തിരുവനന്തപുരം: സി.എസ്.ഐ. ദക്ഷിണ കേരള മഹായിടവക സ്ത്രീ ജനസഖ്യത്തിന്റെ നേതൃത്വത്തിൽ സംഘടിപ്പിക്കുന്ന 11-ാമത് മംഗല്യ ശുശ്രൂഷ ആഗസ്റ്റ് 15ന് രാവിലെ 10ന് തിരുവനന്തപുരം എം.എം. സി.എസ്.ഐ. കത്തീഡ്രലിൽ നടക്കും. മഹായിടവകയുടെ അധ്യക്ഷൻ ബിഷപ്പ് റൈറ്റ് റവ. ഡോ. പ്രിൻസ്റ്റൻ ബെൻ തിരുമേനിയുടെ മുഖ്യകാർമികത്വത്തിലാണ് വിവാഹച്ചടങ്ങുകൾ നടക്കുന്നത്.
മംഗല്യ പദ്ധതിയുടെ ഭാഗമായി അർഹരായ 16 യുവതീയുവാക്കളുടെ വിവാഹമാണ് ഇത്തവണ നടത്തുന്നത്. സഭ വിശ്വാസികളുടെയും വിവിധ സ്ഥാപനങ്ങളുടെയും സുമനസ്സുകളുടെയും സഹകരണത്തോടെയാണ് പദ്ധതി സംഘടിപ്പിക്കുന്നത്.
ചടങ്ങിൽ ദക്ഷിണെന്ത്യ സഭ മോഡറേറ്റർ, ഡെപ്യൂട്ടി മോഡറേറ്റർ, സെക്രട്ടറി, ട്രഷറർ, വിവിധ സഭാ നേതാക്കൾ, വൈദികർ, ജനപ്രതിനിധികൾ, സാമൂഹിക-സാംസ്കാരിക രംഗത്തെ പ്രമുഖർ തുടങ്ങിയവർ പങ്കെടുക്കും. ദക്ഷിണകേരള മഹായിടവ സെക്രട്ടറി ഡോ: ടി.ടി. പ്രവീൺ എംഎൽഎ ജനറൽ കൺവീനർ, മഹായിടവക ഔദ്യോഗിക ഭാരവാഹികൾ,സ്ത്രീ ജന സഖ്യ പ്രസിഡന്റ് ബീന പ്രിൻസ്റ്റൺ ബിഷപ്പമ്മ, സെക്രട്ടറി ധന്യ ജോസ്, മംഗല്യ കമ്മറ്റി ഭാരവാഹികളും ചടങ്ങിന് നേതൃത്വം നൽകും.
2016ൽ ആരംഭിച്ച മംഗല്യ പദ്ധതി ഇതിനകം 126 കുടുംബങ്ങൾക്ക് പുതുജീവിതത്തിന് വഴിയൊരുക്കിയിട്ടുണ്ട്. നാളെ 8 കുടുംബങ്ങൾ കൂടെ രൂപീകൃതമാകുന്നു.
സാമ്പത്തികമായി പിന്നാക്കം നിൽക്കുന്ന അർഹരായ കുടുംബങ്ങളിലെ പെൺകുട്ടികളുടെ വിവാഹത്തിനു കൈത്താങ്ങാകുന്ന മംഗല്യ പദ്ധതിക്ക് തുടർന്നും എല്ലാവരുടെയും സഹകരണവും പിന്തുണയും ഉണ്ടാകണമെന്ന് സംഘാടകർ അഭ്യർഥിച്ചു.
