കൊച്ചി.കാക്കനാട്ട് പോലീസ് കസ്റ്റഡിയിലിരുന്ന ട്രെയിലർ ലോറി മോഷണം പോയി. രണ്ടുപേരുടെ മരണത്തിനിടയാക്കിയ അപകടത്തെ തുടർന്ന് പോലീസ് കസ്റ്റഡിയിലെടുത്ത ട്രെയിലർ ലോറിയാണ് കാണാതായത്. സ്റ്റേഷൻ പരിസരത്ത് സൂക്ഷിക്കാൻ കഴിയാത്തതിനാൽ മാവേലിപുരം ഓണം പാർക്കിന് സമീപം സീപോർട്ട്–എയർപോർട്ട് റോഡരികിലാണ് വാഹനം പാർക്ക് ചെയ്തിരുന്നത്. 27ന് രാത്രി ഒൻപത് മണിക്കും 28ന് ഉച്ചയ്ക്ക് 12.30നും ഇടയിലാണ് ലോറി ആരോ കടത്തിക്കൊണ്ടുപോയതെന്ന് എഫ്‌ഐആറിൽ പറയുന്നു.
സംഭവത്തിൽ തൃക്കാക്കര പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. കഴിഞ്ഞ ദിവസം പുലർച്ചെ മാവേലിപുരത്ത് ബുള്ളറ്റും ട്രെയിലർ ലോറിയും കൂട്ടിയിടിച്ചുണ്ടായ അപകടത്തിൽ ആലപ്പുഴ സ്വദേശി ദിൻരാജ്, കോട്ടയം സ്വദേശി മാത്യു ജോമോൻ എന്നിവർ മരിച്ചിരുന്നു. ഇതേത്തുടർന്നാണ് പോലീസ് ട്രെയിലർ ലോറി കസ്റ്റഡിയിലെടുത്തത്.
