കൊല്ലം: 1.700 കിലോഗ്രാം കഞ്ചാവ് കൈവശം വച്ച് കടത്തിക്കൊണ്ടുവന്ന കേസില് അഞ്ചല് കരുകോണ് സ്വദേശി ഷാഹിദയ്ക്ക് കൊല്ലം ജില്ലാ സെഷന്സ് കോടതി അഞ്ച് വര്ഷം കഠിന തടവും 50,000 രൂപ പിഴയും ശിക്ഷ വിധിച്ചു.
2023 മെയ് 16-ന് പുനലൂര് എക്സൈസ് സര്ക്കിള് ഇന്സ്പെക്ടറായിരുന്ന കെ. സുദേവന്റെ നേതൃത്വത്തില് നടത്തിയ പരിശോധനയിലാണ് ഷാഹിദയെ അറസ്റ്റ് ചെയ്തത്. അസിസ്റ്റന്റ് എക്സൈസ് ഇന്സ്പെക്ടര്മാരായ അന്സാര്. എ., പ്രദീപ് കുമാര് ബി., പ്രിവന്റീവ് ഓഫീസര് അനീഷ് അര്ക്കജ്, വനിതാ സിവില് എക്സൈസ് ഓഫീസര് ദീപ. എന്.പി., സിവില് എക്സൈസ് ഓഫീസര്മാരായ ഹരിലാല് എസ്., റോബി സി.എം. എന്നിവരടങ്ങിയ സംഘമാണ് പ്രതിയെ പിടികൂടിയത്. പിടിയിലായ ഷാഹിദ 25-ലധികം കഞ്ചാവ് കേസുകളില് പ്രതിയാണ്. മുന് കേസുകളില് ജാമ്യത്തില് ഇറങ്ങിയ ശേഷവും ലഹരിക്കടത്ത് തുടര്ന്നതിനിടെയാണ് വീണ്ടും എക്സൈസ് പിടിയിലായത്.
നിലവില് ജോയിന്റ് എക്സൈസ് കമ്മീഷണറായ റോബര്ട്ട് വി. അന്വേഷണം പൂര്ത്തിയാക്കി പ്രതിക്കെതിരെ കുറ്റപത്രം സമര്പ്പിച്ചു. കേസില് എക്സൈസ് വകുപ്പിനുവേണ്ടി അഞ്ചല് റേഞ്ചിലെ അസിസ്റ്റന്റ് എക്സൈസ് ഇന്സ്പെക്ടര് എസ്. പ്രദീപ് പ്രോസിക്യൂഷനെ സഹായിച്ചു.