തിരുവനന്തപുരം: സംസ്ഥാനത്ത് ഇന്നും ഭാഗിക വൈദ്യുതി നിയന്ത്രണം ഏര്‍പ്പെടുത്തിയേക്കും. രാത്രി 12 മണി വരെയുള്ള പീക്ക് സമയങ്ങളിലാണ് ചില മേഖലകളില്‍ നിയന്ത്രണം ഉണ്ടാകുക. കഴിഞ്ഞ മൂന്നുനാല് ദിവസങ്ങളായി സംസ്ഥാനത്ത് തുടരുന്ന രൂക്ഷമായ വൈദ്യുതി പ്രതിസന്ധി ഇപ്പോഴും പരിഹരിക്കപ്പെടാത്ത സാഹചര്യത്തിലാണ് ഇന്നും നിയന്ത്രണം ആവശ്യമായി വരുന്നത്.
സംസ്ഥാനത്ത് മഴ തീരെ ലഭിക്കാത്തതും അന്തരീക്ഷ ഊഷ്മാവ് വലിയ തോതില്‍ ഉയര്‍ന്നതുമാണ് നിലവിലെ കടുത്ത പ്രതിസന്ധിക്ക് കാരണം. ചൂട് ക്രമാതീതമായി വര്‍ധിച്ചതോടെ വീടുകളിലും സ്ഥാപനങ്ങളിലും എയര്‍ കണ്ടീഷണറുകളുടെയും ഫാനുകളുടെയും ഉപയോഗം പീക്ക് സമയങ്ങളില്‍ വലിയ തോതില്‍ കൂടിയിട്ടുണ്ട്. ഇത് സംസ്ഥാനത്തെ ആകെ വൈദ്യുതി ഉപഭോഗം വന്‍തോതില്‍ ഉയരാന്‍ കാരണമായി.
ഉപഭോഗം വര്‍ധിച്ചതിനൊപ്പം കേന്ദ്ര ഗ്രിഡില്‍ നിന്നുണ്ടാകുന്ന വൈദ്യുതിയുടെ ലഭ്യതക്കുറവും തിരിച്ചടിയായി. ഏകദേശം 12,000 മെഗവാട്ടിന്റെ കുറവാണ് കേന്ദ്ര ഗ്രിഡില്‍ നിന്ന് ലഭിക്കേണ്ട വൈദ്യുതിയിലുള്ളത്. ഇതേ തുടര്‍ന്ന് ഇന്നത്തെ ദിവസവും പീക്ക് സമയങ്ങളില്‍ സംസ്ഥാനത്ത് 600 മുതല്‍ 800 മെഗവാട്ട് വരെ അധിക ആവശ്യകതയാണ് ഉണ്ടാകുകയെന്ന് കെഎസ്ഇബി വിലയിരുത്തുന്നു.

തൊടുപുഴ: മുതലക്കൊടത്ത് കെട്ടിടം ഇടിഞ്ഞ് വീണ് അപകടം. പഴയ കെട്ടിടം പൊളിച്ചുമാറ്റുന്നതിനിടെ ഉണ്ടായ അപകടത്തില്‍ കെട്ടിടാവിശിഷ്ടങ്ങള്‍ക്ക് അടിയില്‍ കുടുങ്ങിയ നാലു തൊഴിലാളികളില്‍ രണ്ടുപേര്‍ മരിച്ചു. സാരമായി പരിക്കേറ്റ രണ്ടുപേരെ ആശുപത്രിയില്‍ പ്രവേശിപ്പിച്ചു. ഇവരുടെ ജീവന് ഭീഷണിയില്ല എന്നാണ് ആശുപത്രിയില്‍ നിന്ന് ലഭിക്കുന്ന വിവരം.
കെട്ടിടാവിശിഷ്ടങ്ങള്‍ക്ക് അടിയില്‍ കുടുങ്ങിയ നാലുപേരെ അഗ്‌നിരക്ഷാസേനയും നാട്ടുകാരും ചേര്‍ന്നാണ് പുറത്തെടുത്തത്. എന്നാല്‍ രണ്ടുപേരുടെ ജീവന്‍ രക്ഷിക്കാന്‍ സാധിച്ചില്ല. മരിച്ച രണ്ടുപേരും മലയാളികള്‍ ആണ് എന്നാണ് ലഭിക്കുന്ന വിവരം. ഇരുവരും കോതമംഗലം സ്വദേശികളാണ് എന്നാണ് നാട്ടുകാര്‍ പറയുന്നത്. എന്നാല്‍ ഇവരുടെ പേര് ഉള്‍പ്പെടെയുള്ള മറ്റു വിവരങ്ങള്‍ ലഭിച്ചിട്ടില്ല.

RenjithrenjithkonnakoduEdit Profile

തൃശൂർ: കുന്നംകുളത്ത് കുട്ടി ഉൾപ്പടെ മൂന്നു പേരുടെ മരണത്തിനിടയാക്കിയ വാഹനാപകട‌ത്തിൽ കാർ ഡ്രൈവർ പിടിയിൽ. അർത്താറ്റ് സ്വദേശിയായ ബെൻ (31) ആണ് പൊലീസിന്റെ പിടിയിലായത്. സ്റ്റേഷനിലെത്തി ഇയാൾ കീഴടങ്ങുകയായിരുന്നുവെന്നാണ് വിവരം. ഇയാളുടെ അറസ്റ്റ് രേഖപ്പെടുത്തി. വൈകാതെ കോടതിയിൽ ഹാജരാക്കും. അപക‌ടം നടന്നതിന് പിന്നാലെ ബെൻ സംഭവ സ്ഥലത്തുനിന്നും ഓടിരക്ഷപ്പെട്ടിരുന്നു. ഒളിവിൽ പോയ പ്രതിക്കായി പൊലീസ് തിരച്ചിൽ നടത്തി വരുന്നതിനിടെയാണ് ഇയാൾ കീഴടങ്ങിയത്.

അപകടത്തിൽ മൂന്നുവയസുള്ള കുട്ടി ഉൾപ്പടെ ഒരു കുടുംബത്തിലെ മൂന്നുപേരാണ് മരിച്ചത്. എടക്കഴിയൂർ ഖാദരിയ്യ പള്ളിക്കുസമീപം താഴത്തുവീട്ടിൽ മുനീർ ( 33), ഭാര്യ ഷിഫ്ന (26), മകൾ മൂന്നു വയസ്സുള്ള എമിൽ ഐബക്ക് എന്നിവരാണ് മരിച്ചത്. ഫോൺ വന്നതിനെ തുടർന്ന് റോഡരികിൽ നിർത്തിയിട്ട ബൈക്കിനെ അതിതവേ​ഗതയിലെത്തിയ കാർ ഇടിച്ചു തെറിപ്പിക്കുകയായിരുന്നു. ശനി രാത്രി 11.45 ഓടെയായിരുന്നു അപകടം.

ദമ്പതികൾ സംഭവ സ്ഥലത്തുവെച്ചും കുട്ടി ആശുപത്രിയിൽവെച്ചുമാണ് മരിച്ചത്. അപകടത്തിനിടയാക്കിയ കാറിൽ ബെനും മറ്റ് മൂന്നു സുഹൃത്തുക്കളുമാണ് ഉണ്ടായിരുന്നത്. കുന്നംകുളത്തെ സ്വകാര്യ ബാറിൽ നിന്നും സംഘം മദ്യപിച്ച് ഇറങ്ങിവരുന്നതിന്റെ സിസിടിവി ദൃശ്യങ്ങളും പൊലീസ് കണ്ടെത്തിയിരുന്നു. പിടിയിലായ മൂന്നുപേരെ റിമാന്റ് ചെയ്തു. ഇവരുടെ മൊഴിയിലാണ് ബെൻ ആണ് വാഹനം ഓടിച്ചിരുന്നതെന്ന വിവരം ലഭിച്ചത്. തുടർന്ന് ഒളിവിൽ പോയ ബെന്നിനായി സിസിടിവി ദൃശ്യങ്ങൾ കേന്ദ്രീകരിച്ച് അന്വേഷണം നടത്തി വരവെ ഇയാൾ നേരിട്ടെത്തി കീഴടങ്ങുകയായിരുന്നു. ‌