ന്യൂഡല്ഹി: തന്റെ 26 ദിവസം നീണ്ടുനിന്ന നിരാഹാര സമരം അവസാനിപ്പിക്കാന് ലോക്സഭാ പ്രതിപക്ഷ നേതാവ് രാഹുല് ഗാന്ധിയുടെ പിന്തുണ തേടിയെങ്കിലും അനുകൂല പ്രതികരണം ലഭിച്ചില്ലെന്ന വെളിപ്പെടുത്തലുമായി പ്രമുഖ പരിസ്ഥിതി പ്രവര്ത്തകന് സോനം വാങ്ചുക്. രാഹുല് ഗാന്ധിയുടെ കൈകളില് നിന്ന് നാരങ്ങാവെള്ളം കുടിച്ച് സമരം അവസാനിപ്പിക്കാനായിരുന്നു താനും ഭാര്യ ഗീതാഞ്ജലി ആങ്മോയും ആഗ്രഹിച്ചിരുന്നതെന്നും എന്നാല് കോണ്ഗ്രസ് നേതൃത്വത്തില് നിന്ന് നല്ലൊരു പ്രതികരണം ഉണ്ടായില്ലെന്നും വാങ്ചുക് തുറന്നടിച്ചു.രാഹുല് ഗാന്ധിക്കെതിരെ പിന്നീട് വിമര്ശനം ഉന്നയിച്ച ഭാര്യ ഗീതാഞ്ജലിയെ പിന്തുണച്ചുകൊണ്ടാണ് വാങ്ചുക് ഈ കാര്യങ്ങള് വ്യക്തമാക്കിയത്.
‘എന്റെ സമരം രാഹുല് ഗാന്ധിയെക്കൊണ്ട് അവസാനിപ്പിക്കാനാണ് ഗീതാഞ്ജലി ആത്മാര്ത്ഥമായി ശ്രമിച്ചത്. അവര് രാഹുലിന് എതിരായിരുന്നില്ല. എന്നാല് പ്രതികരണം നിരാശാജനകമായിരുന്നു. തുടര്ന്നാണ് അവര് പരസ്യമായി രംഗത്തുവന്നത്,’ വാങ്ചുക് പറഞ്ഞു.
തന്റെ സമരം അവസാനിപ്പിക്കുന്ന നിമിഷത്തില് ഭരണപക്ഷത്തെയും പ്രതിപക്ഷത്തെയും നേതാക്കളും വിദ്യാര്ത്ഥി പ്രതിനിധികളും ഒരുമിച്ചുണ്ടാകണമെന്നാണ് താന് ആഗ്രഹിച്ചിരുന്നതെന്ന് വാങ്ചുക് വ്യക്തമാക്കി. എന്നാല് ജന്തര്മന്തറില് നടന്ന സമരത്തില് പ്രതിപക്ഷ നേതാക്കള് വളരെ വൈകിയാണ് എത്തിയത്. അര്ദ്ധരാത്രിയോടെ കേന്ദ്രമന്ത്രിമാര് എത്തിയപ്പോള്, താന് സമരം അവസാനിപ്പിക്കുന്ന വാര്ത്ത ഔദ്യോഗികമായി പ്രഖ്യാപിച്ചതിന് ശേഷം മാത്രമേ എല്ലാ പാര്ട്ടി നേതാക്കളുമായുള്ള ചിത്രങ്ങള് പുറത്തുവിടാവൂ എന്ന് താന് നിര്ദ്ദേശിച്ചിരുന്നു. ഇന്റലിജന്സ് ബ്യൂറോയിലെ മുതിര്ന്ന ഉദ്യോഗസ്ഥരുടെ സാന്നിധ്യത്തിലായിരുന്നു ഈ ധാരണയെന്നും അദ്ദേഹം കൂട്ടിച്ചേര്ത്തു.
പ്രധാനമന്ത്രിയുടെ വസതിക്ക് മുന്നില് പ്രകടനം നടത്താനുള്ള രാഹുല് ഗാന്ധിയുടെ തീരുമാനത്തെ ചോദ്യം ചെയ്തതോടെയാണ് ഗീതാഞ്ജലിക്കെതിരെ സോഷ്യല് മീഡിയയില് സൈബര് ആക്രമണം ശക്തമായത്. ബിജെപിക്കും ഹിന്ദുത്വ ഗ്രൂപ്പുകള്ക്കും എതിരെ തങ്ങള് നാലോ അഞ്ചോ തവണ ഭാഷയില് വിമര്ശനം ഉന്നയിച്ചിട്ടുണ്ട്. എന്നാല് ബിജെപി പ്രൊഫൈലുകള് പ്രതികരിച്ചില്ല. അതേസമയം കോണ്ഗ്രസ് വ്യവസ്ഥിതി തന്നെയും ഭാര്യയെയും ക്രൂരമായി ട്രോളാന് തുടങ്ങി. കോണ്ഗ്രസ് നേതൃത്വത്തിന്റെ സങ്കുചിതമായ സമീപനത്തില് വലിയ നിരാശയുണ്ടെന്ന് വാങ്ചുക് വ്യക്തമാക്കി. ഒരു ജനകീയ സമരത്തോട് കൂടുതല് വിശാലമായ കാഴ്ചപ്പാടോടെ പ്രതിപക്ഷം നിലപാട് സ്വീകരിക്കണമായിരുന്നുവെന്നും അദ്ദേഹം കൂട്ടിച്ചേര്ത്തു.
