തിരുവനന്തപുരം: നിയമസഭയിലെ പ്രതിപക്ഷ ഉപനേതൃപദവി സംബന്ധിച്ച് പ്രതിപക്ഷ നേതാവ് പിണറായി വിജയന് നടത്തിയ ഏകപക്ഷീയ പരാമര്ശത്തിനെതിരെ അതിരൂക്ഷ വിമര്ശനവുമായി സിപിഐ സംസ്ഥാന സെക്രട്ടറി ബിനോയ് വിശ്വം. ഉപനേതൃസ്ഥാനം സിപിഎമ്മിന് തന്നെയെന്ന് പിണറായി പറഞ്ഞിട്ടുണ്ടെങ്കില് അത് അദ്ദേഹത്തിന്റെ പദവിക്കും രാഷ്ട്രീയ പക്വതയ്ക്കും നിരക്കുന്നതല്ലെന്ന് അദ്ദേഹം തുറന്നടിച്ചു. മുന്നണിയിലെ തര്ക്കവിഷയങ്ങള് ഉഭയകക്ഷി ചര്ച്ചയിലൂടെ പരിഹരിക്കേണ്ടതിന് പകരം പരസ്യമായി പ്രഖ്യാപിക്കുന്നത് എല്ഡിഎഫിന്റെ രാഷ്ട്രീയ സംസ്കാരത്തിന് ചേര്ന്നതല്ലെന്നും അദ്ദേഹം വ്യക്തമാക്കി.
പ്രതിപക്ഷ ഉപനേതാവ് പദവി സംബന്ധിച്ച് സിപിഐയും സിപിഎമ്മും തമ്മില് കഴിഞ്ഞ കുറേക്കാലമായി ചര്ച്ചകള് നടന്നുവരികയാണെന്ന് ബിനോയ് വിശ്വം ചൂണ്ടിക്കാട്ടി. ഇരുപാര്ട്ടികളുടെയും സംസ്ഥാന-കേന്ദ്ര നേതൃത്വങ്ങള് ഈ ചര്ച്ചകളില് പങ്കാളികളാണ്. അത്തരമൊരു തര്ക്കവിഷയത്തില് എല്ഡിഎഫ് ചെയര്മാന് കൂടിയായ പിണറായി വിജയന് ഏകപക്ഷീയമായി തീരുമാനം പ്രഖ്യാപിച്ചത് ഒരു തരത്തിലും അംഗീകരിക്കാന് കഴിയില്ല. സിപിഐയുടെ അഭിമാനത്തിന് വിലയിടാന് ഒരു നേതാവിനും അവകാശമില്ലെന്നും ആ അവകാശം പാര്ട്ടിക്ക് മാത്രമാണെന്നും അദ്ദേഹം മാധ്യമങ്ങളോട് പറഞ്ഞു.
നിയമസഭാ സ്പീക്കര്ക്ക് കത്ത് നല്കിയാല് പ്രതിപക്ഷ ഉപനേതാവിനെ നിശ്ചയിക്കാമെന്നും, ആ കത്തില് ഉണ്ടാകുക സിപിഎം നേതാവിന്റെ പേരായിരിക്കുമെന്നതില് സംശയമില്ലെന്നുമായിരുന്നു പിണറായി വിജയന് നേരത്തെ മാധ്യമങ്ങളോട് പറഞ്ഞത്. സിപിഐ ഉന്നയിച്ച അവകാശവാദത്തെ തള്ളിക്കളഞ്ഞ പിണറായി, സിപിഐയെ പറഞ്ഞ് ബോധ്യപ്പെടുത്തുമെന്നും പ്രതികരിച്ചിരുന്നു. ഇതിന് പിന്നാലെയാണ് സിപിഐ നിലപാട് കടുപ്പിച്ച് രംഗത്തെത്തിയത്. എല്.ഡി.എഫിലെ രണ്ടാമത്തെ വലിയ ഘടകകക്ഷിയായ സി.പി.ഐ ഉന്നയിക്കുന്ന ആവശ്യത്തെ തള്ളിക്കളഞ്ഞ് മുന്നോട്ടുപോകാനാവില്ലെന്നും ഉഭയകക്ഷി ചര്ച്ചയിലൂടെ മാത്രമേ അന്തിമ തീരുമാനമെടുക്കാവൂ എന്നും പാര്ട്ടി വ്യക്തമാക്കി.
