ന്യൂഡല്ഹി: ദേശീയപാതയില് അപകടത്തില്പ്പെടുന്നവര്ക്ക് അടിയന്തര ചികിത്സ ഉറപ്പാക്കാന് കര്ശന നിര്ദേശങ്ങളുമായി ദേശീയപാത അതോറിറ്റി ഓഫ് ഇന്ത്യ (NHAI). അപകടം സംഭവിച്ചതായി സന്ദേശം ലഭിച്ച് 10 മിനിറ്റിനുള്ളില് ആംബുലന്സ് സ്ഥലത്തെത്തണം. 10 കിലോമീറ്റര് പരിധിക്കുള്ളിലുള്ള ആംബുലന്സാണ് അപകടസ്ഥലത്ത് 10 മിനിറ്റിനകം എത്തേണ്ടത്.
നിശ്ചിത സമയപരിധിക്കുള്ളില് ആംബുലന്സ് എത്തിക്കുന്നതില് വീഴ്ച വരുത്തിയാല് 10,000 രൂപ പിഴ ഈടാക്കും. അപകടസ്ഥലത്ത് എത്തിയ ആംബുലന്സ് പരിക്കേറ്റവരെ ഒരു മണിക്കൂറിനുള്ളില് സമീപത്തെ ആശുപത്രിയിലെത്തിക്കണമെന്നും പുതിയ മാര്ഗനിര്ദേശത്തില് നിര്ദേശിച്ചിട്ടുണ്ട്. ഇക്കാര്യത്തിലും സമയപരിധി പാലിച്ചില്ലെങ്കില് 10,000 രൂപ പിഴ ചുമത്തും.
ആംബുലന്സുകള്, ക്രെയിനുകള്, പട്രോളിങ് വാഹനങ്ങള് എന്നിവയുള്പ്പെടെയുള്ള ഓണ്-റോഡ് യൂണിറ്റുകളുടെ പ്രവര്ത്തനം കൂടുതല് കാര്യക്ഷമമാക്കുന്നതിനാണ് NHAI പുതിയ നിര്ദേശങ്ങള് പുറപ്പെടുവിച്ചത്. NHAIയുടെ കീഴിലുള്ള ഏകദേശം 50,000 കിലോമീറ്റര് ദേശീയപാതയില് 3,000ഓളം ആംബുലന്സുകളും 1,000ഓളം പട്രോളിങ് വാഹനങ്ങളും ക്രെയിനുകളും പ്രവര്ത്തിക്കുന്നുണ്ട്.
അപകടങ്ങള്ക്കുശേഷമുള്ള രക്ഷാപ്രവര്ത്തനത്തിലും അടിയന്തര ചികിത്സ ഉറപ്പാക്കുന്നതിലും ഉണ്ടാകുന്ന കാലതാമസം ചൂണ്ടിക്കാട്ടി സുപ്രീം കോടതിയും റോഡ് സുരക്ഷാ കമ്മിറ്റിയും കണ്ട്രോളര് ആന്ഡ് ഓഡിറ്റര് ജനറലും (CAG) മുന്നോട്ടുവച്ച റിപ്പോര്ട്ടുകളുടെ അടിസ്ഥാനത്തിലാണ് NHAI നിര്ദേശങ്ങള് കര്ശനമാക്കിയത്.
അപകടത്തില്പ്പെട്ടവര്ക്ക് സമയബന്ധിതമായി ചികിത്സ ലഭ്യമാക്കുന്നത് ജീവന് രക്ഷിക്കുന്നതില് നിര്ണായകമാണെന്ന വിലയിരുത്തലിലാണ് പുതിയ സമയപരിധി നിശ്ചയിച്ചത്. പൊതുജനാരോഗ്യവും സുരക്ഷയും സംബന്ധിച്ച സര്ക്കുലറില് വ്യക്തമാക്കിയിട്ടുള്ള മാര്ഗനിര്ദേശങ്ങള് കര്ശനമായി പാലിക്കുന്നുണ്ടെന്ന് ഉറപ്പാക്കണമെന്ന് എല്ലാ പ്രോജക്ട് ഡയറക്ടര്മാര്ക്കും റീജിയണല് ഓഫീസര്മാര്ക്കും NHAI നിര്ദേശം നല്കി.
അപകടസ്ഥലത്തേക്കുള്ള ആംബുലന്സിന്റെ എത്തിച്ചേരല് മുതല് പരിക്കേറ്റവരെ ആശുപത്രിയിലെത്തിക്കുന്നതുവരെയുള്ള ഓരോ ഘട്ടത്തിലും സമയബന്ധിതമായ ഇടപെടല് ഉറപ്പാക്കുകയാണ് പുതിയ നിര്ദേശങ്ങളുടെ ലക്ഷ്യം.
