സംസ്ഥാനത്ത് ഇന്ന് അതി തീവ്ര മഴയ്ക്ക് സാധ്യത. പത്തനംതിട്ട, കോട്ടയം,ഇടുക്കി ജില്ലകളിൽ കേന്ദ്ര കാലാവസ്ഥാ വകുപ്പ് റെഡ് അലർട്ട് പ്രഖ്യാപിച്ചു. അഞ്ച് ജില്ലകളിൽ ഓറഞ്ച് അലേർട്ടും തുടരുകയാണ്. പസഫിക് സമുദ്രത്തിൽ രൂപം കൊണ്ട് ഡോൽഫിൻ ചുഴലിക്കാറ്റിൻ്റെ സ്വാധീനമാണ് സംസ്ഥാനത്ത് മഴ തുടരാൻ കാരണം.
തെക്കൻ തമിഴ്നാട് തീരത്തെ ചക്രവാതചുഴി,
പസഫിക് സമുദ്രത്തിലെ ഡോൾഫിൻ ചുഴലിക്കാറ്റ്, ഫിലിപ്പിയൻസ് തീരത്തെ കുജിര ചുഴലി എന്നിവയുടെ വിദൂര സാന്നിധ്യമാണ് സംസ്ഥാനത്ത് കാലവർഷം കനക്കാൻ കാരണം. പത്തനംതിട്ട, കോട്ടയം,ഇടുക്കി ജില്ലകളിൽ അതി തീവ്ര മഴ തുടരുകയാണ്. പതിനാല് ജില്ലകളിലും ഇന്ന് മഴ മുന്നറിയിപ്പുണ്ട്. കൊല്ലം ആലപ്പുഴ എറണാകുളം, കണ്ണൂർ കാസർകോട് ജില്ലകളിൽ ഓറഞ്ച് അലേർട്ട് തുടരുകയാണ്. തിരുവനന്തപുരം ഉൾപ്പടെ ആറ് ജില്ലകളിൽ യെല്ലോ അലേർട്ടാണ്.
മണ്ണിടിച്ചിൽ ഉരുൾപ്പെട്ടൽ സാധ്യത ഉള്ളതിനാൽ മലയോര മേഖലകളിൽ പ്രത്യേക ജാഗ്രത പുലർത്തണം. ദുരന്ത സാധ്യത മേഖലകളിൽനിന്ന് ആവശ്യമെങ്കിൽ ആളുകളെ മാറ്റി പാർപ്പിക്കാനുള്ള നിർദ്ദേശവും ദുരന്തനിവാരണ അതോറിറ്റി നൽകിയിട്ടുണ്ട്. ശക്തമായ കാറ്റിനും കടലാക്രമണത്തിനും സാധ്യതയുള്ളതിനാൽ തീരദേശ മേഖലകളിലും പ്രത്യേക ജാഗ്രത പുലർത്തണം. കേരള കർണാടക ലക്ഷദ്വീപ് തീരങ്ങളിൽ മത്സ്യബന്ധനത്തിന് വിലക്കേർപ്പെടുത്തി. നാളെയും 14 ജില്ലകൾ കേന്ദ്രീകരിച്ചു മഴ മുന്നറിയിപ്പുകളുണ്ട്.
രണ്ട് ദിവസം കൂടി മഴ തുടരുമെന്നാണ് കാലാവസ്ഥാ പ്രവചനം.
