ഭക്ഷണപ്രേമികളുടെ പ്രിയപ്പെട്ട പ്രഭാതവിഭവങ്ങളിൽ ഒന്നാണ് പുട്ട്. കേരളത്തിന് പുറത്തേക്കോ വിദേശത്തേക്കോ പോകുമ്പോൾ പോലും പുട്ടുപൊടി കൂടെ കരുതുന്ന മലയാളികൾ ഏറെയാണ്. എന്നാൽ വീട്ടിൽ പുട്ട് തയ്യാറാക്കുമ്പോൾ പലർക്കും നേരിടുന്ന പ്രധാന പ്രശ്നം പുട്ട് കട്ടിയാകുന്നതോ ഉണങ്ങിപ്പോകുന്നതോ ആണ്. ചെറിയൊരു നുറുങ്ങ് പ്രയോഗിച്ചാൽ പഞ്ഞിപോലെ മൃദുവായ പുട്ട് വീട്ടിൽ തന്നെ തയ്യാറാക്കാം.
ആവശ്യമായ ചേരുവകൾ
- പച്ചരി
- ഉപ്പ്
- ഉണക്ക കപ്പയുടെ പൊടി
- ചെറുചൂടുള്ള വെള്ളം
- തേങ്ങ ചിരകിയത്
തയ്യാറാക്കുന്ന വിധം
ആദ്യം പച്ചരി കുറഞ്ഞത് എട്ട് മണിക്കൂറെങ്കിലും വെള്ളത്തിൽ കുതിർത്ത് വയ്ക്കുക. തുടർന്ന് വെള്ളം വാർത്ത് അരി വെയിലത്ത് നന്നായി ഉണക്കണം. ഒട്ടും ജലാംശം അവശേഷിക്കാതെ ഉണങ്ങിയ അരി പൊടിച്ച് അരിപ്പയിൽ അരിച്ചെടുക്കുക.
ആവശ്യത്തിന് പുട്ടുപൊടി എടുത്ത് അതിലേക്ക് അൽപം ഉണക്ക കപ്പയുടെ പൊടി ചേർത്ത് ഒരു പാനിൽ ചെറുതായി ചൂടാക്കുക. ഈ നുറുങ്ങാണ് പുട്ടിന് കൂടുതൽ മൃദുത്വം നൽകുന്നത്.
പൊടി തണുത്ത ശേഷം ചെറുചൂടുള്ള വെള്ളവും ആവശ്യത്തിന് ഉപ്പും ചേർത്ത് പുട്ടിന് പാകത്തിൽ നനച്ചെടുക്കുക. തുടർന്ന് പുട്ടുകുറ്റിയിൽ തേങ്ങ ചിരകിയതും നനച്ച പൊടിയും മാറിമാറി നിറച്ച് ആവിയിൽ വേവിച്ചാൽ പഞ്ഞിപോലെ മൃദുവും സ്വാദിഷ്ടവുമായ പുട്ട് തയ്യാർ.
കുറിപ്പ്: മാവ് അമിതമായി നനയ്ക്കാതെയും ആവി കയറ്റുന്നതിന് മുമ്പ് അഞ്ച് മുതൽ പത്ത് മിനിറ്റ് വരെ മാവ് വിശ്രമിക്കാൻ അനുവദിച്ചാലും പുട്ടിന്റെ മൃദുത്വം വർധിക്കും.