കഴിഞ്ഞ ദിവസം നടന്ന റഷ്യന്‍ ആക്രമണത്തില്‍ അഖില്‍ ജോയന്‍ (26) കൊല്ലപ്പെട്ടത് വിവാഹത്തിനായുള്ള ഒരുക്കങ്ങള്‍ നടക്കവെ. കാസര്‍കോട് സ്വദേശിയും എംവി ഗോള്‍ഡന്‍ ലിയോ എന്ന ചരക്കുകപ്പലിലെ നാവികനുമായിരുന്നു കൊല്ലപ്പെട്ട അഖിന്‍ ജോയന്‍. മൂന്നുമാസം മുന്‍പായിരുന്നു അഖിലിന്റെ വിവാഹ നിശ്ചയം. ആലപ്പുഴ സ്വദേശിനിയായ യുവതിയുമായാണ് അഖിലിന്റെ വിവാഹം നിശ്ചയിച്ചിരുന്നത്. വിവാഹനിശ്ചയം കഴിഞ്ഞ്, ഒരു മാസം മുന്‍പാണ് അഖില്‍ തിരികെ ജോലിയില്‍ പ്രവേശിച്ചത്.

19-ാം വയസ്സില്‍ മര്‍ച്ചന്റ് നേവിയില്‍ പ്രവേശിച്ച അഖില്‍, ഇലക്ട്രിക്കല്‍ ഷോപ്പ് ജീവനക്കാരനായ ജോയന്റെയും ഇന്‍ഷുറന്‍സ് ഏജന്റായ സാലിയുടെയും ഏക മകനാണ്. വിവാഹത്തിന് രണ്ട് മാസം അവശേഷിക്കെയാണ് അഖിലിന്റെ വിയോ?ഗ വാര്‍ത്ത എത്തുന്നത്. യുക്രൈനില്‍ നിന്ന് ചോളം കയറ്റി ഗിനി-ബിസാവു പതാകയേന്തി പുറപ്പെട്ട കപ്പലിന് നേരെ ഒഡേസ തുറമുഖത്ത് വെച്ചാണ് റഷ്യന്‍ സേനയുടെ ആക്രമണമുണ്ടായത്. അഖിലിന് പുറമേ മറ്റ് മൂന്ന് ഇന്ത്യക്കാരും അഞ്ച് സിറിയന്‍ സ്വദേശികളും അടക്കം 10 ജീവനക്കാര്‍ കൊല്ലപ്പെട്ടിരുന്നു.

കഴിഞ്ഞ ആറ് വര്‍ഷമായി ഈ കപ്പലില്‍ ജോലി ചെയ്തുവരികയായിരുന്ന അഖില്‍. ഉടന്‍ തന്നെ മറ്റൊരു സ്ഥാപനത്തിലേക്ക് ജോലി മാറാനുള്ള തയ്യാറെടുപ്പിനിടെയായിരുന്നു അപ്രതീക്ഷിത ആക്രമണമുണ്ടായത്. അഖിലിന്റെ മൃതദേഹം എത്രയും വേഗം നാട്ടിലെത്തിക്കാന്‍ നടപടി വേണമെന്ന് പിതാവ് അഭ്യര്‍ത്ഥിച്ചു. നാട്ടുകാര്‍ക്ക് ഏറെ പ്രിയങ്കരനായിരുന്നു അഖില്‍.

കൊച്ചി: റോഡപകടം ഉണ്ടാക്കി വാഹനം നിർത്താതെ കടന്നുകളയുന്ന ഹിറ്റ് ആൻഡ് റൺ കേസുകൾ ഫലപ്രദമായി അന്വേഷിക്കാൻ ജില്ലതോറും പ്രത്യേക പൊലീസ് സ്ക്വാഡ് രൂപീകരിക്കണമെന്ന് ഹൈക്കോടതി ഉത്തരവിട്ടു. ജില്ലാ പൊലീസ് മേധാവിയുടെ നേരിട്ടുള്ള മേൽനോട്ടത്തിലായിരിക്കണം സ്ക്വാഡിന്റെ പ്രവർത്തനമെന്നും കോടതി നിർദേശിച്ചു.

അപകടമുണ്ടാക്കിയ വാഹനങ്ങളെ കണ്ടെത്താനാകാത്തതിനാൽ ഇരകൾക്ക് ഇൻഷുറൻസ് നഷ്ടപരിഹാരം ഉൾപ്പെടെയുള്ള ആനുകൂല്യങ്ങൾ നഷ്ടപ്പെടുന്ന സാഹചര്യത്തിലാണ് ജസ്റ്റിസ് ജി. ഗിരീഷ് നിർണായക ഉത്തരവ് പുറപ്പെടുവിച്ചത്. ഹിറ്റ് ആൻഡ് റൺ അപകടങ്ങളെ സംബന്ധിച്ച മൂന്ന് ഹർജികൾ പരിഗണിച്ച ശേഷമാണ് കോടതി നിർദേശം നൽകിയത്.

ജില്ലകളിലെ പ്രത്യേക സ്ക്വാഡുകൾ പരസ്പര ഏകോപനത്തോടെ പ്രവർത്തിക്കണമെന്നും ഇത്തരം കേസുകൾ സ്ക്വാഡിന്റെ ശ്രദ്ധയിൽപ്പെടുത്താൻ സംസ്ഥാന പൊലീസ് മേധാവി നിർദേശം നൽകണമെന്നും കോടതി വ്യക്തമാക്കി. അന്വേഷണത്തിന് സൈബർ പൊലീസിന്റെ സഹായം ഉറപ്പാക്കണമെന്നും പൊതുജനങ്ങൾക്ക് പരാതികൾ അറിയിക്കാൻ പ്രത്യേക ഫോൺ നമ്പറുകൾ ലഭ്യമാക്കണമെന്നും നിർദേശിച്ചു.

ഹിറ്റ് ആൻഡ് റൺ അപകടങ്ങളിൽ ഇരകൾക്ക് മതിയായ നഷ്ടപരിഹാരം ഉറപ്പാക്കാൻ നിയമഭേദഗതി പരിഗണിക്കണമെന്ന് കേന്ദ്രസർക്കാരിനോടും കോടതി ആവശ്യപ്പെട്ടു. നിലവിലെ ഹിറ്റ് ആൻഡ് റൺ മോട്ടോർ ആക്‌സിഡന്റ് സ്‌കീം-2021 പ്രകാരമുള്ള നഷ്ടപരിഹാര തുക അപര്യാപ്തമാണെന്നും ഓസ്ട്രിയ, ഇംഗ്ലണ്ട് തുടങ്ങിയ രാജ്യങ്ങളിലെ മാതൃകയിൽ പ്രത്യേക ഫണ്ട് രൂപീകരിച്ച് നഷ്ടപരിഹാരം നൽകുന്നതും പരിഗണിക്കാമെന്നും കോടതി അഭിപ്രായപ്പെട്ടു. ഇതിനുള്ള തുക പിഴയിനത്തിലോ ഇൻഷുറൻസ് പ്രീമിയത്തിലെ വിഹിതത്തിലോ നിന്ന് കണ്ടെത്താമെന്നും ചൂണ്ടിക്കാട്ടി.

തുടർനടപടികൾക്കായി കേന്ദ്ര കാബിനറ്റ് സെക്രട്ടറിക്കും സംസ്ഥാന ചീഫ് സെക്രട്ടറിക്കും സംസ്ഥാന പൊലീസ് മേധാവിക്കും വിധിപ്പകർപ്പ് അയയ്ക്കാനും കോടതി നിർദേശിച്ചു. കൊച്ചി കടവന്ത്രയിൽ സ്കൂട്ടർ യാത്രക്കാരിയെ ഇടിച്ചിട്ട് കടന്നുകളഞ്ഞ കേസും നെടുമ്പാശേരിയിൽ ബാങ്ക് ഉദ്യോഗസ്ഥനെ കാർ ഇടിച്ച കേസും ക്രൈംബ്രാഞ്ച് അന്വേഷിക്കാനും കോടതി ഉത്തരവിട്ടു.

പത്തനംതിട്ട: റാന്നിയിൽ മൂന്ന് വയസ്സുകാരി ഷോക്കേറ്റ് മരിച്ചു. വയലത്തല സ്വദേശികളായ ബിനോയ്–സാന്ദ്ര ദമ്പതികളുടെ മകൾ അവന്തികയാണ് മരിച്ചത്. സാന്ദ്രയുടെ കുടുംബവീട്ടിൽവെച്ചാണ് ദാരുണ സംഭവം ഉണ്ടായത്.

അമ്മ കുളിക്കാൻ പോയ സമയത്ത് മുറിക്കുള്ളിൽ കളിച്ചുകൊണ്ടിരുന്ന അവന്തികയ്ക്കാണ് വൈദ്യുതാഘാതമേറ്റത്. കുളി കഴിഞ്ഞ് മടങ്ങിയെത്തിയ സാന്ദ്ര കുട്ടി അബോധാവസ്ഥയിൽ നിലത്ത് കിടക്കുന്നതുകണ്ട് ഓടിയെത്തി തൊട്ടപ്പോൾ അമ്മയ്ക്കും വൈദ്യുതാഘാതമേറ്റു.

തുടർന്ന് നാട്ടുകാരുടെ സഹായത്തോടെ കുട്ടിയെ റാന്നി താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

അപകടത്തിന് കാരണമായ സാഹചര്യം ഇതുവരെ വ്യക്തമായിട്ടില്ല. വീട്ടിനുള്ളിൽ എവിടെ നിന്നാണ് വൈദ്യുതാഘാതമേറ്റതെന്ന് കണ്ടെത്താൻ റാന്നി പൊലീസ് സ്ഥലത്തെത്തി അന്വേഷണം ആരംഭിച്ചു