പത്തനംതിട്ട: റാന്നിയിൽ മൂന്ന് വയസ്സുകാരി ഷോക്കേറ്റ് മരിച്ചു. വയലത്തല സ്വദേശികളായ ബിനോയ്–സാന്ദ്ര ദമ്പതികളുടെ മകൾ അവന്തികയാണ് മരിച്ചത്. സാന്ദ്രയുടെ കുടുംബവീട്ടിൽവെച്ചാണ് ദാരുണ സംഭവം ഉണ്ടായത്.
അമ്മ കുളിക്കാൻ പോയ സമയത്ത് മുറിക്കുള്ളിൽ കളിച്ചുകൊണ്ടിരുന്ന അവന്തികയ്ക്കാണ് വൈദ്യുതാഘാതമേറ്റത്. കുളി കഴിഞ്ഞ് മടങ്ങിയെത്തിയ സാന്ദ്ര കുട്ടി അബോധാവസ്ഥയിൽ നിലത്ത് കിടക്കുന്നതുകണ്ട് ഓടിയെത്തി തൊട്ടപ്പോൾ അമ്മയ്ക്കും വൈദ്യുതാഘാതമേറ്റു.
തുടർന്ന് നാട്ടുകാരുടെ സഹായത്തോടെ കുട്ടിയെ റാന്നി താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
അപകടത്തിന് കാരണമായ സാഹചര്യം ഇതുവരെ വ്യക്തമായിട്ടില്ല. വീട്ടിനുള്ളിൽ എവിടെ നിന്നാണ് വൈദ്യുതാഘാതമേറ്റതെന്ന് കണ്ടെത്താൻ റാന്നി പൊലീസ് സ്ഥലത്തെത്തി അന്വേഷണം ആരംഭിച്ചു