കണ്ണൂര്. അഴീക്കോട് അയനിവയലില് കുളത്തില് റീല്സ് ചിത്രീകരണത്തിനായി ഇറങ്ങിയ യുവ ഡോക്ടര് മുങ്ങി മരിച്ചു. കോയമ്പത്തൂര് സ്വദേശി അനിരുദ്ധ് കൃഷ്ണനാണ് (24) മരിച്ചത്. ശനിയാഴ്ച്ച ഉച്ചയ്ക്ക് രണ്ടരയോടെയാണ് അപകടം. ഇന്സ്റ്റഗ്രാമില് കുളത്തിന്റെ ദൃശ്യങ്ങള് കണ്ട് പെണ് സുഹൃത്തിനൊപ്പം എത്തിയതായിരുന്നു അനിരുദ്ധ്.
എംബിബിഎസ് കഴിഞ്ഞ് ഹൗസ് സര്ജന്സി ചെയ്യുകയാണ് അനിരുദ്ധ്. സുഹൃത്തിനെ കരയ്ക്ക് നിര്ത്തി കുളത്തിലിറങ്ങിയ അനിരുദ്ധ് മുങ്ങി പോകുകയായിരുന്നു. സുഹൃത്തിന്റെ കരച്ചില് കേട്ട് ഓടിയെത്തിയ നാട്ടുകാര് തിരച്ചില് നടത്തിയെങ്കിലും കണ്ടെത്താനായില്ല.
പിന്നീട് ഫയര്ഫോഴ്സ് കുളത്തില് നിന്നു അനിരുദ്ധിനെ പുറത്തെടുത്തു ഉടന് ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല. മൃതദേഹം പൊലിസ് ഇന്ക്വസ്റ്റ് നടത്തി. പോസ്റ്റുമോര്ട്ടം നടപടികള്ക്കായി കണ്ണൂര് ജില്ലാ ആശുപത്രി മോര്ച്ചറിയിലേക്ക് മാറ്റി.കണ്ണൂർ ജില്ലയിലെ അഴീക്കോട് സ്ഥിതി ചെയ്യുന്ന മനോഹരമായ ഒരു പരമ്പരാഗത കുളമാണ് അയനിവയലില് കുളം. ജ്യാമിതീയ കൃത്യതയുള്ള പടവുകളും തെളിഞ്ഞ വെള്ളവും ഈ കുളത്തിന്റെ പ്രത്യേകതയാണ്.
