എൽ സുഗതൻ

ഒരു സെപ്റ്റംബർ 5 കൂടി കടന്നു വരികയാണ്…
ദേശീയ അധ്യാപക ദിനം…..
ആധുനിക കാലത്തെ അധ്യാപനത്തെക്കുറിച്ചും അധ്യാപകരെ കുറിച്ചും ചിലത് പറയാൻ ആഗ്രഹിക്കുകയാണ്….
അധ്യാപകർ സോഷ്യൽ എഞ്ചിനിയർ ആണ് എന്നാലും മുഖ്യ ധർമ്മം വിഷയം പഠിപ്പിക്കൽ തന്നെ.
ഏറ്റവും നല്ല ഗവ ജോലി ഏതെന്നു ചോദിച്ചാൽ പണ്ടുള്ളവർ പറയും സ്കൂൾ മാഷാണെന്ന്.. എന്നാൽ ഇപ്പൊ മാഷൻമാർ തന്നെ പറയും അതിന്റെ മഹത്വത്തെ കുറിച്ച്. അത്രക്കുണ്ട് ഓരോ ദിവസം കഴിയുന്തോറും അവർ അനുഭവിക്കുന്ന മാനസിക സമ്മർദ്ദങ്ങൾ. ആധുനിക കാലത്ത് അധ്യാപന ജോലിയിലേക്ക് കടന്നു വരാൻ മടിക്കുന്നവരുടെ എണ്ണം ഏറുകയാണ്.പ്രഥമ അധ്യാപകരായി ചാർജ് ഏറ്റെടുക്കാൻ താല്പര്യമുള്ള അധ്യാപകരുടെ എണ്ണവും ദിനേന കുറയുകയാണ്.
നാളത്തെ രാഷ്ട്രത്തെ വാർത്തെടുക്കേണ്ടവരാണ് അധ്യാപകർ. എന്നാൽ ഈ മഹത് കർമ്മികൾക്ക് അർഹമായ അംഗീകാരവും പിന്തുണയും അധികാരികളുടെ ഭാഗത്തു നിന്ന് ലഭിക്കുന്നുണ്ടോ എന്നത് ചോദ്യചിഹ്നമാണ്. അധ്യാപകരുടെ ദൈനം ദിന ജീവിതത്തിലൂടെ നമുക്കൊന്ന് കണ്ണോടിക്കാം….

മധ്യവേനൽ അവധിക്കാലത്ത് കുട്ടികളെ ചാക്കിട്ട് പിടിക്കുന്ന പുണ്യ കർമ്മത്തോട് കൂടി ഒരധ്യയന വർഷത്തെ അധ്യാപകരുടെ കർമോൽസുകത ആരംഭിക്കുകയാണ്.
കുട്ടികളുടെയും അധ്യാപകരുടെയും യുടയ്‌സ് എന്റർ ചെയ്യൽ,
ST നോഡൽ ഓഫീസർ ചാർജ്
വിദ്യാവാഹിനി,സമഗ്രയിൽ ടീച്ചിങ് മാനുവൽ തയാറാക്കൽ
ദിനാചരണങ്ങൾ സംഘടിപ്പിക്കൽ
വിവിധ ക്ലബ്ബുകളുടെ പ്രവർത്തനങ്ങൾ ഏകോപിപ്പിക്കൽ,
എസ് പി സി, ജെ ആർ സി, സ്കൗട്ട് ആൻഡ് ഗെയ്ഡ്സ്, എൻ സി സി യൂണിറ്റുകളുടെ പ്രവർത്തനം,
പ്രഭാത, ഉച്ച ഭക്ഷണ വിതരണതോടൊപ്പം അവരുടെ കണക്ക് എന്റർ ചെയ്യൽ
സുരക്ഷ ഡ്യൂട്ടി, സമ്പൂർണയിൽ അറ്റന്റൻസ് കൊടുക്കൽ
ജാഗ്രത സമിതി,വിവിധ തരം സ്കോളർഷിപ്പുകളും പരീക്ഷകളിൽ
പരിശീലനം കൊടുക്കലും , ലഹരി പിടുത്തം,ബോധവൽക്കരണം
തെരുവ് നായ് നിയന്ത്രണം
,ബസ്ഡ്യൂട്ടി,അതിനോടൊപ്പം അധ്യാപക യോഗ്യത പരീക്ഷ നേടിയെടുക്കാനുള്ള നെട്ടോട്ടം
ടെക്സ്റ്റ്‌ ബുക്ക്‌ വിതരണം,യൂണിഫോം വിതരണം, സ്കൂൾതലം മുതൽ സംസ്ഥാനതലം വരെയുള്ള കലാകായിക ശാസ്ത്രമേളകളിൽ കുട്ടികളെ പങ്കെടുപ്പിക്കൽ ,
വിദ്യാരംഗം കലാസാഹിത്യവേദിയുടെ പ്രവർത്തനങ്ങൾ,പച്ചക്കറി എത്തിക്കൽ, പച്ചക്കറിത്തോട്ടം പരിപാലനം,
ഗ്യാസ് എത്തിക്കൽ, ഓണം ക്രിസ്തുമസ് ബക്രീദ് തുടങ്ങിയ ആഘോഷങ്ങൾ സംഘടിപ്പിക്കൽ
പരാതിപ്പെട്ടി, അനുദിനം കുട്ടികൾ തമ്മിലുണ്ടാകുന്ന പ്രശ്നങ്ങൾക്ക് പരിഹാരം കാണലും രാഷ്ട്രീയ പ്രസ്ഥാനങ്ങളിൽ നിന്നുള്ള സമ്മർദ്ദങ്ങളും അനുഭവിക്കേണ്ടി വരിക,
ക്ലാസ് പി ടി എ, പിടിഎ പൊതുയോഗം സംഘടിപ്പിക്കൽ,
പരീക്ഷക്ക് പോർഷൻ തീർക്കൽ
എസ് ആർ ജി ഡാറ്റ ശേഖരിക്കൽ, ഇതിനോടൊപ്പമാണ് ഇലക്ഷൻ ഡ്യൂട്ടിയും.
ഗ്രാമസഭ,ബി എൽ ഓ ഡ്യൂട്ടി,
വിര ഗുളിക നൽകൽ
ഹെൽത്ത് കാർഡ് ഉണ്ടാക്കൽ
ആധാർ അപ്ഡേഷൻ
ദേ ഇപ്പോൾ സെൻസെസ് ഡ്യൂട്ടിയും.
ഏറ്റവും എടുത്തു പറയേണ്ട ഒന്നാണ് കെ ടെറ്റ് എന്ന അധ്യാപക യോഗ്യത പരീക്ഷ. അടുത്തകാലത്ത് അധ്യാപകർക്ക് ഏറ്റവും കൂടുതൽ മാനസിക സമ്മർദ്ദം ഉണ്ടാക്കിയ ഒന്നാണ് ഇത്. റിട്ടയേർഡ് ആകാൻ പോകുന്നവരും ഈ പരീക്ഷ പാസാകണമെന്ന സുപ്രീം കോടതി ഉത്തരവാണ് അധ്യാപകരെ ആകെ കുഴപ്പിച്ചത്.ഈ സമ്മർദ്ദങ്ങൾക്കിടയിൽ ക്ലാസ്സിൽ കയറി ആത്മാർത്ഥതയോടെ പഠിപ്പിക്കുവാൻ അധ്യാപകർക്ക് സമയം ഇല്ലാതെ ആകുന്നു. ഇതാണ് ആധുനിക കാലഘട്ടത്തെ അധ്യാപന ജോലിയുടെ യഥാർത്ഥ ചിത്രം.
അതുകൊണ്ടുതന്നെ വർഷത്തിൽ ഒരിക്കലെങ്കിലും അവരുടെ മന സന്തോഷത്തിനായി ഒരു ദിവസം മാറ്റിവെക്കണ്ടേ. ആ ദിനമാണല്ലോ ദേശീയ അധ്യാപക ദിനം.ഈ ദിനത്തിൽ കൃത്യമായി നടന്നു വരുന്നത് സംസ്ഥാന അധ്യാപക അവാർഡ് വിതരണം മാത്രമാണ്. അതും വിചിത്രമാണ്. മറ്റ് മേഖലയിൽ ഉള്ളവർക്ക് വൻതുക അവാർഡിന് പാരിദോഷികമായി ലഭിക്കുമ്പോൾ വർഷങ്ങളായി സംസ്ഥാന അവാർഡ് നേടുന്ന അധ്യാപകർക്ക് ലഭിക്കുന്നത് കേവലം പതിനായിരം രൂപ മാത്രമാണ്. കഴിഞ്ഞ സർക്കാർ അത് ഇരുപതിനായിരം ആയി വർധിപ്പിച്ച് നൽകുമെന്ന് അന്ന് ഉറപ്പു നൽകിയിരുന്നു. ഈ വർഷം എങ്കിലും അത് വർദ്ധിപ്പിച്ചു തരുമെന്ന് പ്രതീക്ഷിക്കാം. ഒരു പത്രവാർത്തയിലും അവാർഡു തുകയിലും ഒരു മൊമെന്റോയിലും ഒതുങ്ങി പോവുകയാണ് ആ വലിയ ആദരവ്. അവാർഡ് ലഭിക്കുന്ന അധ്യാപകർക്ക് മുൻകാലത്ത് ഗവൺമെന്റിന്റെ ഭാഗത്തുനിന്ന് പല അനുകൂല്യങ്ങളും ഉണ്ടായിരുന്നു. എന്നാൽ ഇപ്പോൾ അതൊന്നും ചർച്ചയിൽ പോലും വരുന്നില്ല എന്നതാണ് യാഥാർഥ്യം.
അവാർഡ് ലഭിക്കുന്ന അധ്യാപകരിൽ നിന്നും എത്രയോ അധികം അധ്യാപകർ തങ്ങളുടെ കർമ്മ മേഖലയിൽ വ്യത്യസ്തവും അഭിമാനകരവുമായ പ്രവർത്തനങ്ങൾ കാഴ്ചവയ്ക്കുന്നുണ്ട്…. അവാർഡുകൾക്കോ അംഗീകാരങ്ങൾക്കോ അപേക്ഷ സമർപ്പിക്കാത്ത എത്രയോ മികച്ച അധ്യാപകർ നമുക്കിടയിൽ ഉണ്ടാകും…. ഇവരെയൊക്കെ മുഖ്യധാരയിൽ എടുത്തു കാണിക്കേണ്ടതും അർഹതപ്പെട്ടവരെ ആദരിക്കേണ്ടുന്നതും സമൂഹത്തിന്റെ ഒട്ടാകെയുള്ള ഉത്തരവാദിത്വമാണ്. ഈ കാലഘട്ടത്തിൽ അധ്യാപകർക്ക് അത്തരം ഒരു പിന്തുണ ലഭിക്കുന്നുണ്ടോ എന്നുള്ളത് ചിന്തനീയമാണ്.
മറ്റേതൊരു ദിനത്തെക്കാളും മഹത്വമേറിയ ഈ ദിനത്തിലെ u ആരും അറിയാതെ കടന്നുപോകുന്നു. മറുവശത്ത് മറ്റു ദിനങ്ങൾ എല്ലാം ഗംഭീരമായി ആചരിക്കുകയും ചെയ്യുന്നു വർഷത്തിലൊരിക്കൽ തങ്ങളെ പഠിപ്പിച്ച അധ്യാപകരെയും ഇപ്പോൾ അധ്യാപക വൃത്തിയിൽ ഉള്ളവരെയും ഓർക്കാനും അവരുടെ മഹത്വം തിരിച്ചറിയാനുമുള്ള അവസരമാണ് നഷ്ടപ്പെടുന്നത്. ഒരർത്ഥത്തിൽ നമ്മുടെ സമൂഹം ഏറ്റവും കൂടുതൽ പ്രാധാന്യത്തോടെ ആചരിക്കേണ്ട ദിനാചരണങ്ങളിൽ ഒന്നല്ലേ അധ്യാപക ദിനം. അധ്യാപക ദിനം സമുചിതമായി ആഘോഷിക്കപ്പെടുന്നതിലൂടെ, അധ്യാപകർക്ക് അർഹമായ അംഗീകാരം ലഭിക്കുന്നതിലൂടെ പൊതു വിദ്യാഭ്യാസ രംഗത്ത് അനസ്യുതവും അത്ഭുതകരവുമായ മാറ്റങ്ങൾ കാണാൻ കഴിയും. ഈ ദിനത്തിൽ പഞ്ചായത്ത് തലം മുതൽ സംസ്ഥാനതലം വരെ മികവും കഴിവും നേതൃപാടവുമുള്ള അധ്യാപകരെ ത്രിതല പഞ്ചായത്ത് സംവിധാനങ്ങളുടെ ആഭിമുഖ്യത്തിൽ ആദരിക്കാൻ കഴിയണം. അതിലൂടെ അവരെ ചേർത്തു നിർത്താൻ കഴിയണം. എന്തുകൊണ്ട് ഈ ദിനത്തിൽ അധ്യയനം ഒഴിവാക്കി സ്കൂളിൽ അധ്യാപകരെ കൂടുതൽ അടുത്തറിയുന്നതിനും അവരുടെ കഴിവുകൾ അളക്കുന്നതുമായ വിവിധതരത്തിലുള്ള പരിപാടികൾ സംഘടിപ്പിച്ചു കൂടാ. കുട്ടികൾക്കും അധ്യാപകർക്കും അതൊരു വേറിട്ട അനുഭവം തന്നെയായിരിക്കില്ലേ……

(സംസ്ഥാന അധ്യാപക അവാർഡ് ജേതാവും , വിദ്യാഭ്യാസ പ്രവർത്തകനുമായ ലേഖകന്‍
ആലപ്പുഴ താമരക്കുളം വി വി എച്ച് എസ് എസ് അധ്യാപകനാണ്)
9496241070