ശാസ്താംകോട്ട: ഉറൂസ് നടക്കുന്ന മയ്യത്തുംകര പള്ളിക്ക് സമീപം പാതയോരത്തേക്ക് പിക്കപ്പ് വാൻ ഇടിച്ചു കയറി 5 പേർക്ക് പരിക്കേറ്റു.തമിഴ്നാട് സ്വദേശിനി രാജകുമാരി (45),ചക്കുവള്ളി
പോരുവഴി സ്വദേശികളായ അൽത്താഫ് (16),നഹീം(17),സിദ്ധിഖ് (52),ഇദ്ദേഹത്തിൻ്റെ ഭാര്യ സീനത്ത് (49) എന്നിവർക്കാണ് പരിക്കേറ്റത്.ഇതിൽ രാജകുമാരിയുടെ നില അതീവ ഗുരുതരമാണ്.ഇവരടക്കം 3 പേർ ഭരണിക്കാവിലെ സ്വകാര്യ ആശുപത്രിയിൽ ചികിത്സയിലാണ്.

നിസാര പരിക്കേറ്റ അൽത്താഫ്,നഹീം എന്നിവർ ആശുപത്രി വിട്ടു. വൈകിട്ട് 4.30 ഓടെയാണ് അപകടം നടന്നത്.ഭരണിക്കാവ് ഭാഗത്തു നിന്നും ചക്കുവള്ളിയിലേക്ക് പോവുകയായിരുന്ന പിക്കപ്പ് വാൻ ദിശതെറ്റി കിഴക്ക് ഭാഗത്തെ താത്ക്കാലിക കടകളിലേക്ക് പാഞ്ഞ് കയറുകയായിരുന്നു.ഇവിടെ കച്ചവടം നടത്തിയിരുന്ന തമിഴ്നാട് സ്വദേശികളായ സ്ത്രീകൾക്കും പ്രദേശവാസികൾക്കുമാണ് പരിക്കേറ്റത്.താത്ക്കാലിക സ്റ്റാളുകളിൽ വിൽപ്പനയ്ക്ക് വച്ചിരുന്ന സാധനങ്ങളും റോഡരികിൽ ഇരുന്ന സ്കൂട്ടറുകളും തകർന്നു.ഡ്രൈവർ ഉറങ്ങിപ്പോയതാകാം അപകട കാരണമെന്നാണ് കരുതുന്നത്.ശൂരനാട് പോലീസ് സ്ഥലത്ത് എത്തി വാഹനവും ഡ്രൈവറേയും സ്റ്റേഷനിലേക്ക് മാറ്റി.

കുന്നത്തൂർ:കുന്നത്തൂർ പഞ്ചായത്തിലെ ഐവർകാല പുത്തനമ്പലം പ്രദേശത്ത് നിരവധി വീടുകളിൽ മോഷണശ്രമം നടന്നതായി പരാതി.കഴിഞ്ഞ ദിവസം രാത്രിയിലാണ് സംഭവം.പുത്തനമ്പലം കിണറുവിള വീട്ടിൽ തങ്കച്ചൻ,മുണ്ടയ്ക്കൽ പടിഞ്ഞാറ്റതിൽ ജമില എന്നിവരുടെ വീടുകളിൽ മോഷ്ടാവ് എത്തിയെങ്കിലും വീട്ടുകാർ ഉച്ചത്തിൽ നിലവിളിച്ചതിനെ തുടർന്ന് ഓടിരക്ഷപ്പെടുകയായിരുന്നു. മോഷണശ്രമം പതിവായതോടെ പ്രദേശത്ത് ജനങ്ങൾ ഭയത്തോടെയാണ് കഴിയുന്നത്.നിരീക്ഷണ ക്യാമറ ദൃശ്യങ്ങൾ സഹിതം ശാസ്താംകോട്ട പൊലീസിൽ പരാതി നൽകിയിട്ടുണ്ട്.അടിയന്തിരമായി മോഷ്ടാക്കളെ കണ്ടെത്താൻ പൊലീസ് നടപടി സ്വീകരിക്കണമെന്നും മേഖലയിൽ രാത്രികാലങ്ങളിൽ പട്രോളിങ് നടത്തണമെന്നും പഞ്ചായത്ത് പ്രതിപക്ഷ നേതാവ് റ്റി.എ സുരേഷ്കുമാർ ആവശ്യപ്പെട്ടു.

ശാസ്താംകോട്ട: അംഗൻവാടിക്ക് പുതിയ കെട്ടിടം നൽകാമെന്ന രാഷ്ട്രീയനേതാക്കളുടെ വാഗ്ദാനം പാഴായി.ശാസ്താംകോട്ട ഗ്രാമ പഞ്ചായത്ത് മൂന്നാം വാർഡിലെ പതിനാലാം നമ്പർ അംഗൻവാടിയിലെ കുട്ടികളാണ് വാഗ്ദാനത്തിൽ വഞ്ചിതരായത്.40 വർഷമായി പ്രവർത്തിച്ച് കൊണ്ടിരുന്ന അംഗൻവാടി കെട്ടിടം അൺഫിറ്റ് ‘ ആയതിനാലാണ് പുതിയ ഹെടെക്ക് അംഗനവാടി കെട്ടിടം പണിയുവാൻ ഫണ്ടിനായി നാട്ടുകാരും പഞ്ചായത്ത് അധികൃതരും ജനപ്രതിനിധികളെ സമീപിച്ചത്.ഉടനടി ഫണ്ട് ലഭ്യമാക്കാമെന്ന ഉറപ്പിൽ പഴയ അംഗൻവാടി കെട്ടിടം ഗ്രാമ പഞ്ചായത്ത് അധികൃതർ പൊളിച്ച് കളയുകയും ചെയ്തു.എന്നാൽ കെട്ടിടം പൊളിച്ച് മാറ്റിയിട്ട് നാല് വർഷം പിന്നിട്ടിട്ടും വാഗ്ദാനം പാലിച്ചിട്ടില്ല.ഇതോടെ മൂന്നാം വാർഡിലെ അംഗൻവാടിയുടെ പ്രവർത്തനം അരക്കിലോ മീറ്റർ ദൂരെയുള്ള ഒമ്പതാം വാർഡിലെ വാടക കെട്ടിടത്തിലേക്ക് മാറ്റിയിരിക്കുകയാണ്.

നിലവിൽ അംഗൻവാടി നിന്ന സ്ഥലം കാട് മൂടി ഇഴജന്തുക്കളുടെ താവളമായി മാറിയിരിക്കയാണ്.വേനൽക്കാലത്തും സുലഭമായി ശുദ്ധജലം ലഭിച്ചു കൊണ്ടിരുന്ന കിണർ സംരക്ഷണമില്ലാതെ കാട് മൂടി നശിച്ച് കൊണ്ടിരിക്കുന്നു.ബാലവാടിയായി തുടങ്ങിയ അംഗൻവാടി വർഷങ്ങളായി നല്ല നിലയിൽ പ്രവർത്തിച്ച് വന്നിരുന്നു.എന്നാൽ കെട്ടിടം പൊളിച്ച് മാറ്റിയതോടെ കുട്ടികളുടെ വരവും കുറഞ്ഞു.ഇപ്പോൾ പ്രവർത്തിക്കുന്ന വാടക കെട്ടിടത്തിന് 4000 രൂപയാണ് പ്രതിമാസ വാടക.ഇതിൽ ഡിപ്പാർട്ട്മെന്റിൽ നിന്നും ഗ്രാമ പഞ്ചായത്തിന്റെ വകയും ചേർത്ത് ആകെ 2980 രൂപ ലഭിക്കും.ബാക്കി 1020 രൂപ ജീവിക്കാർ,തങ്ങൾക്ക് ലഭിക്കുന്ന തുഛമായ ശമ്പളത്തിൽ നിന്നുമാണ് നൽകുന്നത്.

ചെന്നൈ എസ്.ആർ.എം യൂണിവേഴ്സിറ്റിയിൽ നിന്നും ഫിസിക്സിൽ പി.എച്ച്.ഡി നേടിയ ശ്രീരാംജയൻ.കുന്നത്തൂർ ഐവർകാല നടുവിൽ ജയമന്ദിരത്തിൽ (വട്ടവിള) ജയൻ്റെയും സിന്ധു ജയൻ്റെയും മകനാണ്