കണ്ണൂര്‍: വരാനിരിക്കുന്ന 2026 കേരള നിയമസഭാ തിരഞ്ഞെടുപ്പില്‍ കെ.കെ. ശൈലജ പേരാവൂരില്‍ നിന്നും ജനവിധി തേടും. സിറ്റിങ് സീറ്റായ മട്ടന്നൂരില്‍ ഇത്തവണ ശൈലജയെ പരിഗണിക്കേണ്ടതില്ലെന്ന പ്രാഥമിക ചര്‍ച്ചകള്‍ക്കൊടുവില്‍, പേരാവൂര്‍ മണ്ഡലം തിരിച്ചുപിടിക്കുക എന്ന ലക്ഷ്യത്തോടെയാണ് സിപിഎം കണ്ണൂര്‍ ജില്ലാ സെക്രട്ടേറിയറ്റ് ഈ സുപ്രധാന തീരുമാനമെടുത്തത്.
ശൈലജയെപ്പോലെയുള്ള ജനകീയ നേതാക്കളെ തിരഞ്ഞെടുപ്പ് ഗോദയില്‍ നിന്ന് മാറ്റിനിര്‍ത്തുന്നത് പാര്‍ട്ടിക്ക് തിരിച്ചടിയാകുമെന്ന വിലയിരുത്തലാണ് കേന്ദ്ര നേതൃത്വത്തെയും സംസ്ഥാന നേതൃത്വത്തെയും പുനര്‍ചിന്തയ്ക്ക് പ്രേരിപ്പിച്ചത്.
രണ്ടു ടേം വ്യവസ്ഥയുടെ പേരില്‍ ഇത്തവണ മുതിര്‍ന്ന പല നേതാക്കളെയും മാറ്റിനിര്‍ത്താന്‍ സിപിഎം ആലോചിച്ചിരുന്നു. കണ്ണൂര്‍ ജില്ലാ സെക്രട്ടേറിയറ്റ് തയ്യാറാക്കിയ ആദ്യ പട്ടികയില്‍ മട്ടന്നൂരില്‍ ശൈലജയുടെ പേര് ഉള്‍പ്പെട്ടിരുന്നില്ല. ചരിത്രപരമായ ഭൂരിപക്ഷത്തില്‍ വിജയിച്ച ഒരു നേതാവിനെ ഒഴിവാക്കുന്നത് വോട്ട് വിഹിതത്തെ ബാധിക്കുമെന്ന് പാര്‍ട്ടിയിലെ ഒരു വിഭാഗം ശക്തമായി വാദിച്ചു.
സുരക്ഷിത മണ്ഡലങ്ങളില്‍ ടേം വ്യവസ്ഥയില്‍ ഇളവ് നല്‍കേണ്ടതില്ലെന്ന കര്‍ക്കശമായ നിലപാടിലായിരുന്നു പാര്‍ട്ടി നേതൃത്വം. എന്നാല്‍, യുഡിഎഫിന്റെ കൈവശമുള്ള, വിജയം ഉറപ്പില്ലാത്ത മണ്ഡലങ്ങളില്‍ ജനപ്രീതിയുള്ള നേതാക്കള്‍ക്ക് ഇളവ് നല്‍കാം എന്ന ഫോര്‍മുലയിലാണ് ഒടുവില്‍ ശൈലജയുടെ പേര് പേരാവൂരിലേക്ക് നിര്‍ദേശിക്കപ്പെട്ടത്.

ആറ്റുകാല്‍ അമ്മയ്ക്ക് മനസ്സുനിറഞ്ഞ് പൊങ്കാലയര്‍പ്പിച്ച് ഭക്തലക്ഷങ്ങള്‍ മടങ്ങി. ക്ഷേത്രത്തില്‍ ഉച്ചപൂജയ്ക്കു ശേഷം പൊങ്കാല നിവേദിച്ചു. മേല്‍ശാന്തിയാണ് ക്ഷേത്രസന്നിധിയിലെ പണ്ടാര അടുപ്പില്‍ തയാറാക്കിയ പൊങ്കാല നിവേദിച്ചത്. തുടര്‍ന്ന് 350 പൂജാരിമാര്‍ നഗരത്തിന്റെ മറ്റിടങ്ങളില്‍ ഭക്തര്‍ തയാറാക്കിയ പൊങ്കാല നിവേദിക്കുകയാണ്. ചന്ദ്രഗ്രഹണമായതിനാല്‍ ഉച്ചകഴിഞ്ഞ് 3.10 മുതല്‍ രാത്രി 7 വരെ ക്ഷേത്ര ദര്‍ശനം ഉണ്ടാകില്ല.
ചലച്ചിത്ര, ടെലിവിഷന്‍ താരങ്ങളും വിവിധ മേഖലകളിലെ പ്രമുഖരുമടക്കം ഇത്തവണയും പൊങ്കാലയിടാന്‍ എത്തി. ഇന്നു രാവിലെ 9.15 ന് ആറ്റുകാല്‍ ഭഗവതിക്ഷേത്രത്തില്‍ ശുദ്ധപുണ്യാഹത്തോടെയാണു ചടങ്ങുകള്‍ ആരംഭിച്ചത്. 9.45ന് പൊങ്കാല അടുപ്പുവെട്ട് ചടങ്ങു നടന്നു.
കണ്ണകീചരിതത്തില്‍ പാണ്ഡ്യ രാജാവിന്റെ വധം നടത്തുന്ന ഭാഗം തോറ്റംപാട്ടുകാര്‍ പാടിക്കഴിഞ്ഞപ്പോള്‍ തന്ത്രി പരമേശ്വരന്‍ ഭട്ടതിരിപ്പാടിന്റെ സാന്നിധ്യത്തില്‍ മേല്‍ശാന്തി അനീഷ് നമ്പൂതിരി ശ്രീകോവിലില്‍നിന്നു ദീപം ക്ഷേത്ര തിടപ്പള്ളിയിലെ പൊങ്കാല അടുപ്പിലേക്കു പകര്‍ന്നു. തുടര്‍ന്ന് ദീപം സഹ മേല്‍ശാന്തി ഏറ്റുവാങ്ങി വലിയ തിടപ്പള്ളിയിലും ക്ഷേത്രത്തിനു മുന്‍വശത്ത് ഒരുക്കിയിട്ടുള്ള പണ്ടാര അടുപ്പിലും ജ്വലിപ്പിച്ചു. പണ്ടാര അടുപ്പില്‍നിന്നു പകരുന്ന ദീപം ഏറ്റുവാങ്ങി ഭക്തര്‍ സ്വന്തം അടുപ്പുകളില്‍ ജ്വലിപ്പിച്ചതോടെ നഗരം യാഗശാലയായി.
രാത്രി 8.30 ന് കുത്തിയോട്ട ബാലന്മാരെ ചൂരല്‍കുത്തും. 10.45 ന് മണക്കാട് ധര്‍മശാസ്താ ക്ഷേത്രത്തിലേക്കു ദേവിയുടെ എഴുന്നള്ളത്തു പുറപ്പെടും. നാളെ രാത്രി 9.45 ന് കാപ്പഴിച്ചു ദേവിയെ കുടിയിളക്കും. രാത്രി 12.45 ന് നടത്തുന്ന കുരുതി തര്‍പ്പണത്തോടെയാണ് ഈവര്‍ഷത്തെ പൊങ്കാല ഉത്സവത്തിനു സമാപനമാകുക.