ഏഷ്യൻ ഗെയിംസിൽ മലയാളിക്ക് ചരിത്ര മെഡൽ . ഷൂട്ടിംഗിൽ കോഴിക്കോട് സ്വദേശി വിദർശ കെ വിനോദ് വെള്ളി മെഡൽ സ്വന്തമാക്കി. 10 മീറ്റർ എയർ റൈഫിൾ ടീമിനത്തിലാണ് മെഡൽ നേട്ടം. ഏഷ്യൻ ഗെയിംസിൽ മെഡൽ നേടുന്ന ആദ്യ മലയാളി എന്ന അസുലഭ നേട്ടവും ഇനി വിദർശയ്ക്ക് സ്വന്തം.
ഇന്ത്യക്ക് വേണ്ടി ആദ്യ ഏഷ്യൻ ഗെയിംസിൽ തന്നെ വിദർശ വെടിവെച്ചിട്ടത് ചരിത്ര നേട്ടം.
10 മീറ്റർ എയർ റൈഫിൾ ടീം ഇനത്തിൽ 1898 പോയിൻ്റ് നേടിയാണ് വിദർശ യുൾപ്പെടുന്ന മൂന്നംഗ സംഘം വെള്ളി കരസ്ഥമാക്കിയത്. നഗോയയിൽ ചരിത്രം പിറന്നതിന് പിന്നാലെ കോഴിക്കോട്ടെ മലയോര ഗ്രാമമായ തിരുവമ്പാടിയിലും ആഘോഷം.
സന്തോഷം പങ്കുവെച്ച വിദർശ പിന്തുണച്ച കുടുംബത്തിനും കോച്ചിനും നന്ദി പറഞ്ഞു. പിന്നാലെ വീഡിയോ കോളിലൂടെ മുഖ്യമന്ത്രിയുടെ അഭിനന്ദനം.
2018ല് എൻസിസി യിലൂടെ ഷൂട്ടിംഗിലേക്ക് വന്ന വിദർശ 2019 മുതൽ ഷൂട്ടിംഗ് പ്രൊഫഷനായി തീരുമാനിച്ചിരുന്നു. സ്വപ്നമെഡലിന് പിന്നാലെ വിദർശ പങ്കെടുക്കാൻ ഇരിക്കുന്ന 50 മീറ്റർ റൈഫിളിനത്തിൽ മറ്റൊരു ചരിത്രം പിറവി കൊള്ളുമോ എന്ന് കാത്തിരിക്കുകയാണ് നാടും കൂട്ടുകാരും
