കാലഘട്ടത്തിൻ്റെ മാറ്റം ഉൾക്കൊണ്ടുകൊണ്ട് നമ്മുടെ ഗ്രന്ഥശാലകൾ ആധുനികവൽക്കരണത്തിൻ്റെ പാതയിലേക്ക് കടക്കുന്നു. കരുനാഗപ്പള്ളി. താലൂക്ക് ലൈബ്രറി കൗൺസിലിന് കീഴിലുള്ള അംഗ ഗ്രന്ഥശാലകളിലെ മുഴുവൻ പുസ്തകങ്ങളുടേയും അംഗങ്ങളുടേയും വിവരങ്ങൾ പബ്ലിക്ക് എന്ന ഡിജിറ്റൽ പ്ലാറ്റ്ഫോമിൽ ലഭ്യമാകും. ആധുനിക സാങ്കേതികവിദ്യകൾ ഗ്രന്ഥശാല പ്രവർത്തനത്തിന് ഉപയുക്തമാക്കി, യുവതയേയും വിദ്യാർത്ഥികളേയും ഗ്രന്ഥശാലകളിലേക്ക് അടുപ്പിക്കുകയും അവരുടെ അറിവിടങ്ങളാക്കി ഗ്രന്ഥശാലകളെ മാറ്റുകയും ചെയ്യുകയാണ് സമ്പൂർണ ഡിജിറ്റലൈസേഷൻ വഴി ലക്ഷ്യമിടുന്നത്. ജൂലൈ 31 ന് കരുനാഗപ്പള്ളി താലൂക്ക് സമ്പൂർണ ഡിജിറ്റൽ ലൈബ്രറി താലൂക്കായി പ്രഖ്യാപിക്കും.
ഇതിനു മുന്നോടിയായി താലൂക്കിലെ എല്ലാ ഗ്രന്ഥശാലകളിലെയും ലൈബ്രേറിയന്മാർക്കും പബ്ലിക്ക് സോഫ്റ്റ് വയർ പരിശീലനം നൽകി. കരുനാഗപ്പള്ളി IHRD എൻജിനീയറിംഗ് കോളേജിൻ്റെ സഹകരണത്തോടെയാണ് പരിശീലന പരിപാടി നടത്തിയത്. ജില്ലാ എക്സി അംഗം വി.പി. ജയപ്രകാശ് മേനോൻ അദ്ധ്യക്ഷനായിരുന്നു. താലൂക്ക് ലൈബ്രറി കൗൺസിൽ സെക്രട്ടറി വി. വിജയകുമാർ ഉദ്ഘാടനം ചെയ്തു. താലൂക്ക് പ്രസിഡൻ്റ് കടത്തൂർ മൻസൂർ, എക്സി അംഗം സുരേഷ് വെട്ടുകാട് , IHRD ഇൻസ്ട്രക്റ്റർ രഞ്ജിത്ത് എന്നിവർ സംസാരിച്ചു. പി. ദീപു , സജീവ് കുമാർ, മഞ്ജു ജഹാംഗീർ, മായ എന്നിവർ പരിശീലന പരിപാടികൾക്ക് നേതൃത്വം നൽകി
