ടൂറിസം വകുപ്പും കല്ലട ജലോത്സവ സമിതിയും സംയുക്തമായി സംഘടിപ്പിക്കുന്ന ആറാമത് ചാമ്പ്യന്‍സ് ബോട്ട് ലീഗിന്റെ (സി ബി എല്‍) രണ്ടാം പാദമത്സരവും 54-ാമത് കല്ലട ജലോത്സവവും ഇന്ന് ഉച്ചയ്ക്ക് രണ്ടിന് ടൂറിസം, സാംസ്‌കാരിക മന്ത്രി പി സി വിഷ്ണുനാഥ് ഉദ്ഘാടനം ചെയ്യും. കല്ലടയാറ്റിലെ മുതിരപ്പറമ്പ് – കാരുത്തറക്കടവ് നെട്ടായത്തിലാണ് മത്സരങ്ങള്‍ അരങ്ങേറുന്നത്. ഉദ്ഘാടന സമ്മേളനത്തില്‍ ഉല്ലാസ് കോവൂര്‍ എം എല്‍ എ അധ്യക്ഷനാകും. കൊടിക്കുന്നില്‍ സുരേഷ് എം പി വിജയികള്‍ക്കുള്ള സമ്മാനദാനം നിര്‍വഹിക്കും. ബി ബി ഗോപകുമാര്‍ എം എല്‍ എ മാസ് ഡ്രില്‍ ഫ്‌ലാഗ് ഓഫ് ചെയ്യും. ജില്ലാ കലക്ടര്‍ ആനി ജൂല തോമസ്, ടൂറിസം ഡയറക്ടര്‍ അഞ്ജന, ചിറ്റുമല ബ്ലോക്ക് പഞ്ചായത്ത് പ്രസിഡന്റ് ബി ബൈജു, മണ്‍റോതുരുത്ത് ഗ്രാമപഞ്ചായത്ത് പ്രസിഡന്റ് മായ നെപ്പോളിയന്‍, മറ്റ് ജനപ്രതിനിധികള്‍, സാമൂഹിക-സാംസ്‌കാരിക നായകര്‍ എന്നിവര്‍ പങ്കെടുക്കും. ഉച്ചയ്ക്ക് 1.30-ന് പതാക ഉയര്‍ത്തുന്നതോടെ ചടങ്ങുകള്‍ക്ക് തുടക്കമാകും.
