കോഴിക്കോട്: വിശ്വാസികളെ ഒഴിവാക്കിക്കൊണ്ട് വര്‍ഗീയതക്കെതിരെ പൊരുതുക സാധ്യമല്ലെന്ന് സിപിഎം സംസ്ഥാന സെക്രട്ടറി എംവി ഗോവിന്ദന്‍. വര്‍ഗീയത രൂപപ്പെടുത്താന്‍ ഉപയോഗിക്കുന്നതാണ് വിശ്വാസം. അത് ന്യൂനപക്ഷമായാലും ഭൂരിപക്ഷമായാലും വിശ്വാസികളെ കൂടി മുഖവിലയ്ക്ക് എടുത്തുവേണം ഇതിനെതിരായ പോരാട്ടം ശക്തിപ്പെടുത്താനെന്നും ഗോവിന്ദന്‍ പറഞ്ഞു. കോഴിക്കോട്ട് നടക്കുന്ന സിപിഎം വിശാല സംസ്ഥാന കമ്മിറ്റിയില്‍ പ്രതിനിധികള്‍ ഉയര്‍ത്തിയ ചര്‍ച്ചകളെക്കുറിച്ച് സംസാരിക്കുകയായിരുന്നു ഗോവിന്ദന്‍. ശ്രീകൃഷ്ണ ജയന്തി ആര്‍എസ്എസിന്റെ കുത്തകയല്ലെന്നും എല്ലാ ഉത്സവങ്ങളും എല്ലാ ജനങ്ങളുടേതുമാണെന്നും ആരാധാനാലയങ്ങള്‍ വിശ്വാസികളുടേത് മാത്രമാക്കി മാറ്റണമെന്നുമുള്ള അഭിപ്രായം ചര്‍ച്ചയില്‍ ഉയര്‍ന്നതായി എംവി ഗോവിന്ദന്‍ പറഞ്ഞു.

ക്ഷേത്രങ്ങള്‍ വര്‍ഗീയവാദികളുടെ നിയന്ത്രണത്തിലാകരുത്. ദേവസ്വം ബോര്‍ഡിന്റെ കീഴിലുള്ള ക്ഷേത്രങ്ങളില്‍ പോലും ആര്‍എസ്എസ് ശാഖയും ബിജെപി ക്ലാസുകളുമാണ് നടക്കുന്നത്. ഈ സാഹചര്യത്തില്‍ എല്ലാ ഉത്സവങ്ങളും ആഘോഷങ്ങളും എല്ലാജനവിഭാഗങ്ങളുടേതുമാക്കി മാറ്റാനുള്ള ബോധപൂര്‍വമായ ഇടപെടല്‍ ഉണ്ടാവണം. ഉത്സവങ്ങളെയും ആഘോഷങ്ങളെയും എല്ലാം വെള്ളം കടക്കാത്ത അറ പോലെ വേര്‍തിരിച്ച് പൊതുഇടം എന്നതിന് പകരം സ്വകാര്യഇടങ്ങളായി, ആചാരപരമായ രീതിയില്‍ ചൂണ്ടിക്കാണിച്ചുകൊണ്ട് മതവിദ്വേഷത്തിന്റെ നിലപാടുകള്‍ സ്വീകരിക്കാനുള്ള പശ്ചാത്തലം ഒഴിവാക്കുന്നതിന് വേണ്ടിയുള്ള ഫലപ്രദമായ ഇടപെടലുകള്‍ വേണമെന്നും പ്രതിനിധികള്‍ ചൂണ്ടിക്കാട്ടി.

സൂക്ഷ്മ തലത്തിലാണ് വര്‍ഗീയ ശക്തികള്‍ ഇടപെടുന്നത്. അതിനെതിരെ സാംസ്‌കാരിക പ്രതിരോധം തീര്‍ക്കും. ജനങ്ങളുടെ ജീവീതത്തെയും കാഴ്ചപ്പാടുകളെയും വര്‍ഗീയ വത്കരിക്കുന്നതിനുള്ള ഇടപെടലുകളാണ് നടന്നുവരുന്നത്. വലതുപക്ഷ വത്കരണവും അതിന്റെ ഇടതുവത്കരണവും ഫലപ്രദമായി പ്രതിരോധിക്കേണ്ടതുണ്ട്. അന്ധവിശ്വാസജടിലമായ തെറ്റായ നിലപാടുകളെയും അത് ഭൂരിപക്ഷ വര്‍ഗയീതയായാലും ന്യൂനപക്ഷവര്‍ഗീയതായായാലും സ്ത്രീ വിരുദ്ധ പരാമര്‍ശമായാലും ശരിയായ ദിശാബോധത്തോടെ ഇടപെടാനാകണം.

പാര്‍ട്ടി വിദ്യാഭ്യാസം ആധുനിക സാങ്കേതികവിദ്യകളെ ഉള്‍പ്പെടുത്തി ശക്തിപ്പെടുത്തണം. അതിനുവേണ്ടി പ്രത്യേക ആപ്പുകള്‍ സജ്ജീകരിക്കണം. ഏതെങ്കിലും ഒരുകാര്യത്തില്‍ രാഷ്ട്രീയമായി സംശയം ഉണ്ടെങ്കില്‍ അപ്പോള്‍ തന്നെ സംശയനിവാരണത്തിന് കഴിയുന്നതാവണം ആപ്പ്. കേന്ദ്ര ഏജന്‍സികള്‍ നടത്തിക്കൊണ്ടിരിക്കുന്ന് പ്രവര്‍ത്തങ്ങള്‍ക്കെതിരെ ശക്തമായ പ്രതിരോധം ഉയര്‍ത്തണം. അഖിലേന്ത്യാടിസ്ഥാനത്തില്‍ സമാനചിന്താഗിതിക്കാരുമായി ഉള്‍പ്പെടുവിച്ച് വിപുലമായ പ്രസ്ഥാനം രൂപപ്പെടുത്തണം. നവമാധ്യമരംഗത്ത് സാങ്കേിതക വൈദ്ഗ്ധ്യം ഉള്‍പ്പെടുത്തി താഴെത്തലം വരെ ഇടപെടല്‍ നടത്തണം. റിവ്യുവില്‍ പറഞ്ഞതുപോലെ ജനങ്ങളുമായി കുടുതല്‍ ബന്ധപ്പെടുന്ന രീതി ഉണ്ടാവണമെന്നതുള്‍പ്പടെ ആരോഗ്യകരമായ ചര്‍ച്ചകളാണ് സമ്മേളനത്തില്‍ നടക്കുന്നതെന്ന് ഗോവിന്ദന്‍ പറഞ്ഞു. ഇതിന് ഇന്നുതന്നെ സംസ്ഥാന സെക്രട്ടേറിയറ്റ് മറുപടി തയ്യാറാക്കും. സിപിഎമ്മിനെ കരുത്തുറ്റ പാര്‍ട്ടിയാക്കുകയെന്നതാണ് ലക്ഷ്യം. കേരളത്തിലെ പ്രത്യേക സാഹചര്യം മനസിലാക്കി ഇടപെടുമെന്നും ചില മാധ്യമങ്ങള്‍ വിമര്‍ശനം ഉയര്‍ന്നതിനെ അത്ഭുതമായി അവതരിപ്പിക്കുന്നുവെന്നും എംവി ഗോവിന്ദന്‍ പറഞ്ഞു.

കോഴിക്കോട്.രണ്ട് വ്യത്യസ്ത മാതൃകകൾ മുന്നിൽ വച്ചാണ് സിപിഐഎമ്മിന്റെ വിശാല സംസ്ഥാന സമിതിയിലെ ആദ്യ ദിന ചർച്ചകൾ അവസാനിച്ചത്. നേതൃത്വത്തിനെ മുഖം നോക്കാതെ വിമർശിച്ച കണ്ണൂർ ശൈലി തിരുത്തലിൻ്റേതാണ്. നേതൃത്വത്തിനെ പിണക്കാതെ തന്ത്രപരമായ സമീപനം സ്വീകരിച്ച തിരുവനന്തപുരം ശൈലിയാണ് മറ്റൊന്ന്. ഇന്ന് തുടരുന്ന ചർച്ചയിൽ മറ്റു ജില്ലകൾ ഏത് ശൈലി സ്വീകരിക്കുമെന്നതും ശ്രദ്ദേയം.

വിശാല സംസ്ഥാന സമിതി കൊണ്ട് കേന്ദ്രനേതൃത്വം എന്താഗ്രഹിച്ചോ അതാണ് കണ്ണൂർ മുന്നിൽ വച്ച ശൈലി. നേതൃത്വത്തെ കടന്നാക്രമിക്കുക. ഒരു ആനുകൂല്യങ്ങളും നൽകാതെ തോൽവിയുടെ കാരണം തുറന്നു അവതരിപ്പിക്കുക. രണ്ടാമത്തെ ശൈലിയാണ് തിരുവനന്തപുരത്ത് നിന്നുള്ള പ്രതിനിധികൾ സ്വീകരിച്ചത്. അത് സംസ്ഥാന നേതൃത്വം ആഗ്രഹിച്ചതുമാണ്. മുറിവിൽ ലേപനം പുരട്ടുന്നത് പോലെ ഒന്ന്. സംഭവിച്ചത് വലിയവീഴ്ച അല്ലെന്നും നമുക്കൊന്നിച്ച് തിരുത്താമെന്നുമുള്ള ലൈൻ. ഇനി ചെയ്യേണ്ട കാര്യങ്ങൾ ഒന്നിച്ച് തീരുമാനിക്കാം എന്നതാണ് തിരുവനന്തപുരത്തിൻ്റെ നിലപാട് .

9 ജില്ലാ കമ്മിറ്റികളാണ് ഇന്നത്തെ പൊതു ചർച്ചയിൽ പങ്കെടുക്കുക. കണ്ണൂർ ശൈലി ആരൊക്കെ സ്വീകരിക്കുമെന്നത് ശ്രദ്ധേയമാണ്. ജില്ലാ സെക്രട്ടറിയുടെ നിയന്ത്രണത്തിൽ അല്ല പ്രതിനിധികൾ അഭിപ്രായം പറയുന്നത്. അതിനാൽ വിമർശനം ഏതു വഴിക്ക് വരുമെന്ന് നേതൃത്വത്തിന് ഊഹിക്കാനും കഴിയില്ല. നേതൃത്വം തുടരണമെന്ന് ആഗ്രഹിക്കുന്നവർ തിരുവനന്തപുരത്തിന്റെ വഴി സ്വീകരിക്കും. വീഴ്ച പറ്റിയ ജില്ലാ കമ്മിറ്റികൾ അതു ചർച്ചയവാതിരിക്കാനും തിരുവനന്തപുരത്തിൻ്റെ വഴി സ്വീകരിക്കും. പാർട്ടിയിൽ അടിമുടി പൊളിച്ചുപണി ആഗ്രഹിക്കുന്നവർ കണ്ണൂർ ശൈലി ഉപയോഗിക്കും.