തിരുവനന്തപുരം: നേപ്പാളിലെ പ്രളയബാധിത പ്രദേശങ്ങളിൽ മലയാളികൾ ഉൾപ്പെട്ടിട്ടുണ്ടോ എന്ന് പരിശോധിക്കാൻ മുഖ്യമന്ത്രി ചീഫ് സെക്രട്ടറിയെ ചുമതലപ്പെടുത്തി. നേപ്പാളിൽ കുടുങ്ങിക്കിടക്കുന്ന മലയാളികൾക്കും അവരുടെ ബന്ധുക്കൾക്കും സഹായത്തിനായി നോർക്ക റൂട്ട്സിന്റെ പ്രത്യേക ഹെൽപ് ലൈൻ നമ്പറുകൾ സജ്ജീകരിച്ചിട്ടുണ്ട്.
സഹായത്തിനായി നോർക്കയുടെ 1070 എന്ന ടോൾ ഫ്രീ നമ്പറിലോ അല്ലെങ്കിൽ വിദേശകാര്യ മന്ത്രാലയം തുറന്നിട്ടുള്ള 0086 139 8999 0012, 0086 185 1428 4905 എന്നീ ഹെൽപ് ലൈൻ നമ്പറുകളിലോ ബന്ധപ്പെടാവുന്നതാണെന്ന് അധികൃതർ അറിയിച്ചു.
48 മലയാളികൾ നേപ്പാളിൽ കുടുങ്ങിയെന്നാണ് പുറത്ത് വരുന്ന വിവരം . ഇവരുടെ വിവരങ്ങൾ ലഭ്യമായി.ഇതിൽ 18 പേരുമായി ആശയവിനിമയം നടത്താൻ ബന്ധുക്കൾക്ക് കഴിഞ്ഞിട്ടുണ്ട്. 170 പേരുടെ മരണം ഇതുവരെ റിപ്പോർട്ട് ചെയ്തു. 800 ലധികം കാണാനില്ലെന്നും ഇതിൽ 466 പേർ വിദേശികളാണെന്നും നേപ്പാളി മാധ്യമങ്ങൾ റിപ്പോർട്ട് ചെയ്യുന്നു.
