ശ്വാസകോശ അർബുദ നിവാരണത്തെക്കുറിച്ച് പറയുമ്പോൾ നമ്മുടെ ചർച്ചകൾ എപ്പോഴും പുകവലിയിൽ മാത്രമായി ചുരുങ്ങാറാണ് പതിവ്. അർബുദത്തിന് പ്രധാന കാരണം പുകയില തന്നെ ആണെങ്കിലും ജീവിതത്തിൽ ഒരിക്കൽ പോലും പുകവലിക്കാത്തവരിലും ഇന്ന് ശ്വാസകോശ അർബുദം വ്യാപകമായി കണ്ടെത്തിവരുന്നു. നമ്മൾ സുരക്ഷിതമെന്ന് കരുതുന്ന വീടുകളിലെ മുറികൾ തന്നെയാണ് പലപ്പോഴും ഇതിന് വില്ലനാകുന്നത്. പ്രധാനമായും ശ്രദ്ധിക്കേണ്ട കാര്യങ്ങൾ എന്തൊക്കെയാണെന്ന് അറിയാം.
Also Read: കാമുകിയുടെ ആർത്തവരക്തം ഫ്രീസറിൽ സൂക്ഷിച്ചിട്ടുണ്ട്; വിചിത്രമായ വെളിപ്പെടുത്തലുമായി ബ്രയാൻ ജോൺസൺ
- അടുക്കള
ഉയർന്ന താപനിലയിലുള്ള പാചകം, പ്രത്യേകിച്ച് വറുക്കൽ, പൊരിക്കൽ, ഡീപ് ഫ്രൈ ചെയ്യൽ തുടങ്ങിയവ പാചക എണ്ണയിൽ നിന്നുള്ള വിഷപ്പുക വായുവിൽ കലരാൻ ഇടയാക്കുന്നു. എണ്ണ അതിന്റെ സ്മോക്ക് പോയിന്റിന് മുകളിൽ ചൂടാകുമ്പോൾ, അത് സൂക്ഷ്മമായ കണികകളായും മാരകമായ കെമിക്കൽ ബൈ-പ്രൊഡക്റ്റുകളായും മാറുന്നു. ഇവയിൽ പലതും ക്യാൻസറിന് കാരണമാകാറുണ്ട്.
- കൊതുകുതിരികളുടെ ഉപയോഗം
പല വീടുകളിലും കൊതുകുതിരികൾ രാത്രി മുഴുവൻ പുകയ്ക്കാറുണ്ട്. അടച്ചിട്ട കിടപ്പുമുറികളിൽ മണിക്കൂറുകളോളം ഇവ കത്തുന്നത് പതിവാണ്. കൊതുകുകളെ അകറ്റാൻ ഇവ ഫലപ്രദമാണെങ്കിലും, കൊതുകുതിരി പുക പുറത്തുവിടുന്ന സൂക്ഷ്മ കണികകളും കെമിക്കൽ അവശിഷ്ടങ്ങളും പുകയില പുകയ്ക്ക് സമാനമായ തികച്ചും അപകടകരമായ ഘടകങ്ങളാണ്. പുകവലിക്കാത്തവരാണെങ്കിൽ പോലും, പതിവായി കൊതുകുതിരി ഉപയോഗിക്കുന്നവരിൽ ശ്വാസകോശ അർബുദ സാധ്യത വളരെ കൂടുതലാണെന്ന് പഠനങ്ങൾ വ്യക്തമാക്കുന്നു.
- വായുമലിനീകരണം
ഗ്രാമീണ മേഖലകളിലെ ഭൂരിഭാഗം വീടുകളിലും വിറക്, ഉണങ്ങിയ ഇലകൾ, ചാണകവറളി എന്നിവ ഉപയോഗിച്ചാണ് ഇപ്പോഴും പാചകം ചെയ്യുന്നത്. വേണ്ടത്ര വായുസഞ്ചാരമില്ലാത്ത അടുക്കളകളിലെ ഇത്തരം പുക ശ്വസിക്കുന്നത് ശ്വാസകോശ അർബുദത്തിനും മറ്റ് ശ്വാസകോശ രോഗങ്ങൾക്കും കാരണമാകുന്നു. അടുക്കളപ്പുക, സാമ്പ്രാണിത്തിരി പുക, കൊതുകുനിവാരിണികൾ എന്നിവയുടെ ഉപയോഗം പ്രായമായവരുടെ ശ്വാസകോശ ആരോഗ്യത്തെ വൻതോതിൽ ബാധിക്കുന്നുണ്ട്.
- വീടുകളിലെ മറ്റ് വില്ലന്മാർ
റേഡോൺ: അടുക്കളപ്പുകയ്ക്കും കൊതുകുതിരിക്കുമപ്പുറം വീടുകൾക്കുള്ളിൽ ശ്രദ്ധിക്കേണ്ട മറ്റ് ചില ഘടകങ്ങളുണ്ട്. മണ്ണിൽ നിന്നും പാറകളിൽ നിന്നും പ്രകൃതിദത്തമായി പുറത്തുവരുന്ന, മണമോ നിറമോ ഇല്ലാത്ത റേഡോൺ വാതകം കെട്ടിടങ്ങളുടെ തറയിലെ വിടവുകളിലൂടെ ഉള്ളിലേക്ക് കടക്കുന്നു. പുകവലി കഴിഞ്ഞാൽ ശ്വാസകോശ അർബുദത്തിന് കാരണമാകുന്ന രണ്ടാമത്തെ പ്രധാന ഘടകമാണ് റേഡോൺ.
അഗർബത്തി പുക: ആരാധനാ ആവശ്യങ്ങൾക്കും മറ്റുമായി വീടുകളിൽ കത്തിക്കുന്ന സാമ്പ്രാണിപ്പുകയിലെ ദോഷകരമായ കണികകളും അർബുദ സാധ്യത നേരിയ തോതിൽ വർദ്ധിപ്പിക്കുന്നുണ്ട്.
പരോക്ഷ പുകവലി: വീട്ടിലുള്ള മറ്റാരെങ്കിലും പുകവലിക്കുമ്പോൾ ഉണ്ടാകുന്ന പുക ശ്വസിക്കുന്നത്, മുകളിൽ പറഞ്ഞ എല്ലാ കാരണങ്ങളെയും പോലെ തന്നെ മാരകമായ അപകടസാധ്യതയാണ് സൃഷ്ടിക്കുന്നത്.
