കുന്നത്തൂര്‍ (തുരുത്തിക്കര): മലങ്കര മാർത്തോമ്മാ സിറിയൻ സഭയുടെ ഭാഗമായി ശാസ്താംകോട്ട തുരുത്തിക്കരയിൽ പ്രവർത്തിക്കുന്ന ഇമ്മാനുവൽ മാർത്തോമ്മാ പള്ളിയുടെ ശതാബ്ദി ആഘോഷങ്ങൾക്ക് നാളെ (ജനുവരി 17, ശനിയാഴ്ച) സമാപനമാകും. ശനിയാഴ്ച വൈകിട്ട് 3 മണിക്ക് നടക്കുന്ന സമാപന സമ്മേളനത്തിൽ കേരള ഗവർണർ രാജേന്ദ്ര വിശ്വനാഥ് ആർലേക്കർ വിശിഷ്ടാതിഥിയാകും.
അടൂർ ഭദ്രസനാധിപൻ റൈറ്റ് റവ. മാത്യൂസ് മാർ സെറാഫിം എപ്പിസ്കോപ്പ അദ്ധ്യക്ഷത വഹിക്കുന്ന ചടങ്ങിൽ മാർത്തോമ്മാ സഭയുടെ പരമാധ്യക്ഷൻ മോസ്റ്റ് റൈറ്റ് റവ. ഡോ. തിയഡോഷ്യസ് മാർത്തോമ്മാ മെത്രാപ്പോലീത്ത ഭദ്രദീപം തെളിയിക്കും. സുവനീർ പ്രകാശനവും ചാരിറ്റി ഫണ്ട് സ്വീകരണവും കൊടിക്കുന്നിൽ സുരേഷ് എം.പി. നിർവഹിക്കും. പ്രവാസി കൂട്ടായ്മയുടെ ഉദ്ഘാടനവും ലോഗോ പ്രകാശനവും എൻ.കെ. പ്രേമചന്ദ്രൻ എം.പി. നിർവഹിക്കും. ശതാബ്ദി മെമ്മോറിയൽ പാലിയേറ്റീവ് കെയറിന്റെ ഉദ്ഘാടനം കോവൂർ കുഞ്ഞുമോൻ എം.എൽ.എ. നിർവഹിക്കും. പരിപാടിയുടെ ജനറൽ കൺവീനർ ജോയി ജോൺ ശതാബ്ദി റിപ്പോർട്ട് അവതരിപ്പിക്കും.

കുന്നത്തൂർ ഗ്രാമപഞ്ചായത്ത് പ്രസിഡന്റ് അനുപമ പി.ടി., ശാസ്താംകോട്ട ബ്ലോക്ക് പഞ്ചായത്ത് വൈസ് പ്രസിഡന്റ് ബി. ശിവശങ്കരപ്പിള്ള, സെന്റ് തോമസ് ഇവാഞ്ചലിക്കൽ ചർച്ച് വികാരി റവ. ജോൺ മാത്യു, കരിന്തോട്ടുവ സെന്റ് മേരീസ് മലങ്കര കത്തോലിക്കാ ചർച്ച് വികാരി ഫാ. കാലേബ്, വിജയറാണി കത്തോലിക്കാ ചർച്ച് വികാരി ഫാ. ജസ്റ്റിൻ ജോസഫ്, കരിന്തോട്ടുവ സെന്റ് മേരീസ് ഓർത്തഡോക്സ് ചർച്ച് വികാരി ഫാ. പ്രവീൺ സാം പണിക്കർ, കുന്നത്തൂർ ശാലോം മാർത്തോമ്മാ ചർച്ച് വികാരി റവ. സുബിൻ എം. മാത്യൂ, ബോംബെ ഐ.പി.സി. സീനിയർ പാസ്റ്റർ ജോൺസൺ ചാക്കോ, കരിന്തോട്ടുവ സാൽവേഷൻ ആർമി ചർച്ച് മേജർ ജോൺ, വൈ.എം.സി.എ. പ്രതിനിധി ഫാ. സോളു കോശി രാജു, റവ. എ. ധര്‍മ്മിഷ്ഠ പണിക്കര്‍, റവ. കിരണ്‍ ശാമുവേല്‍, റവ. വി. കുഞ്ഞുകോശി, റവ. വൈ. ജോർജ്, വാർഡ് മെംബർ എൻ. രാജി, പ്രോഗ്രാം കൺവീനർ വൈ. തോമസ്, റവ. എബി ഉമ്മൻ എന്നിവർ ചടങ്ങിൽ സംബന്ധിക്കും.
സമാപന സമ്മേളനത്തിൽ മുൻ ഭാരവാഹികളെയും 80 വയസ്സിന് മുകളിലുള്ള ഇടവക അംഗങ്ങളെയും വിവിധ മേഖലകളിൽ കഴിവ് തെളിയിച്ചവരെയും ഉന്നത വിജയം നേടിയവരെയും ആദരിക്കും. തുടർന്ന് ഇടവക ജനങ്ങളുടെ നേതൃത്വത്തിൽ മാർഗംകളി, കോൽകളി, നൃത്തപരിപാടികൾ എന്നിവ അരങ്ങേറും. വൈകിട്ട് 6 മണിക്ക് അമൃത ടിവി സൂപ്പർ ഫാമിലി റിയാലിറ്റി ഷോ ടൈറ്റിൽ വിന്നർ രാജേഷ് അടിമാലി അവതരിപ്പിക്കുന്ന സംഗീതസന്ധ്യയും നടക്കും.
കൊല്ലവർഷം 1101-ൽ രൂപം കൊണ്ട തുരുത്തിക്കര ഇമ്മാനുവൽ മാർത്തോമ്മാ ഇടവകയുടെ ശതാബ്ദി ആഘോഷങ്ങൾക്ക് 2025 മാർച്ച് 2-നാണ് തുടക്കമായത്. ഒരു വർഷം നീണ്ടുനിന്ന ആഘോഷങ്ങളുടെ ഭാഗമായി ജില്ലയുടെ വിവിധ ഭാഗങ്ങളിൽ ലഹരി വിരുദ്ധ ബോധവത്കരണ പരിപാടികൾ, തെരുവ് നാടകങ്ങൾ, പൊതു സമ്മേളനങ്ങൾ എന്നിവ സംഘടിപ്പിച്ചു. കാൻസർ രോഗികളായ 100 പേർക്ക് മെഡിക്കൽ സഹായം ഉൾപ്പെടെ നിരവധി ജീവകാരുണ്യ പദ്ധതികൾക്കും ഇതിനകം തുടക്കമിട്ടിട്ടുണ്ട്. സഭകൾ തമ്മിലുള്ള ഐക്യം ശക്തിപ്പെടുത്തുന്നതിനായി എക്യൂമെനിക്കൽ സംഗമങ്ങളും യുവതലമുറയിൽ വിശ്വാസവും വ്യക്തിത്വവും വളർത്തുന്നതിനായുള്ള വിവിധ പരിപാടികളും സംഘടിപ്പിച്ചു.
ശതാബ്ദി ആഘോഷങ്ങളുടെ സമാപന പരിപാടികൾക്ക് 2026 ജനുവരി 11-നാണ് തുടക്കമായത്. ജനുവരി 18 ഞായറാഴ്ച ഇടവക ദിനത്തോടനുബന്ധിച്ച് വൈകിട്ട് 4 മണിക്ക് നടക്കുന്ന വിശുദ്ധ കുർബാനയ്ക്കും ആദ്യ കുർബാന ശുശ്രൂഷയ്ക്കും അഭിവന്ദ്യ യുയാക്കിം മാർ കുറിലോസ് സഫ്രഗൻ മെത്രാപ്പോലീത്ത നേതൃത്വം നൽകും. തുടർന്ന് സ്നേഹവിരുന്നോടെ ശതാബ്ദി ആഘോഷങ്ങൾക്ക് ഔദ്യോഗിക സമാപനമാകും.