തൃശ്ശൂര്‍: ഗുരുവായൂര്‍ ക്ഷേത്ര ദര്‍ശനം കാലോചിതമാക്കുന്നതിന്റെ ഭാഗമായി ഭക്തര്‍ക്ക് ദര്‍ശനം സുഗമമാക്കുവാന്‍ ദേവസ്വം നടപ്പാക്കുന്ന വെര്‍ച്വല്‍ ക്യൂ ദര്‍ശനം ഇന്നുമുതല്‍ ആരംഭിക്കും. വെര്‍ച്വല്‍ ക്യൂവിന്റെ ഔപചാരിക ഉദ്ഘാടനം ഗുരുവായൂര്‍ ദേവസ്വം ചെയര്‍മാന്‍ എ.വി.ഗോപിനാഥ് നിര്‍വ്വഹിക്കും. ആദ്യഘട്ടത്തില്‍ മണിക്കൂറില്‍ മൂന്നുറു ഭക്തര്‍ക്ക് ഓണ്‍ലൈന്‍ വഴി ദര്‍ശനം സാധ്യമാകും.
പരീക്ഷണാടിസ്ഥാനത്തില്‍ എല്ലാ ചൊവ്വാഴ്ചയും വ്യാഴാഴ്ചയുമാണ് നിലവില്‍ ദര്‍ശനം ക്രമീകരിച്ചിരിക്കുന്നത്. പ്രതിദിനം 2,400 ഭക്തര്‍ക്ക് ദര്‍ശന സൗകര്യം ലഭിക്കുമെന്നാണ് പ്രതീക്ഷ.
ഹൈക്കോടതി നിര്‍ദ്ദേശപ്രകാരമാണ് പുതിയ സംവിധാനം വരുന്നത്. ഇത് വിജയകരമായാല്‍ കൂടുതല്‍ ദിവസവും സമയവും ദര്‍ശനത്തിന് ഓണ്‍ലൈന്‍ പ്രയോജനപ്പെടുത്തുമെന്നാണ് സൂചന. തിരുപ്പതി അടക്കം മഹാക്ഷേത്രങ്ങള്‍ ഓണ്‍ലൈനിലേക്കുമാറി ദര്‍ശനത്തിരക്കും അസൗകര്യവും പരിഹരിച്ചിട്ടുണ്ട്.
