ദേശീയപാത 66ല്‍ കാവനാട് മുതല്‍ കടമ്പാട്ടുകോണം വരെയുളള റീച്ചില്‍ എട്ട് ഫൂട്ട് ഓവര്‍ ബ്രിഡ്ജുകള്‍ക്ക് അനുമതി ലഭിച്ചതായി എന്‍.കെ. പ്രേമചന്ദ്രന്‍ എം.പി അറിയിച്ചു. സര്‍വ്വീസ് റോഡിന്റെ ഇരുവശത്തും കാല്‍നടക്കാര്‍ക്കുളള മേല്‍പ്പാലം സ്ഥാപിക്കുന്നതിന് സ്ഥലം ലഭ്യമാകുന്ന മുറയ്ക്കായിരിക്കും നിര്‍മ്മാണം നടത്തുക. പ്രാദേശികമായ ആവശ്യങ്ങളും സാങ്കേതികമായി പാലം പണിയുന്നതിനുളള സാധ്യതയുമുളള സ്ഥലങ്ങള്‍ പരിഗണിച്ചാണ് ആദ്യഘട്ടമായി കാല്‍നടക്കാര്‍ക്കുളള മേല്‍പ്പാലങ്ങള്‍ക്ക് ലഭിച്ചത്.
മങ്ങാട് (ബസ്‌ബേയ്ക്ക് സമീപം, ചെയ്‌നേജ് 493+910), പളളിമുക്ക് (ശ്രീനാരായണ പബ്ലിക് സ്‌കൂളിന് സമീപം, ചെയ്‌നേജ് 497+800), ഉയമനല്ലൂര്‍ (ബസ്‌ബേയ്ക്ക് സമീപം, ചെയ്‌നേജ് 500+500), മൈലക്കാട് (കൊല്ലം മുന്‍സിപ്പാലിറ്റി ഹോസ്പിറ്റലിന് സമീപം, ചെയ്‌നേജ് 503+880), ചാത്തന്നൂരില്‍ (ഇ.എസ്.ഐ ഹോസ്പിറ്റലിന് സമീപം, ചെയ്‌നേജ് 507+200), (ബസ്‌ബേയ്ക്ക് സമീപം, ചെയ്‌നേജ് 508+280), (രണ്ടാമത്തെ ബസ്‌ബേയ്ക്ക് സമീപം, ചെയ്‌നേജ് 509+700), കല്ലുവാതുക്കല്‍ (ബസ്‌ബേയ്ക്ക് സമീപം, ചെയ്‌നേജ് 512+180) എന്നിവിടങ്ങളിലാണ് കാല്‍നടക്കാര്‍ക്കുളള മേല്‍പ്പാലങ്ങള്‍ക്ക് അനുമതി ലഭിച്ചതെന്ന് എന്‍.കെ. പ്രേമചന്ദ്രന്‍ എംപി പറഞ്ഞു.