാൾ, ചാണ, ചാട്ട, കോളാമ്പി, ചെല്ലപ്പെട്ടി, തളിക, ഓട്ടുവിളക്കുകൾ തുടങ്ങിയ പരമ്പരാഗത കാർഷിക-ഗൃഹോപകരണങ്ങളും കാർഷികോത്പന്നങ്ങളും അണിനിരന്ന മേള ഏറെ ശ്രദ്ധേയമായി.
പ്രിൻസിപ്പൽ ബോണി ഫേഷ്യാ വിൻസൻ്റ്, അഡ്മിനിസ്ട്രേറ്റർ കൊച്ചുമോൾ கெ. സാമുവൽ, വൈസ് പ്രിൻസിപ്പൽമാർ, കോർഡിനേറ്റർമാർ എന്നിവർ വിദ്യാർത്ഥികൾക്ക് ഓണാശംസകൾ നേർന്നു. വിവിധ കലാപരിപാടികളും ഓണക്കളികളും നിറഞ്ഞ ആഘോഷം സ്കൂൾ അങ്കണത്തെ ഉത്സവലഹരിയിലാഴ്ത്തി.
