Home Blog Page 392

കാപ്പാ പ്രതി ‘സുന്ദരി ബാർ’ ഉടമ ശാസ്താംകോട്ട എക്സൈസിന്റെ പിടിയിൽ

ശാസ്താംകോട്ട. ഓപ്പറേഷന്‍ തണ്ടറിന്‍റെ ഭാഗമായി വീട്ടില്‍ ചാരായം വില്‍പന നടത്തിയ കേസില്‍ യുവതി അറസ്റ്റിലായി ശാസ്താംകോട്ട എക്സൈസ് റേഞ്ച് ഇൻസ്‌പെക്ടർ ഷഫീക്ക്‌. S ഉം പാർട്ടിയും നടത്തിയ പരിശോധനയിൽ ശൂരനാട് വടക്ക് ഇടപ്പനയം അമ്മു നിവാസിൽ ജനാർദ്ദനന്റെ ഭാര്യ ബിന്ദു ജനാർദ്ദനൻ(48)ആണ് പിടിയിലായത്. സുന്ദരി ബാര്‍ എന്ന് പ്രാദേശികമായി അറിയപ്പെടുന്ന താമസ സ്ഥലത്ത് മദ്യവില്‍പ്പന നടത്തിയതും അക്രമം നടത്തിയതുമായി നിരവധി കേസുകളുണ്ട്. നിലവിലെ അബ്കാരി നിയമത്തിനു വിരുദ്ധമായി വീട്ടിൽ ചാരായം വില്പനയ്ക്കായി സൂക്ഷിച്ച കുറ്റത്തിന് ആണ് അറസ്റ്റ് ., തൊണ്ടിയായി 800 ML ചാരായം ബന്തവസിലെടുത്ത്, നിയമാനുസരണം രേഖകൾ തയ്യാറാക്കി അബ്കാരി നിയമപ്രകാരം 8(1), 8(2) എന്നീ സെക്ഷൻസ് ചുമത്തി CR. NO. 134/2026 ആയി കേസ്എടുത്തു

പാർട്ടിയിൽ, പ്രിവന്റ്റീവ് ഓഫീസർ ഹരികൃഷ്ണൻ, പ്രിവന്റ്റീവ് ഓഫീസർ(gr) വിജു. C. A, വനിതാ പ്രിവന്റ്റീവ് ഓഫീസർ(gr) റസ്മിയ. Z, CEO മാരായ പ്രേംരാജ്. R, സുജിത് കുമാർ. M. S, അതുൽ കൃഷ്ണൻ, വനിത സിവിൽ എക്സൈസ് ഓഫീസർ ലക്ഷ്മി ചന്ദ്രൻ, CEO Driver വിനീഷ്. V. G എന്നിവർ ഉണ്ടായിരുന്നു.

മകളെ വിവാഹം കഴിച്ചു കൊടുക്കാത്തത്തിലെ വിരോധം,സിനിമ സ്റ്റെല്‍ തട്ടിക്കൊണ്ടുപോകല്‍

തിരുവനന്തപുരം: കിളിമാനൂരിലെ സിനിമ സ്റ്റെല്‍ തട്ടിക്കൊണ്ടുപോകലില്‍ പ്രതികള്‍ക്കായി തിരച്ചില്‍. സംഭവത്തില്‍ തിരുവനന്തപുരം സ്വദേശികളായ സുധീഷ്, ഷംനാദ് ഉള്‍പ്പെടെയുള്ള അഞ്ച് പ്രതികളെയാണ് പൊലീസ് തിരയുന്നത്. അനില്‍ കുമാറിന്റെ മകളെ വിവാഹം കഴിച്ചു കൊടുക്കാത്തത്തിലെ വിരോധമാണ് ആക്രമണത്തിന് കാരണമെന്ന് പൊലീസ് പറയുന്നു.

പ്രതികള്‍ അനില്‍കുമാര്‍ എന്നയാളെ തട്ടിക്കൊണ്ടുപോയി നിര്‍മ്മാണം നടക്കുന്ന വീട്ടില്‍ സൗണ്ട് പ്രൂഫ് മുറി ഉണ്ടാക്കിയാണ് മര്‍ദ്ദിക്കുകയായിരുന്നു. ചങ്ങല കൊണ്ട് ബന്ധിച്ചായിരുന്നു ക്രൂരമായ ആക്രമണം.അനില്‍ കുമാറിന്റെ മകനെയും അക്രമികള്‍ വിളിച്ചുവരുത്തി ആക്രമിച്ചു. അനില്‍ കുമാറിന്റെ കൈ അക്രമികള്‍ തല്ലിയൊടിച്ചു. പ്ലെയര്‍ ഉപയോഗിച്ച് മകന്‍ അച്ചുവിന്റെ വിരലുകള്‍ക്കും പരിക്കേല്‍പ്പിച്ചു.

അമ്മയെ കൂടി എത്തിച്ചില്ലെങ്കില്‍ അനില്‍കുമാറിനെ അപായപ്പെടുത്തുമെന്നും പ്രതികള്‍ ഭീഷണിപ്പെടുത്തി. ഇതോടെ മകന്‍ അവിടെനിന്ന് ഇറങ്ങിയോടി പൊലീസില്‍ വിവരം അറിയിക്കുകയായിരുന്നു. പൊലീസ് എത്തിയപ്പോഴേക്കും അക്രമികള്‍ രക്ഷപ്പെട്ടിരുന്നു.

കത്തി കാണിച്ച് ഭീഷണിപ്പെടുത്തിയാണ് മകനെ വിളിപ്പിച്ചതെന്നും ഹെല്‍മറ്റ് കൊണ്ട് അടിച്ചു വീഴ്ത്തി ക്രൂരമായി മര്‍ദ്ദിച്ചെന്നും അനില്‍കുമാര്‍ പൊലീസിനോട് പറഞ്ഞു. സഹോദരിയെ കൊലപ്പെടുത്തുമെന്ന് തട്ടിക്കൊണ്ടുപോയവര്‍ ഭീഷണിപ്പെടുത്തിയെന്നും ബോംബ് ഉണ്ടെന്നും ദേഹത്ത് വച്ചുകെട്ടി കൊല്ലുമെന്നും പറഞ്ഞുവെന്നും മകന്‍ അച്ചു പറഞ്ഞു. സാരമായി പരിക്കേറ്റ അനില്‍കുമാറും മകനും വര്‍ക്കലയിലെ ആശുപത്രിയില്‍ ചികിത്സയിലാണ്.

സംസ്ഥാനത്തെ ഐഎഎസ് തലപ്പത്ത് വൻ അഴിച്ചുപണി

തിരുവനന്തപുരം: സംസ്ഥാനത്തെ ഐഎഎസ് തലപ്പത്ത് വൻ അഴിച്ചുപണി. എൻ പ്രശാന്ത് ഐഎഎസിനെ യുവജന-കായിക വകുപ്പുകളുടെ സ്‌പെഷ്യൽ സെക്രട്ടറിയായി നിയമിച്ചു. ഇതിനു പുറമെ ഇൻഡസ്ട്രിയൽ ഇൻഫ്രാസ്ട്രക്ചർ ഡെവലപ്മെന്റ് കോർപ്പറേഷൻ, ജലവിഭവ വകുപ്പ് സ്‌പെഷ്യൽ സെക്രട്ടറി എന്നീ അധിക ചുമതലകളും എൻ. പ്രശാന്തിന് നൽകിയിട്ടുണ്ട്.

വിവിധ അതോറിറ്റികളുടെ എംഡി, സ്‌പെഷ്യൽ അക്കാദമി തുടങ്ങിയ വിഭാഗങ്ങളിലും പുതിയ നിയമനങ്ങളും മാറ്റങ്ങളും സർക്കാർ പ്രഖ്യാപിച്ചിട്ടുണ്ട്. ശ്രീറാം വെങ്കിട്ടരാമൻ സ്‌കിൽസ് എക്‌സലൻസ് അക്കാഡമി എംഡിയാകും. നിലവിൽ അദ്ദേഹം കൃഷിവകുപ്പ് ഡയറക്ടറായിരുന്നു.

എസ്. സുഹാസ് കേരള ഇൻഡസ്ട്രിയൽ ഇൻഫ്രാസ്ട്രക്ചർ ഡെവലപ്‌മെന്റ് കോർപറേഷന്റെ സ്‌പെഷ്യൽ സെക്രട്ടറിയാകും. നിലവിൽ അദ്ദേഹം വാട്ടർ റിസോഴ്‌സ് ഡിപ്പാർട്ടുമെന്റ് സെക്രട്ടറിയായിരുന്നു. സഹകരണ സൊസൈറ്റി രജിസ്ട്രാറായിരുന്ന പ്രേംകൃഷ്ണൻ ഐഎഎസ് ആയിരിക്കും പുതിയ വാട്ടർ അതോറിറ്റി എംഡി.

സതീശന്‍ പിണറായിക്കുപഠിക്കുന്നോ,കെഎസ്‌യു സംസ്ഥാന പ്രസിഡന്റ് അലോഷ്യസ് സേവ്യറിന് മുഖ്യമന്ത്രിയുമായി കൂടിക്കാഴ്ചയ്ക്ക് അനുമതി നല്‍കിയില്ല

തിരുവനന്തപുരം: കാത്തിരുന്നു കിട്ടിയ മുഖ്യമന്ത്രിക്ക് പഴയമുഖ്യമന്ത്രിയുടെ ബാധകൂടിയെന്ന് കോണ്‍ഗ്രസില്‍ അടക്കം പറച്ചില്‍, ഗവണ്‍മെന്റ് പ്ലീഡര്‍ നിയമനങ്ങളുമായി ബന്ധപ്പെട്ട് കോണ്‍ഗ്രസിനുള്ളില്‍ ഉയര്‍ന്ന ഭിന്നതകള്‍ കൂടുതല്‍ രൂക്ഷമാകുന്നു. പ്ലീഡര്‍ നിയമനത്തില്‍ പ്രതിഷേധിച്ച് മുഖ്യമന്ത്രി വിഡി സതീശനെ നേരില്‍ കാണാന്‍ അനുമതി തേടിയ കെഎസ്‌യു സംസ്ഥാന പ്രസിഡന്റ് അലോഷ്യസ് സേവ്യറിന് മുഖ്യമന്ത്രിയുടെ ഓഫീസ് കൂടിക്കാഴ്ചയ്ക്ക് അനുമതി നല്‍കിയില്ല. തിരക്കേറിയ ഷെഡ്യൂള്‍ കാരണമാണ് അനുമതി ലഭിക്കാതിരുന്നതെന്ന് ഔദ്യോഗിക വിശദീകരണമുണ്ടെങ്കിലും, വിഷയം പാര്‍ട്ടിക്കുള്ളില്‍ ഗ്രൂപ്പ് തര്‍ക്കങ്ങള്‍ക്ക് വഴിതുറന്നിരിക്കുകയാണ്.

എസ്എഫ്‌ഐ മുന്‍ പ്രവര്‍ത്തകയായ ജിയോണ ജെയിംസ്, ആര്‍എസ്എസ് ബന്ധം ആരോപിക്കപ്പെടുന്ന ഡിഎസ് ശരത് എന്നിവരെ സീനിയര്‍ ഗവണ്‍മെന്റ് പ്ലീഡര്‍മാരായി നിയമിച്ചതിനെതിരെയാണ് കെഎസ്‌യു പ്രതിഷേധം ഉയര്‍ത്തിയത്. എന്നാല്‍, ‘ഗവണ്‍മെന്റ് പ്ലീഡര്‍മാരെ നിശ്ചയിക്കുന്നതില്‍ കെഎസ്‌യുവിന് എന്താണ് കാര്യം?’ എന്ന മുഖ്യമന്ത്രി വിഡി സതീശന്റെ പരാമര്‍ശം കെഎസ്‌യു പ്രവര്‍ത്തകര്‍ക്കിടയില്‍ കടുത്ത അതൃപ്തിക്ക് കാരണമായിരുന്നു. പിണറായി വിജയനെപ്പോലെ പാർട്ടിക്കും മീതേയാണ് താനെന്ന മട്ടില്‍ മുഖ്യമന്ത്രി സതീശന്‍ മാറുന്നുവെന്ന ആക്ഷേപം ശക്തമാവുകയാണ്. എതിര്‍ശബ്ദം പുറപ്പെടുവിച്ചവര്‍ക്കെതിരെ നടപടി ആവശ്യപ്പെടുന്ന തരത്തില്‍ മുഖ്യമന്ത്രി മാറുന്നത് വലിയ ആശങ്കയായിട്ടുണ്ട്.

കൂടൽ സ്റ്റേഷനിലെ മൂന്നാംമുറ; ചെന്നിത്തലയെ തള്ളി ഡി സി സി പ്രസിഡൻ്റ്

പത്തനംതിട്ട: ഹൃദ്‌രോഗിയായ ഇരുപതുകാരൻ മൂന്നാംമുറയ്‌ക്കിരയായ കൂടൽ സ്‌റ്റേഷനിലെ പൊലീസുകാർക്കെതിരെ തനിക്കും പരാതിയുണ്ടെന്നും ജില്ലാ കോൺഗ്രസ്‌ കമ്മിറ്റി പ്രസിഡന്റ്‌ സതീഷ്‌ കൊച്ചുപറമ്പിൽ. കൂടൽ സ്‌റ്റേഷനെതിരെ നിരവധി പരാതി തന്റെ പക്കലുണ്ട്‌. ഇക്കാര്യം പരാതിയായി തന്നെ ഉന്നതതലത്തിലുള്ളവരുടെയടക്കം ശ്രദ്ധയിൽപ്പെടുത്തിയിട്ടുണ്ടെന്നും അദ്ദേഹം പറഞ്ഞു.

കഴിഞ്ഞദിവസം ജില്ലയിലെത്തിയ ആഭ്യന്തരമന്ത്രി രമേശ്‌ ചെന്നിത്തല കൂടൽ സ്‌റ്റേഷനിലെ കസ്‌റ്റഡി മർദനത്തെ ന്യായീകരിച്ചിരുന്നു. മാധ്യമ റിപ്പോർട്ടിന്റെ അടിസ്ഥാനത്തിലാകും പൊലീസ് പെരുമാറിയിട്ടുണ്ടാകുകയെന്നായിരുന്നു ചെന്നിത്തലയുടെ വിവാദ പരാമർശം.

അതേസമയം രാഹുൽ മാങ്കൂട്ടത്തിലിന്റെ സാന്നിധ്യത്തിൽ അടൂർ സ്‌റ്റേഷൻ വളപ്പിൽ പൊലീസ്‌ ജീപ്പ്‌ തടഞ്ഞ്‌ അക്രമം കാട്ടിയ സംഭവത്തിൽ അഭിപ്രായം പറയാതെ ഡിസിസി പ്രസിഡന്റ്‌ ഒഴിഞ്ഞുമാറി.

ആർട്ടിസ്റ്റ് ഗോപാലന് ആദരവും പുസ്തക ചർച്ചയും വികാസിൽ

ചവറ.
ചവറയിൽ ജനിച്ച ആർട്ടിസ്റ്റ് ഗോപാലന് ചവറ വികാസ് കലാ സാംസ്കാരിക സമിതി ആദരവും അദ്ദേഹത്തിന്റെ ആത്മകഥ “ഓർമ്മകൾ കൊണ്ട് വരഞ്ഞ വരകൾ ” ചർച്ചയും ചെയ്യുന്നു. മലയാള രേഖാചിത്ര കലാരംഗത്തെ ആദ്യ പഥികരിൽപെട്ടയാളാണ് ആർട്ടിസ്റ്റ് ഗോപാലൻ. പ്രമുഖ വാരികകളിൽ പ്രത്യേകിച്ച് കൊല്ലത്തു നിന്നുള്ള പ്രസിദ്ധീകരണങ്ങളിൽ ഇലസ്ട്രേഷൻ കൊണ്ടും കാലിഗ്രാഫി കൊണ്ടും ദൃശ്യ ചാരുത തീർത്ത പ്രതിഭ.
ആർട്ടിസ്റ്റ്ഗോപാലന്റെ ജീവിതവും കലയും അടയാളപ്പെടുത്തിയ ബൈജു ചന്ദ്രന്റെ രചനയാണ് ചർച്ച ചെയ്യുന്നത്.  ജൂലൈ 18 ശനിയാഴ്ച വൈകിട്ട് 4. 30ന് ചവറ വികാസ് ഓഡിറ്റോറിയത്തിലാണ് പരിപാടി.  തിരുവിതാംകൂർ ദേവസ്വം ബോർഡ് പ്രസിഡന്റ് കെ ജയകുമാർ ഐ.എ.എസ് സമ്മേളനം ഉദ്ഘാടനം ചെയ്യും. ദൂരദർശൻ മുൻ ഡയറക്ടർ ബൈജു ചന്ദ്രൻ, പി.എസ്. സുരേഷ്, ചവറ കെ.എസ്.പിള്ള എന്നിവർ ചടങ്ങിൽ പങ്കെടുക്കുമെന്ന് വികാസ് ഭാരവാഹികൾ അറിയിച്ചു.

ദിവസവും 16 മുതൽ 17 മണിക്കൂർ വരെ പഠനസമയം, ആര്യൻ്റെ വിജയ രഹസ്യം ,നീറ്റ് യു.ജി ഫലം പ്രസിദ്ധീകരിച്ചു

ന്യൂഡൽഹി:ദിവസവും 16 മുതൽ 17 മണിക്കൂർ വരെയായിരുന്നു  പഠനസമയം. കഠിനമായി പരിശ്രമിച്ച നാളുകളിൽ ഉറക്കം പോലും പലപ്പോഴും വേണ്ടെന്ന് വെക്കേണ്ടി വന്നിട്ടുണ്ടെന്ന് നീറ്റ് ഒന്നാം സ്ഥാന ക്കാരൻ ആര്യൻ ഗുപ്ത.

  ചോദ്യപേപ്പർ ചോർച്ചയെ തുടർന്ന് മാറ്റി നടത്തിയ മെഡിക്കൽ എൻട്രൻസ് യോഗ്യത പരീക്ഷ നീറ്റ് യു.ജിയുടെ ഫലം പ്രസിദ്ധീകരിച്ചു. 11.21 ലക്ഷം വിദ്യാർഥികൾ യോഗ്യത നേടിയതായി പരീക്ഷ നടത്തിയ നാഷനൽ ടെസ്റ്റിങ് ഏജൻസി (എൻ.ടി.എ) അറിയിച്ചു.

ഇതിൽ 58 ശതമാനം പെൺകുട്ടികളാണ്. 720ൽ 715 മാർക്കുമായി പഞ്ചാബിൽനിന്നുള്ള ആര്യൻ ഗുപ്തയും ഹരിയാനയിൽനിന്നുള്ള പൻഷുൽ ബൻസാളുമാണ് ടോപ്പർമാർ. 19 പേർ 700ലധികം മാർക്ക് സ്കോർ ചെയ്തപ്പോൾ 138 പേർ 690ലധികം മാർക്ക് നേടി. 1,492 പേർ 650ലധികവും 10,160 പേർ 600ൽ കൂടുതലും സ്കോർ ചെയ്തു.

മേയ് ഒമ്പതിന് നടന്ന നീറ്റ് യു.ജി പരീക്ഷ ചോദ്യപേപ്പർ ചോർച്ച ആരോപണത്തെ തുടർന്ന് മേയ് 12ന് റദ്ദാക്കുകയായിരുന്നു. കേസ് സി.ബി.ഐ അന്വേഷണത്തിലാണ്. തുടർന്ന് ജൂൺ 21നാണ് വീണ്ടും പരീക്ഷ നടത്തിയത്. വിദ്യാർഥികൾക്ക് ഔദ്യോഗിക വെബ്സൈറ്റ് (https://neet.nta.nic.in/)സന്ദർശിച്ച് ഫലമറിയാം.

റെയിൽവേ ക്രോസിന്റെ ​ഗേറ്റ് അടച്ചില്ല; സ്കൂള്‍ വാനില്‍ ട്രെയിന്‍ ഇടിച്ചു, 2 കുട്ടികൾ ഉൾപ്പടെ 3 മരണം

കൊൽക്കത്ത: ട്രെയിൻ സ്കൂൾ വാനിലിടിച്ചുണ്ടായ അപകടത്തിൽ രണ്ട് കുട്ടികൾ ഉൾപ്പടെ 3 പേർക്ക് ദാരുണാന്ത്യം. നിരവധി വിദ്യാർഥികൾക്ക് പരിക്കേറ്റു. രാവിലെ ഏഴ് മണിയോടെ ബം​ഗാളിലെ മുർഷിദാബാദിലെ ബഹരംപുർ മേഖലയിലുള്ള കർണസുബർണ റെയിൽവേ ക്രോസിങ്ങിലാണ് നാടിനെ നടുക്കിയ അപകടമുണ്ടായത്.

കുട്ടികളുമായി പോവുകയായിരുന്ന സ്‌കൂൾ വാനിലേക്ക് നിംതിത-കത്വ പാസഞ്ചർ ട്രെയിൻ ഇടിക്കുകയായിരുന്നു. അപകടസമയത്ത് റെയിൽവേ ക്രോസിന്റെ ഗേറ്റ് തുറന്നു കിടക്കുകയായിരുന്നു എന്ന് നാട്ടുകാർ പറഞ്ഞു. ഒരു വശത്തുനിന്നുള്ള ട്രെയിൻ കടന്നുപോകുന്നതുവരെ ഗേറ്റ് അടച്ചിട്ടിരുന്നതായും, എന്നാൽ തൊട്ടടുത്ത ട്രാക്കിലൂടെ മറ്റൊരു ട്രെയിൻ വരുന്നത് ശ്രദ്ധിക്കാതെ ഗേറ്റ് തുറന്നുകൊടുത്തതാണ് വലിയ ദുരന്തത്തിന് കാരണമായത്.

കത്വയിൽ നിന്ന് 48 കിലോമീറ്റർ അകലെയുള്ള കർണ സുബർണ സ്റ്റേഷനു സമീപമുള്ള ലെവൽ ക്രോസിങ് മുറിച്ചുകടക്കുകയായിരുന്നു സ്‌കൂൾ വാനെന്ന് റെയിൽവേ ഉദ്യോഗസ്ഥർ സ്ഥിരീകരിച്ചു.

അപകടത്തിൽ സ്കൂൾ വാൻ പൂർണമായും തകർന്നു. പരിക്കേറ്റ വിദ്യാർഥികളെ ഉടൻ മുർഷിദാബാദ് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. മുതിർന്ന പൊലീസ് ഉദ്യോഗസ്ഥരും റെയിൽവേ അധികൃതരും അപകട സ്ഥലം സന്ദർശിച്ചു. ഗേറ്റ്‌മാന്റെ ഭാഗത്തുനിന്നുണ്ടായ ​​ഗുരുതര വീഴ്ച ഉൾപ്പെടെയുള്ള കാര്യങ്ങളിൽ വിശദമായ അന്വേഷണം പ്രഖ്യാപിച്ചതായി അധികൃതർ അറിയിച്ചു.

രാത്രി വൈകി ഉറങ്ങുന്നവരാണോ നിങ്ങൾ? ഈ ദൈനംദിന ശീലങ്ങൾ ശരീരത്തിന്റെ ജൈവഘടികാരത്തെ താളംതെറ്റിക്കും

ജോലി തീർക്കാൻ വേണ്ടി രാത്രി വൈകിയിരുന്ന് ഉണർന്നിരിക്കുക, ഉറക്കമില്ലാത്ത രാത്രിക്ക് ശേഷം പിറ്റേന്ന് നേരം വൈകി ഉണരുക, അല്ലെങ്കിൽ തിരക്കുകൾ കാരണം അർദ്ധരാത്രിയിൽ അത്താഴം കഴിക്കുക എന്നിവയൊക്കെ ഇന്നത്തെ തിരക്കുപിടിച്ച ജീവിതത്തിൽ പലർക്കും ഒരു സാധാരണ ശീലമായി മാറിയിട്ടുണ്ട്. എന്നാൽ ഇത്തരം നിസ്സാരമായ ശീലങ്ങൾ നിങ്ങളുടെ ശരീരത്തിന്റെ സ്വാഭാവിക താളത്തെ അഥവാ ജൈവഘടികാരത്തെ ഇല്ലാതാക്കുമെന്ന് ആരോഗ്യവിദഗ്ദ്ധർ പറയുന്നു.

എന്താണ് സർക്കാഡിയൻ റിഥം?

നമ്മുടെ ശരീരത്തിന്റെ സ്വാഭാവികമായ 24 മണിക്കൂർ ജൈവഘടികാരമാണ് സർക്കാഡിയൻ റിഥം. ഇത് ഉറക്കത്തെ മാത്രമല്ല നിയന്ത്രിക്കുന്നത്. ശരീരത്തിലെ ഹോർമോൺ ഉത്പാദനം, ദഹനം, ശരീരതാപനില, വിശപ്പ്, നമ്മൾ കഴിക്കുന്ന ഭക്ഷണം ശരീരം എങ്ങനെ പ്രയോജനപ്പെടുത്തുന്നു എന്ന പ്രക്രിയ എന്നിവയെയെല്ലാം ഈ ആന്തരിക ഘടികാരം സ്വാധീനിക്കുന്നുണ്ട്. കരൾ, കുടൽ, മസ്തിഷ്കം എന്നിവയെല്ലാം പ്രവർത്തിക്കുന്നത് ഈ ഘടികാരത്തിന്റെ താളത്തിലാണ്.

നമ്മുടെ ജൈവഘടികാരത്തെ തെറ്റിക്കുന്നത് എന്തൊക്കെയാണ്?

ദൈനംദിന ജീവിതത്തിലെ ചില അശ്രദ്ധകളാണ് പ്രധാനമായും നമ്മുടെ ശരീരത്തിന്റെ താളം തെറ്റിക്കുന്നത്. അവ എന്തൊക്കെയാണെന്ന് അറിയാം.

  1. രാവിലെയുള്ള പ്രകൃതിദത്തമായ സൂര്യപ്രകാശം ഏൽക്കാതിരിക്കുന്നത്.
  2. അർദ്ധരാത്രിയിൽ അത്താഴം കഴിക്കുന്നത്.
  3. ഉറക്കം വരാൻ വേണ്ടി മെലാടോണിൻ ഗുളികകളെ ആശ്രയിക്കുന്നത്.

ശരീരത്തിന്റെ ജൈവഘടികാരം വീണ്ടെടുക്കാൻ ചെയ്യേണ്ട കാര്യങ്ങൾ

ശരീരത്തിന്റെ സ്വാഭാവിക താളം വീണ്ടെടുക്കാനും മികച്ച ആരോഗ്യം നിലനിർത്താനും താഴെ പറയുന്ന ശീലങ്ങൾ പിന്തുടരാം.

കൃത്യമായ ഉറക്കസമയം- പ്രവൃത്തിദിവസങ്ങളിലും അല്ലാത്ത ദിവസവും ഒരേ സമയത്ത് തന്നെ ഉണരാൻ ശ്രമിക്കുക.

  1. രാവിലെയുള്ള സൂര്യപ്രകാശം- ഉറക്കമുണർന്ന് ആദ്യത്തെ ഒരു മണിക്കൂറിനുള്ളിൽ തന്നെ കുറച്ചു സമയം വെയിൽ കൊള്ളുക.
  2. ഭക്ഷണസമയം ക്രമീകരിക്കുക- എല്ലാ ദിവസവും ഏകദേശം ഒരേ സമയത്തുതന്നെ പ്രഭാതഭക്ഷണവും ഉച്ചഭക്ഷണവും അത്താഴവും കഴിക്കാൻ ശ്രദ്ധിക്കുക.
  3. രാത്രിയിലെ വെളിച്ചം കുറയ്ക്കുക- ഉറങ്ങാൻ കിടക്കുന്നതിന് മുൻപായി മുറിയിലെ പ്രകാശതീവ്രത കുറയ്ക്കുക
  4. ഫോൺ മാറ്റിവെക്കുക- ഉറങ്ങാൻ പോകുന്നതിന് കുറഞ്ഞത് ഒരു മണിക്കൂർ മുൻപെങ്കിലും മൊബൈൽ ഫോൺ, ലാപ്ടോപ്പ് തുടങ്ങിയവ ഉപയോഗിക്കുന്നത് പൂർണ്ണമായും ഒഴിവാക്കുക.

ഇക്കാര്യങ്ങൾ കൃത്യമായി ശീലമാക്കുന്നതിലൂടെ നിങ്ങളുടെ ശരീരം സ്വാഭാവിക താളത്തിലേക്ക് മടങ്ങിയെത്തുകയും ദഹനക്കേട്, ഉറക്കമില്ലായ്മ പോലുള്ള സാധാരണ ആരോഗ്യപ്രശ്നങ്ങൾ തനിയെ മാറാൻ തുടങ്ങുകയും ചെയ്യും.

അയയിൽ ഉണക്കാനിട്ട സ്ത്രീകളുടെ അടിവസ്ത്രങ്ങൾ രാത്രി കാണാതാകും, രാവിലെ തിരികെ എത്തും, പിന്നിലെ വിചിത്ര സംഭവം മറനീക്കിയത് സിസിടിവി

ബെംഗളൂരു: ബെംഗളൂരുവിൽ നടന്ന ഒരു വിചിത്ര മോഷണത്തിന്റെ കഥയാണ് ഇപ്പോൾ ചർച്ചയാകുന്നത്. സ്ത്രീകളുടെ അടിവസ്ത്രങ്ങൾ മോഷ്ടിക്കുകയും രാത്രി മുഴുവൻ ധരിച്ച ശേഷം പിറ്റേന്ന് രാവിലെ അതേ സ്ഥലത്ത് തിരികെ കൊണ്ടിടുകയും ചെയ്യുന്ന ഒരാളാണ് ഒടുവിൽ ക്യാമറയിൽ കുടുങ്ങിയത്.

Also Read: മോഷ്ടിച്ച ബൈക്കുമായി നാട്ടിലേക്ക് മടങ്ങുന്നതിനിടെ യുവാവ് തൃശൂരിൽ അപകടത്തിൽപ്പെട്ടു

ഒരു ഒളിക്യാമറ സ്ഥാപിച്ചതോടെയാണ് ഈ വിചിത്ര കള്ളന്റെ ചെയ്തികൾ പുറത്തുവന്നത്. തുടർച്ചയായി അടിവസ്ത്രങ്ങൾ മോഷണം പോകുന്നത് ശ്രദ്ധയിൽപ്പെട്ടതോടെയാണ് താമസക്കാർ ഈ നീക്കത്തിന് മുതിർന്നത്. ഇതോടെയാണ് മോഷണത്തിന്റെ പിന്നിലെ വിചിത്രമായ രീതി വ്യക്തമായത്. സംഭവം പൊലീസിനെയും നാട്ടുകാരെയും ഒരുപോലെ അമ്പരപ്പിച്ചിരിക്കുകയാണ്.

കുടുക്കിയത് ഒളിക്യാമറ

സ്ഥിരമായി അയയിൽ വിരിക്കുന്ന അടിവസ്ത്രങ്ങൾ കാണാതാവുന്നത് പതിവായതോടെയാണ് വീട്ടുകാർക്ക് സംശയം തോന്നിയത്. എന്നാൽ, പിറ്റേദിവസം രാവിലെ ഇവയെല്ലാം അതേ സ്ഥാനത്ത് തിരികെ കാണുന്നതും അവരെ കുഴപ്പിച്ചു. ഈ ദുരൂഹത നീക്കാനാണ് ഇവർ ഒരു സിസിടിവി ക്യാമറ സ്ഥാപിക്കാൻ തീരുമാനിച്ചത്. ക്യാമറയിലെ ദൃശ്യങ്ങൾ എല്ലാവരെയും ഞെട്ടിക്കുന്നതായിരുന്നു. രാത്രിയിൽ വീട്ടിലെത്തുന്ന ഒരാൾ അയയിൽ കിടക്കുന്ന അടിവസ്ത്രങ്ങൾ എടുക്കുന്നു. പിറ്റേന്ന് രാവിലെ അതേയാൾ വന്ന് അവ തിരികെ വയ്ക്കുന്നതും ദൃശ്യങ്ങളിൽ വ്യക്തമായി പതിഞ്ഞിരുന്നു. ഇതോടെയാണ് മാസങ്ങളായി തുടരുന്ന ഈ വിചിത്ര മോഷണത്തിന് പിന്നിലെ രഹസ്യം പുറത്തുവന്നത്.

മോഷണത്തിന്റെ വിചിത്ര രീതി

പിടിയിലായ ആൾ സ്ഥിരമായി ഇങ്ങനെ ചെയ്തിരുന്നതായാണ് വിവരം. രാത്രിയിൽ മോഷ്ടിക്കുന്ന അടിവസ്ത്രങ്ങൾ ഇയാൾ ധരിക്കുകയും പിറ്റേന്ന് രാവിലെ ആരും കാണാതെ തിരികെ കൊണ്ടിടുകയുമായിരുന്നു രീതി. മോഷണം പോയെന്ന് പരാതിപ്പെടാൻ പോലും കഴിയാത്ത സാഹചര്യമായിരുന്നു വീട്ടുകാർക്ക്. ഒടുവിൽ സിസിടിവി ദൃശ്യങ്ങൾ തെളിവായി ലഭിച്ചതോടെയാണ് ഈ പ്രശ്നത്തിന് ഒരു പരിഹാരമായത്. അടിവസ്ത്രങ്ങൾ മോഷ്ടിച്ച് ധരിച്ച് തിരികെ വയ്ക്കുന്ന ഈ രീതി എന്തിനാണെന്ന കാര്യത്തിൽ വ്യക്തതയില്ല. എന്തായാലും, സിസിടിവി ദൃശ്യങ്ങൾ കേസ് തെളിയിക്കുന്നതിൽ നിർണായകമായി.

1...391392393...1,522Page 392 of 1,522