കോഴിക്കോട്. നാദാപുരം കുമ്മങ്കോട് ജനവാസമേഖലയിൽ രണ്ട് പേരെ ആക്രമിച്ച പുലിക്കായി വനംവകുപ്പിന്റെ തിരച്ചിൽ ഊർജിതമാക്കി. നാദാപുരം ബദ്രിയ മസ്ജിദിന് സമീപമാണ് പുലിയുടെ ആക്രമണമുണ്ടായത്. പ്രദേശത്ത് സ്കൂളിനും അങ്കണവാടികള്ക്കും അവധിയും പ്രഖ്യാപിച്ചു.
ഇതിനിടെ, യുവാവിനെ ആക്രമിച്ചത് പുലിയാണെന്ന് സ്ഥിരീകരിക്കുന്ന CCTV ദൃശ്യങ്ങൾ പുറത്തുവന്നു. പുലിയുടെ ആക്രമണത്തിൽ നെഞ്ചിലും തലയിലും സാരമായി പരിക്കേറ്റ കുമ്മങ്കോട് സ്വദേശി മുഹമ്മദ് സിനാൻ ചികിത്സയിലാണ്. മറ്റൊരു സ്ത്രീയെയും പുലി ആക്രമിച്ചു. സിനാന്റെ അയല് വാസിയുടെ വീടിന്റെ പിൻവശത്തുകൂടി പുലി നടന്നുപോകുന്ന ദൃശ്യങ്ങളാണ് ലഭിച്ചത്. ദൃശ്യങ്ങൾ പുറത്തുവന്നതോടെ ആക്രമണത്തിന് പിന്നിൽ പുലിയാണെന്ന നിഗമനത്തിലാണ് നാട്ടുകാർ.
പുലിയെ പിടികൂടുന്നതിനായി വനംവകുപ്പ് പ്രദേശത്ത് കൂട് സ്ഥാപിച്ചു. താമരശ്ശേരി, പെരുവണ്ണാമൂഴി എന്നിവിടങ്ങളിൽ നിന്നുള്ള ആർ.ആർ.ടി സംഘങ്ങളും സ്ഥലത്തെത്തി പരിശോധന ശക്തമാക്കി. DFOയുടെ നേതൃത്വത്തിലുള്ള സംഘവും കുമ്മങ്കോട് ക്യാമ്പ് ചെയ്ത് സ്ഥിതിഗതികൾ നിരീക്ഷിക്കുന്നുണ്ട്. പുലിയുടെ സാന്നിധ്യം സ്ഥിരീകരിച്ച സാഹചര്യത്തിൽ പ്രദേശവാസികൾ അതീവ ജാഗ്രത പാലിക്കണമെന്ന് വനംവകുപ്പ് നിർദേശം നൽകി.
