കൊല്ലം: ശക്തമായ തിരയില്‍പ്പെട്ട് നീണ്ടകരയില്‍ മത്സ്യബന്ധന വള്ളം മറിഞ്ഞുണ്ടായ അപകടത്തില്‍ കാണാതായ രണ്ട് പേരില്‍ ഒരാളുടെ മൃതദേഹം ലഭിച്ചു. പുത്തന്‍തുറ കടുവുങ്കല്‍ രാധാകൃഷ്ണ (47) ന്റെ മൃതദേഹമാണ് കണ്ടെത്തിയത്. അപകടത്തില്‍പ്പെട്ട രാധാകൃഷ്ണന്റെ മകന്‍ ഗൗതം കൃഷ്ണ (26) യെ കണ്ടെത്താനായിട്ടില്ല.
രാധാകൃഷ്ണന്റെ ഭാര്യാ പിതാവ് നീണ്ടകര പുത്തന്‍തുറ പൂമുഖത്ത് രാജീവന്‍ (76) അപകടത്തില്‍ മരിച്ചിരുന്നു. ശനിയാഴ്ച രാവിലെ ഏഴോടെയായിരുന്നു അപകടമുണ്ടായത്. 14 പേരുമായി കടലില്‍ മത്സ്യബന്ധനത്തിന് പോയിരുന്ന ‘മിയോമി’ എന്ന ബോട്ടാണ് ശക്തമായ തിരമാലയില്‍പ്പെട്ട് മറിഞ്ഞത്. അപകടം നടന്നയുടന്‍ സമീപത്തുണ്ടായിരുന്ന മത്സ്യത്തൊഴിലാളികള്‍ രക്ഷാപ്രവര്‍ത്തനം ആരംഭിച്ചു. തുടര്‍ന്ന് കോസ്റ്റ് ഗാര്‍ഡ്, മത്സ്യബന്ധന വകുപ്പ്, മറൈന്‍ എന്‍ഫോഴ്‌സ്‌മെന്റ്, ഫയര്‍ഫോഴ്‌സ് തുടങ്ങിയ വിഭാഗങ്ങളും സ്ഥലത്തെത്തി തിരച്ചില്‍ നടത്തി.
ഗുരുതരാവസ്ഥയില്‍ കണ്ടെത്തിയ രാജീവനെ സമീപത്തെ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. രാധാകൃഷ്ണനെയും ഗൗതം കൃഷ്ണനെയും കാണാതായെങ്കിലും കഴിഞ്ഞ ദിവസം നടത്തിയ തിരച്ചിലില്‍ കണ്ടെത്താനായിരുന്നില്ല. തുടര്‍ന്ന് നടത്തിയ തിരച്ചിലിലാണ് രാധാകൃഷ്ണന്റെ മൃതദേഹം കണ്ടെത്തിയത്. ബോട്ടിലുണ്ടായിരുന്ന മറ്റ് 11 പേരെ സുരക്ഷിതമായി രക്ഷപ്പെടുത്തിയിരുന്നു. ഇവരില്‍ അഞ്ച് ഇതരസംസ്ഥാന തൊഴിലാളികളും ഉള്‍പ്പെടുന്നു. ശക്തമായ തിരമാലയും കടലിലെ പ്രതികൂല കാലാവസ്ഥയുമാണ് അപകടത്തിന് കാരണം.
