28.4 C
Kollam
Sunday 22nd November, 2026 | 08:41:11 PM
Home News Breaking News സുപ്രധാന നീക്കവുമായി സംസ്ഥാന സർക്കാർ; ഹൈക്കോടതിയെ സമീപിക്കുമെന്ന് മന്ത്രി കെ മുരളീധരൻ; ശബരിമലയിലെ വെർച്വൽ ക്യൂ...

സുപ്രധാന നീക്കവുമായി സംസ്ഥാന സർക്കാർ; ഹൈക്കോടതിയെ സമീപിക്കുമെന്ന് മന്ത്രി കെ മുരളീധരൻ; ശബരിമലയിലെ വെർച്വൽ ക്യൂ ബുക്കിങ് വർധിപ്പിക്കാൻ ആവശ്യപ്പെടും

Advertisement

തിരുവനന്തപുരം: ശബരിമലയിൽ തിരക്ക് കുറയുന്ന സാഹചര്യത്തിൽ വെർച്വൽ ക്യൂ ബുക്കിംഗിൽ ചില ക്രമക്കേടുകൾ നടക്കുന്നുണ്ടോ എന്ന് പരിശോധിക്കുമെന്ന് ദേവസ്വം മന്ത്രി കെ. മുരളീധരൻ വ്യക്തമാക്കി. ഇക്കാര്യം അന്വേഷിക്കുന്നതിനായി എ.ഡി.ജി.പിയെ ചുമതലപ്പെടുത്തിയിട്ടുണ്ട്. കൂടാതെ, ദിവസേനയുള്ള വെർച്വൽ ക്യൂ ബുക്കിംഗിൽ 5,000 ഭക്തരുടെ വർദ്ധനവ് വരുത്താൻ അനുമതി തേടി ഹൈക്കോടതിയെ സമീപിക്കുമെന്നും മന്ത്രി അറിയിച്ചു.

Also Read: ഭീകരവാദത്തിനെതിരെ ഇന്ത്യ തെളിവ് നൽകിയാൽ നടപടിയുണ്ടാകുമെന്ന് പാക് മന്ത്രി മസൂദ് മാലിക്; പരസ്പര പ്രകോപനമല്ല, ശാശ്വത പരിഹാരമാണ് വേണ്ടതെന്നും പ്രതികരണം

അതേസമയം, വെർച്വൽ ക്യൂ ബുക്കിംഗിൽ കടുത്ത നിയന്ത്രണങ്ങൾ കൊണ്ടുവരുമെന്ന പ്രചാരണം ദേവസ്വം ബോർഡ് തള്ളി. ബുക്ക് ചെയ്ത ശേഷം ദർശനത്തിന് എത്താതിരുന്നാൽ പിന്നീട് മണ്ഡലകാലത്ത് അവസരം നിഷേധിക്കുമെന്ന തരത്തിലുള്ള പ്രചാരണങ്ങൾ അടിസ്ഥാനരഹിതമാണ്. ഈ സീസണിൽ വെർച്വൽ ക്യൂ സോഫ്റ്റ്‌വെയറിൽ മാറ്റങ്ങൾ വരുത്തുന്നത് ആലോചനയിലില്ല. നിലവിൽ സോഫ്റ്റ്‌വെയറിൽ മാറ്റം വരുത്തിയാൽ വലിയ സാങ്കേതിക പ്രശ്നങ്ങൾക്ക് കാരണമാകുമോ എന്ന ആശങ്ക ബോർഡിനുണ്ട്. അതിനാൽ എന്തെങ്കിലും പരിഷ്കാരങ്ങൾ ഉണ്ടെങ്കിൽ തന്നെ അത് സീസണിന് ശേഷം മാത്രമേ നടപ്പിലാക്കുകയുള്ളൂ.

വെർച്വൽ ക്യൂ ബുക്കിംഗും ദർശനത്തിന് എത്തുന്നവരുടെ എണ്ണവും തമ്മിലുള്ള വ്യത്യാസത്തിൽ അന്വേഷണം തുടരുകയാണ്. കൂട്ടമായി ബുക്ക് ചെയ്യുന്ന തരത്തിലുള്ള അസ്വാഭാവികതകൾ പരിശോധനയിൽ കണ്ടെത്തിയാൽ മാത്രമേ നടപടികളിലേക്ക് കടക്കുകയുള്ളൂ. പ്രാഥമിക പരിശോധനയിൽ പ്രത്യേകിച്ച് അസ്വാഭാവികതകളൊന്നും കണ്ടെത്തിയിട്ടില്ലെന്നാണ് പൊലീസിന്റെയും ദേവസ്വം ബോർഡിന്റെയും വിലയിരുത്തൽ. വെള്ളിയാഴ്ച മുതൽ സന്നിധാനത്തേക്ക് എത്തുന്ന തീർത്ഥാടകരുടെ എണ്ണത്തിൽ വർദ്ധനവുണ്ടായിട്ടുണ്ട്. വെള്ളിയാഴ്ച 60,000 പേരും ശനിയാഴ്ച 61,000 പേരും ദർശനം നടത്തി. ഇന്ന് രാവിലെ 11 മണി വരെ മാത്രം 28,000 തീർത്ഥാടകർ മലയിലെത്തിയിട്ടുണ്ട്.

ഇതിനിടെ, മദ്യപാനികളും പെരുമാറ്റ ദൂഷ്യമുള്ളവരുമായ പൊലീസ് ഉദ്യോഗസ്ഥരെ ശബരിമല ഡ്യൂട്ടിക്ക് അയക്കരുതെന്ന് ദക്ഷിണ മേഖല ഐ.ജി പി. പ്രകാശ് എസ്.പിമാർക്ക് കർശന നിർദ്ദേശം നൽകി. നിലയ്ക്കലിൽ തീർത്ഥാടകരെ കൊണ്ടുവന്ന വാഹനത്തിന്റെ ഡ്രൈവറെ പൊലീസ് ഉദ്യോഗസ്ഥൻ മർദ്ദിച്ച സംഭവം സേനയ്ക്ക് വലിയ നാണക്കേടുണ്ടാക്കിയതിന് പിന്നാലെയാണ് ഈ നടപടി. ഭക്തജനങ്ങൾക്ക് ആവശ്യമായ സൗകര്യങ്ങൾ ഒരുക്കുകയാണ് പൊലീസിന്റെ പ്രഥമ ചുമതലയെന്നും ഐ.ജി എസ്.പിമാർക്ക് അയച്ച കത്തിൽ വ്യക്തമാക്കി.

LEAVE A REPLY

Please enter your comment!
Please enter your name here