പത്തനംതിട്ട: ലഹരിയുടെ വേരറുക്കാൻ സർക്കാർ രൂപീകരിച്ച ഓപ്പറേഷൻ തൂഫാൻ സംഘത്തിലെ മൂന്ന് പോലീസുകാർ മദ്യപിച്ച് വാഹനമോടിച്ച കേസിൽ സസ്പെൻഷനിലായത് സർക്കാരിന് നാണക്കേടായി. മദ്യപിച്ച് അശ്രദ്ധമായി പോലീസ് ജീപ്പോടിച്ച് മറ്റ് വാഹനങ്ങളിൽ ഇടിക്കാൻ ശ്രമിച്ചതിന് പത്തനംതിട്ട ഡാൻസാഫ് സംഘത്തിലെ മൂന്ന് പോലീസ് ഉദ്യോഗസ്ഥരെയാണ് സർവീസിൽ നിന്ന് സസ്പെൻഡ് ചെയ്തത്. പ്രിയേഷ്, രാഹുൽ, സുമൻ എന്നിവരെയാണ് ജില്ലാ പോലീസ് മേധാവി സസ്പെൻഡ് ചെയ്തത്. മദ്യപിച്ച് വാഹനം ഓടിച്ചതിന് ഡ്രൈവർ പ്രിയേഷിനെതിരെ പോലീസ് കേസെടുത്തിട്ടുമുണ്ട്.
ചൊവ്വാഴ്ച വൈകീട്ട് പത്തനംതിട്ട നഗരത്തിലായിരുന്നു സംഭവം.
ഓപ്പറേഷൻ തൂഫാൻ പരിശോധനയുടെ ഭാഗമായി ഡിവൈ.എസ്.പിയുടെ കീഴിൽ പ്രവർത്തിക്കുന്ന ഡാൻസാഫ് സംഘമാണ് ജീപ്പിലുണ്ടായിരുന്നത്.
മൈലപ്ര ഭാഗത്തുനിന്ന് അമിത വേഗതയിൽ വന്ന പോലീസ് ജീപ്പ് മറ്റ് വാഹനങ്ങളിൽ ഇടിക്കാൻ ശ്രമിക്കുകയും, ഒരു വനിതയുടെ ഓട്ടോറിക്ഷയിൽ തട്ടാൻ അടുക്കുകയും ചെയ്തു.
നിർത്താതെ പോയ ജീപ്പിനെ നാട്ടുകാരും ഓട്ടോ ഡ്രൈവറും ചേർന്ന് ജില്ലാ പോലീസ് മേധാവിയുടെ ഓഫീസിന് സമീപത്തുവെച്ച് തടയുകയായിരുന്നു.
ജീപ്പിലുണ്ടായിരുന്ന ഒരാൾ ബാഗുമായി ഇറങ്ങിയോടിയെങ്കിലും നാട്ടുകാർ തടഞ്ഞുവെച്ചു.
തുടർന്ന് പത്തനംതിട്ട പോലീസ് എത്തി മൂന്നുപേരെയും കസ്റ്റഡിയിലെടുത്ത് ജനറൽ ആശുപത്രിയിൽ വൈദ്യപരിശോധനയ്ക്ക് വിധേയരാക്കി.
