തിരുവനന്തപുരം: പാലക്കാട് റെയില്‍വേ ഡിവിഷനില്‍നിന്ന് മംഗലാപുരം സ്റ്റേഷന്‍ ഉള്‍പ്പെടെയുള്ള പ്രധാന ഭാഗങ്ങള്‍ അടര്‍ത്തിമാറ്റി മൈസൂരു ഡിവിഷനിലേക്ക് മാറ്റാനുള്ള റെയില്‍വേ ബോര്‍ഡിന്റെ നീക്കം ഏകപക്ഷീയവും അങ്ങേയറ്റം പ്രതിഷേധാര്‍ഹവുമാണെന്ന് മുഖ്യമന്ത്രി വിഡി സതീശന്‍. സതേണ്‍ റെയില്‍വേയുടെ പ്രധാന വരുമാന സ്രോതസ്സുകളിലൊന്നായ മംഗലാപുരം ജങ്ഷനെ ഒഴിവാക്കുന്നത് പാലക്കാട് ഡിവിഷന്റെ സാമ്പത്തിക ഭദ്രതയെയും ഭാവി വികസന പ്രവര്‍ത്തനങ്ങളെയും ഗുരുതരമായി ബാധിക്കും.
നിലവില്‍ സതേണ്‍ റെയില്‍വേയുടെ പരിധിയിലുള്ള ഉള്ളാള്‍ മുതല്‍ മംഗലാപുരം വരെയുള്ള തന്ത്രപ്രധാനമായ റെയില്‍വേ പാതകള്‍ സൗത്ത് വെസ്റ്റേണ്‍ റെയില്‍വേയില്‍ ലയിപ്പിക്കുന്നതിലൂടെ സതേണ്‍ റെയില്‍വേയ്ക്കും കേരളത്തിനും വലിയ നഷ്ടമാണ് സംഭവിക്കുക. സംസ്ഥാന സര്‍ക്കാരുമായി യാതൊരുവിധ കൂടിയാലോചനകളും നടത്താതെയും സംസ്ഥാനത്തെ മുന്‍കൂട്ടി അറിയിക്കാതെയുമാണ് പാലക്കാട് ഡിവിഷനെ വെട്ടിമുറിക്കാന്‍ റെയില്‍വേ മന്ത്രാലയം തീരുമാനമെടുത്തത്. ഈ തീരുമാനം അടിയന്തരമായി പിന്‍വലിക്കണമെന്നത് കേരളത്തിന്റെ ഒറ്റക്കെട്ടായ ആവശ്യമാണ്.
വിഷയത്തില്‍ അടിയന്തര പരിഹാരം കാണണമെന്ന് ആവശ്യപ്പെട്ട് സംസ്ഥാന സര്‍ക്കാര്‍ കേന്ദ്ര സര്‍ക്കാരിനെ സമീപിക്കും. റെയില്‍വേയുടെ ഏകപക്ഷീയമായ നീക്കത്തിനെതിരെ പ്രധാനമന്ത്രിക്കും കേന്ദ്ര റെയില്‍വേ മന്ത്രിക്കും ഔദ്യോഗികമായി കത്തയക്കും. കേരളത്തില്‍ നിന്നുള്ള ലോക്‌സഭാ-രാജ്യസഭാ എം.പിമാരുടെ പൂര്‍ണ്ണ സഹകരണത്തോടെ പാര്‍ലമെന്റിലും പുറത്തും ശക്തമായ പ്രതിഷേധം ഉയര്‍ത്താനും തീരുമാനം പുനഃപരിശോധിപ്പിക്കാന്‍ കേന്ദ്രത്തിന് മേല്‍ സംയുക്ത സമ്മര്‍ദ്ദം ചെലുത്തുമെന്നും മുഖ്യമന്ത്രിയുടെ ഓഫീസ് പുറത്തിറക്കിയ വാര്‍ത്താക്കുറിപ്പില്‍ വ്യക്തമാക്കി.
