കൊല്ലം.മണിക്കൂറുകളോളം നിശ്ചലമായി മോട്ടോർ വാഹന വകുപ്പിന്റെ ”സാരഥി പോർട്ടൽ’. പല തവണയായി പോർട്ടൽ സെർവർ പണിമുടക്കി തുടങ്ങിയതോടെ പ്രതിസന്ധിയിൽ ആയിരിക്കുകയാണ് ഉപയോക്താക്കൾ. നൂറുകണക്കിന് ആളുകളാണ് ആര്ടിഒ ഓഫീസുകളിലെത്തി മടങ്ങിപ്പോകുന്നത്. സാങ്കേതിക പിഴവെന്നും ഉടൻ പരിഹാരം കാണുമെന്നും മോട്ടോർവാഹന വകുപ്പ്.
ഡ്രൈവിങ് ലൈസന്സ് എടുക്കല്, പുതുക്കല് തുടങ്ങി മുപ്പത്തിയഞ്ചോളം സേവനങ്ങളാണ് ‘സാരഥി’ പോർട്ടൽ വഴി ലഭ്യമാകേണ്ടത്. എന്നാൽ ദിവസങ്ങളായി പോർട്ടൽ പൂർണ്ണ നിശ്ചലം. ലേണേഴ്സ് പരീക്ഷ എഴുതാനോ ഡ്രൈവിംഗ് ടെസ്റ്റ് സ്ലോട്ട് ബുക്ക് ചെയ്യാനോ സാധിക്കുന്നില്ല. ലൈസൻസിന്റെ കാലാവധി തീർന്ന് പുതിയതിന് അപേക്ഷിക്കുന്നവർ ഉൾപ്പെടെ കടുത്ത പ്രതിസന്ധിയിലാണ്. ഇതിനു പുറമെ മോട്ടോർ വാഹന വകുപ്പിന്റെ ‘പരിവാഹൻ’ സൈറ്റും പലപ്പോഴും പണിമുടക്കുന്നത് പ്രതിസന്ധി ഇരട്ടിയാക്കുന്നു. സാങ്കേതിക തകരാർ മാത്രമാണ് അധികൃതരുടെ ഭാഗത്തുനിന്നും ലഭിക്കുന്ന ഏക വിശദീകരണം.
എം.വി.ഡിയുടെയും ഡ്രൈവിംഗ് സ്കൂളുകളുടെയും ദൈനംദിന പ്രവർത്തനം പൂർണ്ണമായും സ്തംഭിച്ച സാഹചര്യത്തിൽ മുഖ്യമന്ത്രി ഇടപെടണമെന്ന മോട്ടോർ ഡ്രൈവിംഗ് സ്കൂൾ സംഘടനകളുടെ ആവശ്യവും ശക്തം. പ്രശ്നത്തിന് ശാശ്വത പരിഹാരമായി തിരുവനന്തപുരം ടെക്നോപാർക്കിൽ പ്രത്യേക സെർവറോ മിറർ സെർവറോ ഉടൻ സ്ഥാപിക്കണം. മുടങ്ങിപ്പോയ ലേണേഴ്സ് പരീക്ഷകൾ പുനഃക്രമീകരിക്കാൻ പ്രത്യേക സംവിധാനം വേണമെന്ന ആവശ്യവും ഉയരുന്നു.
